Nôel jơ̆ bơyan kơ hơdah păng ‘lơ̆ng rŏ, jơ̆p anih đei rang rŏ, dreng drao hloh kơ đĭ đăng. Mă lei, khei năr kơ năr Nôel blŭng a ưh kơ đei ‘lơ̆ng rŏ thoi noh. Kơplah teh đak pơ-ư kơ dôm tơdrong kiơ rang rŏ, pơgơ̆r păng pran kơtang, lei ‘Bok Kei-Dei tă kơ đei rơih dôm tơdrong kiơ rơdu, iĕ ioch păng chu iŏk đon ala wă tơ ‘bôh tơdrong ư-ang Sư. Păng trong yak năm kơpal teh đak đơ̆ng Yang Yêsu đei jơ̆ mĭnh tơdrong tơ’bôh kơ tơdrong ‘noh.

Năr ‘nâu, ‘năr 12/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Brian Simmons kơ̆l ‘bai ĐƠ̆NG BƠNG ‘NHĔT TRUH TƠ ‘LONG PƠGLANG.

“ ‘Bok Kei-Dei ăn kơ bơ̆n oei hơdai minh jơhngơ̆m minh đon hăm Yêsu Krist. ‘Bok Kei-Dei ăn kơ Kon Sư Yêsu Krist tơbăt ăn kơ bơ̆n gơh tơchĕng hơgei gah tơdrong Sư. Yua kơ đơ̆ng Yêsu Krist na ‘Bok Kei-Dei huai iŏk bơ̆n đơ̆ng tơdrong yoch, Sư jô̆ bơ̆n jing bơngai tơpăt hăm Sư păng Sư ăn kơ bơ̆n jing bơngai ‘lơ̆ng.” (I Kôrintô 1:30)

Đei dôm hơ’mon ling lang pơm kơ lu bơ̆n hơ iă, gĭt kăl jơ̆ dôm hơ’mon đei tơdrong hơđăl “tơplơ̆ tơdrong”, blư thar dĭng truh kơ ưh kơ đei bu gơh băt adrol. Wă khan, mĭnh ‘nu bơngai hŏk hnam trưng iơ̆m dim, ưh kơ đei bơngai băt na thar đei mĭnh ‘nu adruh ayơ noh kơnhăm, lăm kơplah mĭnh ‘nu tơdăm đe pơư păng pơ̆n nuih tă ưh kơ đei rơih iŏk. Dah lăm mĭnh tơdrong tơblah ayơ noh, bơngai rơdu tơrăn, ngeh kơ thua bơih, tuch luch tă kơ kĕjei bơngai pran tih păng mơdrŏng hloh. Chăl arih mưh lăp hlĭch tơpă, dôm tơdrong iĕ hloh păng rơrăn tă kơ gơh đei hloh kơ dôm tơdrong kiơ ‘lơ̆ng rŏ păng pran kơtang.

Lu bơ̆n ‘bôh dôm kơ hơ’mon thoi noh hơiă tơpă, rŏ lăng yua kơ lu bơ̆n ưh kơ đei tơ’bơ̆p lăm chăl rih. Yua kơ tơpă lăm chăl arih, bơngai mơdrŏng păng pran tih ngăl đei kĕ jei hloh, na dôm lu bơngai rơdu tơrăn đei pŭ iŏk tơdrong ưh kơ kĕjei.
Mă lei, lăm tơdrong tơdă đơ̆ng ‘Bok Kei-Dei ‘măn ăn kơ kon bơngai, Sư tơplơ̆ kơ tơdrong proh hơmet mă teh đak juăt ‘noh jơ̆ bơngai tơrăn đei pôk tơiung, bơngai pran tih đei tơjur tơ ala, bơngai pơang đei pơ̆k huŏng; tơplơ̆ dơ̆ng, bơngai kơ’bah đei phĭ mah. Tơdrong ‘nâu đei tơ’blŏk truh lăm ‘bai hơri đơ̆ng Mari: “Sư yua tơdrong mơsêh mơyang Sư wă blah pơpuh tŭk lê̆ lu bơngai mă pơang akâu kơdih hăm pơm kơnê̆ kơ đe. Sư tơjur tŭk đĭ lu bơngai mă pơm tih sơ̆, na atŏk dơ̆ng lu bơngai mă pơm iĕ hloh kơ đe. Sư ‘me lu bơngai pơngot rơwĕt tơmam sa ‘lơ̆ng, mă-lei lu bơngai mơdrŏng noh Sư tơbrŏk ti hoh đĕch.” (Luka 1:51-53)

Tơdrong đơ̆ng bơngai “dôm lu bơngai đei đon tơchĕng pơ ang” jơ̆ lu sư dan tơdrong hơmĕng lăm kơdih kâu tơplih kơ anih ‘Bok Kei-Dei, tơchĕng khan kơdih đei tôm păng ưh kơ kăl tơdrong dŏng pơklaih bơih. Jơhngơ̆m pơ ang ‘nâu đei lăng jơ̆ tơdrong yoch, thoi Tơdrong Pơđơ̆k 16:18 chih: “Pơang năm adrol, hor ba tơdrong răm; Pơang pơrŏ năm adrol, pơ̆k huŏng đơ̆ng rŏng.” Kơdih Kră Yang gô tơjur lu sư tơ ala păng puh “brŏk ti hoh”. Lăp dôm lu bơngai bu rơhing ‘Bok Kei-Dei na gơh phĭ tôm.

Lăm chăl Yang Yêsu, kon pơlei Isơrael đei đe pơm tơdrong kơnê̆ păng pơjăm pơjuă đơ̆ng tơdrong pơgơ̆r Rôm. Lu sư đei arih ala kơ đơ̆ng dôm tơdrong pơgơ̆r ‘bĕnh tơdrong mơdrŏng, pran tih, phŏ kŭm đei ham. Lu sư chang gô ‘Bok Mêsi gô ‘bôh thoi mĭnh ‘nu pơtao pơgơ̆r wă dŏng pơklaih lu sư hlôi đơ̆ng tơdrong pơgơ̆r đơ̆ng pơlei ‘nguaih. Mă lei, tơplơ̆ hăm dôm tơdrong chang hơmĕng, Yang Yêsu, ‘Bok Mêsi đei pơkă ăn đơ̆ng rơbâu sơnăm sơ̆, đei tơpŭ lăm mĭnh bơng ‘nhet hmă đĕch, ưh kơ đei tơdrong pran tih, ưh kơ mơdrŏng tih.

‘Bok Kei-Dei mă lu bơ̆n oei kơkuh hơ iă kơ dôm tơdrong kiơ mă teh đak lăng hmă đĕch, iĕ hloh, rơdu, dah phŏ kŭm kơhlôh kơwao. Trŏ tơpă thoi dôm tơdrong kiơ mă ‘bok Pôl đei chih: “Mă-lei ‘Bok Kei-Dei rơih iŏk boih lu bơngai ưh kơ hơgei ala teh âu wă pơm kơ lu bơngai hơgei mơlâu; ‘Bok Kei-Dei kư̆m rơih iŏk boih lu bơngai tơrăn ala teh âu wă pơm kơ lu bơngai pran kơtang mơlâu; păng ‘Bok Kei-Dei rơih iŏk boih lu bơngai mă pă jing jat pă-tat tơdrong wă pơthuơ lu bơngai pơm tih pơm yŏng. Thoi noh na ưh kơ đei bu gơh pơang akâu sư ‘bơ̆t anăp ‘Bok Kei-Dei. ‘Bok Kei-Dei ăn kơ bơ̆n oei hơdai minh jơhngơ̆m minh đon hăm Yêsu Krist. ‘Bok Kei-Dei ăn kơ Kon Sư Yêsu Krist tơbăt ăn kơ bơ̆n gơh tơchĕng hơgei gah tơdrong Sư. Yua kơ đơ̆ng Yêsu Krist na ‘Bok Kei-Dei huai iŏk bơ̆n đơ̆ng tơdrong yoch, Sư jô̆ bơ̆n jing bơngai tơpăt hăm Sư păng Sư ăn kơ bơ̆n jing bơngai ‘lơ̆ng.” (I Kôrintô 1:27-30)

‘Bok Kei-Dei yua dôm tơdrong kiơ kon bơngai khan jơ̆ ưh kơ đei yua wă pơm tơdrong proh hơmet dŏng pơklaih đơ̆ng Sư. ‘Bok Krist đei pŭ iŏk pơ̆ng kơ đĭnh kơpal ‘long pơglang jơ̆ trong mă ‘Bok Kei-Dei yua wă dŏng pơklaih kon bơngai. ‘Noh jơ̆ minh tơdrong mă kon pơlei Isơrael jơhnơr ‘noh anat kơ gơh tơchĕng, yua kơ lu sư chang gô minh ‘nu ‘bok pơtao pran tih, mơdrŏng tih, ưh kơ jơ̆ mĭnh ‘Bok Pơklaih arih chăl arih dơnuh pơmat tat, pŭ iŏk dôm tơdrong pơmat tat păng mơlâu plơ̆m. Tơdrong ‘nâu tơ’bôh kon bơngai ưh kơ gơh wă yua tơdrong gơh hơgei kơdih akâu wă hlôh băt gah ‘Bok Kei-Dei.

Trŏ yua kơ tơdrong gơh hơgei păng wă đơ̆ng ‘Bok Kei-Dei hloh ataih đơ̆ng dôm tơdrong hlôh băt đơ̆ng kon bơngai, na lu bơ̆n kăl kơ achăng dôm tơdrong pơrŏ păng pơang. Tơplih yua kơ gơnang kơ jơhngơ̆m pran dah dôm tơdrong gơh hơgei đơ̆ng kơdih kâu, Kră Yang krao lu bơ̆n athei chu iŏk đon ala păng lui gơnang anih Sư, thoi Yakơ tơ’blŏk kơ lu bơ̆n khan: “Iĕm athei pơma sơdrĭ tơ ala kơ Sư, na Sư ‘brơ̆k mơnat tơiung iĕm.” (Yakơ 4:10).

Bơyan Nôel ‘nâu, lu bơ̆n ưh kơ pơdơh ‘bơ̆t tơdrong lăng ‘bôh dôm kơ ŭnh dreng drao dah tơdrong hiôk chơt gah ‘nguaih, mă lei kŭm athei ăn jơhngơ̆m kơdih tơchĕng pơwao gah chăl arih chu iŏk đon ala đơ̆ng ‘Bok Dŏng Pơklaih Yang Yêsu, gah bơng ‘nhet dơnuh hin anih Sư tơpŭ, păng gah ‘long pơglang mă Sư đei chu pŭ tơplih wă dŏng pơklaih lu bơ̆n. Bơng ‘nhet păng ‘long pơglang đei jơ̆ dôm tơdrong pơjăm lăm măt teh đak, mă lei jing tih hloh lăm tơdrong tơdă dŏng pơklaih đơ̆ng ‘Bok Kei-Dei. Lu bơ̆n pŭn hiôk tơpă kơplah gơh ” oei hơdai minh jơhngơ̆m minh đon hăm Yêsu Krist. ‘Bok Kei-Dei ăn kơ Kon Sư Yêsu Krist tơbăt ăn kơ bơ̆n gơh tơchĕng hơgei gah tơdrong Sư. Yua kơ đơ̆ng Yêsu Krist na ‘Bok Kei-Dei huai iŏk bơ̆n đơ̆ng tơdrong yoch, Sư jô̆ bơ̆n jing bơngai tơpăt hăm Sư păng Sư ăn kơ bơ̆n jing bơngai ‘lơ̆ng.” (I Kôrintô 1:30)

Apĭnh đĭ đăng krao khan hơdai: Kơkuh kơ Yang Yêsu mă ‘mêm, kon bơnê kơ Ih yua kơ đei ‘mêm mơnat kơ kon, đei jur jing kon bơngai wă lôch tang yua kơ tơdrong yoch kon. Hơpơi jơhngơ̆m kon ling lang tơ’blŏk gah chăl arih chu iŏk đon ala đơ̆ng Ih, đơ̆ng bơng ‘nhet anih Ih tơpŭ dĭng truh tơ ‘long pơglang mă Ih đei pŭ iŏk yua kơ kon. Kon lui Kră Yang oei yua dôm tơdrong rơdu tơrăn, ưh kơ kĕ jei păng pơmat tat wă pơhrăm pơjuăt kon băt arih chu iŏk đon ala păng lui gơnang kơ Ih hloh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, bơyan Nôel ‘nâu, athei ‘măn jơ năr wă ưh kơ sĭ lăp tơchĕng pơwao gah tơdrong jur đơ̆ng Yang Yêsu, mă kŭm tơchĕng pơwao gah chăl arih păng tơdrong chu pơmat mă Sư đei pŭ yua kơ lu bơ̆n. Yua kơ Sư đei ‘măn ăn kơ buăl minh kơmil chu iŏk đon ala, na buăl kŭm athei tơjur kơdih pơyơ̆r chăl arih kơ Sư, băt kơnăl khan dôm tơdrong pơmat tat, tơdrong pơlong lăng lăm chăl arih đei lăm tơdrong pơgơ̆r đơ̆ng ‘Bok Kei-Dei, păng đơ̆ng noh, buăl pơhrăm băt gơnang lăm tơdrong mơsêh mơyang đơ̆ng Sư tơplih yua kơ gơnang kơ jơhngơ̆m pran kơdih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.