Rŏ lăng lăm chăl arih ‘bĕnh tơdrong ưh kơ tơpăt ‘nâu, lu bơ̆n đei juăt dêh bơih hăm tơdrong tơblah wă tơgar iŏk tơdrong hloh. Lu bơ̆n tơblah wă kơ đei sơng iŏk, wă tơ’bôh kơdih kĕjei, dah wă tơgar iŏk mĭnh tơdrong tơpăt ayơ noh. Mă lei Nôel đei roi kơ lu bơ̆n mĭnh hơ’mon pha, tơdrong hơ’mon gah Tơ’ngla đei achăng dôm tơdrong pơgơ̆r wă pơjao ăn đĕch păng ‘mêm mơnat kơ dôm lu bơngai ưh kơ trŏ kơ đei- jơ̆ kơdih buăl păng inh.

Năr ‘nâu, ‘năr 14/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kenneth Gene Markland kơ̆l ‘bai ĂN ĐĔCH PĂNG ‘MÊM MƠNAT.

“Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu.” (Luka 2:14)

Mĭnh ‘nu bơngai ‘lơ̆p jang hơdai jet inh: “Ăn đĕch păng ‘mêm mơnat pha ra băl ‘bơ̆t anih ayơ ă?” Inh ưh kơ đei gơh tơl tơwih hloi, na pơma hơnul khan: “Ăn đĕch jang kơplah pơge, na ‘Mêm mơnat jang kơplah gơsơ̆.” Dôm ‘nu bơngai jum dăr đei hiĕk yua kơ tơdrong pơtih gia đơ̆ng inh.

Mă lei đơ̆ng rŏng kơ noh, nơ̆r jet ‘noh đei lăm kơ̆l inh. Inh tơchĕng gah ăn đĕch đơ̆ng ‘Bok Kei-Dei, jơ̆ pŭn dŏng pơklaih đei ‘măn ăn dĕch, jơ̆ pŭn hiôk ‘lơ̆ng mă lu bơ̆n tơpă ưh kơ trŏ kơ đei sơng iŏk. Na inh tơchĕng gah jơhngơ̆m ‘mêm mơnat đơ̆ng Sư, tơdrong kĕ chơ̆n păng mơnat ăn, gô huay kơ jô̆ yo hloi mă lu bơ̆n trŏ kơ đei phak. Tơpă, ‘Bă Kơpal Plĕnh trŏ jơ̆ kơmĭl ‘lơ̆ng rŏ hloh tơ’bôh ăn đĕch păng ‘mêm mơnat.

Dah tơchĕng pơwao gah tơdrong mă ăn dĕch păng ‘mêm mơnat pơgơ̆r hơdai, inh ‘blŏk truh kơ minh tơdrong đei tơpă Tơdrong Tơblah Mă Mônh. ‘Noh jơ̆ măng Nôel sơnăm 1914, tơ gah Yă Nâm, anih linh Anh păng linh Đư̆k oei tơblah băl tih. Mĭnh ‘nu bơngai linh Anh đei hơdai lăm măng ‘noh đei chih kơthơ gơih tơhnam:

“Inh ưh tim mă đei ‘bôh anih ayơ mă đei hlĭch chrơp păng ‘lơ̆ng rŏ thoi noh. Jơ̆p trong năm linh Đư̆k, đơ̆ng gah ‘ngiĕo truh gah ‘ma ataih tơ to jơ̆ lơ hơdah ŭnh iĕ iĕ.
Inh jet: “ ‘Noh jơ̆ kiơ kih?”

Buăl inh tơl: “ ‘Long Hơngo Nôel ‘noh!”

Tơpă thoi noh. Linh Đư̆k đei dan dôm kơ ‘long hơnô adrol kơ , tơ̆k khơ̆ng hăm ŭnh jrĕnh păng ŭnh lăm hơdrŭng, pơtih thoi kơ dôm gŏl ŭnh ‘bĕnh tơdrong ‘mêm.

Na lu nhôn mơ̆ng kơtơ̆ng lu sư hơri:

Stille Nacht, Heilige Nacht…

‘Bai hơri ư-ang ‘noh đei hlĭch hăm bơngai Anh, mă lei buăl inh đei tơblang kơ inh: Silent night, Holy night… (Măng hơđơ̆ng, măng ‘lơ̆ng rŏ)

Lăm măng tơngiĕt thĕng hreh, kơplah hơdah măt khei pơchrang tơ ala, inh ưh tim mă đei kơtơ̆ng tơdrong hơri ư-ang ayơ ‘lơ̆ng rŏ păng đei tơdrong tơm thoi noh.
Kơplah ‘bai hơri tôch, khŭl linh lăm sơlŭng teh đei sir pĕng lu nhôn đei tap ti hrơ̆k hrăch. Trŏ, linh Anh tap ti hơdai hăm linh Đư̆k!

Na minh ‘nu linh hơdai pah lu nhôn pơtơm hơri:

The First Noel, the angel did say…

(Nôel blŭng a, linh jang roi tơbăt…)

Trŏ bơih lu nhôn hơri ưh hiôk thoi lu sư, mă lei linh Đư̆k kŭm tap ti tơl tơwih păng hơri pơtrơp:

O Tannenbaum, o Tannenbaum…( Ô ‘long Nôel, Ô ‘long Nôel…)

Lu nhôn đei tơl:

O come, all ye faithful… (Ơ lu bơngai tơnăp…)

Păng jơ ‘nâu, lu sư kŭm hơri hơdai ‘bai hơri ư-ang hăm nơ̆r Latin:

Adeste Fideles…

Nơ̆r hơri đơ̆ng khul linh Anh păng khul linh Đư̆k hơri hơdai lăm anih “teh lôch”. Lăm kơplah lăp dôm jơ adrol, lu sư đei prah pơlôxh dih băl:

Na đei bơngai pơma: “Lu nhôn drơ̆ng ưh kơ prah phao dĭng truh kơ tŏk bŏk măng dơning.”

Ưh kơ đunh, hrĕng ‘nu bơngai linh ‘bar pah yak lĕch tŏk bŏk anih tơblah, rôp ti, pơma dơnuh, ăn băl tơmam apah, tra tơplih kơphê, ‘nhĕm lăm kơlong tơplih kơ suk sich. Inh kŭm đei tơplih săng iĕ iŏk tơlei tơ̆n akar, tơmam ‘blŏk hơdơ̆r gĭt kăl wă chĕp brŏk tơhnam.

Tuch luch, đĭ dăng hơdai hơri ‘bai Auld Lang Syne (‘Bai hơri Achăng Băl) cheng nhur ŭnh, na tơklah băl hăm nơ̆r pơkă wă tơ’bơ̆p dơ̆ng lăm năr dơning, phŏ kŭm đei pơma gô pơjing mĭnh tơdrong đă bơlong hơdai!”

Dah đŏk dơ̆ng hơ’mon mơn đei lăm jơhngơ̆m ‘noh, inh jet kơdih: tơdrong kiơ gơh pơm kơ ‘bar khŭl linh ayăt băl, tŏk bŏk tơdrong tơblah ‘bĕnh kơ pham đei wă gô dan tơmam tơblah tơ ala păng rôp băl ti hơdai thoi dôm lu bơngai buăl hloi?
Lăp đei ăn đĕch păng ‘mêm mơnat đĕch!

Păng kŭm trŏ kơ ăn đĕch hăm ‘mêm mơnat ‘noh đei truh hăm teh đak hloh kơ ‘bar hơbâu sơnăm adrol, lăm minh măng ‘lơ̆ng rŏ sơ̆.

Măng noh, linh jang roi tơbăt kơ lu bơngai wei triu: “Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu.” (Luka 2:14)

Dôm lu bơngai wei triu noh đei chă truh tơ anih bơng ‘nhĕt, tơ’bơ̆p Mari, Yôsep păng Kon Nge. Kơplah lăng ‘bôh ‘Bok Dŏng Pơklaih Yang Yêsu, kơplah Sư tơjur akâu kơdih jing kon bơngai păng arih lăm kon bơngai ‘nâu.

Hơpơi khan lu bơ̆n kŭm gô yak năm kiơ̆ kơmĭnh đơ̆ng ‘Bă Kơpal Plĕnh, băt tơ’bôh ăn đĕch păng jơhngơ̆m ‘mêm mơnat hăm dôm bơngai mă lu bơ̆n tơ’bơ̆p lăm trong yak năm chăl arih bơ̆n.

Hơkat pŭn hiôk kơ buăl đei bơyan Nôel pŭn hiôk, ‘bĕnh tơdrong mơnat ăn đĕch păng ‘mêm mơnat!

Apĭnh đĭ đăng krao khan hơdai: Kơkuh kơ ‘Bok Dŏng Pơklaih Yang Yêsu, kon bơnê kơ Ih yua kơ ăn đĕch păng jơhngơ̆m ‘mêm mơnat Ih đei tơ’bôh kơ kon bơngai păng ăn kơdih kon đơ̆ng tơdrong Ih jur. Apinh tơgum kon băt lăng bơngai nai hăm ‘bar pah măt Ih, băt rơih huay kơ jô̆ yo yua kơ ơh blĕk, păng pơjao ăn tơdrong ‘mêm mơnat tơplih yua kơ nŏng kơ iŏk tơdrong ơh sơ’ngon. Hơpơi chăl arih kon gô jing pơm kơdranh arih, tơ̆k hơdah tơdrong mơnat ăn đĕch păng jơhngơ̆m ‘mêm mơnat ‘blĕnh blai đơ̆ng Kră Yang lăm teh đak ‘nâu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, buăl đei khan ăn đĕch păng ‘mêm mơnat jơ̆ dôm pơwao hlôh gah thân hŏk ataih dêh ah? Ưh ôh, ‘noh jơ̆ tơnŏ tơpă lăm minh teh đak tơngiĕt jơhngơ̆m bơngai. ‘Noh jơ̆ kơplah lu bơ̆n rơih iŏk huay kơ jô̆ yo tơplih kơ pơm ‘mong ăn, rơih ‘mêm mơnat tơplih yua kơ areh dih băl. Rim wơ̆t pơm thoi noh, lu bơ̆n oei tơ̆k hơdah minh “ŭnh jrĕnh Nôel” ‘mêm mơnat iĕ lăm jơhngơ̆m bu noh, kŭm thoi lăm kơdih jơhngơ̆m lu bơ̆n dơ̆ng. ‘Noh trŏ jơ̆ trong ăn lu bơ̆n arih tơ’bôh tôm mah tơdrong mơnat ăn đĕch păng jơhngơ̆m

‘Mêm mơnat đơ̆ng ‘Bok Dŏng Pơklaih Yang Yêsu rim năr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.