Hăm buăl, akŭm kơkuh kơ Kră Yang đei tơm jơ̆ tơdrong kiơ? Tơdrong kơkuh tơpă ưh kơ sĭ jơ̆ hơri dôm ‘bai hơri ư-ang dah krao khan lăm jơ akŭm. ‘Noh jơ̆ bơhngol lu bơ̆n kơkuh, hiôk chơt tơl tơwih tơdrong ‘mêm mơnat đơ̆ng ‘Bok Kei-Dei. Kơplah đĭ jơ̆hngơ̆m tơpă lăng tơ gah Sư, lu bơ̆n gô mơn đei ‘bôh dôm tơdrong hiơ̆k bơngơ̆t, ơh sơ’ngon nhen thoi hiong đĭ, lăp pă tơdrong hiôk chơt jrŭ hlĭch kơplah gơh oei hơđơ̆ng lăm tơpang ti ‘Bă. Trŏ lăm dôm jơ phŭt ‘noh, lu bơ̆n ‘bôh jơhngơ̆m thoi đei tơdrong arih pran, yua kơ đơ̆ng kơplah ‘noh tơdrong kơkuh ưh pă jơ̆ athei đei dah tơdrong juăt, mă kŭm jing tơdrong hiôk chơt ưh kơ đei kiơ gơh pơtŏ kơ bơngai gah Sư.

Năr ‘nâu, ‘năr 04/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih kơ̆l ‘bai KƠKUH ‘BƠ̆T ANĂP PƠTAO ‘LƠ̆NG RŎ.

“Trŏ boih lu sư khan thoi noh. Bơnê kơ Ih Kră Yang nhôn ‘Bok Kei-Dei. Ih ‘lơ̆ng rŏ mơsêh mơyang pran tih hlôh wao tôm tơdrong, na trŏ kơ nhôn lui yom păng ư-ang Ih ling-lang ưh kơ layơ tôch. A-men.” (Tơdrong Tơ’bôh 7:12)

“Klaih kơ noh inh ‘bôh lơlap lơlang ưh kơ kĕ jô̆ ôh, yua kơ đơ̆ng rim dêh char, rim adrĕch adrung, rim khŭl bơngai, rim kơ nơ̆r pơma, lu sư dơ̆ng ‘bơ̆t anăp tang-dŏ ‘Bok Kei-Dei păng Kon Triu. Lu sư tă ling hrŭk ao tai kok păng chĕp sơdrai hla. ”Lu sư pơma hơdai đĭ kơ minh tơpôl khan: “Ư-ang Kră Yang bơ̆n mă oei tơ tang-dŏ hăm ư-ang Kon Triu. Sư boih pơklaih bơ̆n ăn kơ bơ̆n hiôk-hian.” (Tơdrong Tơ’bôh 7:9-10)

Lăp dôm nơ̆r kơđeh đĕch mă lei đei dôm kơ tơdrong gĭt kăl! Inh gơh chih kơdih mĭnh ‘bai pơma gah tơdrong mĭnh jơhngơ̆m kơ rim kon pơlei rim dêh char, dah gah dôm kơ ao kok pơtih kơ tơdrong tơpăt mă lu bơ̆n đei lăm ‘Bok Krist. Inh kŭm gơh pơma gah dôm kơ tơ‘bla hla hơdrŏng tơ’blŏk truh kơ năr Kră Yang Yêsu kĕ jei mơ̆t lăm pơlei Jêrusalem, dah gah rup Kon Triu ‘bĕnh tơdrong mơsêh mơyang păng ‘lơ̆ng rŏ. Đĭ đăng hơdai jing mĭnh rup plei ‘lơ̆ng ‘lơ̆ng rŏ, mĭnh anih ‘lơ̆ng tôm, tôm mah, ưh pă đei ơh sơ’ngon dah hơgăt ayơ dơ̆ng bơih. Mă lei tơdrong hơtŭt truh tơ jơhngơ̆m inh hloh, kŭm jơ̆ anih tŏk bŏk kơ đĭ đăng tôm tơdrong, trŏ ‘noh jơ̆ tơdrong akŭm kơkuh.

Tơdrong akŭm kơkuh ‘bơ̆t dâu ưh kơ sĭ jơ̆ dôm phŭt pơ ư-ang, dah dôm ‘bai hơri ư-ang lăm pơge năr Tơpơh. Pơtrơp lăm Sơ̆p Hla Bơar nơ̆r ‘Bok Kei-Dei ‘nâu, lu bơ̆n ‘bôh tơdrong akŭm kơkuh ‘noh “măng kơ’năr”. Rŏ lăng ‘nâu jơ̆ mĭnh trong pơma hloh kơ dôm tơdrong pơwao hlôh gah jơnăr mă kon bơngai gơh hlôh (Tơdrong Tơ’bôh 7:15).

Inh ngăl pơwao gah rup anih ‘noh lăm dôm jơ krao khan păng akŭm kơkuh kơdih. Lăm tơdrong tơchĕng, inh ‘bôh kơdih hơdai mơ̆t lăm khŭl bơngai tih kơjung, jing mĭnh pah iĕ lăm rup chhơ̆ ‘lơ̆ng rŏ đei tanh đơ̆ng lơ bơngai lui đơ̆ng dôm kơ jơhnơr. Jơhngơ̆m inh nhen thoi ‘nă hal lăm tơdrong hlĭch hlăch păng hiôk chơt kơplah lăng ‘bôh hơdah ‘lơ̆ng rŏ đơ̆ng ‘Bok Kei-Dei pơchrang hơdah đơ̆ng ataih.
Na blư thar, anih ‘noh tơplih. Inh ưh pă jơ̆ mĭnh ‘nu bơngai tŏk bŏk lăm khŭl tơpôl lơ bơih, mă jing mĭnh ‘nu kon hơ’lơ̆p lăm tơpang ti ‘Bă. Đei kơplah inh sơtơ̆p kŭl tăng ‘bơ̆t anăp Sư. Păng mưh lăp, inh mơn đei thoi ‘Bă oei pôk kơ’mĭn inh tơ kơpal, pơdăr dăr lăm tơdrong hiôk chơt, ao kok đông păr kiơ̆ trong dăr.

Tơ’ngla Tih Hloh pơm kơ đĭ kơ khŭl linh đei drap kơkuh ‘noh bơih trŏ jơ̆ ‘Bă ‘mêm mơnat kơ inh. Hlĭch chrơp tơpă păng hiôk lăm jơhngơ̆m dêh! Inh jơ̆ kon ‘mêm kơ ‘bok Pơtao ‘lơ̆ng rŏ noh.

Kơplah mơ̆ng pơma gah plei ‘lơ̆ng jơ̆ anih kơkuh kơ Kră Yang đĭ kơmăng kơ’năr, rŏ lăng đei bơngai mơ’noh gô mơn ‘bôh tơdrong noh… ưh kơ đei hơiă. Mă lei inh jet kơdih: dah dang ei buăl ưh tim mă tơpă hơ iă oei lăm tơdrong Kră Yang oei hơdai, lei pơm thoi yơ buăl hơpơi wă kơ gơh oei hơdai Sư đĭ truh tơ ning mônh? Tơplơ̆ dơ̆ng, dah buăl ‘mêm kơ Sư, păng Sư kŭm ‘mêm kơ buăl, lei tơdrong ‘noh đei phara băl tơpă. Kơplah noh, kơkuh ưh pă đei jơ̆ “tơdrong jang”, mă jơ̆ tơdrong hiôk chơt jrŭ lăm jơhngơ̆m.

Păng pơtrơp đŏk Tơdrong Tơ’bôh, bơ̆n ‘bôh đĭ dôm kơ linh jang kơpal plĕnh kŭm hơdai nơ̆r pơ ư-ang: “Bơnê kơ Ih Kră Yang nhôn ‘Bok Kei-Dei. Ih ‘lơ̆ng rŏ mơsêh mơyang pran tih hlôh wao tôm tơdrong, na trŏ kơ nhôn lui yom păng ư-ang Ih ling-lang ưh kơ layơ tôch. A-men.” (Tơdrong Tơ’bôh 7:12).

Mă khan kơplah oei oei lăm teh đak ‘nâu, inh kŭm đêl đei drap kŭp kơ̆l tơ ala ‘bơ̆t anăp Kră Yang, dah suang chơt hiôk hăm tơ’bla ‘long hơdrŏng lăm ti. Dôm lu jơ ‘noh pơm kơ jơhngơ̆m inh mơn chhưu tơpă, nhen hơtŭt ‘bơm truh tơ tơm kơ bơhngol kơdih. Păng inh băt kơnăl, tơdrong kơkuh tơpă ưh kơ đei layơ bơ̆l hăl ôh.
Hơpơi kơ buăl kŭm đơ̆ng đei, dah gô hrôih đĕch đei dôm jơphŭt ‘lơ̆ng rŏ thoi noh hăm ‘Bok Kei-Dei. Khan buăl gô mơn đei tôm mah tơdrong hiôk chơt kơplah oei lăm tơdrong đơ̆ng ‘Bă oei hơdai, gơh oei lăm tơdrong ‘mêm mơnat, lăm tơdrong hiôk hian păng jơhngơ̆m hiôk anih Sư.

Lăm bơyan Nôel ‘nâu, Dah lu bơ̆n lăng Kon Nge iĕ ioch, chu iŏk đon ala ‘bĭch kơpal bơng ‘nhet kro, lei athei ‘blŏk khan kŭm trŏ lăm jơ ‘noh, đĭ plĕnh teh re kơtơ̆ng nơ̆r hơri ư-ang đơ̆ng khŭl linh jang ‘lơ̆ng: “Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu.” (Luka 2:14). ‘Noh kŭm jơ̆ ‘bai hơri măng Nôel sơ̆, mă kŭm jơ̆ nơ̆r krao lu bơ̆n hơdai pơyơ̆r tơdrong ư-ang kơ Tơ’ngla Pơjing mơsêh mơyang- Pơtao kơ lu pơtao, Yang kơ lu yang.

Athei ‘măn tŏ sĕt jơ wă tơchĕng pơwao kơdih buăl oei lăm anih plei ‘lơ̆ng ‘noh. Buăl ‘bôh kiơ? Buăl mơ̆ng kơtơ̆ng kiơ? Buăl mơn đei tơdrong kiơ lăm jơhngơ̆m? Athei ăn đon tơchĕng păng jơhngơ̆m buăl hơdai lăm tơdrong oei hơdai ‘lơ̆ng rŏ đơ̆ng ‘Bok Kei-Dei, wă kơ dôm jơphŭt ‘noh ling lang arih lăm đon tơchĕng buăl.

Apĭnh đĭ đăng krao khan hơdai: Kơkuh kơ ‘Bă mă ‘mêm, kon rơhing gơh oei lăm tơdrong oei hơdai đơ̆ng Ih, anih đei tơdrong hiôk hian, tơdrong hiôk chơt păng tơdrong ‘mêm mơnat ưh kơ layơ tôch. Apinh bơtho kon băt kơkuh kơ Ih ưh kơ sĭ lăp hăm nơ̆r hơri, mă hăm đĭ jơhngơ̆m păng chăl arih kon rim năr. Hơpơi kơ đơ̆ng dui jơhngơ̆m, đơ̆ng tơdrong bơ̆jang kon jang đei lăng tơ gah Ih. Apinh bơwei kon ling lang oei lăm tơdrong ‘mêm mơnat khŏm khŏm đơ̆ng Ih, đơ̆ng dang ei truh ning mônh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, buăl hăm tơpă đei hơ iă oei lăm tơdrong oei hơdai đơ̆ng ‘Bok Kei-Dei ưh? Dah tơdrong akŭm kơkuh mưh lăp oei lăp jơ̆ mĭnh tơdrong phĕt mă buăl hơdai rim giĕng? Plei ‘lơ̆ng jơ̆ anih lu bơ̆n gơh oei hơdai hăm Kră Yang ling lang, ưh pă đei hơgăt yua kơ jơ năr dah anih oei. Dah dang ei jơhngơ̆m buăl tơpă đei hiôk chơt kơplah gơh oei jê̆ Sư, lei athei tơchĕng pơwao tơdrong hiôk chơt ‘noh gơh tih truh dang yơ kơplah buăl gơh akŭm kơkuh kơ Sư khŏm khŏm tơ anih plei ‘lơ̆ng. Đơ̆ng lăm năr ‘nâu hloi, athei rong bơwei tơdrong hiôk chơt hơiă lăm tơdrong akŭm kơkuh kơ Kră Yang, wă kơ truh tơ kơplah yak mơ̆t lăm anih arih ling lang, tơdrong hiôk chơt ‘noh gô jing tôm mah kơplah buăl hơdai lăm tơdrong hơri ư-ang ưh kơ layơ tôch.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.