Thaum nyeem Vajluskub, peb yooj yim pom ib qhov tseeb yog: thaum ib tug neeg twg lossis ib haiv neeg twg hwm Vajtswv, ces koob hmoov yuav ntws los. Yog tsis mloog lus, thiab xaiv txoj kev ywj siab thiab tawm tsam ces yuav txais tau txoj kev puastsuaj xwb. Niaj hnub nim no, nyob rau hauv lub ntiajteb muaj kev hloov pauv, txhua tus ntseeg tau Vajtswv hu kom dhau los ua ib qhov pov thawj ciaj sia rau Vajtswv. Yog li peb yuav ua lub neej zoo li cas kom yus thiaj tau koob hmoov, thiab yus haiv neeg tib si thiaj tau koob hmoov?

Hnub no, yog hnub 18/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Brooke Alsop Boland dhau ntawm Zaj kawm NCAJ NCEES RAU VAJTSWV

“Koj nqa ntaj, nqa hmuv thiab xubvos tuaj tua kuv, tiamsis kuv tuav tus Tswv uas muaj hwjchim loj kawg nkaus uas yog cov tubrog Yixalayees tus Vajtswv uas koj saib tsis tau lub npe tuaj tua koj” (I Xamuyees 17:45).

Ib lub tebchaws tau txhim kho los ntawm cov tib neeg muaj zog thiab hwm Vajtswv ces yog lub tebchaws tau koob hmoov. Thaum paub ua lub neej hwm Vajtswv, xyaum lawv cov neeg hwm Vajtswv thiab txhais ruam mus nrog txoj kev ntseeg, ces peb yuav sau tau tej paj txiv zoo. Vajntxwv Daviv yog ib qhov piv txwv rau tej no. Yawg muaj lub siab tag nrho pub rau Vajtswv. Yawg muaj zog tiamsis kuj txo hwjchim. Yawg qhib siab rau Vajtswv lub suab. Yog ib tug yug yaj, Daviv zov rawv nws pab yaj ntuj teb tag hmo tom tshav zaub, zoo siab hlo cawm tus tsiaj twg uas ntsib teeb meem. Nyob rau tej lub sijhawm uas cheem tsum nthuav tawm lub siab tawv, yawg tsis tso tseg. Thaum yawg ntsib Nkauli-am, Daviv yeej tsis ntshai tiamsis paub vam khom rau ntawm Vajtswv thiab ntseeg tias yus yuav yeej. Txawm yog Nkauli-am ua saib tsis taus nws los, Daviv yeej muaj lub siab tawv hais tias:

“Koj nqa ntaj, nqa hmuv thiab xubvos tuaj tua kuv, tiamsis kuv tuav tus Tswv uas muaj hwjchim loj kawg nkaus uas yog cov tubrog Yixalayees tus Vajtswv uas koj saib tsis tau lub npe tuaj tua koj” (I Xamuyees 17:45).

Ib yam li Daviv, Vajtswv kuj tab tom nrhiav tus neeg muaj lub siab tawv thiab ncaj ncees ntawm peb, yog Vajtswv cov tub rog. Peb tsis yog tsuas paub thov Vajtswv pab xwb, tiamsis tseem yuav ntsib yeeb ncuab los ntawm lub siab tawv, los ntawm Vajtswv lo lus muaj hwjchim, thiab los ntawm tej cuab yeej dawbhuv uas Vajtswv pub rau peb.

Txawm yog Daviv tsis yog ib tug neeg loj, muaj zog thiab nto npe nyob hauv cov neeg tiam ntawd los yam uas nqus tau tib neeg lub siab tsis yog nyob ntawm yawg tus yamntxwv, tiamsis nyob hauv yawg lub siab txo hwjchim, muaj lub siab mos muag thiab ua siab ntev. Daviv tshua txog lwm tus ntau dua li nws tus kheej. Nws kuj tsis txaj muag lossis txhawj txog lwm tus yuav xav li cas rau yus thaum yawg nthuav tawm yus txoj kev hlub rau Vajtswv dhau los ntawm lo lus qhuas thiab pehawm Vajtswv, txawm yog lwm tus yuav ua saib tsis taus yawg. Kev pehawm tas siab no ua rau Vajtswv zoo siab. Thiab niaj hnub no, Vajtswv yeej tseem nrhiav cov neeg muaj lub siab tag nrho rau Vajtswv zoo li ntawd.

Tiamsis, ib lub tebchaws yuav pob puas thaum tus thawj coj tus cwjpwm pob puas. Ib qhov piv txwv yog vajntxwv Yelenpau-as, yog ib tug vajntxwv phem. Yawg tau tsim txom cov ntseeg txog qhov uas lawv tawm tsam thiab tsis kam ua haujlwm rau yawg. Tus vajntxwv no ua saib tsis taus Vajtswv, nws tsim muaj tej mlom tseg rau cov pej xeem pehawm. Thaum kawg cov neeg Yixalayees thiaj yuav tau tiv kev txomnyem. Txog rau Yehau-ahas tiam, yawg tus tub Yehu los ua vajntxwv, cov pejxeem lub neej sab ntsujplig thiab kev ua zoo yeej tsis muaj kev hloov pauv. Yehau-ahas yeej ua tej yam phem ntawm Vajtswv xub ntiag. Yawg ua raws li yawg txiv tus qauv Yelunpau-as ua neeg phem pemlom zoo li poj koob yawm koob. Tiamsis yam uas ua rau Vajtswv yeej tseem nthuav tawm Vajtswv lub siab hlub tshua thiab ua tib zoo mloog tus vajntxwv phem ntawd lo lus taij thov, thiaj txib ib tug neeg los cawm cov neeg Yixalayees dim ntawm yeebncuab txhais tes! Tiamsis yam uas txaus nyuaj siab yog thaum lub tebchaws muaj kev ywj pheej lawm, pauv qhov uas lees txim, ces lawv yeej ua raws li lawv lub neej qub.

“Ces Yehau-ahas thiaj thov tus Tswv, tus Tswv txaus siab thiab teb nws tej lus thov, vim tus Tswv pom hais tias tus vajntxwv uas kav lub tebchaws Xilias tau tsimtxom cov Yixalayees heev. Tus Tswv pub cov Yixalayees muaj ib tug thawjcoj los tso kom lawv dim ntawm cov Xilias, yog li ntawd cov Yixalayees thiaj tau rov mus nyob hauv lawv tej vajtse kaj siab lug ib yam li yav tas los. Tiamsis lawv tseem pheej ua tej kev txhaum uas Vajntxwv Yelaunpau-as tsevneeg coj cov Yixalayees mus ua tsis tso tseg li” (II Vajntxwv 13:4-6a).

Yam dabtsi ua rau cov pejxeem muaj lub siab tawv li ntawd? Yog lawv lub siab tawv li lub pob zeb, ntxeev siab thiab muabb hlob tau ua rau lawv dhau los ua cov neeg phem, dag ntxias. Zoo tshaj thaum uas peb ntseeg Vajtswv tiag tiag, ntseeg tias Vajtswv paub txoj kev uas peb taug, coj peb thiab pub yam uas peb cheem tsum rau peb. Tej ntawd txawm tsis yog Vajtswv txojlus nyob hauv Yakaunpaus 1:17 hais tias: “Ib puas tsav yam uas zoo thiab ib puas tsav yam koob hmoov uas zoo kawg nkaus yeej yog Vajtswv pub rau peb. Vajtswv yog tus uas tsim lub hnub, lub hli thiab tej hnubqub uas nyob saum nruab ntug. Lub hnub thiab lub hli yeej ua rau lub ntiajteb txawj kaj thiab txawj tsaus, tiamsis Vajtswv tsis zoo li ntawd, Vajtswv yeej zoo Vajtswv li qub.”

Yog li vim li cas peb ho mus nrhiav tej kev ntshaw hauv ntiajteb, thaum uas Vajtswv cog lus yuav foom koob hmoov nplua mias rau peb yog tias peb mus hauv Vajtswv txoj kev?

Daim duab cov vajntxwv nyob hauv Vajluskub yog ib qhov piv txwv rau qhov tseeb no. Dhau ntawm cov neeg hwm Vajtswv li Daviv, thiab cov neeg tawm tsam Vajtswv li Yelenpau-as lossis Yehau-ahas, peb pom tias: Hwm Vajtswv yog tus cag rau ib haiv neeg tau koob hmoov thiaj ruaj khov, tshuav tsis hwm Vajtswv thiab tawm tsam ces yuav ua rau puas tshuaj, txawm yog nyob hauv tus kheej lub neej lossis tag nrho ib haiv neeg.

Vajtswv tab tom nrhiav cov neeg uas ncaj ncees rau Vajtswv, pehawm Vajtswv tas nrho peb lub neej thiab kam ua lub neej txawv nyob rau hauv lub neej uas tsis ntseeg. Koj puas zoo siab hlo dhau los ua tus neeg li ntawd?

Thov caw nrog kuv peb thov Vajtswv ua ke: Tus Tswv! Ntau zaug kuv pheej nrhiav tej uas yog ntiajteb no hnov qab Koj thiaj yog tus pub txhua txoj koob hmoov zoo rau kuv. Thov Vajtswv zam txim thiab qhia kom kuv paub ua lub neej ncaj ncees rau Koj, kom kuv lub neej yuav ua lub raj hliv koob hmoov mus rau kuv haiv neeg. thov pub kom kuv muaj lub siab tawv ua lub neej hwm Vajtswv nyob rau hauv lub ntiajteb puv npo kev txhaum no. Kuv thov hauv Tswv Yexus Khetos lub npe. Amees.

Cov kwv tij txhua tus, koj puas tab tom nrhiav kev kaj siab thiab kev cia siab ruaj khov los ntawm Vajtswv los rau saum yus haiv neeg lossis yus lub neej? Koj puas tau thov Vajtswv rau tej thawj coj tebchaws thiab cia siab tias lawv yuav ntsia pom txoj kev hloov pauv hauv yus lub tebchaws lawm tau? Paub Vajtswv yog tus ua tau siab ntev, ncaj ncees thiab tseeb, peb yuav tau xaiv ua lub neej hwm Vajtswv thiab cog lus dhau los ua ib tug tub rog ncaj ncees. Nthuav tawm lub neej ntseeg tsis yog tsuas nyob hauv lub zej zos uas cov ntseeg nyob xwb, tiamsis nyob rau hauv cov tsis tau ntseeg tib si. Kuj yuav tau thov Vajtswv rau cov nom tswv, thov Vajtswv pub lawv kom muaj kev txawj ntse thiab ncaj ncees los coj lub tebchaws mus raws li Vajtswv txoj kev.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.