Dilah Yàng rê wơl tòm ngai do, ngan he dờn nền ngan lah Kơnràn rơp dờp git he la cau lơi sơl ơ? Hala nùs he dê dơrcul, tài bơh neh jó tơngai he ờ tòm boh bơr mơ Yàng, hala he kung ờ kah dớ lồi dut he pờ Sră Goh la tú lơi sơl? Oă dớ he kứ kơlôi la he gam lòt jat Yàng, mơya ngan bol he mìng gam kis dê gùl đah poac să lơm … mơ ờ gơs Yàng ơm tòm rài kis bol he dê! Oă dớ bol he tồl lah he git loh làng bơh Yàng, mơya tú Yàng tus, gen bol he ờ đal git sătờm Bèp niam lơhơn he dê!

Ngai do, ngai 20/08/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ mò Jessica Teed bơh tơnggume NGAN LA HE GIT YÀNG SƠL Ờ Ơ?

“Ơ ală cau lơh bơta tồi glài iơh bơsak, Añ ò tŭ lơi git bol mê ò, lik lòt tĕ bơh di Añ.” (Mathiơ 7:23)

Dồ dớ ne tú an lòt kơnhơl hìu cau bơyô an dê, khai wèt sền hơ an mơ đơs nhó mơ an lah: “an ờ pà ai in ồi bic ya! Dilah ai mơ geh ồi bic la ai bic tơn mơ ờ rgơi sền fim mơ an ya!” an gơdan nhó dờng ngan – tài bơh khai đơs di ngan mơ khai git loh làng an ya. Kứ kờp tú an nggui sền fim mơ gơs ồi bic gen la an bic lơhă ngan! Gơs tú an bic mơ mpau đơs buba bơh fim an sền tơn. An gơboh ngan sền fim, mơya nàng nggui tus dê lồi fim mơ ờ gơdan bic la kalke ngan an in!

Dilah ờ sền dồ nơm fim kung ờ gơs nchi lơi, bơh he rgơi sền wơl. Mơya dilah sang lòi tú lơmpah nàng đal git Yàng Dong Klàs, gen do la broă dờng ngan. Sră Goh hơ nền cê ngan Yàng Jesus rơp rê wơl, mơ bol he pal rcang sir nàng wă rò ngai hớ tus (Mathiơ 25:1-13). An ờ rgơi git ồng mọ oh mi kơlôi bè lơi, mơya gơwèt mơ an, an kờn sătờm an pal rcang sir ngan nàng wă rò Yàng rê wơl.

Nàng rcang tus dê ngai hớ, bol he pal lòi oă tú jơ tơngai ơm is mơ Yàng. bol he pal bơtê git bơh Yàng. Sră Goh la tiah dong bol he jòi bàn sătờm Yàng Tòm Trồ, Yàng Jesus, mơ Yàng Hwềng Goh. mơya oă cau tòm bol he gen sang lòi bàr pơnah mơnàng do nàng đal git Yàng: hớ là lời tú jơ đòk, bơtê Jơnau Yàng, mơ hòi dan kòp ngai, tombohbơr mơ Yàng.

Mbè lơi bol he rgơi git loh làng dồ nă cau tú he ờ gơs tú jơ tơngai ơm mơ cau hớ taih? Kung bè hớ, bol he pal ơm rềp mơ Yàng Jesus, nàng tú Kơnràn rê wơl, bol he rgơi dờp git Kơnràn. Mơya dilah bol he sùp giga mơ oă broă, ờ tup bư Sră Goh, kung ờ tombohbơr mơ Yàng bơh bơta hòi dan, gen tú ngai Yàng rê wơl bè rgơi he đal git sătờm Kơnràn taih?

Yàng Jesus đơs lah: “Kơrhia tĕ, rngòt gơs cau pơrlồm bol mê tìs nrah mòn. Gơs oă cau rơp ai sơnđan Añ tus mơ đơs lah: ‘Añ la Bơtau Krist!’ Mơ rơp pơrlồm lơh oă cau in tìs nrah. Tòm tŭ bol mê kơno đơs bơh kơlìn mơ jơnau pơnro bơh kơlìn, gen bañ dơrcul. Ală bơta hơ̆ pal gơlik tus mơya hơ̆ òhềt la lồi dut ò. Bơh làng bol do rơp bơtào tòmsò mơ làng bol ne, lơgar do tòmlơh mơ lơgar ndai. Oă tiah rơp gơs lơnggơr ù mơ jơgloh rung. Ală bơta hơ̆ mìng la bồ dà bơta jê sồt bòl glar dê. (Mak 13:5-8)

Gơs dồ bơta krơi dờng ngan dê gùl broă he git Yàng mơ bồ tơngoh mơ broă git Yàng bơh jơh nùs nhơm he dê. Mathiơ 7:21-23 cih lah:

“Ò di kòp nă cau đơs mơ Añ lah: ‘Khoai Yàng, khoai Yàng,’ gen geh mut tòm lơgar đang trồ ò, mơya mìng cau lơi lơh jat nùs kòñ Bèp Añ jê ơm hơđang trồ. Tòm ngai hơ̆ rơp gơs oă cau đơs mơ Añ lah: ‘Khoai Yàng, khoai Yàng, bol hi ò di neh ai sơnđan Kơnràñ mơ đơs hwơr, ai sơnđan Kơnràñ mơ bơtrơh ală cà, ai sơnđan Kơnràñ mơ lơh oă broă gơnap gơnoar ò ơ?’ Tŭ hơ̆ Añ rơp yal loh bol khai in git lah: ‘Ơ ală cau lơh bơta tồi glài iơh bơsak, Añ ò tŭ lơi git bol mê ò, lik lòt tĕ bơh di Añ.”

Git Yàng Jesus ờ di mìng kah prap tòm nùs ală jơnau cih bơh Kơnràn lơm ờ. Mơya hớ la bơta tomklac sătờm is he dê mơ Yàng, lòi Yàng at bồ nùs nhơm mơ bơt bơtào bol he gơlik gơs cau niam nùs Kơnràn. Hớ la tú he ơn Yàng lài đap, tú he tombohbơr mơ Yàng bơh bơta hòi dan, mơ lòi oă jơ kơno iat jơnau đơs Yàng dê bơh Sră Goh kòp ngai.

Jơh tơl nă bol he pal càng gơs Yàng Dong Klàs Jesu tồ rgơi mut tòm lơgar hơđang trồ. Mơ bol he kung kờn Yàng là Bơtau Dong Klàs mơ Bơtau Dong Tă rài kis he dê sơl. Yàng Tòm Trồ kờn gơs bơta đềt mềr wil tơl mơ bol he. Kơnràn kờn bol he git Kơnràn jrô ndơp oă rlau tai.

La dồ nă cau lòt jat Yàng, bol he pal càng git sền wơl mơ lùp is să he dồ bă song ngan: tus dê ngai Yàng rê wơl, tú mat tom toh mat mơ Yàng, bol he kờn kơno iat jơnau lơi taih?

“Añ ò tŭ lơi git bol mê ò, lik lòt tĕ bơh di Añ.’” hala ‘Ơ cau dĭ lơbơn niam mơ dòn song ne, niam ngan!”

Ờ gơs cau lơi rgơi hơ wơl rlau mơ sătờm he dê. Sèng hơ wơl gơrê mơ bơta sac rwah bol he dê ngai do – tòm bơta tomklac mơ Yàng, tòm bơta jòi jat Yàng, mơ tòm bơta lơh nền bol he dê – nàng ơn să jăn rài kis he dê kòp ngai Yàng in.

Dan jà bol he dô nùs bal tòm bơta hòi dan: Khoai Yàng, kon kờn git Yàng dồ bă jrô ndơp oă rlau tai. Dan dong kòn sùm tơnggờr sền dê Yàng mơ cơnđoà lòt sùm mơ Yàng kờp ngai. Dan dong kòn bơtê git Yàng tòm bơta hòi dăn mơ bơh Jơnau Yàng dê. Kon kờn yò tơngguh Yàng dờng rlau jơh tòm rài kis kon dê. Dan dong kon sang sơrbì ală bơta ờ niam, mơ rcang sir nùs nhơm kon dê nàng wă rò ngai Yàng rê wơl. Kon jơh nùs hòi dăn, ai sơnđăn Yàng Jesus Krist, Amen.

Ơ ală ồng mọ oh mi kờn gơboh, Yàng sùm gam jòi jat ală nùs nhơm rcang sir nàng cơnđoà mut tòm bơta tomklac song ngan mơ Yàng. ban kơp gơn tus “dồ ngai ết jó tai” sùm sơntờm bơtê git bơh Yàng. ngai do – tú jơ do mơ – là tú jơ he rê wơl mơ Yàng, sơntòm tombohbơr mơ Yàng, pờ nùs nhơm he mơ Jơnau Yàng mơ wă rò Yàng mut tòm nùs nhơm he dê. Nàng tú ngai Yàng rê wơl, he ờ nrơt nrơl hala rngòt rngơt, mơya rơp chò hòp tài bơh rơp kơno jơnau: “Ơ cau dĭ lơbơn niam mơ dòn song ne, niam ngan!”

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.