Đei brŏ re lăm bơyan Nôel đơ̆ng lăm mum pơlei tih, tơ anih tơpôl lơ, tơ lăm ŭnh hnam kơdih lu bơ̆n. Bơyan Nôel oei ling lang jơ̆ bơyan ‘mêm mơnat, chang hơmĕng, păng chơt hiôk kơplah rim ‘nu pơih jơhngơ̆m tơ Kră Yang ư ang kơ Kon Sư. Đơ̆ng tơmăn glă ‘Betlehem sơnăm sơ̆ noh ding truh tơ jơ̆p jang anih tơ kơpal teh đak hrei âu, nơ̆r krao wơ̆n athei năm kơkuh păng lăng ‘Bok Dŏng Pơklaih ưh kơ đei layơ tơplih.

Năr ‘nâu, ‘năr 08/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kenneth W.Osbeck kơ̆l ‘bai Ơ LU BƠNGAI TƠNĂP.

“Bĕ bơ̆n năm tơ Pơlei Betlehem chă lăng tơdrong mă Kră Yang ‘Bok Kei-Dei ‘nao roi kơ bơ̆n.” Na lu sư kơdâu brŏk tơ Pơlei Betlehem. Lu sư chă na ‘bôh Mari hăm Yôsep păng ‘bôh kon nge oei ‘bĭch kơpal ‘nhĕt kro.” (Luka 2:15-16)

Hăm inh, dôm kơ lu ‘bai hơri lăm bơyan Nôel jơ̆ lu ‘bai hơri hiôk dêh păng đei gĭt kăl mă kon bơngai băt. Lơ rơbâu ‘bai hơri noh, “Ơ Lu Bơngai Tơnăp” jơ̆ ‘bai hơri hiôk hian dêh lăm kơ pal teh đak âu. Hrei âu, ‘bai hơri ‘nâu đei hơri jơ̆p kơ anih tơ lăm kơpal teh đak yua kơ đei tơblang hăm lơ nơ̆r pơma pha ra băl. Nơ̆r lăm ‘bai hơri ‘nâu mơ̆ng hiôk tơpă, pơm kơ lu bơ̆n ‘lơ̆p ‘lŏ, mă tơdrong arih pha ra kư̆m hưch wă.

Đơ̆ng nơ̆r tơm đei puăn nơ̆r. Nơ̆r blŭng a krao lu bơ̆n năm tơ nge Yêsu tơ’bĭch kơpal bơng ‘nhĕt kro tơ pơlei ‘Betlehem:

“Ơ lu bơngai tơnăp, hơdai hơri hiôk chơt,
mơ̆t tơ lăm pơlei ‘Betlehem lăng mă rơđah tơpă,
Kră Yang pơgơ̆r pơlei ‘lơ̆ng ‘nâu jur tơ teh đak.”

Nơ̆r mă ‘bar tơ’blŏk kơ lu bơ̆n gah khôi juăt gĭt kăl, Yang Yêsu jơ̆ ‘Bok Kei-Dei nơ̆r tơm đơ̆ng ‘blŭng a nơ̆r chih gah tơdrong lui kơ khŭl bơngai lui kơ ‘Bok Kei-Dei, lăm noh đei chih, “ ‘Bok Kei-Dei Sư jơ̆ ‘Bok Kei-Dei, Hơdah hăm đơ̆ng tơdrong Hơdah, jơ̆ ‘Bok Kei-Dei tơpă đei tơpŭ mă ưh kơ đei pơm dan pơdrơ̆ng ăn đĕch”. Tơblang lăm nơ̆r yuăn thoi âu:

“Yêsu đơ̆ng ‘Bok Kei-Dei, Rơgoh ‘lơ̆ng đei đơ̆ng Rơgoh ‘lơ̆ng,
Na huay kơ pơjăm bơngai drŏ kăn noh lŭch răm.
‘Bok Dŏng Pơklaih ưh kơ tơ pŭ đơ̆ng kon bơngai.”

Nơ̆r mă pêng đei chih hiôk hian ‘lơ̆ng rŏ, đơ̆ng linh jang mă lu bơngai wei triu đei kơ tơ̆ng:

“Lu linh linh jang wang hơri ư ang hiôk hian,
Kơpal plĕnh ti ala teh âu wang hơri hơdai:
Ư ang kơ Kră Yang tơ kơpal plĕnh ti ư ang kơ Kră Yang jơ̆p kơ anih!”

Păng nơ̆r tuch luch ‘bai hơri pơyơ̆r kơ Yang Yêsu, jơ̆ ‘Bok Kei-Dei, jơ̆ Tơ’ngla oei hơdai hăm Yang ‘Bă đơ̆ng blŭng a:

“Hiôk hian Yang Yêsu jur tơ lu nhôn,
Tơdrong ư ang ăn kơ Kon Nge ‘lơ̆ng rơgoh noh khŏm khŏm;
Tơ’ngla mă ‘Bă wơh jur jing kon bơngai, noh jơ̆ đơ̆ng ‘Bok Kei-Dei.”

Đơ̆ng lơ kơ sơnăm, “Ơ Lu Bơngai Tơnăp” ‘bai hơri ‘nâu tam mă băt hơđăl đơ̆ng bơngai bu chih. Mă lei, đei lu bơngai hơgei đei chă ‘bôh hla bơar chih hăm ti đei chih kơplah sơnăm 1744 đei bơngai lui đơ̆ng English anăn sư John Wade, păng kư̆m đơ̆ng sư pơcheh preh brŏ tơ’nguơ̆ thoi kơ hrei âu. ‘Bai hơri ‘nâu blŭng a đei chih lăm sơ̆p Cantus Diversi tơ dêh char English lăm sơnăm 1751. Dang kơ minh hrĕng sơnăm đơ̆ng rŏng đei minh ‘nu ‘bok bơtho bơngai English anăn sư Frederick Oakeley đei tơblang ‘bai hơri ‘nâu tơ nơ̆r Englsih wă yua hơri lăm hnam akŭm sư. Anăn ‘bai hơri “Adeste Fideles” đei iŏk đơ̆ng nơ̆r blŭng a, noh wă khan “ Ơ lu bơngai tơnăp, athei năm lăng bĕ.”

Lu bơngai wei triu, mă khan lăng thoi kơ lŭch đĭ đăng, mă lei lu sư đei tơ’bơ̆p ‘Bok Dŏng Pơklaih Yang Yêsu. Đơ̆ng rŏng kơ linh jang weh đơ̆ng lu sư, na lu sư năm hloi tơ pơlei ‘Betlehem wă lăng dôm nơ̆r linh jang đei khan kơ lu sư. Hăm jơhngơ̆m hiôk hian, lu sư kơdâu năm chă Yang Yêsu. Sơ̆p hla bơar ‘Bok Kei-Dei chih lăm Luka 2:15-20 thoi âu:

“Đang kơ lu linh jang ‘lơ̆ng hơri păng wih tơ plĕnh đơ̆ng lu sư, lu bơngai wei triu ei pơma tơduă lu sư: “Bĕ bơ̆n năm tơ Pơlei Betlehem chă lăng tơdrong mă Kră Yang ‘Bok Kei-Dei ‘nao roi kơ bơ̆n.”

Na lu sư kơdâu brŏk tơ Pơlei Betlehem. Lu sư chă na ‘bôh Mari hăm Yôsep păng ‘bôh kon nge oei ‘bĭch kơpal ‘nhĕt kro.

‘Bôh thoi noh boih lu bơngai wei triu ră roi đêl tơdrong linh jang ‘lơ̆ng tơbăt kơ lu sư gah kon nge ‘noh. Mari ‘blŏk hơdơ̆r tơdrong noh, klaih kơ noh tơchĕng lăm đon sư kơdih. Lu bơngai wei triu wih, bơnê kơkuh kơ ‘Bok Kei-Dei yua kơ lu sư kơtơ̆ng hăm ‘bôh tơdrong noh lei-lăi thoi linh jang ‘lơ̆ng đei khan kơ lu sư.”
Lăm tơdrong arih hiôk hian kơ bơyan Nôel, lu bơ̆n ngăl ‘bônh kơ druh kiơ̆ kơ tơdrong hiôk hian lăm teh đak mă hiơt kơ tơdrong gĭt kăl tơpă kơ phĕt ‘blŏk hơdơ̆r kơ Nôel: noh jơ̆ athei tơ’bơ̆p ‘Bok Dŏng Pơklaih Yang Yêsu, wă kơ Sư tơplih jơhngơ̆m, wă kơ bơyan Nôel hlôi, lu bơ̆n kư̆m đei tơplih thoi kơ lu bơngai wei triu sơnăm sơ̆ noh: “năm hơri ư ang kơ ‘Bok Kei-Dei hăm tôm tơdrong lu sư đei kơ tơ̆ng păng ‘bôh”.

‘Bai hơri “Ơ Lu Bơngai Tơnăp” tơ’blŏk kơ lu bơ̆n wă kơ tơ’bơ̆p ‘Bok Dŏng Pơklaih Yang Yêsu lu bơ̆n athei năm tơ pơlei ‘Betlehem păng “lăng rơđah tơpă tôm tơdrong”. Lei hơdrol kơ năr Nôel buăl hăm wă chă Yang Yêsu ưh? Buăl hăm hơpơi wă đei Sư oei hơdai lĕi rai ataih đơ̆ng Sư? Buăl hăm dan jơhngơ̆m “tơpă”, dah lăp lăng Sư ưh kơ bơngơ̆t, păng yak năm gleh lap lăm chăl arih lăm bơhngol?

Kơplah lăm năr hrăt hrot, athei hơmet jơhngơ̆m buăl năm kơkuh kơ ‘Bok Dŏng Pơklaih Yang Yêsu thoi kơ ‘bai hơri “Ơ Lu Bơngai Tơnăp” đei pơma krao:

“Bơ̆n năm kơkuh kơ sư bĕ,
Bơ̆n năm kơkuh kơ sư bĕ,
Bơ̆n năm tơnoh kơkuh kơ Kră Yang Yêsu Krist.”

Apĭnh đĭ đăng krao khan hơdai: Kơkuh kơ Yang Yêsu mă ‘mêm! Kon bơnê kơ Ih yua kơ đei jur tơlăm teh đak ăn kơ kon đei tơdrong arih ling lang. Apinh ăn kơ kon đei mơn kơ tơdrong ‘mêm Ih jrŭ să, ưh kơ sĭ lăm bơyan Nôel đĕch, mă rim năr lăm chăl arih kon. Kơkuh kơ Kră Yang, apinh ăn kơ jơhngơ̆m kon chă Ih păng tơ’bơ̆p Ih thoi kơ lu bơngai wei triu noh sơ̆, wă kơ tơdrong arih kon đei tơplih, păng ră roi tơdrong ‘Nă Hal đơ̆ng Ih ăn kơ lơ bơngai nai. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lu bơ̆n ưh kơ sĭ năm tơ Kră Yang tơ’bôh tơdrong tơnăp lăm bơyan phĕt ayơ noh đĕch, mă tơdrong tơnăp athei tơ’bôh đĭ chăl arih kiơ̆ Kră Yang. Sư oei athei lu bơ̆n arih tơnăp ‘lơ̆ng: tơnăp lăm akŭm kơkuh, tơnăp lăm tơdrong chă Sư, păng tơnăp lăm tơdrong kơdranh kơ Sư.
Năr ‘nâu, buăl athei ‘măn jơ “năm tơ pơlei ‘Betlehem” hăm jơhngơ̆m chă Kră Yang đơ̆ng kơdih păng lăng Sư “mă tơpă” hloh. Athei apinh Kră Yang tơgŭm buăl đei tơdrong arih tơnăp hăm Sư mă khan adrol dah đơ̆ng rŏng kơ Nôel. Hơdrol kơ Nôel buăl hơmet jơhngơ̆m sơng iŏk Sư; đơ̆ng rŏng kơ Nôel, jơhngơ̆m buăl oei chơt hiôk păng ‘mêm kơ Kră Yang rai lơ hloh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.