Gơs oă dơ̆ rài kis do gơ kư hwài bol he tom kơrwal ò tŭ lơi ơm rlô. Broă lơh, hiu nhă, gơnoar broă, ală bơta rơndap òhềt geh lơh, ală bơta kòñ tìp mat pơnjat …. Ngai sơrlèt ngai, bol he ntoàt ò ơm rlô. Mơ bulah behơ̆ digùl ò git nđò jơnau nggồr-nggàc dunnia dê, gơs dô Bơtau gam hòi jà bol he mơ jơnau đơs lơbơn niam Kơnràñ dê. Mơ ya bol he neh ơm momọ̆ nàng kơno jơnau hòi jà hơ̆ hala ò?
Ngai do, ngai 14/08/2025, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Carolyn Fraiser dê bơh tơnggume KƠNO

“Belàt añ jê kơno jơnau đơs añ, añ git gơ mơ gơ jat añ” (Jang 10:27)

Tom pah tơngai neh rlau, tom nùs añ kư gơs sùm jơnau Yàng lơbơn niam chồl: “Kơnọ tĕ”. Bơh sơnròp, añ kơlôi lah Kơnràñ lah pơrhơng añ. Ngan nam lài giga ngan, giga rlau mơ be òs. Añ lơh broă tơm công ty ndang, gơs pơnah bal mơ ală broă tom Hiu Jum Goh ndang, gen tus di bơta pran kơldang bau klau añ jê, mơ gam ò git nđò gơnoar broă ndai… añ gơlơh ò gam tai dô ềt tŭ jơ ìs mơ Yàng. Digơlan añ neh ò kơno Kơnràñ oă kung be añ pal cang lơh.

Mơ ya nam do, jơnau “kơnọ” sùm ò bơdơh gơs tom rài kis añ- dô bă lơbơn niam ngan. Nisơna añ đal git hơ̆ ò di la jơnau lah pơrhơng, mơ la jơnau tơngkah bîng kòñ gơboh: wèt tĕ nùs hơ Yàng mơ kơno jơnau Kơnràñ gam đơs tŭ do.
Jơnau Yàng tơngkah kờp nă bol he tom Jang 5:25:

“Di ngan, di ngan, añ đơs mơ bol mê, jơ rơp tus mơ tŭ do neh tus rau, dơ̆ ală cau chơt rơp kơno jơnau đơs Kòn Yàng Tom Trồ dê, mơ ală cau kơno hơ̆ rơp kis.”

Ò di mìng dòn dòp Yàng gen la tơl rau, mơ ya kờp ngai bol he pal kư pơnjat kơnọ jơnau Kơnràñ. Kơnọ la dô pơnah ò rgơi siău dô rài kis bîng-liu tom Kơnràñ- kờp ngai, kờp cơnđoà lòt. La kòn sau Yàng, bol he pal cang bơtê mbe đal git sap đơs lơbơn niam hơ̆, tom tŭ Kơnràñ lơbơn niam hòi jà bol he tus rềp Kơnràñ rlau. Añ đal git loh nùs nhơm rac ròc David dê gan ală jơnau ồng cih tom Đơs Crih 95:7: “Bơh Kơnràñ la Yàng Tom Trồ bol he dê; bol he la làng bol ơm tom ƀlàng ñhơt Kơnràñ dê, mơ la belàt tom tê Kơnràñ dê.”

Oh mi pal cang bơta pơndòm pơniang sơl? Kơnọ tĕ. “Yàng Jêhôwa ơm rềp mơ jơh ală cau hòi dan di Kơnràñ.” (Đơs crih 145:18)

Oh mi kơp gơn bơta tề lam hala ò? Kơnọ tĕ. “Tồr bol mê rơp kơnọ gơs sap đơs đah ngkòi bọ̀l mê lah: “Dọ la gùng, lòt tĕ tom hơ̆.” (Esai 30:21)

Oh mi ò git mbe pal đơs nàng tomtoh. Kơnọ tĕ. “Dê jơ hơ̆ Yàng Hwềng Goh rơp bơto bol mê jơnau bol mê pal đơs.” (Luka 12:12)

Bol he neh wàs goh nùs nhơm nàng dòp rò jơnau đơs Yàng dê hala ò? Bol he neh ơn tŭ jơ nàng kòñ kơnọ Kơnràñ hala ò? Nàng rgơi lơh bơta hơ̆, bol he pal cang rơndap ală bơta giga he dê, mơ wèt nùs hơ Yàng, đềt mêr ngan, nàng rgơi kơno geh sap đơs lơbơn niam Kơnràñ dê (I Ală Cau Bơtau 19:12).

Yàng gam gơn bol he tus mơ Kơnràñ tom ală tŭ lơmpah ngềt-ngơt rlau jơh rài kis dê. Tom tŭ hơ̆, bol he dòp geh bơta rĭng-lơngai, bơta tề lăm, bơta jak chai mơ ò git nđò bơta pal cang tom gùng lòt hơđap. Tŭ do, añ gam bơtê mbe git sền dờng mang ală tŭ ngềt-ngơt hơ̆, kung be ală tŭ jơ dờng mang bal mơ Yàng. Añ kơp gơn Kơnràñ rơp tus mơ lơbơn niam đơs mơ nùs nhơm añ, kung be jơnau Kơnràñ neh ho.

Kơp kòñ lah bol he rơp dô nùs bal driau dờng mơ dĭ gơna Yàng Đơs Crih: “Lòi ăñ in kơno jơnau Jehôwa Yàng Tom Trồ rơp đơs, bơh Kơnràñ rơp đơs jơnau lơngap-lơngai mơ làng bol Kơnràñ dê, Mơ cau sàng-goh Kơnràñ dê, băl mơ cau gơs nùs rê wơl mơ Kơnràñ.” (Đơs crih 85:8)

Dan jà bol he dô nùs bal tòm bơta hòi dan: Khoai Yàng kòñ gơboh, tom dô lơgar bîng nggồr-nggàc mơ ală bơta gơ lòt mhar ngan, dan tơngkah kòn git bơdơh wơl mơ ơm momọ̆ nàng kơno sap đơs lơbơn niam Kơnràñ dê. Dan dong kòn đal git sap đơs Kơnràñ dê, kờp tŭ kòn pal cang bơta pơndòm pơniang, tom tŭ gam dơrcùl, tom tŭ ò git pal cơnđoà pơnjat mbe lơi. Dan bơto kòn git kơno Kơnràñ mơ jơh nùs nhơm lơbơn niam mơ bồ dơngoh pò-ơnang. Kờp ngai, kòn dan rê wơl mơ Yàng, nàng kơno sap đơs Kơnràñ dê mơ cơnđoà jat nùs kòñ Kơnràñ ai kòn in. Kòn jơh nùs hòi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, oă dơ̆ bol he pơnđơl pràn duh broă Yàng, lơh oă ngan broă Kơnràñ in, pơndơl pràn kis dô rài kis song-ring- mơ ya bol he hŭi ơn nùs he nàng kơno jơnau Kơnràñ đơs. Behơ̆ gen mbe bol he rgơi đal git mơ lơh jat nùs kòñ Kơnràñ dê hơđang rài kis he dê taih? Ngan behơ̆, kơno la dô pơnah dờng mang mơ bol he pal bơtê tom rài kis. Tài bơh mìng tom tŭ kơno sap đơs Yàng dê, song bol he rgơi sàc rwah tomtoh gùng mơ Kơnràñ hòi sàc bol he lòt.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.