Wă truh tơ bơyan Kră Yang jur gah tơdrong chang hơmĕng păng nơ̆r đei pơkă wă dŏng pơkliah đơ̆ng ‘Bok Kei-Dei. Đơ̆ng lơ rơbâu sơnăm adrol sơ̆, lăm tơdrong arih pơm đam đe anat anot, kon pơlei Isơrael oei chang gô ‘Bok Mêsi truh păng dŏng pơklaih lu sư. Kư̆m nhen thoi kon pơlei sơnăm adrol sơ̆, rim ‘nu lu bơ̆n dang ei oei kăl kơ Kră Yang truh tơ lăm chăl arih bơ̆n.

Năr ‘nâu, ‘năr 09/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kenneth W. Osbeck kơ̆l ‘bai ÊMANUEL, APINH IH JUR!

“Yua kơ noh bơih Kră Yang gô tơ’bôh kơ lu iĕm tơdra: Minh ‘nu adruh gô anăp tơpŭ kơ minh ‘nu kon drŏ-nglo, đe anăn kon sư noh Êmanuel.” (Êsai 7:14)

Tơdrong hơmet kơ phĕt bơyan Nôel ngăl pơtơm đơ̆ng tơpuăn wơ̆t năr tơpơh hơdrol kơ ‘blŏk hơdơ̆r tơpŭ kơ Yang Yêsu. Lăm kơplah jơ ‘nâu đei khan bơyan wă jê̆ truh tơ Kră Yang jur. Lăm bơyan wă jê̆ truh tơ Kră Yang jur, lu bơ̆n ‘blŏk kơ nơ̆r lu ‘bok khan lê̆ adrol lăm Pơgơ̆p pah so pơma gah ‘Bok Mêsi, Sư gô truh wă dŏng pơklaih kon pơlei Sư păng pơjing dêh char ‘Bok Kei-Dei tơ kơpal teh. Loi kơ tơdrâu hrĕng sơnăm adrol kơ tơpŭ kơ Yang Yêsu, ‘bok khan lê̆ hơdrol Êsai đei roi tơbăt thoi âu: “Yua kơ noh bơih Kră Yang gô tơ’bôh kơ lu iĕm tơdra: Minh ‘nu adruh gô anăp tơpŭ kơ minh ‘nu kon drŏ-nglo, đe anăn kon sư noh Êmanuel.” (Êsai 7:14)

Kơplah bơngai Isơrael pơm đam đe tơ ‘Babilôn, đunh kơ sơnăm, lu sư chang hơmĕng wă kơ đei ‘Bok Dŏng Pơklaih, noh jơ̆ ‘Bok Mêsi, gô truh dŏng pơklaih adrĕch adrŭng lu sư lĕch hlôi đơ̆ng pơm đam đe.

Na tuch luch, tơdrong lu sư chang gô kư̆m truh. ‘Bok Mêsi mă lu ‘bok khan lê̆ hơdrol roi tơbăt đei truh tơpă bơih. Lăm kơplah măng tơpŭ kơ Yang Yêsu, lu linh jang đei roi tơbăt tơdrong ‘nă hal kơ kon bơngai: “Măng ‘nâu tơ pơlei Đawit, đe tơpŭ kơ minh ‘nu ‘Bok Dŏng Pơklaih, ‘Bok Kră Yang, Krist.” (Luka 2:11)

Êmanuel wă khan “Bok Kei-Dei oei hơdai hăm bơ̆n.” (Mathiơ 1:23). Anăn ‘nâu wă tơ’blŏk ăn kơ lu bơ̆n gah tơdrong ‘mêm păng ‘Bok Kei-Dei oei hơdai rim chăl arih lu bơngai bu mă lui kơ Sư. Lăm chăl arih ‘bĕnh kơ măng mu, ơh sơ’ngon, blĕk klai, lu bơ̆n oei đei ‘Bok Kei-Dei oei hơdai păng tơgŭm lu bơ̆n lăm dôm kơ năr noh.
Rim kơ năr Nôel truh, lu bơ̆n đei kơtơ̆ng ‘bai hơri ư ang “Êmanuel, apinh Ih jur!”, ngăl hơri tơ lăm hnam akŭm kơplah jơ ‘nâu. ‘Bai hơri ‘nâu đei đơ̆ng kră sơ̆ bơih. Lăm kơplah wă truh tơ kơ măng Nôel, ‘bai hơri ‘nâu ngăl hơri lăm jơ kơ sơ̆ rim kơ hnam akŭm. Rim kơ trong hơri dơ̆ng, nơ̆r hơri tơ’bôh tơdrong chang gô đơ̆ng ‘Bok Mêsi, păng ư ang kơ Sư hăm anăn gĭt kăl thoi kơ: Tơ’ngla gơh hơgei, Tơ’ngla mơsêh mơyang, Tơ’biĕng đơ̆ng Jese, sơnglŏng wŏng tar hơdah hơdong, Tơ’ngla đei ‘long pơih khoă đơ̆ng Đawit.

‘Bai hơri ‘nâu đei đơ̆ng nơ̆r krao khan đơ̆ng bơngai lui kơ Kră Yang đei đơ̆ng lơ jơhnơr. Kơplah đei mơ̆ng kơtơ̆ng, đơ̆ng rim kơ trong hơri nhen thoi dui jơhngơ̆m đơ̆ng rim bơngai oei chang gô ‘Bok Dŏng Pơklaih:“Apinh Êmanuel đei năm oei hơdai. Đunh sơ năm bơih weh ataih đơ̆ng dêh char chĕp tơdrong arih pơmat tat.” Năr ‘nâu, mă khan lu bơ̆n ưh pă pơm đam đe thoi kơ kon pơlei Isơrael sơnăm noh sơ̆, kư̆m đei lu bơ̆n oei đei glang tơdrong yoch chô̆, hli tơrơ păng sơ’ngon. Nơ̆r krao khan “ Êmanuel, apinh jah jur!” jơ̆ nơ̆r krao apinh Yang Yêsu mơ̆t lăm chăl arih păng dŏng pơklaih lu bơ̆n đơ̆ng tơdrong yoch, ơh sơ’ngon lăm chăl arih, ba ăn kơ lu bơ̆n jơhngơ̆m chang hơmĕng lăm Sư:

Apinh Êmanuel oei hơdai hăm kon pơlei Sư.
Đunh sơnăm ataih đơ̆ng dêh char pŭ iok tơdrong pơmat tat.
Tơdrong arih đei lơ tơdrong pơmat tat măng mu.
Apinh Êmanuel oei hơdai hăm kon pơlei Sư.
Athei hơri hiôk chơt, chang gô tơpŭ kơ Kră Yang.
Ba ăn tơdrong chang hơmĕng, pŭn hiôk ăn kơ kon bơngai.

Apĭnh đĭ đăng krao khan hơdai: Kơkuh kơ Kră Yang mă ‘mêm, Ih bơih jơ̆ kon chang hơmĕng! Kon bơnê kơ Ih yua kơ đei tơpŭ kơ Ih tơ lăm teh đak ‘nâu ăn kơ kon đei dŏng pơklaih đơ̆ng tơdrong hli tơrơ păng tơdrong yoch chô̆ pơkơ̆ng. Lăm rim tơdrong arih, hơpơi đơ̆ng Ih ăn kơ kon băt kơ Ih oei hơdai kon, păng chông anhăk kon đơ̆ng lăm măng mu lăm chăl arih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, anăn Êmanuel tơ ‘blŏk lu bơ̆n gah ‘Bok Kei-Dei oei hơdai lu bơ̆n: đơ̆ng lăm dui jơhngơ̆m, chơt hiôk, păng lăm kơplah rơdu tơrăn, ơh sơ’ngon. Buăl oei lăm tơdrong trăp trĭn kơ tơdrong yoch? Athei apinh Êmanuel, Tơ’ngla huay kơ jô̆ yo păng tơplih buăl. Buăl oei lăm ơh sơ’ngon păng chhŭr nuih? Athei sơng iŏk Êmanuel oei hơdai hăm buăl; Sư gô oei hơdai hăm tơdrong ‘mêm mơnat Sư. Lăm bơyan Nôel âu, hơpơi kơ buăl băt Êmanuel – ‘Bok Kei-Dei oei hơdai lu bơ̆n oei oei hơdai dŏng pơklaih, ba ăn chang hơmĕng kơ rim ‘nu lu bơ̆n rim jơ phŭt lăm chăl arih bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.