Peb txhua tus ib leeg nyias yeej muaj nyias ib zaj xwm txheej, ib txua kev zoo tsis sib thooj nrog tej kev mob siab, kev zoo siab,… thiab paub tias yeej muaj tej haujlwm loj uas Vajtswv ua. Tej zaug koj xav tias zaj xwm txheej txog yus lub neej yeej tsis muaj dabtsi txawv, thiab tsis muaj dabtsi yuav ua tim khawv. Tiamsis yog twb tau Vajtswv chwv txog, ces koj kuj tab tom tuav ib lo lus tim khawv muaj nqis uas lub ntiajteb no yuav tau hnov txog. Tej zaug nws yog koj zaj xwm txheej yog rab yaum sij qhib lub qhov rooj cia siab rau ib tug twg tab tom yuam kev.

Hnub no, yog hnub 25/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Adam Howard dhau ntawm Zaj kawm KUV TWB TAU.

“Tus txivneej ntawd txawm mus qhia thoob plaws hauv lub nroog Dekapaulis txog tej uas Yexus tau pab nws lawm rau sawvdaws mloog; txhua tus uas hnov nws qhia xav tsis thoob li” (Malakaus 5:20)

Ib leeg nyias muaj nyias ib zaj xwm nrog rau lub zog loj. Ntau zaug, thaum peb saib tej haujlwm uas Vajtswv tau ua nyob rau hauv peb lub neej tsis tseem ceeb, thiab hnov qab tias ntawd yog tus choj tuam tseg rau peb qhia Txojmoo Zoo rau txhua tus. Tej zaug koj yeej tsis tau ntsib dua Tswv Yexus tshwj xeeb li tus neeg raug dab nkag nyob hauv Txojmoo Zoo Malakaus, lossis ntsia pom Vajtswv lub tshwjchim ci ntsa iab ib yam li Paulus thaum tab tom taug kev tuaj mus rau Damaxes – tiamsis tej ntawd yeej tsis ua rau kom zaj xwm txheej txog koj lub neej muaj feem zoo tuaj.

Tsuas yog ib zaug koj hais rau Tswv Yexus tias: “Muaj kuv nyob ntawm no!” ces lub sijhawm ntawd, koj yuav tawm hauv qhov tsaus ntuj nkag los rau qhov pom kev- tawm ntawm txoj kev tuag los mus rau qhov tau txojsia. Mloog cuag li yooj yim, tiamsis nws ho yog yam uas zoo thiab suav tsis txheeb!

Rov qab los rau zaj xwm txheej nyob hauv Malakaus tshooj 5, peb pom muaj ib tug txiv neeg raug dab txog qhov uas nws tswj tsis tau nws tus kheej- tag nrho cheeb tsam ntawd puav leej paub yawg, txhua tus puav leej hnov txog tej kev mob siab thiab kev puas tshuaj uas yawg tau ua dhau los. Sim xav saib: nag hmo koj pom muaj ib tug neeg vwm, nws ua heev heev khiav los rau ntawm koj; hnub tom qab koj ho pom tus neeg ntawd txhais ruam mus kaj siab lug, tsis ua cas. Tej zaug qhov kev hloov pauv ntawv yuav ua rau muaj coob tug lawv tsis ntseeg rau tej uas yus lub qhov muag pom! Thiab tej zaug yog vim li ntawd yawg thiaj tig rov qab los, tham rau sawv daws mloog tej uas Vajtswv tau ua. Vim tsis muaj leej twg yuav tsis kam lees tej xwm txheej uas tab tom tshwm kiag ntawm lawv qhov muag.

“Tus txivneej ntawd txawm mus qhia thoob plaws hauv lub nroog Dekapaulis txog tej uas Yexus tau pab nws lawm rau sawvdaws mloog; txhua tus uas hnov nws qhia xav tsis thoob li” (Malakaus 5:20).

Tsuas cheem tsum peb lo lus xwb “kuv twb…” txaus qhib ib zaj xwm hais txog tej yam uas Vajtswv muaj cuab kav ua rau hauv peb txhua tus lub neej. Thiab yog Vajtswv twb ua tej ntawd rau koj lawm, ces ntseeg tias Vajtswv kuj yuav ua tej ntawd rau lwm tus thiab.

Tej zaug koj yeej muaj ib koj ib zaj xwm yuav tham – ib zaj xwm muaj txoj kev zoo txog Vajtswv txoj kev hlub thiab Vajtswv lub hwjchim. Tej zaug koj zaj xwm txheej nws yuav “tsis zoo” npaum li tej uas ntiajteb ntsuas, tiamsis txhua zaj xwm txheej puav leej muaj ib lub ntsiab lus loj muaj Txojmoo Zoo. Tej zaug koj tau ua neej nyob rau hauv txoj kev ntshai, thiab Vajtswv tau coj txoj kev kaj siab los rau koj.

Tej zaug koj tau tsau tsawv rau txoj kev nyob ib leeg, thiab thaum no, koj tab tom maj mam rov qab nrhiav tau txoj kev zoo siab. Txawm yuav yog dabtsi los, Vajtswv muaj puv npo lub hwjchim, thiab Vajtswv yuav siv koj lub neej los nthuav tawm Vajtswv lub hwjchim thiab Vajtswv txoj kev tshwm ntsej muag. Kom dhau ntawm koj, lwm tus kuj yuav nrhiav tau txoj kev ywj pheej uas lawv tab tom ntshaw.

Yog li, txawm yog koj zaj xwm yuav zoo li cas los, kav tsij muab tham! Ua siab tawv qhia, hais kom meej, kom tseeb, txog tej yam uas Tswv Yexus tau ua nyob rau hauv koj lub neej. Los ntawm Vajtswv lub hwjchim uas muaj cuab kav hloov pauv tib neeg, thiab tej uas Vajtswv tau ua tiav nyob rau hauv koj lub neej tsimnyog rau lwm tus tau hnov, thiab qhuas Vajtswv lub npe!

Thov caw nrog kuv peb thov Vajtswv ua ke: Tus Tswv, kuv ua Koj tsaug vim zaj xwm uas koj tab tom sau nyob rau hauv kuv lub neej. Thov pab kom kuv nco txog koj tej haujlwm uas koj tau ua nyob hauv kuv lub neej, txawm yog txujci yuav loj npaum twg lossis tej yam me me nyob hauv lub neej txhua hnub. Thov pab kom kuv muaj lub siab tawv tham txog kuv zaj xwm txheej, txhob pheej khaws cia rau kuv txog tej yam zoo uas koj twb tau ua tiav lawm. Thov kom kuv lub neej yuav dhau los ua qhov pom kev rau cov neeg tab tom mus hauv qhov tsaus ntuj, thiab kuv tej lus tim khawv yuav ua rau cov neeg uas qhib siab muaj kev cia siab tos. Kuv thov hauv Tswv Yexus Khetos lub npe. Amees.

Cov kwv tij txhua tus, hnub no koj puas npaj txhij tham koj zaj xwm txheej? Tsis tas yuav kom zoo, tsis tas yuav ntxiv koj tsuas ua tim khawv txog qhov tseeb xwb. Twb yog txoj kev uas koj ntsib Vajtswv thiab nrog Vajtswv mus tau rov qab muab tham ces yuav chwv txog cov neeg uas muaj lub siab puas ntsoog. Yuav tau muaj lub siab tawv qhia tej zaug koj zaj xwm txheej cuag li me me ho dhau los muaj txoj kev hloov pauv loj nyob hauv ib tug twg ntawd lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.