Bơngai bu dan đon lui anih Kră Yang lei gơh sơng iŏk tơdrong dŏng pơklaih păng jing kon pơlei lăm Dêh Char ‘Bok Kei-Dei, gơh arih lăm tơdrong oei hơdai păng pơgơ̆r đơ̆ng Kră Yang. Mă lei, tơpă lăm, tơdrong arih bơngai lui kơ Kră Yang kŭm đei tơ‘bơ̆p lơ tơdrong pơmat tat. Mưh lăp tơplih yua kơ sơng iŏk tơdrong hiôk chơt, lei lu bơ̆n đei tơ’bơ̆p hăm dôm tơdrong ơh sơ’ngon. Hăm đei layơ buăl jet kơdih “dêh char ‘Bok Kei-Dei tơyơ” dah ưh?

Năr ‘nâu, ‘năr 10/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Missey Butlerkơ̆l ‘bai DÊH CHAR ‘BOK KEI-DEI TƠYƠ?

“Lu bơngai Pharisi jet Yêsu: “Layơ ‘Bok Kei-Dei wă pơgơ̆r teh đak?” Yêsu tơl: “’Bok Kei-Dei pơgơ̆r bơ̆n ưh kơ ‘bôh păng măt ôh. Ưh kơ đei bu gơh khan: ‘Noh, ‘Bok Kei-Dei pơgơ̆r boih, yua kơ ‘Bok Kei-Dei pơgơ̆r lăm jơhngơ̆m bơ̆n.”  (Luka 17:20-21)

Rim măng Nôel, mĕ đei athei inh păng lu ‘nhŏng hăm gơh mơ̆t tơ lăm phŏng sơng tơmoi, rơih mĭnh pôm tơmam apah ‘bơ̆t ala ‘long hơngo na pơih lăng. Cheng tơnuh ŭnh nhur, lu nhôn ‘nă hal năm truh tơ dôm tơmam apah đei ‘măn ‘lơ̆ng rŏ. Iŏk chĕp, gơgŭ rim kơ tơpu tơmam apah, lu nhôn đei khan lăng tơmam gah lăm ‘noh kiơ, jơhngơ̆m ‘bĕnh ‘nă hal păng tơchĕng pơwao.

Mă dang ei inh ưh pă jơ̆ mĭnh ‘nu bơngai ‘lơ̆p bơih, mă lei lăm bơyan phĕt ‘blŏk ‘nâu, inh kŭm đei pơih mĭnh pôm tơmam apah Nôel hrôih. Tơmam apah ‘noh đei ăn yua kơ đơ̆ng ‘Bă Kơpal Plĕnh. Inh gô pơ̆n nuih pơma khan ‘nâu jơ̆ mĭnh lăm dôm tơmam gĭt kăl hloh mă inh đei sơng iŏk, păng ‘noh đei ba truh tơdrong dŏng pơklaih kơ chăl arih inh.

Yua kơ lăm mĭnh khei năr đunh, inh băt ‘bôh đon tơchĕng kơdih ling lang tơwŏk yua kơ ‘bar tơdrong: dôm kơ tơdrong hmach lăm tơdrong so păng dôm kơ hiơ̆k bơngơ̆t gah ning mônh, truh kơmah hiơt khan kơdih kăl kơ arih tơpă tôm mah kơ dang ei. Đon tơchĕng inh đei pơjăng băl hăm tơdrong so sơ̆ păng ning mônh, pơm kơ inh ưh pă mơn đei tơdrong hiôk hian kơ năr ‘nâu.

Kơplah băt kơ năl kơ đơ̆ng kơdih kâu, inh đei tơ’blŏk khan kơdih kăl kơ arih lăm teh đak ‘nâu nhen thoi oei arih lăm dêh char ‘Bok Kei-Dei. Dêh char noh ưh kơ đei tơplih, na ‘bĕnh blai tơdrong tơpăt, hiôk hian păng hiôk chơt lăm Yang Bơhngol ‘Lơ̆ng. Păng tơdrong hlĭch chrơp jơ̆ Yang Bơhngol ‘Lơ̆ng oei pơgơ̆r lăm kơdih inh!
Nơ̆r ‘Bok Kei-Dei lăm sơ̆p Luka chăl 17 chih khan, bơngai Pharasi jet Kră Yang Yêsu kơplah ayơ dêh char ‘Bok Kei-Dei gô truh. Rŏ lăng lu sư chang gô mĭnh dêh char ‘bôh hloi păng măt, ‘bĕnh tơdrong ‘lơ̆ng rŏ păng gơh lăng ‘bôh hăm măt hmă. Mă lei Yang Yêsu ăn kơ lu sư băt khan dêh char ‘Bok Kei-Dei ưh kơ truh kiơ̆ trong mă lu sư ngăl tơchĕng, yua kơ dêh char ‘noh oei lăm jơhngơ̆m kơ rim ‘nu bơngai lui kơ Sư. Păng kon bơngai lăp gơh hlôi mơn đei dêh char ‘Bok Kei-Dei lăm kơpal teh đak ‘nâu kơplah ăn kơ Sư pơgơ̆r lăm jơhngơ̆m bơ̆n. Sơ̆p Hla Bơar ‘Bok Kei-Dei chih:

“Lu bơngai Pharisi jet Yêsu: “Layơ ‘Bok Kei-Dei wă pơgơ̆r teh đak?” Yêsu tơl: “’Bok Kei-Dei pơgơ̆r bơ̆n ưh kơ ‘bôh păng măt ôh. Ưh kơ đei bu gơh khan: ‘Noh, ‘Bok Kei-Dei pơgơ̆r boih, yua kơ ‘Bok Kei-Dei pơgơ̆r lăm jơhngơ̆m bơ̆n.” (Luka 17:20-21)

Kră Yang đei ăn kơ inh ‘bôh dêh char Sư đei truh păng inh hlôi mơn đei dêh char ‘noh lăm năr ‘nâu, ưh kơ trŏ jơ̆ tơdrong ataih atŏ lăm ning mônh. Trŏ yua kơ thoi noh na Yang Yêsu đei krao đĭ đăng kon bơngai athei tơbral wă kơ gơh yak năm păng arih lăm dêh char plei ‘lơ̆ng:

“Iĕm athei tơbral kơdih tôm tơdrong yoch, yua kơ ‘Bok Kei-Dei wă pơgơ̆r iĕm boih.” (Mathiơ 4:17)

Dah lu bơ̆n pơih ‘măng jơhngơ̆m păng ăn Kră Yang Yêsu pơgơ̆r chăl arih bơ̆n, ‘noh jơ̆ kơplah lu bơ̆n hlôi mơn đei dêh char Sư. Yang Yêsu jơ̆ tu tơdrong arih, hiôk hian, păng pŭn hiôk. Tơdrong hiôk chơt ‘bĕnh blai kơ inh kơplah inh băt ‘Bok Krist jơ̆ đĭ đăng kơ inh mă lăm dang ei păng ling lang. Nơ̆r ‘Bok Kei-Dei pơma hăm lu bơ̆n khan: “Yêsu Krist pơgơ̆r đĭ-đăng, hăm oei hơdai đĭ rim khŭl bơngai ‘noh.” (Kôlôse 3:11). Sư đei, oei, păng gô hơdai lăm chăl sơ̆, dang ei, păng tơ anăp kơ lu bơ̆n!

Đơ̆ng rŏng kơ đei Kră Yang tơplih ‘nao đon tơchĕng, inh ‘nao wă băt kơnăl tơdrong ‘lơ̆ng rŏ păng tơdrong rơngei đơ̆ng chăl arih ‘nâu. Inh pơjuăt kơnhăm lăm dôm tơdrong iĕ ioch lăm chăl arih, wă khan nhen thoi tơdrong hiĕk chhôk hal đơ̆ng mĭnh ‘nu bơngai hơ’lơ̆p, dah kial dơhlu pơm kơ hla ‘long pơpơ̆. Inh ưh pă đei hăt hot lăng hlôi kơ dôm tơdrong nhen kơ thoi hmă đĕch lăm chăl arih rim năr bơih, kŭm ưh kơ ăn kơ dôm tơdrong hiơ̆k bơngơ̆t gah ning mônh dah mơlŏu kơ tơdrong adrol so sơ̆ pơm kơ inh achăng dôm jơ phŭt gĭt kăl đơ̆ng dang ei.

Kơplah bơyan Nôel truh, inh bơnê kơ Kră Yang yua kơ đei ăn kơ inh đei pơih mĭnh pôm tơmam apah hơ iă, ‘noh trŏ jơ̆ tơmam apah kơ dang ei. Yua kơ ‘noh, inh gơh sơng iŏk ‘lơ̆ng rŏ kơ rim jơ năr mă Sư ‘măn ăn. Inh đei pơhrăm iŏk khan kơdih kăl gĭt kơ rim jơ phŭt đơ̆ng lăm năr ‘nâu, yua kơ ưh kơ đei bu băt tơdrong kiơ gô truh lăm năr dơning. Kơplah lu bơ̆n arih thoi oei arih lăm dêh char ‘Bok Kei-Dei, lu bơ̆n gô băt kơnăl kơ tơdrong oei hơdai arih păng hơnơ̆ng đơ̆ng Sư lăm rim kơ jơ năr. Yua kơ, đơ̆ng rŏng tôm tơdrong, Sư ling lang oei hơdai lu bơ̆n.

Apĭnh đĭ đăng krao khan hơdai: Kơkuh kơ Kră Yang mă ‘mêm! Mưh lăp kơplah kon đei ăn jơhngơ̆m kơdih đei pơgơ̆r yua kơ đơ̆ng tơdrong so sơ̆ păng dôm tơdrong hiơ̆k tơ tăm đơ̆ng ning mônh. Mă khan oei arih lăm teh đak ‘nâu, mă lei apinh Kră Yang ăn kơ kon gơh hlôi đei mơn đei dêh char Ih. Hơpơi kơ chăl arih kon jơ̆ chăl arih đơ̆ng tơdrong chu yom, păng pơchrang ‘bâu phu đơ̆ng plei ‘lơ̆ng kơ dôm lu bơngai jum dăr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Kră Yang oei oei hơdai lu bơ̆n lăm rim jơ phŭt kơ chăl arih. Mă khan tơdrong so sơ̆ lu bơ̆n đei lơ tơdrong glăi, dang ei păng ning mônh oei đei lơ tơdrong pơmat tat, lei lu bơ̆n oei hơđơ̆ng lui gơnang anih Sư, jơ̆ Tơ’ngla Pơgơ̆r lăm đĭ trong yak năm lăm teh đak. Athei krao apinh Kră Yang tơgŭm buăl hlôi mơn đei dêh char Sư oei kơplah arih lăm teh đak ‘nâu, jơ̆ dêh char ‘bĕnh blai tơdrong hiôk hian păng rơnŭk rơnua. Athei ling lang ‘blŏk răk dêh char ‘Bok Kei-Dei ưh kơ đei tơyơ ataih, mă lei jơ̆ trŏ lăm jơhngơ̆m dôm lu bơngai sơng iŏk Kon Nge ‘lơ̆ng rơgoh jur, arih lăm tơdrong oei hơdai đơ̆ng Sư, păng năm hơdai hăm Sư đĭ chăl arih bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.