05.12 Amăn Jơ Krao Khan Rim Năr: TƠMAM APAH ƯH KƠ DRƠ̆NG IŎK

Nôel jơ̆ bơyan đei pơgong tơ̆k ŭnh ‘brê ‘bra, dreng drao, đei hơnŭng tah tơmam ‘lơ̆ng ba ăn hăm jơhngơ̆m hiôk. Mă lei lăm rơ’bâu lu hơnŭng tơmam ‘lơ̆ng noh, đei layơ buăl jet kơdih tơmam ayơ mă gĭt kăl hloh? Rŏ lăng, tơdrong hơ iă dêh noh lăm minh “hơnŭng iĕ noh” mă lu bơ̆n ưh kơnhăm. Nhen thoi kon bơngai lăm teh đak ‘nâu sơ̆ ưh kơ sơng iŏk ‘Bok Dŏng Pơklaih, yua kơ Sư jur hăm tơdrong pơyom. Rŏ lăng, lăm bơyan Nôel ‘nâu, Kră Yang oei pơ’lơ̆ng ăn kơ buăl tơmam kư̆m thoi noh.

Năr ‘nâu, ‘năr 05/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kimberly Poteet kơ̆l ‘bai TƠMAM APAH ƯH KƠ DRƠ̆NG IŎK.

“Teh bơ̆n âu đơ̆ng Sư pơjing mơ̆n, na kơplah Sư oei tơ ala teh âu sơ̆ lu bơngai ala teh âu ưh kơ băt kơ Sư.” (Yôhan 1:10)

Inh oei ‘blŏk hơđăl dêh minh năr đei asong tơmam Nôel sơnăm noh sơ̆. Kơplah inh hơdai hăm khŭl juăt kơ asong đĕch tơmam lăm pơlei tih. Tơ kơdeng hnam năr noh dreng drao kơ pơgong ‘lơ̆ng, lơ hơnŭng tơmam, hơnŭng tah tơmam tih iĕ yua kơ đơ̆ng bơngai tơgŭm wă ăn kơ lu bơngai oei kơ‘bah. Bu bu kư̆m hưch hanh rơih iŏk kơdih tơmam ăn kơ kon lu sư.

Inh hnhoi lăng minh ‘nu bơngai mĕ chĕp minh hơnŭng tơmam iĕ, na kơgŭ mơ̆ng hăm đon păng lăng hơlen. Mŏ noh sư lăng hơlen, na dan ming dơ̆ng đơ̆ng noh rơih iŏk hơnŭng tơmam tih ‘biơ̆. Na hơnŭng tơmam iĕ noh đei dan ming ưh kơ đei bu iŏk. Bu bu kư̆m kơnhăm lăng tơ hơnŭng tơmam tih, ‘nŭng hăm hla bơ ar ‘lơ̆ng, lăng rŏ kơ “gĭt kăl” dêh.

Inh oei ‘blŏk minh ‘nu bơngai mĕ pơma mơmơnh hăm inh: “Tơmam ‘nâu iĕ dêh, rŏ lăng ưh kơ tôm mah ăn kơ kon inh.” Mơ̆ng ‘bônh kơ hlôh đĕch. Jing mĕ ‘bă bu mă ưh kơ hlôh ‘maih wă kơ đei tơmam ăn kơ kon mă trŏ ‘lơ̆ng.

Đơ̆ng rŏng kơ ‘bôh hơnŭng tơmam iĕ noh ưh kơ đei bu ‘maih wă iŏk, inh đei tơchĕng pơwao lăng tơmam kiơ ‘nâu, păng pơlong pơih lăng. Lu nhôn ngeh kơ tơmam kiơ noh hmă đĕch, gô ‘nŭng hăm tơmam nai wă kơ đei bơngai iŏk. Mă lei kơplah ‘nao pơih hơnŭng tơmam noh, lu nhôn ‘bôh hlĭch. Ưh kơ đei bu ngeh lăm hơnŭng iĕ noh jơ̆ minh pôm tơmam kơmăi pơm ngôi ‘nao hrei âu, măk jên dêh kơplah noh!

Yua kơ tơmam gĭt kăl dêh, lu nhôn ưh kơ ăn kơ minh hnam dơnŏ ayơ noh, na klah song ăn kơ lơ hnam dơnŏ kư̆m wă kơ đei hiôk chơt hơdai. Năr noh, dôm kơ lu bơngai đei năm iŏk tơmam lăng ‘brơ̆k lĕch đak măt. Lu sư ưh kơngeh lăm minh pôm hnŭng iĕ thoi noh na đei đơ̆ng lăm jơhngơ̆m hơmrah păng ‘mêm truh kơ thoi noh.

Nôel tơ ‘blŏk kơ lu bơ̆n minh tơdrong: ‘Bok Dŏng Pơklaih-Yang Yêsu Krist jur tơ teh đak ‘nâu nhen thoi tơmam gĭt kăl đơ̆ng ‘Bok Kei-Dei ăn kơ kon bơngai. Mă lei “gah ‘ngoaih” kơ tơmam noh pơm kơ lơ bơngai ưh kơ wă rơih iŏk. Lu sư ưh kơ băt kơ Kră Yang, truh tơ năm chă ‘Bok Mêsi nai, “trŏ hloh” kiơ̆ kơ lu sư chang hơmĕng.

Lu sư chang gô, gô tơpŭ kơ minh ‘nu Pơtao, lăm anih pơtao hăm lu khăn ‘lơ̆ng rŏ thoi yŏng pơgơ̆r, ưh kơ lui ngeh ‘Bok Dŏng Pơklaih tơpŭ tơ lăm hơdrong rơmo dơnuh hin. Lu sư tơchĕng Kră Yang đe gô tơsu ăn kơ Sư khăn kăp jên, tơ’bich tơ lăm giơng ‘lơ̆ng rŏ, ưh kơ tơsu hăm khăn hmă đĕch păng tơ’bĭch kơ păl bơng ‘nhĕt kro tơmam mă rơmo sa rim năr.

Tôm tơdrong ‘bơm kơ tơpŭ đei tơjur jơhngơ̆m đon tơ ala pơm kơ lơ bơngai ưh kơ sơng iŏk. Lu sư lăng tơ Kră Yang păng tơchĕng: “Thoi noh đĕch hă?” Sư “ưh kơ tôm mah” wă ăn thoi kơ lu sư ‘maih wă. Lu bơ̆n ngăl tơchĕng lu bơngai arih kơplah Yang Yêsu măt tol ưh kơ lăng ‘bôh Sư. Mă lei pơma tơpă, kư̆m đei kơdih bơ̆n ưh kơ phara kơnoh.

Lăm hla bơar Tơdrong tơ’bôh chăl 11, sơ̆p hla bơar ‘Bok Kei-Dei chi gah ‘bar ‘nu bơngai mă ‘Bok Kei-Dei wơh tơ anăp ning mônh. Măr sư gô bơtho, pơm kơdranh păng pơm lơ tơdrong mơsêh tơ pơlei Jrusalem. Thoi noh na tơplih kơ mơ̆ng kơtơ̆ng păng ‘bôh tơdrong mơsêh Kră Yang, lơ bơngai ưh kơ sơng iŏk măr sư. Kơplah “sem brem” pơlôch măr sư, akâu măr sư achăng lê̆ tơ lăm trong pơlei, na kon pơlei hiôk chơt truh tơ ăn băl tơmam hiôk chơt yua kơ tơdrong lôch bơngai ‘lơ̆ng tơpăt.

Mơ̆ng tơnat kơ ngeh, mă lei kư̆m đei lu bơ̆n thoi noh, lu bơ̆n ưh kơ sơng iŏk tơmam ‘lơ̆ng rŏ đơ̆ng Kră Yang yua kơ tơdrong noh ưh kơ “tih” dah “lăp đon” hăm tơdrong proh hơmet đơ̆ng kơdih.

Kră Yang oei ling lang ăn kơ lu bơ̆n dôm kơ tơmam tih, yua kơ lu bơ̆n ‘nŭng hăm tơmam iĕ păng hmă đĕch. Hơpơi kơ lu bơ̆n huay kơ achăng lê̆ tơmam tih hloh lăm dôm tơmam noh: đơ̆ng kon Pôm Kră Yang jur tơ teh âu wă ăn kơ lu bơ̆n đei tơdrong arih ling lang.

Apĭnh đĭ đăng krao khan hơdai: Kơkuh kơ Kră Yang mă ‘mêm, apinh Ih pơih đon kon wă kơ mơ̆ng kơ tơ̆ng nơ̆r Ih, pơih măt kon wă kơ ‘bôh dôm tơdrong mơsêh Ih oei pơm, păng ăn kơ kon đei jơhngơ̆m rơmuăn wă sơng iŏk tơmam gĭt kăl hloh mă teh đak ‘nâu kư̆m đei sơng iŏk, noh jơ̆ Kon Pôm Ih, Yang Yêsu Krist. Apinh Ih tơgŭm kon wă kơ băt păng băt kơ ‘mêm bơwei dôm tơdrong Ih oei hơdai păng chông anhăk đơ̆ng Yang Bơhngol ‘Lơ̆ng lăm chăl arih kon. Kon bơnê kơ ‘Bă yua kơ tơdrong ‘mêm mơnat Ih rơkah rơkai ăn kơ bơngai bu mă lui sơng iŏk Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kư̆m đei lăng dôm tơdrong nhen thoi iĕ đĕch tă kơ tơmam gĭt kăl hloh Kră Yang wă kơ buăl ‘mêm bơwei. ‘Nĕ ăn dôm tơdrong ‘lơ̆ng đơ̆ng Kră Yang ăn mă buăl ưh kơ drơ̆ng sơng iŏk yua kơ lăng gah ‘ngoaih ‘nŭng hăm tơmam ưh kơ “ ‘lơ̆ng rŏ” thoi kơ bơ̆n chang hơmĕng. Nôel ‘nâu, athei pơih jơhngơ̆m sơng iŏk tơmam gĭt kăl hloh đơ̆ng ‘Bă kơpal plĕnh ti. Yua kơplah sơng iŏk Yang Yêsu, lu bơ̆n gô ‘bôh tơmam tih hloh, gĭt kăl hloh lăm chăl arih bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.