Rài kis bol he di sùm ntềt pơnjal mơ ò dơh tòm gơl. Gơs ală tŭ jơh ală bơta gơlơh be gam di gèn nisơna gơ sơlơ̆u wơl. Dô jơnau iơh, dô bơta gơlòng nisơna gơlik tùs, mơ bol he dal git lah: he ò rgơi ntao kơ̆ mìng kơnòm ală bơta gơklŏ dah bơdih, mơ la kơnòm mơnàng kơ̆ cề hwềng sòan dê. Ală mơnàng hơ̆ ò di gơs is,. Mơnàng hơ̆ păl geh gŭl kòp ngai, mơ broă kis mơ lơh jat Jơnau Yàng- Bơtau gơs gơnoăr prăp gàr bol he ntao kơ̆ digùl càl rbùt rai kis.

Ngai do, ngai 15/08/2025, tơnggu Hoi Dan Kòp Ngai dan jà ông mo oh mi kolồi sơnờng bal jơnau Yàng kơnòm bơta dong kol Dr. Paul J. Palma bơh tơnggu me NTAO KƠ̆ DIGÙL CÀL RBÙT.

“Cau hơ̆ ndrơm be cau ne bơt hiu, tò jrô, bơt mơnàng hơđăng lŭ klềr; tòm tŭ dà tih ngờr, gơhòr jroh tùs di hiu hơ̆, kùg ò geh wañ lơnggơh, bơh neh bơt bơtào kơ̆ cê.” (Luka 6: 48)

Cau lơi lơh broă gah lơh hiu kùng git: pơnah dờng mang rlau jơh dô nơm broă bơt bơtao hiu dê ò dê la pơnah rgơi sền gŏ, mơ la ơm tòm mơnàng gơ dê. Đơs bơh bơta siău tis tòm mơnàng, nền cề păl đơs tùs Tháp nghiêng Pisa ơm tòm Itali. Bulah tiah do sùm la tiah ơnih cau lòt kơnhơl tiang pơnrơ tòm gah Châu Âu, mơya tòm ală klơng bơtê bơt hiu, gơ òs geh đớs tùs be la dô nơm rùp cơng tàng broă “bơt bơtao tis”. Tơnggu tòm lơh gơlăng hơ̆ in sơrkềng ò be òs la bơh gơ neh gehbơt bơtao hơđang mơnàng ù tiah lơbờñ, bơcah bal mơ ù kơnàng, bràs mơ ngkàp krang. Dilah ò konom bơta chai rgơi bơtao tơngguh ponniam wol, gen digơlan theng kơ̆ cê neh tơrlah rau.

Yàng Jesu kùng neh bơtô bol he bơh mơnàng kơ̆ cê bơta dòn dê. Mơnàng hơ̆ ò gơ ơm tòm ală bơta bol he kơno hala đơs, mơ la ală bơta bol he lơh. Tòm Luka 6: 46, Kơnràñ đơs nền loh lang lah mìng hoi sơnđăn Kơnràñ là “Yàng” gèn ò hêt tơl:
“Ñchi bơh tai bol mê hoi sơnđăn añ Yàng, Yàng, mơ ò lơh jăt jơnau añ sôr taih?”
Dilah ală broă bol he dê lơh ò pơn đang tòm toh ală bơta bol he dòn mơ dòp rò, gèn khơñ hala băt kùng gơs tŭ bol he rơp gơpừ- hơđơm bơta kơñjơ̆ tồi glài dê, bol glăr, mơ ală bơta gơlòng tòm rài kis. Yàng Jêsu neh pơnyơu ală cau kơno mơ kis lơh jăt jơnau Kơnràñ “be cau ne bơt hiu, tò jrô, bơt mơnàng hơđăng lŭ klềr. Tòm tŭ dà tih, ngơr, gơ hòr jroh tùs di hiu hơ̆, kùng ò geh wañ lơnggơh, bơh neh bơt bơtao kơ̆ cê.” (Luka 6: 48)

Pơrlơ̆ wơl, Yàng lah pơrhơng bơh ală cau mìng kơno mơ ò lơh jăt:

“Mơya cau lơi iat jơnau añ mơ ò lơh jat, gèn pơndrơm mơ cau ne bơt hiu hơđang tiah ò gơs mơnàng; dà hor jroh tùs di hiu hơ̆, gen tơr lah mo, bơta roh rui la dơng ngăn.” (Luka6: 49)

Cau bơt he in dô nơm mơnàng kơ̆ cê la cau ò di mìng iat mơ lơi ting hơ̆, ò di mìng đơs bơkah lơngồt gời mơ ò kis jat jơnau Yàng bơto. Tŭ càl rbùt nisơna tùs, cau hơ̆ gam rgơi ntao kơ̆. Añ đăl git lah, tòm tŭ kơ̆ nùs hôi dăn, kơlồi sơnờng jơnau Yàng mơ kis tòm mpôl cơnum ală cau dô nùs jê gloh tơhìr joi jat Bơtau Krist, añ rgơi khin cha tòm tip mơ ală cal rbùt dờng rài kis do di.

Ñcau tòm bol he kùng rơp tìp bơta bol glar mơ bơta gơlòng. Yàng Jêsu ò hềt tŭ lơi pih cùr rài kis cau dòn Krist di- Kơnràñ ò hềt đơs lah gùng lòt jat Kơnràñ tŭ lơi kùng ƀuôn, lơngăp lơngai! Rơp gơs tŭ bol he pal tom tip mơ bơta moat jrùng dờng jrô, ală bơta roh gơn kơnòm sràt bơtăng, mơ ală bơta roh lơm gơlơh be dờng ngăn ò git nđờ. Dilah kờñ ntao kơ̆ tom rbùt dơng hơ, bol he pal bơt bơtao dô nơm mơnàng kơ̆ cề. Pal pơnđơl pràn kòp ngai nàng tòmgơl gùng dà kis, tồ dipăl mơ Jơnau Bơta Kis mơ bol he neh kơno. Ming gơs behơ̆ , bol he rgơi bơt bơtao mơnàng kơ̆ cê hơđăng Jơnau Yàng, mơ nền cề càl rbùt dơng rlau jơh kùng ò rgơi trùh lơnggơh mơnàng hơ̆.

Dan jà bol he dô nùs bal tòm bơta hòi dan:

Khoai Yàng kờñ gơboh, kòn ưn ngai Kơnràñ bơh Jơnau Kơnràñ bềng lều gơn kơnòm, bơh bơta kis bềng tơl, mơ gơs gonap gơnoăr bềng tơl Lơgăr Trồ dê. Dan toh glài kòn in bơh gơs ală tŭ kòn mìng kơno mơ đơs, mơya ò kis mơ lơh lòt tom toh jat ală bơta Kơnràñ bơtô sồr. Ngai do, dăn bơtô kòn săng lơi gùng dà kis bără bàrai, mìng kơno mơ lơh tơl. Dan ơn tòm kòn nùs jê gloh tơhìr nàng ngăn dòn bơr Kơnràñ, tồ kon in rgơi pràn ntao kơ̆ lòt găn jơh ală bơta gơlòng tòm gùng rài kis. Kòn jơh nùs hôi dan tòm sơnđăn Yàng Jesu Krist, Amen.

Ơ ală ồng mo oh mi, ồng mò oh mi mơ añ ò gơs cau lơi rgơi pleh ală ngai càl rbùt. Mơya bơta pha is gơ ơm tòm bol he rgơi ntao kơ̆ bulah càl rbùt dơng mbe lơi. Bơta hơ̆ gởìng tùs hơ mơnàng mơ bol he sac rwah nàng bơt hiu he tìng hơ̆. Dilah bol he sac kis mơ lơh jat Jơnau Yàng, gèn bulah miu tùh càl dờng, bol he kùng găm sùm gơs bơta rìng lơngai kơ̆ sùm. Dăn kòp nă bol he he sùm prăp gàr rài kis he di sơmbăt kơ̆ di Jơnau Kis Sùm Kơnràñ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.