Tej kev sim siab hauv lub neej thiab tej teeb meem tshwm los tej zaug yuav ua rau koj ntog ua rau koj hnov txhawj, yuam kev nyob rau hauv lub ntiajteb no. Ntau zaug, koj yuav tau cim civ nug: “Kuv yog leej twg? Lub neej no muaj nqis li cas? Vim li cas kuv ho tseem muaj sia nyob?” Tiamsis koj puas paub? Koj yog tus muaj nqis tshaj plaws uas Vajtswv tsim los. Nws hlub koj ntau dua txhua yam uas koj yuav xav tsis tau.

Hnub no, yog hnub 15/09/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Diane Virginia dhau ntawm Zaj kawm LUB VOJ KEV HLUB.

“Vajtswv yog kev hlub” (I Yauhas 4:16)

Jenna txhos caug ntua ntawm txaj, quaj ncia ncia. Nws cev tes plhws cov plaub hauv, tsis muaj lub nplhaib sib yuav yim ua rau hnov poob txog txoj kev puas tshuaj. Lub nplhaib uas nws ib txwm coj ntawm nws ntiv tes yog lub cim ntawm txoj kev tso siab. Tiamsis tseeb tiag, Brian tsis hnov li ntawd. Yawg tau tso nws pojniam tseg thiab khiav caum ib “txoj kev hlub tshiab”.

Jenna raug muab tso cia, tsis paub nrhiav lo lus teb qhov twg. Tsis paub nws puas yuav ua dabtsi kom cheem tau yawg? Tsis, yawg lub qhov muag twb yuam kev thaum pib lawm. Jenna paub qhov ntawd, tiamsis nws xav tias muaj cuab kav hloov pauv nws tus txiv, ua rau kom yawg rov qab tig los rau ntawm nws dua ib zaug ntxiv. Thaum no, Jenna tsis paub tias nws yog leej twg lawm.

“Tswv Yexus” Jenna hais dhau ntawm nws ob daim dincauj tsheej na, “Kuv yog leej twg rau ntawm koj?”

Nws zawm ncauj ruaj ruaj, cia siab tias Vajtswv yuav saib taus nws, tiamsis ho ua xyem xyav tias txog yus tus kheej qhov muaj nqis. Tej kev ua xyem xyav ntawd khiav dhau ntawm nws lub hlwb. Nws paub tias nws tau tsis muaj lub siab tawv nyob hauv txoj kev sib raug zoo nrog Vajtswv, yog li yuav ua li cas Vajtswv thiaj yuav xav zoo txog nws thaum uas nws lub neej txij nkawm sib nrauj tas? Jenna tsis paub ua cas. Nws sawv tsees, qaug zog. Nws cev tes mus muab phau ntawv uas nws niam sau tseg rau nws los. Ntau xyoo dhau los, Jenna twb nyeem mus nyeem los tej tsab ntawv ntawd, thiab nrhiav tau kev txhawb zog hauv txoj kev xav, lub tswv yim, thiab tej kev txomnyem uas nws niam sau cia tib si. Nws qhib los thiab nyeem tej uas tau ntaus cim cia:

“Niam tus ntxhais Jenna uas niam hlub, hnub no niam thov Vajtswv rau koj. Hnub no yog thawj hnub uas koj mus tsev kawm ntawv. Niam khi plaub hau rau koj. Koj rau khau tawv thiab ris dub. Koj yog daim duab zoo heev!

Niam xav kom koj yuav zoo li no mus, tiamsis niam ua tsis tau. Lub neej muaj kev sim siab thiab kev zoo siab tib si. Muaj ib hnub twg, lub caijnyoog tej zaug yuav dhau los txomnyem txog qhov uas ua xyem xyav rau Vajtswv txoj kev hlub. Ntawv Nkauj 139 tab pov rau kuv tias Vajtswv tau tsim kuv los thaum tseem nyob hauv niam plab. Yam ntawd muaj lub ntsiab tias Vajtswv hlub kuv ua ntej uas kuv tau los ua pa thawj zaug. Kuv nyob hauv Vajtswv lub hlwb. Vajtswv tej kev xav zoo pub rau kuv tseem ntau dua li cov suab zeb uas dej ntsawj tuaj tim ntug.

Muaj ib hnub twg, niam yuav tsis yog tus muab ris dub rau koj hnav, khi koj cov plaub hau lawm. tiamsis txawm yog thaum ntawd los, koj yeej yog Vajtswv tug – tus uas muaj kev hlub mus ib txhis. Vajluskub sau: “Vajtswv yog kev hlub” (I Yauhas 4:16). Vajtswv yog kev hlub thiab txoj kev hlub ntawd yuav ntsuas tsis tau.
Hnub no, koj puas tab tom ua xyem xyav rau Vajtswv? Puas yog vim ib txoj kev sib raug zoo twg puas tshuaj? Vajtswv yeej nyob ntawm koj ib sab. Txoj kev sib raug zoo nrog Vajtswv tsuas xaus thaum peb txiav txim txav deb Vajtswv thiab txawm yog thaum ntawd los Vajtswv yeej khiav caum koj qab, cab koj rov los. Ntawv Nkauj 139 qhia rau koj paub:

“Koj yeej paub hais tias kuv yog neeg zoo li cas. Kuv yuav khiav mus nkaum qhov twg thiaj khiav dim koj? Kuv yuav khiav mus nkaum qhov twg, koj thiaj tsis porn kuv? Txawm yog kuv nce mus txog saum ntuj ceebtsheej los koj yeej nyob saud, yog kuv nqis mus rau hauv tubtuag teb los koj yeej nyob hauv thiab. Yog kuv ya mus dhau rau sab hnubtuaj lossis sab hnubpoob los koj yuav nyob qhov ntawd coj kuv kev, koj yuav nyob qhov ntawd” (Ntawv Nkauj 139:6-9).

Thaum koj loj hlob lawm, koj yuav kawm tau txoj kev pheeb rau Tswv Yexus ruaj ruaj ib yam li Tswv Yexus tuav koj ruaj ruaj. Nyob rau lub sijhawm tsaus ntuj nti hauv lub neej, thaum Nws muab Nws txojsia tuag saum roob Kaulakauthas, tib neeg tau tso Nws tseg. Nws cov thwjtim tso tes khiav. Ib tug tub sab yuav tuag tau hais lus saib tsis taus Nws. Txawm li los, Tswv Yexus yeej xaiv tuag thiab sawv rov qab los vim txoj kev hlub yog li ntawd: Kev hlub yog muab mus. Leej twg thiaj yuav muaj cuab kav cais koj tawm ntawm ib txoj kev hlub zoo li ntawd? Puas yog kev txomnyem ua rau koj khiav deb tus Cawm Seej, tus Cawm Seej twb zoo siab hlo them ib tug nqi rau koj tej kev txhaum? Tsis yog li, mentxhais. Tsis muaj ib zaum li.

Koj yog leej twg los? Koj yog Tswv Yexus txoj kev hlub tiag. Tig rov qab los saib Nws tus yamntxwv nyob hauv koj.”

Jenna muab phau ntawv sau npog cia thiab cev tes mus muab phau Vajluskub los. Nws cheb cov pla tshauv tas, zaum ntawm rooj thiab ua tib zoo nyeem ib nqe zuj zus, ib lo lus zuj zus ntawm Ntawv Nkauj 139, “Tswv Yexus, kuv yog Koj tug” nws ntxhi ntxhi, “thiab kuv muab kuv lub neej tom ntej tso rau Koj.”

Txawm lub nplhaib ua tshoob tsis nyob ntawm tes, los nws yeej txais tau ib txoj kev hlub vij puas ncig nws. Jenna pw tsaug zog, kaj siab hauv tus Cawm Seej txhais tes. Vim Nws yog tus uas tsis lov tus pas tauj thaum twb ntsoog thiab tsis tua teeb thaum roj tas. (Yaxayas 42:3). Vim Nws txoj kev hlub yog zoo kawg nkaus.

Thov caw nrog kuv peb thov Vajtswv ua ke: Twb Tswv, twb muaj qee lub sijhawm kuv hnov qab tias koj hlub kuv heev. Nyob hauv tej kev sim siab, tej kev nkhaus hauv lub neej, kuv tsis paub ua cas, qaug zog thiab cia kuv lub hlwb txav deb Vajtswv txoj kev tshwm ntsej muag. Kuv hnov qab koj yeej tseem nrog nraim kuv thiab tiv thaiv kuv los ntawm txojkev hlub tsis muaj nrim. Thov ntuas kom kuv nco ntsoov tias: tib neeg txoj kev hlub muaj nrim, tiamsis koj txoj kev hlub tsis muaj nrim. Thiab yog kuv nyob hauv koj, ces txoj kev hlub ntawd yuav yog qhov kaj coj kuv kev thaum tau zoo txomnyem, kuv yeej mus hauv txoj kev kaj siab lug. Kuv thov hauv Tswv Yexus Khetos lub npe. Amees.

Cov kwv tij txhua tus, tib neeg tej zaug yuav tag kev cia siab thaum yus txoj kev hlub raug ntxeev siab, thaum yus txoj kev hlub raug ua saib tsis taus li yav tas los. Lossis ib tug twg cog lus yuav hlub koj mus ib txhis, tiamsis ho tig nruab qaum tso cov lus cog tseg ntawd tsau tsawv hauv txoj kev hnov qab. Lub sijhawm ntawd, koj puas ntshaw kom tau ib txoj kev hlub mus ib txhis, ib txoj kev hlub tsis hloov pauv, tsis yuam ua dabtsi?

Vajtswv txoj kev hlub yog kev hlub li ntawd. Nws tsis yog nrog koj dhau ntawm tej kev siab qis hauv lub neej xwb, tiamsis tseem nthuav tawm txoj kev hlub ntawd thaum uas Nws tuag saum Ntoo Khaub Lig, kom koj tau txais txoj kev cawmdim yog koj tso siab rau Nws.

Yog muaj ib lub sijhawm twg koj ua poob txoj kev hlub ntawd lawm, cia li thov Vajtswv pab oj nrhiav kom tau txoj kev tshiab hauv Vajtswv txoj kev hlub, kom koj tsis yog tau ua neej hauv Vajtswv txoj kev hlub xwb, tiamsis tseem hais rau cov neeg tsis tau paub Vajtswv txog Nws txoj kev hlub thiab.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.