Lub ntiajteb niaj hnub nim no yeej tseem tshuav ntau txoj kev mob siab, tej lub siab puas ntsoog nrog tej ntsujplig yuam kev. Vajtswv daim teb yeej tseem tab tom tos kom tau sau – muaj ntau tus neeg tab tom cheem tsum Vajtswv txoj kev hlub thiab qhov tseev los tshoov lawv lub siab. Vajtswv yog tus Tswv sau ntawm thaj teb, thiab Nws tab tom nqua hu kom peb los koom tes rau Nws tes haujlwm cawm dim. Nws nqua hu kom peb npaj lub siab los ua haujlwm, thiab zoo siab hlo nqes tes cia Vaj Ntsujplig ua tus coj.

Hnub no, yog hnub 16/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Tori Troncone dhau ntawm Zaj kawm LUB CAIJ SAU TAB TOM TOS

“Cov nplej uas zoo hlais lawm muaj ntau, tiamsis cov neeg uas hlais muaj tsawg. Nej cia li thov tus tswv teb kom nws txib dua ib co neeg mus pab hlais nws cov nplej.” (Lukas 10:2).

Thaum uas yus muaj ib lub tsev me me rau yus lawm, thawj yam yus xav ua yog cog ib vaj zaub. Kuv nyiam ua tej pluas mov los ntawm tej zaub uas yus nyiam thiab yus cog tau . Kuv xav txog qhov uas tau mus hauv vaj, de ob peb daim nplooj zaub thiab nqa los ua tej uas yus nyiam noj. Yooj yim tiamsis kuj zoo siab!
Kuv tseg sijhawm mus ncaws av, nce kab, xov vaj rau kom zoo, ua siab ntev tseb noob, ywg dej txhua hnub. Tsis ntev xwb, kuv vaj zaub cia li ntsuab xiab, tsw ha ntxiag. Tiamsis kuv tsuas noj tes zaub… ib zaug xwb. Tomqab poob lub sijhawm ntau thiab siv ntau lub zog los ua, kuv tsuas de ib zaug los ua ib pluas mov noj xwb. Tsimnyog kuv vaj zaub ntawd yuav tau de los ua zaub noj rau hauv peb tsev neeg txhua pluag mov, tiamsis kuv tsis rov qab los de ntxiv lawm, yog li thaum kawg nws tsuas yog ib vaj zaub – zoo saib tiamsis yeej tsis muaj nqis dabtsi.
Nyob hauv Lukas tshooj 10, Tswv Yexus txib cov thwjtim mus rau hauv txhua lub nroog thiab lub zos mus qhia Txojmoo Zoo, kho tej neeg muaj mob thiab qhia rau lawv paub tias Vajtswv lub tebchaws twb los ze lawm.

Tswv Yexus qhia lawv tias: “Yexus hais rau lawv hais tias, “Cov nplej uas zoo hlais lawm muaj ntau, tiamsis cov neeg uas hlais muaj tsawg. Nej cia li thov tus tswv teb kom nws txib dua ib co neeg mus pab hlais nws cov nplej.” (Lukas 10:2).
Paulus nqua hu Pawg Ntseeg Loos ib yam nkaus li ntawd:

“Tiamsis yog lawv tsis tau ntseeg, lawv yuav ua li cas thov nws? Thiab lawv yuav ua li cas ntseeg tus uas lawv tsis tau hnov dua? Yog tsis muaj neeg mus qhia txojmoo zoo rau lawv, lawv yuav ua li cas hnov? Yog tsis muaj leejtwg txib lawv mus, lawv yuav ua li cas mus qhia txojmoo zoo? Vajtswv txojlus hais tias, “Cov neeg uas mus qhia txojmoo zoo txhais kotaw zoo kawg li” (Loos 10:14-15).

Vajluskub qhia paub tias peb tab tom ua neej nyob rau hauv lub ntiajteb puastsuaj (Chivkeeb 3). Lub ntiajteb no puvnpo cov tib neeg muaj kev tu siab, muaj mob muaj nkeeg, nyob ib leeg, puas ntsoog thiab khoob lug. Tswv Yexus puv npo lub siab hlub tshua txog tib neeg ntiajteb, ntsia pom lawv “txomnyem thiab yuam kev zoo li tus menyuam yaj tsis muaj neeg saib” (Mathais 9:36). Txhua tus puav leej yuav saj tau txoj kev hloov pauv, thiab dhau los ua lub neej dawbhuv ntawm txoj kev sib raug zoo nrog Tswv Yexus. Tiamsis, yog tsis coj lawv los rau txoj kev cia siab hauv Txojmoo Zoo, ces lawv yuav yuam kev, tsis paub ua cas thiab tsis paub qhov twg yog qhov chaw pheeb rau yus tus ntsujplig.

Yog li, hnub no, peb yuav tau thooj siab ua ke, kom nras liaj tab tom siav ntawm peb xub ntiag yuav tsis raug muab tso tseg ib yam li kuv vaj zaub. Thov kom peb txhua tus lub siab tau chwv txog, kom ncaj ncees thov Vajtswv, thov Leej Txiv txib ntau tus mus rau ntawm Vajtswv daim teb uas loj – cov neeg uas zoo siab hlo tseb, thiab sau coj txoj kev cia siab rau ntau tus ntsujplig tab tom tos txoj kev cawmdim.

“Thaum nej porn tus neeg hla toj roob hauv pes xa xov zoo tuaj , mas nej zoo siab kawg li, nws tuaj qhia txojkev thajyeeb uas yog txojmoo zoo! Nws tshaj tawm txojkev cawm dim, nws hais rau cov neeg hauv lub nroog Yeluxalees hais tias, “Nej tus Vajtswv yog vajntxwv!” (Yaxayas 52:7).

Thov caw nrog kuv peb thov Vajtswv ua ke: Tus Vajtswv uas muaj kev hlub yog tus Tswv ntawm thaj teb, thov Koj npaj thiab txib kuv thiab ntau tus ntxiv nkag mus rau hauv thaj teb mus qhia txoj kev hlub thiab qhov tseeb rau lub ntiajteb uas ntxhov nyho. Thov Vajtswv qhib kuv lub qhov muag kom ntsia pom cov neeg uas cheem tsum paub Koj ib ncig kuv. Thov pub kom kuv muaj lub siab hlub tshua ib yam li Koj hlub cov ntsujplig yuam kev. Thov tshoov kuv lub siab kom kuv teb koj lub suab hu. Thov pub kom kuv muaj lub siab tawv thiab lub zog loj koom mus sau los rau Koj ib cim qoob zoo. Kuv thov hauv Tswv Yexus Khetos lub npe. Amees.

Cov kwv tij txhua tus, koj puas pom thaj teb tab tom siav daj rhuv ntawm xub ntiag cheem tsum cov tib neeg mus sau zoo li peb?

Thov kom peb tsis yog tsuas nres saib xwb, tiamsis yuav tau muaj lub siab tawv nkag los rau hauv thaj teb, nrog tus Tswv “sau” cov ntsujplig muaj nqis uas tab tom tos tau txais kev cawmdim. Vajtswv tsis cheem tsum cov neeg zoo, tsuas yog peb txaus siab hlo nqes tes ua xwb. Thaum peb txhais ruam mus, Vajtswv yuav qhia, yuav nrog nraim, thiab Vajtswv yuav ua Vajtswv feem haujlwm uas peb ua tsis tau. Hnub no, thov kom peb txhua tus yuav teb lub suab hu ntawd ib yam li tus cev lus Yaxayas thaum ub: “Muaj kuv nyob ntawm no, thov Vajtswv txib kuv!”

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.