“Vim li cas?” – lo lus nug no saib yooj yim tiamsis nws muaj lub nra nyhav heev rau txhua ntu hauv peb lub neej. Thaum tseem me me, peb twb pheej nug cov neeg laus tias: “vim li cas?” thiab tej zaug txog thaum no, thaum ntsib tej kev mob siab, tag kev cia siab, lossis thaum txhua yam tsis tshwmsim los raws li lub siab xav, lo lus nug ntawd xwb tim cia tshwm hauv peb lub siab: “Tus Tswv, vim li cas?” tej zaug hauv peb kuj tau ntsib dhau ib yam li ntawd: tsis paub ua cas, xyem xyav, thiab xav kom tau ib lo lus teb ntawm Vajtswv los.

Hnub no, yog hnub 12/11/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Joy Brunson dhau ntawm Zaj kawm VIM LI CAS, VAJTSWV?

“Tus Tswv uas yog cov Yixalayees tus Vajtswv uas dawbhuv, yog tus npaj tej uas yuav muaj los yav tom ntej; nws hais tias, “nej tsis muaj cai yuav nug txog kuv cov menyuam lossis qhia haujlwm rau kuv ua li!  Kuv yog tus uas tsim lub ntiajteb thiab tsim neeg los nyob rau hauv. Kuv siv kuv lub hwjchim los nthuav lub ntuj; kuv kav lub hnub, lub hli thiab tej hnubqub huv tibsi” (Yaxayas 45:11-12).

“Vim li cas?”

Peb nug lo lus nug no thaum nyuam qhuav pib mus kev – thiab tej zaug kuj yog lo lus teb uas peb tsis muaj hnub yuav nres tsis nug ntxiv nyob hauv peb lub neej. Kuv nco muaj zaug kuv nrog ib tug menyuam xyaum hais ua si, txawm yog dabtsi tshwmsim los nws lub qhov ncauj hais mus ib los: “Vim li cas?” Txhua lo lus txib, txhua tes haujlwm puav leej tau teb los ntawm lo lus khuab xeeb zoo li tej menyuam thaum me.

“Txhob ua li no” “Vim li cas?”

“Twb txog sijhawm cheb huv si lawm” “vim li cas?”

Tau ib pliag, kuv pib tsis txaus siab vim pheej teb mus teb los, cuag li ua rau kuv npau taws. Lub sijhawm ntawd, kuv tau Vajtswv tej lus maj mam ntuas kuv hauv siab: “Yog koj ntag ov”. Kuv hnov ib ce tuag tas.

Vajluskub sau: “Tus Tswv uas yog cov Yixalayees tus Vajtswv uas dawbhuv, yog tus npaj tej uas yuav muaj los yav tom ntej; nws hais tias, “nej tsis muaj cai yuav nug txog kuv cov menyuam lossis qhia haujlwm rau kuv ua li! Kuv yog tus uas tsim lub ntiajteb thiab tsim neeg los nyob rau hauv. Kuv siv kuv lub hwjchim los nthuav lub ntuj; kuv kav lub hnub, lub hli thiab tej hnubqub huv tibsi” (Yaxayas 45:11-12).

Puas tau muaj zaum twg koj poob rau txoj kev txomnyem txog qhov uas koj yuav tau tsa suab: “Vajtswv, vim li cas?” Kuv ces muaj ntau zaug zoo li no. Ntau zaug kuv cim civ nug tias yus paub yam dabtsi yog zoo tshaj plaws, txoj kev twg yog txoj yuav tau mus, thiab txoj kev twg thiaj yuav zoo. Kuv tseem cim civ txhawb tus kheej tias yus tab tom ua raws li Vajtswv lub siab nyiam, tiamsis tseeb tiag kuv tabtob txeeb tswj kuv tug kheej.

Thaum tseem kawm ntawv qib siab, kuv pib muaj ib txoj kev sib raug zoo, txawm yog nyob hauv kuv lub siab kuv paub tseeb tias Vajtswv tsis txaus siab. Tiamsis zoo li txhua zaug, kuv xav tias yus paub zoo dua. Kuv nrog Vajtswv sib tawm tsam, cim civ dag tus kheej tias ntawm no yog Vajtswv lub siab nyiam ntag. Ua Vajtswv tsaug vim Vajtswv tsis cia kuv mus raws li kuv txoj kev txawj ntse. kuv yeej tsis tham kom ntxaws, tiamsis Vajtswv tau tso kuv dim ntawm qhov kev sib raug zoo ntawd ua ntej yuav lig. Tiamsis ntau hli dhau, kuv yeej pheej tseem nug: “Tus Tswv, vim li cas? vim li cas koj ho tshem qhov no tawm ntawm kuv?”

Tiamsis thaum no tig rov qab mus saib, kuv pom meej heev: ntawd yog Vajtswv txhais tes tiv thaiv thiab hlub tshua. Yog tias kuv pheej tawv qees nyob, tej zaug kuv twb ua poob lub neej zoo uas Vajtswv npaj tseg rau kuv lawm.

Kuj yooj yim nkag siab xwb thaum peb xav nug lo lus nug txog tej uas peb tsis nkag siab. Thaum peb ntsia tsis pom daim duab tag nrho, peb pheej hnov qab Vajtswv tus loj thiab Vajtswv lub hwjchim. Tiamsis Nws yog Leej Txiv siab zoo, thiab Nws yuav tsis ua phem rau ib tug twg.

Kuv nyiam nqe Vajluskub nyob hauv Yaxayas 45:15, “Cov Yixalayees tus Vajtswv uas cawm nws haivneeg dim kev puastsuaj, yog tus Vajtswv uas tsis tshwm rau leejtwg pom”

Phooj ywg, Vajtswv saib ntsoov pom koj. Vajtswv paub zoo koj, paub zoo koj txhua lub caijnyoog uas koj tab tom mus dhau. Hnub no, kuv xav txhawb koj tias tig rov qab mus saib yus lub neej, nco txog txhua zaug uas cuag li tag kev cia siab, txog qhov uas koj tav tsis tau koj tus kheej yuav tau tawm suab tias: “Vim li cas Vajtswv?” tas ntuas kom peb lub siab nco ntsoov tias Vajtswv twb cawm koj dim li cas thiab siv txhua yam ntawd ua rau koj muaj nqis rau koj li cas. Nyob ntawm tej kev sim siab, peb yooj yim ua xyem xyav rau Vajtswv kev ua haujlwm, thiab cim civ nug Nws tab tom nyob rau qhov twg hauv tej cua daj cua dub ntsawj tuaj. Tiamsis lub sijhawm ntawd, yuav tau cim civ ntuas tus kheej txog tej haujlwm zoo uas Vajtswv tau ua nyob hauv koj lub neej.

Yeej tsis tau muaj ib feeb twg uas Vajtswv tsis zoo li. Thiab phooj ywg, yuav tsis muaj hnub Vajtswv cia tej ntawd tshwmsim. Hnub no thov kom peb txhua tus sawv khov kho rau qhov tseeb ntawd tias.

“Tus Tswv uas yog Vajtswv tus muaj hwjchim loj kawg nkaus, thov coj peb rov qab los. Thov qhia koj txojkev hlub rau peb, peb thiaj yuav dim!” (Ntawv Nkauj 80:19).

Thov caw nrog kuv peb thov Vajtswv ua ke: Tus Tswv siab zoo, ntau zaug kuv tsis nkag siab vim li cas tej kev txomnyem no ho tshwmsim los raug rau kuv lub neej. Kuv pheej nug thiab pheej nroo, thiab muaj ntau zaug kuv ua raws li kuv siab nyiam. Tiamsis hnub no, kuv xaiv ntseeg koj. Thov ntuas kuv tias Koj yog leej txiv zoo thiab yog leej txiv ntawm txhua yam uas yog kev hlub thiab xav tiv thaiv kuv. Thov pub kom kuv muaj lub siab tawv tuav koj tes txawm yog thaum uas kuv ntsia tsis tau pom txhua yam. Ua Vajtswv tsaug vim tsis tau muaj ib hnub twg koj txav deb kuv. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug hnub no koj yeej tseem tsis paub ua cas vim nrhiav tsis tau lo lus teb. Tiamsis phooj ywg, txawm yog peb tsis tau nkag siab, los yeej muaj ib yam tab pov tias: Vajtswv yog Leej txiv siab zoo, Nws tsis muaj hnub hloov pauv, thiab Nws niaj hnub hlub peb mus ib txhis. Tamsim no, koj muaj cuab kav nres ib pliag ua pa thiab ntseeg tias Leej Txiv saum ntuj tab tom tuav koj tes. Cia txoj kev ntseeg ntawd coj koj mus ntxiv txog rau hnub uas koj muaj cuab kav tig tau rov qab thiab luag ntxhi tias: “Oh, tseeb tiag kuv tsis tas nkag siab tias “vim li cas” vim Peb Leej Txiv yeej ib txwm tuav lo lus teb lawm!”

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.