Đei layơ buăl apinh Kră Yang tơdrong kiơ noh, na jet Sư pơm thoi yơ wă kơ thoi buăl wă ưh? Na truh kơ buăl đei tơchĕng kơdih “proh hơmet” wă tơgŭm Kră Yang pơm tơdrong noh? Lu bơ̆n ngăl đei ‘maih wă bơwei, ‘maih wă proh kiơ̆ kơdih, khan tơdrong noh ‘lơ̆ng. Mă lei buăl hăm băt ưh, đei đon lui noh jơ̆ tơgŭm lu bơ̆n drơ̆ng iŏk tŭk đĭ kiơ̆ kơdih na pơjao tôm tơdrong lăm tơpang ti Kră Yang. Tơplih kơ hơgăt ăn kơ Kră Yang, lu bơ̆n ăn kơ Sư bơ̆jang kiơ̆ kơ Sư wă.

Năr ‘nâu, ‘năr 03/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Lina Johnson kơ̆l ‘bai ‘NĔ HƠGĂT ‘BOK KEI-DEI.

“Bơnê kơ ‘Bok Kei-Dei Kră Yang mơsêh tăp pang mơyang tăp dăr tơgŭm bơ̆n lơ hloh kơ đêl bơ̆n apinh, lơ hloh kơ đêl đon bơ̆n tơchĕng.” (Êphêsô 3:20)

“Kon drŏ nglo mŏ gô ‘net ‘net ‘bônh hloh tơdah pơjuăt hăm kơ măi kơdâu kơtă rim năr, tơplih kơ minh ‘măng lăm minh giĕng,” duch bơ̆jang gah pơgang pơma. Kon inh đei hơwen lăp ai, na wă yak năm tơnat pat. Duch noh bơtho kon inh pơjuăt nhen thoi hăm pơm ‘long tơsĕr: minh pah jơ̆ng tơ kơpal hơnă minh pah jơ̆ng tơ hơnă oei nơnăm. Dơ̆ng thoi noh, lu nhôn gơh hơmet tơpang jơ̆ng sư kơplah kon inh yak năm. Mă lei lăm tơdrong ‘nâu lu nhôn pơjuăt sư minh giĕng lăp minh ‘măng đĕch, yua kơ inh ưh kơ đei jên răt kơ măi kơ dâu kơdih ‘măn tơhnam.

Kơplah noh, buăl juăt inh kư̆m ngôi tơ noh. Nhi tơlăng dih băl, na inh đei pơma khan: “Kră Yang ơi, lu nhôn kăl kơ đei kơ măi kơdâu kơtă. Kon ưh kơ băt Ih gô ăn kơ lu nhôn thoi yơ, mă lei kon lui ngeh Ih gô hơmet ăn.”

Dôm năr đơ̆ng rŏng, inh đei ba kon năm ngôi tơ mĕ inh, buăl inh hăm kon drŏ kăn ‘lơ̆p inh dai yak năm hơdai. Kơplah noh pă ‘bar giĕng đĕch truh tơ Nôel. Hơdrol kơ wă năm, lu nhôn đei pơtrŭt đơ̆ng lăm jơhngơ̆m athei plôh lê̆ tang dŏ lăm gre pah rŏng, mă ưh kơ băt yua kơ kiơ. Na đei mơn noh hơđăl tơpă truh tơ lu nhôn pơm kiơ̆.

Lu nhôn năm truh tơ hnam mĕ inh kơplah ‘năr drơ̆m kơsơ̆. Minh măng hơđơ̆ng. Mĕ inh pơtơm lu nhôn năm lăng ŭnh Nôel tơlăm pơlei. Minh tơdrong pơwao pơih ăn hơ iă dêh! Na lu nhôn tŏk tơgre, yak năm tơ rim trong, mă truh tơ lu trong tôch ưh kơ đei bu yak năm.

Kơplah gre kơwĕch tơrŏng ‘bơ̆t trong noh, ŭnh gre pơchrang ‘bơm tơmam kiơ noh ‘bơ̆t cheng trong. Đei bơngai ôr khan: “Ơ, hăm trŏ kơ kơmăi kơdâu kơtă ưh?!” Mĕ inh kơdŭn gre tơrŏng. Trŏ tơpă: đei minh pôm kơmăi kơdâu kơtă ‘bơ̆t doh! Inh hăm buăl inh lĕch hloi đơ̆ng gre, kơdâu năm tơhnam jê̆ tơnoh păng tơdŭ ‘măng.

Đei minh ‘nu bơngai drŏnglo lĕch đơ̆ng lăm hnam, na lu nhôn jet: “Yua kơ kiơ kơmăi kơdâu kơtă dan ming tơ âu kih?” Na sư tơl: “A, inh đei tơmam Nôel ăn kơ akăn inh hrôih ‘biơ̆, inh đei răt kơmăi ‘nao, ‘lơ̆ng ‘biơ̆ ăn kơ sư. Mă kơmăi so ‘nâu oei ‘lơ̆ng, ưh kơ đei anih wă ming. Tơdah duch kăl wă na iŏk ă.”

Na lu nhôn ôr jreo yua kơ hiôk chơt! Mĕ inh ba lu nhôn năm iŏk gre, na hăm buăl wơ̆t iŏk kơmăi chĕp brŏk. Na tah lăp ‘blep lăm gre – yua kơ lu nhôn đei plôh lê̆ tang dŏ hơdrol kơ noh!

Truh tơdang ei, rim wơ̆t ‘blŏk kơ tơdrong noh, inh hăm buăl inh oei ‘bôh chrêu kơ dôm tơdrong đei truh noh. Bơngai drŏ nglo noh nhen thoi Kră Yang hơmet lê̆ adrol gô lu nhôn lăm kơmăng noh. ‘Bok Kei-Dei ‘lơ̆ng dêh tơpă! kon drŏ nglo inh kăl kơ tơmam, mă inh ưh kơ adrin “bơtho” Kră Yang ăn tơmam kăl yua noh – inh lui ngeh kơ Kră Yang gô pơm thoi noh. Na trŏ thoi noh tơpă, Sư đei tuh ăn, kiơ̆ kơ tơdrong ‘lơ̆ng Sư ‘ngoaih kơ đon tơchĕng inh.

Lơ wơ̆t lu bơ̆n ngăl ‘maih wă tơ’bôh kơ Kră Yang pơm tôm tơdrong, wă kơ Kră Yang mơ̆ng kiơ̆ tơdrong proh hơmet đơ̆ng lu bơ̆n. Tơdah lu bơ̆n răk minh tơdrong ‘nâu đĕch – ‘Bok Kei-Dei ling lang ‘lơ̆ng tơpăt, Sư ‘mêm kơ lu bơ̆n păng ‘maih wă tuh ăn tơdrong ‘lơ̆ng hloh ăn kơ bơngai lui kơ Sư – na jơhngơ̆m lu bơ̆n kơplah noh hiôk hian tơpă.

“Bơnê kơ ‘Bok Kei-Dei Kră Yang mơsêh tăp pang mơyang tăp dăr tơgŭm bơ̆n lơ hloh kơ đêl bơ̆n apinh, lơ hloh kơ đêl đon bơ̆n tơchĕng.” (Êphêsô 3:20)

Na lei, yua kơ kiơ lu bơ̆n ‘maih wă hơgăt ăn kơ ‘Bok Kei-Dei pơm lơ hloh kơ lu bơ̆n đei tơchĕng?

Inh ưh kơ đei layơ hiơt kơ bayan Nôel sơnăm noh sơ̆. Rim wơ̆t ‘blŏk, inh đei tơchĕng kơ yă adro lăm II Lu pơtao chăl 4. Sư đei minh bô̆i đak rơmă ôliwơ đĕch, na ‘Bok Kei-Dei yua iŏk tơdrong pơm ăn kơ dôm tơdrong hơpơi wă yă adro noh jing đei thoi kơ yă âu wă. Truh tơ yă âu ưh kơ đei bô̆i wă mong đơ̆ng Kră Yang tuh ăn!

Apĭnh đĭ đăng krao khan hơdai: Kơkuh kơ Kră Yang mă ‘mêm, kon bơnê kơ Ih ling lang băt kơ kon kăl wă, mă adrol kơ kon tơlĕch nơ̆r pơma. Apinh bơtho kon pơjuăt lui gơnang kơ Ih lơ hloh, huay kơ hiơ̆k bơngơ̆t huay kơ ‘maih wă kiơ̆ kơdih. Mă khan ưh kơ hlôh lăm trong yak năm Ih, apinh ăn kơ kon ling lang đei jơhngơ̆m hơđơ̆ng lui ngeh Ih ling lang ‘maih wă tơdrong ‘lơ̆ng hloh ăn kơ kon, păng tôm tơdrong Ih pơm ‘lơ̆ng ngăl. Apinh tơgŭm kon pơih jơhngơ̆m đei mơn ‘bôh tơdrong mơsêh mă khan iĕ đĕch Ih oei bơ̆jang lăm chăl arih kon lăm rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdrong mơsêh mơyang Kră Yang đei ling lang, dôm lu tơdrong tơchĕng hiơ̆k bơngơ̆t đĕch pơgăn lu bơ̆n. Kră Yang pơm ưh kơ thoi kon bơngai tơchĕng ôh, yua kơ Sư jơ̆ Tơ’ngla hlĭch chrơp, trong Sư tih tin ưh kơ băt dang yơ! Yua kơ thoi noh, tơplih kơ adrin chă “tơ’bôh ăn” đơ̆ng Kră Yang, athei pơih jơhngơ̆m, lui gơnang pơjao ăn kơ Kră Yang mơ̆ng kơ Sư bơ̆jang. Kơplah lu bơ̆n lui ngeh kơ Kră Yang Sư gô chih pơtrơp tơdrong hơ’mon kơ buăl hlĭch chrơp, wă kơ buăl mơn ‘bôh Kră Yang jơ̆ Tơ’ngla hnhoi lăng păng bơwei kon Sư rim năr. Hơpơi rim ‘nu lu bơ̆n gô ưh kơ hơgăt ăn kơ ‘Bok Kei-Dei, mă gô lui gơnang kơ Sư lăm bơyan Nôel sơnăm ‘nâu, păng đơ̆ng rim kơ jơ phŭt lăm chăl arih lu bơ̆n. Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.