Hăm đei layơ buăl mơn kơ tơdrong arih ưh kơ đei wơ̆ ‘lŏ lăm tơdrong hlôh băt kơ Kră Yang, păng pơlơ̆k dơ̆ng dôm kơ tơdrong mă ưh kơ trŏ? Nơ̆r Kră Yang đei pơtih thoi kơ “ ‘Bĕng arih ling lang” rong arih gah bơhngol lu Bơngai Lui kơ Sư. Mă lei gô thoi yơ tơdah Bơngai Lui ưh kơ wă kơ sa ‘bĕng noh rim năr? Pơm liơ wă kơ bơngai noh wơ̆ ‘lŏ tơdah weh đơ̆ng tơdrong bơtho tơ’bôh đơ̆ng Kră Yang đơ̆ng lăm sơ̆p hla bơar ‘Bok Kei-Dei?

Năr ‘nâu, ‘năr 13/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kenneth Kathryn Graves kơ̆l ‘bai PƠHRĂM BĂT KƠ KRĂ YANG.

Lăm kơ măng adrol kơ Nôel, klo akăn nhi ming hơmet gre tang wang ăn kơ ‘bar ‘nu kon drŏ nglo. ‘Nâu jơ̆ tơmam wă ăn kơ măr sư. Klo inh đei dônh minh pôm bulong iĕ đơ̆ng hơnă hnam păng pơlong tah tơ lăm gre, na sư ưh kơ băt tah noh hăm trŏ dah ưh. Inh đei tơtăm, lăng jơ păng ‘bôh đei kơ minh jơ bơih tam mă đei tŏk bŏk kơ tơdrong jang noh.

Klo inh tơ hôih jơhngơ̆m sư, dan bulong iĕ noh tơ lăm tơmam oei rơkah păng pơma khan ming hơmet đang hơdrol kơ wă tep, yua kơ ‘bar ‘nu kon nhi ngăl iung hrôih lăm năr Nôel, nhi ưh kơ wă lê̆ dôm tơdrong mơlôh mơlônh thoi noh ôh.
Inh chă pơih lăm dôm tơmam păng ‘bôh hla bơar bơtho tơ’bôh wă yua tơmam noh. Inh pơma: “Rŏ lăng ba kư̆m ưh kơ gơh wă tah hơmet gre ‘nâu ôh, lei pơlong đŏk lăng hla bơar ‘nâu!” Inh oei pơma păng pơih rah hla bơ ar noh.

Yua kơ đơ̆ng pơm kiơ̆ tơdrong bơtho tơ’bôh, lăm pêng jĭt phŭt đĕch, nhi đei tah hơmet đang hloi bơih gre tang wang ‘brê păng pơdơ̆ng ‘bơ̆t cheng ‘long hơngo Nôel. Mă khăn gleh lap, inh kư̆m mơn đei hiôk. Oei pă minh pôm gre dơ̆ng kăl kơ tah hơmet, na đơ̆ng rŏng kơ tah hơmet đang, nhi đei pơdơh minh ‘bar jơ hơdrol kơ đei râu hăm nơ̆r jreo ôr hiôk đơ̆ng lu kon hơ’lơ̆p đơ̆ng ‘năr tam mă lĕch.

Kơplah jreo ôr chơt hiôk đơ̆ng ‘bar ‘nu kon drŏ nglo nhi lăm pơge Nôel sơnăm noh, inh mơn ‘bôh tơdrong ưh kơ đŏk hla bơar bơtho tơ’bôh noh pơm kơ nhi ưh kơ đei tep minh ‘bar jơ păng gleh lap. Tơdrong noh pơm kơ inh tơchĕng tơ kơdih akâu inh, đei lơ wơ̆t inh tŭk lê̆ dôm kơ tơdrong bơtho tơ’bôh đơ̆ng ‘Bok Kei-Dei lăm Nơ̆r Sư. Păng sơ’ngon tơpă đei lơ Bơngai Lui kư̆m ưh kơ đei đŏk Nơ̆r Kră Yang.

Kon pơlei Isơrael kư̆m đei tơdrong thoi noh. Mă khan lu sư băt kơ Jĭt Khôi Juăt, mă lei lu sư oei pơm kiơ̆ kơ jơhngơ̆m ‘maih wă kơdih. Đei lơ wơ̆t ‘Bok Kei-Dei krao lu sư wih brŏk tơ ‘Bok Kei-Dei. Mă khan lu sư tơbral păng wơ̆t dơ̆ng, mă lei tơdrong noh ưh kơ sĭ huay pă pŭ trăp bơih ôh mă lu sư oei pŭ iŏk tơdrong đơ̆ng ưh kơ chu yom.

Lăm I Hơ’mon 13, lu bơ̆n đŏk gah tơdrong Đawit drơ̆ng năm ba Hom Pơgơ̆p tơ Jêrusalem. Sơ̆p hla bơar ‘Bok Kei-Dei chih: “Đawit păng đĭ-đăng bơngai Isơrael năm hơdai sư tŏk tơ Baala noh Kiriat Jêarim, lăm dêh Juđa, wă kơ năm iŏk hom pơgơ̆p krao Anăn noh Kră Yang Tih Hloh Tơ’ngla dan tang-dŏ Sư sơlam kơ chêrubim. Lu sư tung iŏk Hom Pơgơ̆p Kră Yang ‘Bok Kei-Dei đơ̆ng hnam Abinađap, tah atŏk tơ kơpal gre rơmo ‘nao; na Usa păng Ahiô dui rơmo hor gre. Pơtao Đawit păng đĭ-đăng bơngai Isơrael đĭ jơhngơ̆m chơt hiôk ‘bơ̆t anăp Kră Yang ‘Bok Kei-Dei, hơri, reh brŏ, ot brŏ, teh hơgơ̆r iĕ, preh chhar păng hlôm keng hiôk chơt” (trong 6-8)

Mă lei, kơplah kon pơlei oei chơt hiôk, hơri soang bơnê kơ Kră Yang, rơmo hor dui gre noh tơsĕr, na Usa chro ti rôp Hom noh, na “Kră Yang hil dêh kơ Usa păng Kră Yang pơlôch hloi sư, yua kơ sư rôp ‘bơm hom pơgơ̆p; na sư lôch hloi tơ noh ‘bơ̆t anăp Kră Yang ‘Bok Kei-Dei.(trong10). Đơ̆ng rŏng kơ Usa lôch, pơtao Đawit sơ’ngon păng hli tơrơ yua kơ sư băt kơdih đei ưh kơ pơm kiơ̆ đơ̆ng ‘Bok Kei-Dei bơtho tơ’bôh.

‘Bok Kei-Dei đei bơtho tơbăt rơđah lăp lu bơngai Lêwi đĕch gơh chĕp tung Hom Pơgơ̆p, păng ưh kơ đei bu gơh chĕp Hom noh, dah ưh kơ chu lei gô lôch (Jô̆ Bơngai 4:15). Mă lei, pơtao Đawit chơ Hom Pơgơ̆p hăm gre rơmo păng wơh bơngai nai ưh kơ bơngai Lêwi tung Hom noh. Rŏ lăng pơtao Đawit ưh tam mă pơyom păng ưh tam hlôh wao tôm gah tơdrong ‘lơ̆ng rơgoh ‘Bok Kei-Dei.
Mă lei, đơ̆ng rŏng kơ tôm tơdrong ơh sơ’ngon ‘nâu, pơtao Đawit mơn ‘bôh Sư glăi păng sư adrin pơm kiơ̆ kơ ‘Bok Kei-Dei bơtho. Kơplah Đawit man hnam pơtao đang bơih, sư đei hơmet anih kơ Hom Pơgơ̆p. Kơplah ‘nâu, Đawit yua bơngai Lêwi tung Hom yua kơ sư hlôh thoi âu: “Kơplah noh Đawit khan ‘nguaih kơ bơngai Lêwi, ưh kơ đei bơngai bu gơh tung Hom Pơgơ̆p Kră Yang ‘Bok Kei-Dei, yua kơ Kră Yang ‘Bok Kei-Dei rơih iŏk boih lu sư wă tung Hom Pơgơ̆p Kră Yang ‘Bok Kei-Dei păng bơ̆jang kơ Kră Yang ling-lang.” (I Hơ’mon 15:2)

‘Ngoaih kơ noh pơtao Đawit athei ‘bok soi păng bơngai Lêwi athei hơmet jơhngơ̆m kơdih mă rơgoh kơplah tung Hom, păng sư rơih iŏk lu bơngai Lêwi mă gơh rơgei gah reh brŏ wă hơri ư ang kơ Kră Yang. Kơplah tung Hom Pơgơp, kon pơlei ôr jreo hăm hlôm keng, preh chhar, ot brŏ, jing đei kơ anih kơkuh ư ang.
Lăm tơdrong Pơgơ̆p Pah ‘Nao, đei lơ Hnam Akŭm mă ‘bok Pôl đei chih kơthơ yua kơ lu sư ưh kơ mơ̆ng kơ Kră Yang bơtho tơ’bôh. Yua kơ thoi noh, lăm rim kơ kơthơ, sư đei nơ̆r bơtho tơ’bôh wă kơ lu sư pơm kiơ̆. Dôm kơ nơ̆r bơtho noh kư̆m bơtho tơ’bôh kơ lu bơ̆n dang ei. Sư đei chih lăm kơthơ Galati 1:11-12 khan: “Ơ lu ‘nhŏng oh, inh wă kơ iĕm hlôh tơdrong âu: Tơdrong ‘nao ‘lơ̆ng mă inh bơtho ăn kơ iĕm sơ̆, ưh kơ sĭ đơ̆ng kon bơngai pơjing ôh. Kon bơngai ưh kơ đei bơtho inh tơdrong noh, pôm Yêsu Krist đĕch tơbăt kơ inh tơdrong ‘nao ‘lơ̆ng Sư.”

Hiôk tơpă kơplah lu bơ̆n đei tôm tơdrong bơtho tơ’bôh đơ̆ng ‘Bok Kei-Dei đei chih lăm sơ̆p hla bơar ‘Bok Kei-Dei! Mă lei, lăm tơdrong arih, kư̆m đei lu bơ̆n ưh kơ ‘maih đŏk Nơ̆r Kră Yang, kư̆m nhen thoi kơdih inh hăm klo inh ưh kơ ‘maih đŏk hla bơar bơtho tơ’bôh. Lu bơ̆n tơchĕng lu bơ̆n hrăt hrot dêh wă đŏk nơ̆r ‘Bok Kei-Dei, mă lăm kơplah ‘măn jơ ‘năr lu bơ̆n kư̆m gơh đŏk păng weh wer đơ̆ng tôm tơdrong ưh kơ ‘lơ̆ng truh. Kư̆m đei, lu bơ̆n ngăl alah, rơih iŏk năm tep tơplih kơ đŏk Nơ̆r Kră Yang. Na gô đei, yua kơ ưh kơ đei đŏk Nơ̆r Kră Yang, lu bơ̆n gô ưh kơ gơh tep yua kơ hiơ̆k bơngơ̆t păng hmach, yua kơ ưh kơ mơ̆ng Nơ̆r bơtho đơ̆ng Kră Yang.

Kơplah tah hơmet tơmam gre tang wang ưh kơ keh đang ‘mơ̆i, na nhi pơih lăng hla bơar bơtho tơ’bôh noh. Hăm gre tang wang noh truh tơ nhi ưh đei tep lăm măng noh. Na lăm tơdrong arih, tơdrong ưh kơ đei đŏk Nơ̆r ‘Bok Kei-Dei pơm kơ lu bơ̆n gô pŭ iŏk tơdrong truh lơ hloh. Yua kơ thoi noh, inh drơ̆ng rơih đơ̆ng pơge hrôih hŏk pơhrăm Nơ̆r Kră Yang păng chơ chă tơdrong Sư ‘maih wă đơ̆ng rim hlak hla bơar ‘Bok Kei-Dei.

Apĭnh đĭ đăng krao khan hơdai: Kơkuh kơ Kră Yang mă ‘mêm kơ kon! Kon bơnê kơ Ih yua kơ đei ăn kơ kon tơdrong bơtho tơ’bôh đơ̆ng Ih đơ̆ng lăm sơ̆p hla bơar ‘Bok Kei-Dei. Apinh Ih ăn kơ kon hưch wă chơ chă Nơ̆r Ih păng adrin arih kiơ̆ Nơ̆r Ih noh lăm rim năr. Kon hơpơi kơ tơdrong arih kon đei wơ̆ ‘lŏ lăm đon lui păng hlôi mơn đei tơdrong pŭn hiôk ‘bĕnh blai kơplah kon yak năm hăm jơhngơ̆m đon chu yom kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mơn băt kơ tơdrong arih kơdih arih đei nơ̆r Kră Yang, buăl hăm wă ‘măn jơ hŏk pơhrăm păng pơm kiơ̆ tơdrong ‘maih wă đơ̆ng Kră Yang ưh?

Tơdah buăl ưh kơ đei jơ wă đŏk Nơ̆r ‘Bok Kei-Dei rim năr, athei lăng tơdrong kiơ oei pơgăn buăl năm tơ Nơ̆r Kră Yang. Tơdah buăl đei đŏk Nơ̆r Kră Yang ling lang, athei jet kơdih hăm mơn kơ hiôk ưh lăm Nơ̆r mơsêh mơyang noh, truh tơ buăl đei pơtrŭt wă “ ‘maih wă pơm kiơ̆” đơ̆ng Kră Yang?

Mă buăl oei lăm anih ayơ, athei kư̆ kơ yua kơ đơ̆ng tơdrong pŭn hiôk Kră Yang wă kơ hŏk băt kơ Sư, wă kơ buăl rai ‘mêm kơ Kră Yang hloh, wă kơ arih đei yua kơ Sư kơplah oei kơpal teh đak ‘nâu. Hrei âu, athei arih lăm bơyan Nôel, athei arih lăm Nơ̆r Kră Yang arih hiôk ‘lơ̆ng rim năr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.