Tso qhov chaw uas yus tau siv zog txhim tsa tseg tsis yog ib yam uas yooj yim. Zam qhov chaw ntawd rau lwm tus thaum koj lub siab yeej tseem tshuav ntau yam ua tsis tau tiav, tej zaug yuav ua rau peb khuv xim heev. Tiamsis muaj tej lub sijhawm Vajtswv nqua hu kom peb txo hwjchim zam chaw, qhib kev rau tiam txuas ntxiv, pab lawv kom lawv mus tau deb dua vim tib lub homphiaj. Rau qhov Vajtswv lub tebchaws tau qhib kom dav thaum uas peb sawv daws npaj txhij txo hwjchim, txhawb tiam txuas ntxiv thiab nrog lawv mus ua ke hauv txoj kev ua Vajtswv haujlwm.

Hnub no, yog hnub 06/09/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gary E. Roberts dhau ntawm Zaj kawm KHO KEV RAU TIAM TXUAS NTXIV.

“Nws yuav muaj hwjchim loj zuj zus, tiamsis kuv lub hwjchim yuav yau zuj zus.” (Yauhas 3:30)

Kuv zaum ntawm rooj ua haujlwm, xav txog ob xyoo dhau los puv npo kev sim siab tiamsis kuj muaj ntau txoj koob hmoov, thaum kuv ris lub nra ua tus thawj coj nyob rau hauv ib lub tsev kawm ntawv nto npe. Kuv cim civ nug: yuav ua li cas thiaj xaus tau txoj kev no kom haum Vajtswv siab, thiab pab kom muaj nqis rau tsev kawm ntawv thiab tus yuav los ua txuas ntxiv? Hauv kuv lub siab yeej tseem tshuav ntau yam tsis paub ua cas, rau qhov tseeb tiag kuv yeej tseem xav ua txoj haujlwm no ntxiv. Tiamsis kuv paub tias kuv yuav tau muab txoj kev xav tu siab, tub qaug no “ntsia tseg” tsis cia tej kev xav no ua rau yus coj tus cwjpwm zoo li ib tug menyuam yaus npau taws sib txeeb khoom ua si los tsev.

Yog tus ntseeg Vajtswv, kuv siv zog ua neej yog raws li txoj kev ua haujlwm thaum yog ib tug thawjcoj. Kuv kawm tau txog Yauhas Npatitus tus qauv. Thaum pom yawg tes haujlwm yawg maj mam zam kev rau Tswv Yexus yawg yeej tsis nyuaj siab tsis nroo ib los. Tsis tas li xwb, yawg tseem nthuav tawm tus cwjpwm txo hwjchim: “Nws yuav muaj hwjchim loj zuj zus, tiamsis kuv lub hwjchim yuav yau zuj zus.” (Yauhas 3:30). Lo lus no ua rau kuv tsim dheev. Pauv qhov uas puag rawv txoj kev npau taws thiab tub qaug, kuv pom tias kuv yuav tau ua neej kom yog rau lub ntsiab lus uas kuv pheej cob qhia, ntawd yog muab yam muaj nqis rau sawv daws tso ua ntej thiab lub luag dejnum tsom tom ntej.

Tswv Yexus kuj tau ua qauv rau qhov haujlwm no. Thaum txib cov thwjtim tawm mus ua raws li tej lus samhwm, Tswv Yexus hais tias: “Kuv qhia tseeb rau nej hais tias tus uas ntseeg kuv yuav ua tej haujlwm uas kuv ua; tsis yog li ntawd xwb, nws tseem yuav ua tau ntau dua tej uas kuv ua, rau qhov kuv mus cuag Leej Txiv lawm” (Yauhas 14:12). Tswv Yexus kuj zoo siab thaum pom lwm tus ua Nws tes haujlwm txuas ntxiv, thiab tseem ua tau zoo dua. Tseeb tiag, yeej tsis muaj ib tug qauv twg txog txoj kev txo hwjchim loj npaum li ntawd!

Thaum pom txog qhov no, cuag li muaj ib nthwv cua tshiab tshuab tuaj rau hauv kuv lub siab, nrog lub homphiaj, lub ntsiab lus thiab txoj kev zoo siab ntawd: kuv nkag siab tias: yam tseem ceeb tshaj uas yus yuav ua tau rau lub sijhawm hloov pauv no yog tsis siv zog tuav yus lub meej mom cia, tiamsis yog npaj txhua yam kom zoo rau tus yuav los txais tes haujlwm txuas ntxiv kom tau zoo tshaj.

Kuv pib npaj homphiaj yuav muab cob rau lwm tus kom meej meej, daws tej teeb meem tseem ceeb txog nyiaj txiag, cov tuav nyiaj, tej nyiaj pab thiab cov neeg yuav ua, kom tus yuav los ua txuas ntxiv nws yuav tswj tau zoo, tsis yog mus daws tej teeb meem uas muab tso tseg. Tseem ceeb dua yog, kuv pib thov Vajtswv rau tus neeg yuav los ua thawj coj tshiab thiab tag nrho pab tuav haujlwm. Kuv siv zog txhawb kom muaj kev sib koom ntawm cov qhia thiab cov kawm nrog cov ua haujlwm; thiab kuv cia siab tias qhov ntawd yuav tau ua mus ntxiv, loj hlob kom muaj zog dua.

Nyob rau tej lub sijhawm sab laj lossis sib tham txhua hnub, kuv yeej nthuav tawm kuv txoj kev txhawb thiab tso siab rau tus tshiab uas yuav los ua. Kuv ntseeg tias lawv yuav coj lub tsev kawm ntawv no nce mus rau qhov chaw siab tshiab. Ib zaug ntxiv, kuv tau ntuas txog Tswv Yexus tus qauv uas zoo kawg nkaus. Ua ntej yuav rov qab mus saum ntuj, Tswv Yexus thov Vajtswv kom Leej txiv pub txoj kev koom ua ib lub siab rau cov neeg uas ntseeg Nws: “kom lawv koom ib lub siab. Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj; thov koj pab kom lawv ua tau ib lub siab, ntiajteb thiaj paub hais tias koj txib kuv los.” (Yauhas 17:21).

Ua Vajtswv tsaug vim kuv kuj xaiv coj raws li tus cwjpwm ntawd. Zoo kawg nkaus, kuv nkag los rau hauv ib txua kev tshiab ntawm kuv kev ua haujlwm, kaj siab dua, tso siab dua, thiab txaus siab rau txoj kev ua thawj coj ntawm tus neeg tshiab los ua. Tsis muaj lub nra nyhav, tsis raug ntau yam tsub rau nws, ua rau kuv lub siab puv npo kev zoo siab.

Nyob hauv lub neej, leej twg los kuj yuav ntsib dhau tej kev hloov pauv li ntawd: tej zaug nyob hauv tes haujlwm, hauv tsev neeg, lossis hauv Pawg Ntseeg. Thiab tej lub sijhawm zoo li ntawd, Vajtswv txojlus ntuas kom peb nco txog peb yam tseem ceeb. Ib, yuav tau ncaj ncees rau Vajtswv thiab lees txim tiag tiag hauv peb lub siab thaum uas muaj kev khib lossis kev iab siab. Ob, thov Vajtswv pub kom peb muaj lub siab txo hwjchim thiab muaj lub zog los ua tej haujlwm uas yus ua tau, pab rau tes haujlwm muab cob rau pab tshiab los ua tau zoo. Thaum kawg, txhob hnov qab thov Vajtswv tag siab rau tus tshiab yuav los ua, kom lawv muaj kev kajsiab, koom ua ib lub siab thiab tau Vajtswv txoj koob hmoov hauv tes haujlwm tshiab.

Thaum peb paub txo hwjchim nqes, Vajtswv yuav rub peb sawv!

Thov caw nrog kuv peb thov Vajtswv ua ke: Leej Txiv saum ntuj, thov qhia rau kuv paub ua lub neej txo hwjchim, zoo siab hlo zam rau kuv tej kwv tij viv ncaus los ua, kom Vajtswv lub npe tau txhawb nqa thiab koom tes sib txhawb hauv Yexus Khetos lub cev. Thov Vajtswv pab kom kuv paub saib taus lwm tus tseem ceeb dua yus, paub koom ris lub nra hauv txoj kev hlub, thiab tshua txog lwm tus kev cheem tsum tsis yog kuv tus kheej li. thov pab kom kuv ua lub neej haum Vajtswv siab dhau ntawm tej haujlwm me thiab tuav lub siab ncaj ncees zoo li ib tug tub qhe ncaj ncees hauv Vajtswv lub tebchaws. Kuv thov hauv Tswv Yexus Khetos lub npe. Amees.

Cov kwv tij txhua tus, zam kev rau lwm tus tsis tau txhais tias yog ua puas tshuaj. Ntawd yog ib tus cwjpwm txo hwjchim, hlub thiab ntseeg siab, muab yam uas zoo tshaj plaws yus tau tsim tseg los txhawb tus txuas ntxiv. Kom dhau ntawm peb txoj kev khwv, tiam txuas ntxiv yuav sawv khov kho thiab ua tau ntau yam dua rau Vajtswv lub tebchaws. Peb lub npe kuj yuav ploj mus, tiamsis tus cag uas peb ua yuav pab rau tiam txuas nxiv sawv khov kho rau ntawm tes haujlwm Vajtswv cob. Thiab tej qub txeeg qub teg uas peb tseg cia yeej tseem yuav nyob khov kho hauv Vajtswv lub tebchaws.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.