Dôm kơ tơdrong pơlong lăng lăm tơdrong arih păng dôm tơdrong blư truh pơm kơ buăl pơ̆k huŏng, păng ngĭl ngŭl wơ̆l jrok lăm teh đak tih să ‘nâu. Kư̆m đei, buăl jet kơdih: “Inh ‘nâu bu? Chăl arih ‘nâu đei yua kiơ? Yua kơ kiơ inh đei tơ âu?” Buăl jơ̆ tơmam gĭt kăl mă Kră Yang đei pơjing. Sư ‘mêm kơ buăl lơ hloh kơ tơdrong kiơ mă buăl đei tơ chĕng.

Năr ‘nâu, ‘năr 15/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Diane Virginia kơ̆l ‘bai TŎK BŎK TƠDRONG ‘MÊM MƠNAT.

“ ‘Bok Kei-Dei jơ̆ Tơ’ngla ‘mêm mơnat.” (I Yôhan 4:16)

Jena sơtơ̆p kŭl tăng ‘bơ̆t giơng, nhơ̆m ơh. Sư hơli hơnglâu ti hăm hơnglâu yŏng păng hơnglâu pleh, mơn ưh kơđei chơ khiĕn pơkong pơm kơ inh rai ơh sơ’ngon. Chơ khiĕn ‘bơ̆t tơ hơ’nglâu ti pơm kơ sư hơđơ̆ng. Mă lei hơđăl, Brian ưh kơ đei mơn thoi noh. Sư achăng lê̆ duch noh na “hưch wă kơ bơngai nai”

Achăng lê̆ Jenna, sơ’ngon wă chơchă nơ̆r tơl tơwih. Hăm đei gơh pơm liơ wă dui ‘nhŏng noh wih brŏk dơ̆ng ưh? Ưh, măt sư wơ̆l jrok bơih đơ̆ng blŭng a. Duch noh băt kơ tơdrong noh, mă lei sư khan gô gơh tơplih ăn kơ ‘nhŏng noh, pơm kơ sư hưch wă, pơm kơ lăng tơ sư đĕch. Jơ ‘nâu, duch âu ưh kơ băt sư noh bu bơih.

“Yang Yêsu ơi,” Jenna pơma ‘bơ̆r sư tơtơ̆ đĭ, “Kon âu jơ̆ bu hăm Ih?”

Sư kăp sơnĕnh pơ ăm hơkŭng, hơpơi Kră Yang gô lăng kăl kơ sư, mă lei tơchĕng ưh kơ đei gĭt kăl kơ kơdih sư. Dôm kơ ngĭl ngŭl đei lăm kơ̆l ‘ngok sư. Sư băt kơ kơdih ưh kơ kơjăp pơgơ̆p hăm Kră Yang, lei na thoi yơ Kră Yang tơchĕng ‘lơ̆ng kơ sư kơplah ŭnh om sư pă jing bơih? Jenna mơn chhŭr nuih. Sư iung, bơ̆l hăl. Sư iŏk hla bơar đêl mĕ sư chih ăn kơ sư. Đunh kơ sơnăm, Jenna đŏk hơlơ̆k hơle kơ lăm hla bơar noh, đei pơlung sư lăm tơdrong tơchĕng, pơwao, dôm kơ đêl mĕ sư đei chih. Sư pơih sơ̆p hla bơar noh đŏk lu trong đei rek bơih:

“Jenna mă mĕ ‘mêm,
Năr ‘nâu mĕ đei krao khan kơ kon. Năr ‘nâu năr blŭng a kon năm hŏk lăm lu khŭl hơ’lơ̆p. Mĕ chô̆ sŏk ăn kơ kon hăm tơlei tơsĕr brĕo. Kon ‘bot chơkhŏ hơkar hăm tơ̆k tanh. Kon ‘lơ̆ng tơpă!

Mĕ hơpơi rŏ kơ bơwei kon ling lang thoi âu, mă lei mĕ ưh kơ gơh. Tơdrong arih đei kơ dôm kơ tơdrong pơlong lăng hăm kư̆m đei hiôk chơt. Minh năr ayơ noh, tơdrong arih pơmat tat truh tơ kon ngĭl ngŭl tơchĕng ưh kơ ‘lơ̆ng kơ ‘Bok Kei-Dei. Hơri so 139 đei chih khan Kră Yang pơjing kon kơplah kon oei lăm klak mĕ. Tơdrong noh wă khan Kră Yang ‘mêm kơ kon hơdrol kơ kon đei dui jơhngơ̆m blŭng a. Kon oei lăm jơhngơ̆m đon tơchĕng Kră Yang. Dôm kơ tơdrong ‘lơ̆ng tơpăt Kră Yang ăn kơ kon lơ hloh kơ găr chuơh mă đông kiơ̆ kơpal đak.

Minh năr ayơ noh, mĕ pă đei tơ’bot ăn kơ kon tơ̆k tanh păng tơlei brĕo chô̆ sŏk dơ̆ng. Mă lei kơplah noh kơnh, kon oei gah lăm Kră Yang – Tơ’ngla đei jơhngơ̆m ‘mêm khŏm khŏm. Sơ̆p hla bơar ‘Bok Kei-Dei chih: “ ‘Bok Kei-Dei jơ̆ tơ’ngal ‘mêm mơnat.” ( I Yôhan 4:16) ‘Bok Kei-Dei jơ̆ tơ’ngla ‘mêm mơnat păng jơhngơ̆m ‘mêm ưh kơ đei gơh pơtŏ pơting.

Năr ‘nâu, kon hăm oei ưh kơ ngeh kơ Kră Yang ưh? Yua kơ ŭnh hnam ưh kơjing? ‘Bok Kei-Dei oei oei hơdai kon. Tơdrong pơgơ̆p kon hăm Sư gô tôch tơdah kon drơ̆ng weh ataih đơ̆ng Sư păng kơplah jơ noh, Kră Yang oei kơdâu druh kiơ̆ kon, dui kon wih brŏk. Hơriso 139 ăn kơ kon băt:

“Tơdrong hơgei Ih, inh lăng hlĭch mơsêh tơpă. Kơjung dêh inh mah ‘mơn pă truh! Inh năm tơ yơ gơh weh ataih đơ̆ng Yang Bơhngol Ih inh wă klĕnh tơ yơ gơh hlơp đơ̆ng muh măt Ih? Dah inh tŏk tơ plĕnh, Ih oei tơ noh, Mă inh jur ‘bĭch lăm dêh hơtâu to Ih kư̆m tơ noh. Tơdah inh đei pơnăr păr đơ̆ng pơgê năm oei tơ tôch đak dơsĭ.” (Hơriso 139:6-9)

Kơplah kon wơ̆ ‘lŏ bơih, kon gô hŏk iŏk wei kơjăp Yang Yêsu thoi Sư wei kơjăp kon. Lăm jơ phŭt tơdrong truh kơ Sư bơih, kơplah Sư pơjao tơdrong arih Sư tơ kơpal ‘long pơglang tơ kông Gôgôltha, kon bơngai achăng lê̆ Sư. Lu bơngai pơhrăm păng Sư kơ dâu sơlah đĭ. Minh ‘nu bơngai tơtông che bơle kơ Sư. Thoi noh ră bơih, mă lei Sư oei rơih pŭ iŏk tơdrong lôch păng iung arih dơ̆ng yua kơ tơdrong ‘mêm thoi noh: tơdrong ‘mêm ling lang ba ăn. Bu gơh sơlah kon weh đơ̆ng tơdrong ‘mêm thoi noh? Lei tơdrong ơh sơ’ngon gô pơm kơ kon weh ataih đơ̆ng ‘Bok Dŏng Pơklaih, Tơ’ngla pŭ iŏk tơdrong yoch đơ̆ng kon ưh? Ưh ôh, kon ‘mêm. Ưh kơ đei layơ.

Kon noh bu hă? Kon jơ̆ tơdrong ‘mêm đơ̆ng Yang Yêsu ‘mêm tơpă. Athei chă tơdrong arih ‘lơ̆ng đơ̆ng Kră Yang.”

Jenna klơ̆p lê̆ sơ̆p hla bơar noh păng iŏk sơ̆p hla bơar ‘Bok Kei-Dei. Sư dơhlu ‘bruih tơ tơpu hla bơar, tơ oei ‘bơ̆t tang dŏ păng pơyom đŏk đơ̆ng rim kơ trong, rim kơ chư lăm Hơriso 139,

“Yang Yêsu ơi, kon oei gah Ih,” sư pơma lăm jơhngơ̆m, “păng pơjao chăl arih kon kơ Ih”

Mă khan tơ khiĕn pơkong pă đei tơ hơ’nglâu ti, mă lei sư đei mơn sư oei dơ̆ng tŏk bŏk tơdrong ‘mêm mơnat tăp dăr kơ sư. Jenna tep hloi, thĕng hiôk lăm tơpang ti ‘Bok Dŏng Pơklaih. Yua kơ Sư ưh kơ gơ̆ lê̆ ‘long gơlăr wă tơgơ̆ bơih păng ưh kơ pĭt lê̆ ŭnh oei khơ̆ng kơplah brai wă jê̆ tôch. Sư gô ba tơdrong tơpăt hơnơ̆ng hăm tơdrong sĭt. (Êsai 42:3) Yua kơ Sư jơ̆ tơm kơ tơdrong ‘mêm.

Apĭnh đĭ đăng krao khan hơdai: Kơkuh kơ Kră Yang, đei lơ wơ̆t kon hiơt kơ Ih ‘mêm kơ kon dêh. Kơplah đei tơdrong pơlong lăng, đei trong yak năm ưh kơ tơpăt lăm tơdrong arih, kon ưh kơ hơđơ̆ng, bơ̆l hăl, păng jơhngơ̆m kon weh ataih đơ̆ng Ih. Kon hiơt kơ Ih oei oei hơdai păng krôp gom kon hăm tơdrong ‘mêm Ih. Apinh tơ’blŏk kơ kon: tơdrong ‘mêm kon bơngai ưh kơ đei tôm mah, mă lei tơdrong ‘mêm đơ̆ng Ih ưh kơ đei layơ tôch. Tơdah kon oei lăm Ih khŏm khŏm, na tơdrong ‘mêm noh gô pơchrang chông ba trong yak năm mă khan ưh kơ tơproh ‘lơ̆ng dah tơproh ‘lơ̆ng, kon oei yak năm hăm jơhngơ̆m hiôk hian. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kon bơngai mơn ơh sơ’ngon kơplah jơhngơ̆m hưch wă đei pơrăm lê̆, kơ plah jơhngơ̆m hưch wă ưh pă đei pơyom thoi kơ hơdrol ki sơ̆. Dah đei bu noh pơkă hưch wă kơ buăl đĭ chăl arih, mă lei gô weh achăng lê̆ nơ̆r pơkă noh hiơt hiong hloi. Lăm kơplah đei tơdrong arih thoi noh, buăl hăm rơhing kơ jơhngơ̆m ‘mêm đei kojăp, jơhngơ̆m ‘mêm ưh kơ đei tơplih, ưh kơ kăl kơ đei mŭk tơmam?

Jơhngơ̆m ‘mêm Kră Yang jơ̆ jơhngơ̆m ‘mêm thoi noh. Sư ưh kơ hơdai buăl lăm rim kơ tơdrong arih đĕch ôh, mă kư̆m đei tơ‘bôh jơhngơ̆m ‘mêm noh kơjăp khŏm khŏm kơplah Sư chu pŭ iŏk tơ kơpal ‘long pơglang, wă kơ buăl đei tơdrong dŏng pơklaih tơdah buăl đei jơhngơ̆m đon lui kơ Sư.

Tơdah đei minh năr ayơ noh buăl hiơt kơ tơdrong ‘mêm noh, athei apinh Kră Yang tơgŭm buăl chă tơdrong plơ̆ng ‘nao lăm tơdrong ‘mêm lăm Kră Yang, wă kơ buăl ưh kơ adrô̆ arih lăm tơdrong ‘mêm Kră Yang, mă kư̆m wă kơ buăl ră roi ăn kơ lơ bơngai tam mă băt kơ Kră Yang gah tơdrong ‘mêm Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.