Yog Vajtswv rov qab los rau hnub no, koj puas ntseeg tias Vajtswv paub koj yog leej twg? Lossis koj lub siab yij fab yij fwj, vim twb tau ntev los lawm koj tsis tau nrog Vajtswv sib tham tiag, ntau zaug koj tseem tsis nco tias zaum kawg koj nthuav Vajluskub los nyeem yog thaum twg? Ntau zaug peb pheej xav tias yus tab tom nrog tus Tswv mus, tiamsis tseeb tiag peb tab tom ua neej nyob nrog tej kab lig kevcai… tiamsis ho tsis muaj tus Tswv tiag tiag! Ntau zaug peb xav tias yus paub zoo txog Vajtswv, tiamsis thaum Tswv Yexus los, peb ho tsis paub peb Leej Txiv siab zoo!

Hnub no, yog hnub 20/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm KOJ PUAS PAUB VAJTSWV TIAG TIAG?

“Cov neeg siab phem, cia li khiav mus, kuv tsis paub nej!” (Mathais 7:21-23).

Muaj ib zaug thaum kuv mus ua si tom kuv tus phooj ywg tsev, nws tig los rau ntawm kuv thiab tawb kuv ua si tias: “Kuv tsis muab pam rau koj qiv ov! Yog tias muaj pam mas koj yuav pw tsaug zog tsis nco qab saib zaj movies zoo lawm!” Kuv cia li tsa suab luag – vim yog tiag, nws nkag siab kuv zoo. Thaum twg zaum saib movies muaj daim pam sov so thiab ces ib yam li… kuv yuav pw tsaug zog! Muaj tej lub sijhawm kuv tseem npau suav hais dog dig txog lub ntsiab lus ntawm tej zaj movies. Kuv nyiam saib movies heev, tiamsis kom zaum twj ywm ib qhov chaw saib thaum pib txog thaum xaus tsis tsaug zog ces nyuaj dhau heev!

Hnov qab ib zaj movies xwb yeej tsis ua cas, yog xav pom ces mam rov qab saib dua xwb. Tiamsis yog hnov qab ib lub sijhawm zoo kom paub Tswv Yexus ces yog ib qhov xwm tseem ceeb. Vajluskub hais meej tias Tswv Yexus yuav rov qab los thiab peb yuav tau npaj kom txhij tos hnub ntawd (Mathais 25:1-13). Kuv tsis paub koj xav li cas, tiamsis ntawm kuv tus kheej kuv xav kom kuv npaj txhij rau hnub Tswv Yexus rov qab los.

Kom npaj rau hnub ntawd, peb yuav tau tseg sijhawm nrog Vajtswv nyob ua ke. Peb yuav tau kawm paub txog Vajtswv. Vajluskub yog “phau ntawv taw kev” pab kom peb paub txog Vajtswv, Tswv Yexus thiab Vaj Ntsujplig xwb. Tiamsis muaj ntau tus hauv peb ho hnov qab ob yam tseem ceeb kom paub Vajtswv tiag: ntawd yog lub sijhawm nyeem, kawm Vajtswv tejlus, thiab thov Vajtswv, nrog Vajtswv sib tham ua ke.

Yuav ua li cas kom koj thiaj paub ib tug tib neeg yog tias tsis muaj sijhawm nyob ntawm lawv ib sab ua ke? Kuj ib yam li ntawd, peb yuav tau nyob ze Tswv Yexus, kom thaum Tswv Yexus rov qab los, peb thiaj yuav paub tseeb Nws. Tiamsis yog peb pheej tsis khoom, tsis chwv txog Vajluskub, kuj tsis nrog Vajtswv sib tham dhau ntawm kev thov Vajtswv ces lub sijhawm ntawd. Yuav ua li cas peb thiaj paub tias yog Nws?

Tswv Yexus hais tias: “Yexus qhia rau lawv hais tias, “Nej yuav tsum ceevfaj, tsis txhob pub leejtwg dag ntxias tau nej yuam kev. Yuav muaj ntau leej tuav kuv lub npe hais rau nej hais tias, ‘Kuv yog nws!’ thiab lawv yuav dag ntxias ntau leej yuam kev. Thaum nej hnov suab ntaj suab riam nyob ze nej thiab hnov tej tebchaws nyob deb ua tsov ua rog, nej tsis txhob pooh siab, yeej yuav xub muaj tej ntawd, tiamsis tej ntawd tsis tau qhia hais tias twb txog lub sijhawm ntiajteb kawg lawm. Ib lub tebchaws yuav sawv tawmtsam ib lub tebchaws, thiab ib haivneeg yuav sawv tawmtsam ib haivneeg. Yuav muaj av qeeg txhua qhov thiab yuav muaj kev tshaib kev nqhis. Tej ntawd zoo ib yam li tus pojniam uas nyuam qhuav pib mob plab yuav yug menyuam.” (Malakaus 13:5-8).

Muaj ib qhov txawv loj heev txog qhov uas paub Tswv Yexus los ntawm lub hlwb thiab paub Tswv Yexus los ntawm lub siab tiag tiag. Mathais 7:21-23 sau:

“Tsis yog txhua tus uas hu kuv hais tias, ‘Tus Tswv! tus Tswv,’ ces yuav tau mus Ntuj Ceebtsheej. Tiamsis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb. Thaum txog hnub ntawd yuav muaj ntau leej hais rau kuv hais tias, ‘Tus Tswv! tus Tswv, peb twb tuav koj lub npe qhia Vajtswv Txojlus, peb tuav koj lub npe ntiab dab thiab ua ntau yam txujci tseemceeb!’ Thaum ntawd kuv yuav hais rau lawv hais tias, ‘Cov neeg siab phem, cia li khiav mus, kuv tsis paub nej!” (Mathais 7:21-23).

Paub Tswv Yexus tsis yog tsuas kawm kom nco tej yam uas hais txog Nws xwb. Ntawd yog ib txoj kev sib raug zoo ntawm tus kheej, txaus siab hlo cia Vajtswv muab koj zuaj kom dhau los ua tus neeg zoo haum Vajtswv siab. Ntawd yog thaum uas koj xaiv tso txoj kev sib raug zoo ua ke nrog Vajtswv tso ua ntej, thaum koj nrog Vajtswv sib tham dhau ntawm kev thov Vajtswv, thiab tseg sijhawm los mloog Vajtswv dhau ntawm Vajluskub txhua hnub.

Tag nrho peb txhua tus puav leej cheem tsum Tswv Yexus – tiamsis tsis txhob muab Tswv Yexus saib zoo li “ib daim ntawv mus ntuj ceebtsheej” xwb. Peb cheem tsum Vajtswv zoo li tus Cawm Seej thiab Tus Tswv hauv peb lub neej. Vajtswv xav kom peb muaj kev sib raug zoo ua ke nrog Vajtswv, nyob ze thiab zoo kawg nkaus. Vajtswv xav kom peb paub Vajtswv tob tob.

Yog ib tug ntseeg Vajtswv, peb yuav tau nres thiab cim civ nug tus kheej meej meej: “Txog hnub ntawd, thaum ntsib Vajtswv, koj xav mloog lo lus twg?

Yeej tsis muaj leej twg yuav pab teb rau koj. Lo lus teb nyob txij ntawm koj txoj kev xaiv hnub no – hauv txoj kev nrog Vajtswv sib raug zoo ua ke, hauv txoj kev nrhiav Vajtswv, thiab hauv koj tus kheej kev txiav txim siab – fij yus rau Vajtswv txhua hnub.

Thov caw nrog kuv peb thov Vajtswv ua ke: Tus Tswv, kuv xav kom paub Koj tob dua. Thov pab kom kuv saib ntsoov Koj thiab nrog koj mus ua ke txhua hnub. Thov pab kom kuv kawm paub koj dhau ntawm kev thov Vajtswv thiab hauv Koj tej lus. Kuv xav txhawb Koj nyob rau qhov chaw siab tshaj plaws hauv kuv lub neej. Thov pab kom kuv tso tau txhua yam uas ua rau kuv ua xyem xyav, thiab npaj lub siab rau hnub koj rov qab los. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv tab tom nrhiav cov neeg uas muaj lub siab nkag los rau hauv txoj kev sib raug zoo nrog Vajtswv ua ke. Txhob tos thaum txog “ib hnub twg” thiaj pib kawm paub Vajtswv. Hnub no kiag – tamsim no kiag – yog lub sijhawm rau koj tig rov qab los, pib nrog Vajtswv sib tham, qhib siab rau Vajtswv tej lus thiab caw Vajtswv los nyob hauv koj lub siab. Kom txog hnub Nws rov qab los, koj thiaj yuav tsis ntshai, tiamsis yuav zoo siab vim tau hnov lo lus “Kuv tus tub txib uas zoo thiab ncaj ncees, zoo heev!”

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.