Lub neej no txhua hnub yeej tsis muaj sijhawm khoom nrog rau ntau yam haujlwm yuav tsum nco, yuav tau ua, yog li muaj ntau zaug peb tseem hnov qab yam uas tseem ceeb tshaj. Txawm yog twb muaj ntau zaug Vajtswv cawmdim thiab coj peb, pab peb los, tib neeg lub siab yooj yim hnov qab. Tsuas yog ib nyuag qhov teeb meem me me xwb, lossis muaj tsis txaus ib yam dabtsi xwb, tej kev txhawj ntawd rov qab sawv tsees, ua rau peb yij fab yij fwj. Tej zaug tsis yog vim peb tsis tau pom dua Vajtswv lub hwjchim, tiamsis yog vim tib neeg qaug zog yeej ib txwm yoj yees ntawm tej yam tsis ruaj tsis khov li ntawd. Tiamsis Vajtswv yeej nrog nraim, maj mam caw peb los so rau hauv Vajtswv txoj kev kaj siab nplua mias.

Hnub no, yog hnub 22/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Beth Patch dhau ntawm Zaj kawm NEJ TSEEM TSIS TAU NKAG SIAB LOS?

“Ua li cas nej sib tham hais txog qhov uas nej tsis ntim mov tuaj? Nej tseem tsis porn thiab tsis totaub los? Ua li cas nej yuav ruam ua luaj li?” (Malakaus 8:17).

Muaj tej tagkis sawv ntxov kuv pom tias “kuv txawj kawg” – tsuas mus tib zaug ncaj qha rau tom tsheb xwb tsis tas yuav rov qab los dua ib zaug ntxiv. Tiamsis hais tiag mas zaum twg kuv kuj yuav tau rov qab los tsev nqa xov tooj, nqa yaumsij, nqa tsom lossis ntau yam ntxiv uas kuv pheej hnov qab!

Tswv Yexus cov thwjtim kuj tau “hnovqab” ib yam tseem ceeb. Tiamsis lawv “hnov qab” nyob rau hauv ib lub caijnyoog txawv – phomsij dua ntau npaug. Nyob hauv Malakaus tshooj 8, thaum nrog Tswv Yexus hla nkoj mus tom hiav txwv mus, lawv hnov qab tsis nqa ncuav txaus.

Ua ntej ntawd tsis ntev, lawv twb pom Tswv Yexus ua txujci muab ncuav faib rau sawv daws. Tsuas yog xya lub ncuav thiab ob peb tug ntses me me xwb, Vajtswv tau tawm suab ua tsaug, muab ntais thiab cev rau cov thwjtim faib rau tsheej txhiab tus tib neeg noj tsau npo. Thaum kawg, lawv tseem sau tau ntau tawb puv nkaus.

Tiamsis… thaum uas lawv nce mus saum nkoj lawm, lawv pib sib cav, ib tug yws ib tug vim tsis nqa ncuav nrog. Tswv Yexus paub lawv tab tom hais dabtsi. Tswv Yexus nug:

“Ua li cas nej sib tham hais txog qhov uas nej tsis ntim mov tuaj? Nej tseem tsis porn thiab tsis totaub los? Ua li cas nej yuav ruam ua luaj li?” (Malakaus 8:17).

Yog kuv hnov qab khoom yeej tseem rov qab mus muab tau, tshuav cov thwjtim thaum no lawv twb mus txog ib nrab tom pas dej lawm, tsis muaj kev rau lawv rov qab. Kuv xam tau lub sijhawm uas lawv ib tug yws ib tug, tus twg los ntshai thiab txhawj. Tiamsis lawv hnov qab lub ntsiab lawm: Tswv Yexus tab tom nrog lawv nyob ua ke ntawd. Tus uas nyuam qhuav muab ncuav faib rau sawv daws noj tsis tas tab tom nrog lawv nyob ua ke saum lub nkoj. Lawv txawm tsis nco los? Puas yog lawv tsis ntseeg tias Tswv Yexus muaj cuab kav pab tau rau lawv ntxiv?

Tswv Yexus nug lawv: “Nej tseem tsis tau paub, tsis tau nkag siab los?”

Thiab kuv xav tias, Vajtswv kuj tab tom nug kuv tus kheej, nug koj, thiab nug tag nrho peb sawv daws li ntawd.

Kuv tau txhawj, tsis paub ua cas, txawm yog kuv lub siab yeej tseem ntseeg Vajtswv txoj kev ncaj ncees. Kuv paub Vajtswv npaj rau kuv, cawm kuv dim, thiab ua tej yam uas siab tshaj kuv txoj kev xav. Tiamsis txhua zaug uas kuv ntsib kev txomnyem, teeb meem, kuv… yeej tseem ntshai? Tej zaug, qhov teeb meem tsis yog tsuas nyob ntawm qhov uas kuv “hnov qab” Vajtswv lub hwjchim xwb, tiamsis tseem yog txoj kev ntshai ntawm tej yam uas tsis ruaj siab, ntawm tej kev puastsuaj, tej kev tu siab thiab mob siab.

Cov thwjtim tsis xav kom tshaib plab. Peb kuj tsis xav poob rau qhov uas muaj tsis txaus, muaj kev tu siab, lossis tsau tsawv rau lub qhov tob uas tsis muaj kev tawm. Tswv Yexus tsis tau cog lus tias yuav tshem txhua yam kev nyuaj mus. Tiamsis Nws cog lus ib yam tseem loj dua: Nws yuav pub kev kaj siab rau peb.

Tswv Yexus hais nyob hauv Yauhas 16:33 “Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm”

Txoj kev kaj siab tiag tsis yog los ntawm qhov uas peb nkag siab tag nrho txhua yam, tiamsis yog peb kawm txoj kev so hauv Vajtswv kev tswjhwm, txawm lub caijnyoog yuav zoo li cas. Vajtswv txoj kev kaj siab uas pub rau peb tsis zoo li tej kev kaj siab tsis ruaj hauv ntiajteb uas tab tom caw hu peb. Nws yog kev kaj siab tob tob, ruaj khov, tsis nyob ntawm qhov uas muaj txaus lossis tsis txaus, zoo lossis txomnyem. Txawm yog lub tawb ncuav hnub no yuav tsis muaj dabtsi los peb yeej sawv khov kho – vim Vajtswv yeej nrog nraim peb nyob. Thiab Vajtswv yog tus pub peb muaj nplua mias.

Thov caw nrog kuv peb thov Vajtswv ua ke: Leej Txiv uas muaj kev hlub, kuv thov muab kuv tej kev txhawj thiab ntshai hauv lub siab fij rau Koj. Thov pab kom kuv txhob cia kuv lub hlwb raug cab mus rau tej yam uas kuv muaj tsis txaus, tiamsis paub cia siab rau Koj yog tus pab kom kuv muaj nplua mias. Thov qhia rau kuv paub txhais ruam mus hauv Koj txoj kev kaj siab, txawm yog lub caijnyoog yuav zoo li cas. Kuv ntseeg tias Koj tab tom kav, thiab hnub no, kuv thov so hauv qhov tseeb ntawd. Kuv thov hauv Tswv Yexus Khetos lub npe. Amees.

Ib tsoom kwvtij nkaujmuam sawv daws, peb yeej tsis paub ua ntej txhua yam, thiab Vajtswv kuj tsis cog lus tias yuav tshem tej kev sim siab iab siab hauv peb lub neej mus. Tiamsis Vajtswv cog lus ib yam muaj nqis dua: yog Vajtswv txoj kev tshwm ntsej muag thiab kev kaj siab nplua mias hauv peb. Txawm yog hnub no koj tab tom nyob hauv tej kev sim siab, tej teeb meem los, thov txhob hnov qab tus uas ua txujci yeej tseem tab tom nrog koj nyob ua ke txhua lub sijhawm. Koj puas npaj txhij tso tej kev txhawj, xaiv so hauv Vajtswv txoj kev tshwm ntsej muag puv npo kev hlub?

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.