Puas muaj zaum twg koj siv zog ua txhua yam ib leeg, thaum kawg koj pom tias yus tab tom qaug zog, tsis muaj zog thiab ua tsis tau? Koj paub tias yus cheem tsum kev pab, tiamsis vim koj lub siab txaj muag koj thiaj tsis qhib ncauj? Nyob hauv lub neej vam meej no, peb pheej zais peb txoj kev qaug zog. Tiamsis nyob tob tob puag hauv, leej twg los kuj paub tias yus muaj nrim, zoo tsis txaus, thiab tshaj txhua yam, peb cheem tsum tus Cawm Seej.

Hnub no, yog hnub 21/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Tori Troncone dhau ntawm Zaj kawm KOJ PUAS CHEEM TSUM TUS CAWM SEEJ?

“Vajtswv yog tus ncaj ncees, Vajtswv tsis suav neeg lub txim, thiab Vajtswv pab kom txhua tus uas ntseeg Yexus Khetos ua tau neeg ncaj ncees” (Loos 3:26).

Muaj ib hnub, kuv txiav txim siab cim civ hloov tus pas so nag ntawm lub tsheb loj. Ntawm no yog thawj zaug kuv ua qhov haujlwm no. Muab tus qub thau mus yooj yim li ua si. Tiamsis dhos tus tshiab rau ho yog ib yam txawv.

Thaum ntawd, muaj ib tus neeg zej zog pom kuv tab tom zaum saum taub hau tsheb, tabtomsiv zog dhos tus so nag tshiab rau kom yog.

“Koj puas cheem tsum kuv pab koj?” – nws nug kuv.

Kuv lo lus teb ces yog cheem tsum. Tiamsis raws li ib txwm, kuv teb: “Tsis ua cas, kuv ua tau. Ua koj tsaug os!”

Tseeb tiag, kuv paub kuv cheem tsum kev pab. Tiamsis vim kuv txoj kev khav theeb ua rau kuv tseem tsis tau npaj txhij los lees tias kuv tus kheej ua tsis tau.
Nyob hauv peb txoj kev ntseeg, kuv kuj muaj caij txaj muag thiab khiav deb Tswv Yexus ib yam li ntawd. Kuv ntseeg siab rau Nws, tiamsis tsis nkag siab tias vim li cas kuv ho tsis lees tias kuv cheem tsum Nws ua luaj.

Kuv paub zoo Vajtswv txojlus nyob hauv Loos 3:23 sau tias: “Rau qhov txhua tus puavleej ua txhaum thiab tu ncua Vajtswv lub tshwjchim lawm” tiamsis pauv qhov uas taij thov Vajtswv, thov Vajtswv cawm kuv dim ntawm tej kev txhaum, kuv ho siv zog cim civ nrhiav kev ua lub neej los ntawm kuv tus kheej lub zog. Ib zaug ntxiv, tus kheej txoj kev khav theeb ua rau kuv xav ua pov thawj tias: Kuv cim civ ua tau, kuv yuav coj tau ncajncees los ntawm kuv lub zog.

Thaum uas kuv tseem tab tom tsis paub ua li cas nrog tus pas so nag, ces ntuj pib los nag. Tus pas ntub dej lawm yog li thiaj nplua heev, kuv tuav tsis ruaj plam tes, ua rau hlais kuv ntiv tes. Tiag mas kuv twb tsis raug hlais tes li ntawd yog tias kuv kam cia tug neeg zej zog ntawd pab kuv.

Kuv lub siab tawv tau tav kuv ua rau kuv txais tsis tau Yexus Khetos txoj koob hmoov nplua mias uas tau muab pub rau kuv – thiab qhov ntawd kuj ua rau kuv yuav txais tau yam tsis zoo. Tom qab ntau xyoo siv zog, thaum kawg kuj pom tias: txawm yog yuav siv zog npaum twg los, kuv yeej yuav cawm tsis tau kuv dim ntawm tej kev txhaum.

Kuv cheem tsum kev pab. Kuv cheem tsum ib tug Cawm Seej.

Vajtswv txojlus sau tias:

“Vajtswv txojkev hlub uas nws muab pub dawb rau neeg yog nws txib Yexus Khetos los tuag txhiv neeg kom dim txim, Vajtswv thiaj suav hais tias neeg ncaj ncees tabmeeg Vajtswv. Vajtswv txib Yexus Khetos los tuag theej neeg lub txhoj thiab nws cov ntshav ntxuav neeg tej kev txhaum, Vajtswv thiaj zam tau neeg lub txhim, vim neeg ntseeg Yexus Khetos. Vajtswv ua li ntawd qhia hais tias Vajtswv yog tus ncaj ncees. Yav tas los Vajtswv ua siab ntev thiab tsis rau txim rau cov neeg uas ua txhaum. Qhov uas Vajtswv ua li no qhia hais tias Vajtswv yog tus ncaj ncees, Vajtswv tsis suav neeg lub txim, thiab Vajtswv pab kom txhua tus uas ntseeg Yexus Khetos ua tau neeg ncaj ncees” (Loos 3:24-26).

Tsis tas yuav tos kom txog ib lub caij twg tshwj xeeb, hnub no kiag – nyob rau lub sijhawm tsis muaj dabtsi no – kuj yog lub sijhawm ua rau kuv nco tias: Kuv yog ib tug neeg txhaum tag kev cia siab, thiab kuv cheem tsum ib tug Cawm Seej.

Thov kom peb lub siab yuav ua rau peb tsim dheev los, tau ntuas txhua hnub kom nco ntsoov tias: Yuav tau lees txim, yuav tau txo hwjchim, yuav tau lees tias peb yuav ua tsis tau lub neej zoo yog tsis muaj Tswv Yexus txoj kev cawmdim.

Ua Vajtswv tsaug vim kuv muaj ib tus Cawm Seej, yog tus twb ris lub txim hloov kuv qhov chaw uas kuv tsimnyog raug, thiab ris qhov nuj nqi uas kuv them tsis taus ib zaug. Tswv Yexus twb ua qhov no zoo kawg nkaus kuv tus kheej cim civ ua tsis tau.

Thov kom hnub no yuav yog ib txoj kev pib dua tshiab, kom peb pib ua neej nrog lub siab nco tshav ntuj thiab txo hwjchim vim txhua yam uas Vajtswv twb ua rau peb lawm.

“Tus Tswv, kuv nyob puag hauv qab qho, kuv quaj thov koj, Thiab thaum kuv thov kom koj mloog kuv tej Ius thov, koj yeej hnov. Koj teb kuv tej Ius thov thiab hais kom kuv tsis txhob ntshai. “Tus Tswv, koj twb tuaj tso kuv dim, thiab cawm tau kuv txojsia lawm” (Nkauj Quaj Ntsuag 3:55-58).

Thov caw nrog kuv peb thov Vajtswv ua ke: Kuv tus Vajtswv. Tus Tswv, kuv ua Koj tsaug vim Koj nkag siab kuv tej kev qaug zog, txawm yog thaum kuv siv zog zais kuv tus kheej rau ntawm lub plhaub ua txuj siv zog. Ua Vajtswv tsaug vim Koj ua siab ntev tos kuv, txawm yog muaj ntau zaug kuv tsis txais yuav Koj txoj kev pab. Hnub no kuv thov tso kuv txoj kev khav theeb lees tias kuv cheem tsum Koj. Kuv cheem tsum Koj txoj kev hlub, kev zam txim, thiab txoj kev hlub uas zoo siab hlo muab pub dawb rau kuv. Thov qhia kuv kom kuv muaj lub siab mos muag, paub lees xim, kom kuv nco txiaj ntsig txog Koj qhov khoom plig cawm dim uas tsis muaj nqi. Kuv thov hauv Tswv Yexus Khetos lub npe. Amees.

Cov kwv tij txhua tus, ntev loo los no koj puas siv zog tawm tsam txhua yam ib leeg? Tej zaug hnub no yog lub sijhawm uas koj yuav tau nres, saib tus kheej, thiab hais rau Vajtswv tias: “Kuv cim civ cawm tsis tau kuv tus kheej. Kuv cheem tsum Koj, Tus Tswv” Cia siab tias peb yuav nrog Vajtswv mus txhua hnub los ntawm lub siab mloog lus, txo hwjchim thiab nco tus uas tau tuag theej peb tshav ntuj. Nws yeej tseem tab tom tos, los ntawm nws txhais tes xyab dav tos peb. Koj puas npaj txhij los txais yuav txoj kev cawmdim ntawd?

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.