17.03 Amăn Jơ Krao Khan Rim Năr: TƠMAM HU GĬT HLOH

Tơdrong gĭt lăm chăl arih buăl noh kiơ? Hăm lơ bơngai lăm lu bơ̆n, rŏ lăng noh jơ̆ hnam dơnŏ, tơdrong jang dah đei tôm măh lăm tơdrong arih. Mă lei đei lu kon bơngai tŭk lê̆ đĭ đăng yak kiơ̆ Kră Yang krao. Lu sư lăng Kră Yang thoi kơ tơmam hu rang, jơ̆ mŭk măk hloh kơ lăm chăl arih lu sư, na drơ̆ng iŏk kiơ̆ Kră Yang mă khan đei chhŭr nuih dah hli tơrơ.

Năr ‘nâu, ‘năr 17/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jonathan Macnab kơ̆l ‘bai TƠMAM HU GĬT HLOH

“Pơtih gia thoi âu dơ̆ng: Lu bơngai mă ăn ‘Bok Kei-Dei pơgơ̆r sư, noh kư̆m thoi bơngai adrin răt tơmam hu đe gĭt dêh. Lăp sư ‘bôh đe tĕch tơmam hu rang hloh kơ hu nai na sư brŏk tơ hnam tĕch đĭ mŭk tơmam sư na răt tơmam hu mă đe gĭt noh.” (Mathiơ 13:45-46)

“Hơpơi kơ buăl gô đei jơhngơ̆m hiôk chơt păng pŭn hiôk kơ tơdrong arih âu ba ăn. Na tơ tuch luch buăl gô chă ‘bôh tơmam mŭk măk.”

Noh jơ̆ nơ̆r hơkat ăn pŭn hiôk lu bơngai Ireland, na noh kư̆m thoi kơ nơ̆r hơkat ăn pŭn hiôk mă lu bơ̆n juăt kơ kơtơ̆ng lăm năr phĕt dah năr têt, hơpơi wă kơ tơdrong arih đei chơt hiôk, ‘nă hal, păng ‘lơ̆ng rŏ. Hăm lu bơngai jơ̆p kơ lăm teh đak nơ̆r hơkat thoi kơ lu bơngai Ireland pơm kơ Năr ‘Lơ̆ng rơgoh Patrick hiôk ‘nă hal. Na tơdah lăng ming mă hơlen ‘biơ̆, lu bơ̆n gô ‘bôh: đơ̆ng rŏng kơ nơ̆r hơkat đei pŭn hiôk noh đei minh tơdrong gĭt tih hloh.

Wă kơ hlôh tơdrong noh, lu bơ̆n kăl kơ lăng ming chăl arih ‘Bok Patrick – mă anăn sư jing dan ăn kơ minh năr phĕt đei lơ dêh char pơm kiơ̆. Sư jơ̆ minh ‘nu bơngai ră roi tơdrong ‘Bok Kei-Dei pơyơ̆r chăl arih bơ̆ jang ăn kơ adrĕch adrŭng Ireland đơ̆ng jơhnơr mă 5. Patrick pơma khan “Inh pơsĭt lăm jơhngơ̆m thoi âu, tôm tơdrong inh đei noh đơ̆ng ‘Bok Kei-Dei.” Rim kơ năr blŭng a, sư pơtơm hăm nơ̆r krao khan hăm nơ̆r juăt kơ krao khan: “ ‘Bok Krist oei hơdai inh, ‘Bok Krist adrol kơ inh, ‘Bok Krist gah rŏng kơ inh, ‘Bok Krist lăm inh …”

Hăm Patrick, ‘Bok Krist jơ̆ tơm kơ sư. Mă tơpă, kơplah oei ‘lơ̆p sư ưh kơ băt kơ ‘Bok Kei-Dei. Sư đei tơ’bơ̆p Kră Yang kơplah tơdrong arih đei tơdrong kơnê̆ truh, kơplah hnam sư đei đe mơ̆t tơtông iŏk na đe rôp Sư chĕp ba tơ dêh char Ireland pơm đĭch đam đe. Na đơ̆ng tơdrong đe phak noh, Patrick pơjao đĭ chăl arih sư kơ ‘Bok Kei-Dei. Đơ̆ng rŏng kơ noh Kră Yang tơgŭm sư đei arih rơngei păng wih brŏk tơ pơlei pơla sư, mă lei minh ‘bar sơnăm đơ̆ng rŏng, sư pơyơ̆r tơdrong jang sư wơ̆t năm tơ Ireland. Mă ‘nâu sư ưh pă năm hăm đe chô̆ păng glang dơ̆ng bơih, sư năm hăm jơhngơ̆m pơyơ̆r đĭ chăl arih sư bơ̆ jang kơ ‘Bok Kei-Dei.

Yua kơ hăm Patrick, đei tơ’bơ̆p ‘Bok Krist noh jơ̆ tơm kơ chă ‘bôh mŭk măk hloh lăm chăl arih kon bơngai. Thoi kơ Yang Yêsu đei bơtho pơtih gia kơ tơmam hu gĭt:
“Lu bơngai mă ăn ‘Bok Kei-Dei pơgơ̆r sư, noh kư̆m thoi bơngai adrin răt tơmam hu đe gĭt dêh. Lăp sư ‘bôh đe tĕch tơmam hu rang hloh kơ hu nai na sư brŏk tơ hnam tĕch đĭ mŭk tơmam sư na răt tơmam hu mă đe gĭt noh.” (Mathiơ 13:45-46)
Patrick hlôh kơ tơmam hu rang gĭt noh jơ̆ Yang Yêsu Krist. Na yua kơ mŭk măk gĭt noh, chu tŭk lê̆ dôm lu tơdrong nai.

Kơplah Kră Yang krao wơ̆t tơ Ireland sư weh ataih đơ̆ng hnam dơnŏ păng tơdrong arih tơ anăp. Lăm trong yak năm bơ̆jang noh, đei ưh kơ drơ̆ng đơ̆ng lu bơngai pơgơ̆r gah tơdrong lui, lu sư khan rơih iŏk trong glăi bơih. Tam mă pơma ‘bơm kơ anih kơnê̆ kơplah wơ̆t tơ anih lăng sư bơngai đĭch đam kơ dâu klĕnh.

Jơ ‘nâu, lu bơ̆n hơdai wơ̆t tơ phĕt năr ‘nâu, hăm tơdrong hơkat ăn pŭn hiôk thoi ki sơ̆. Patrick đei pơjao akâu tơ tơdrong jang kơ ‘Bok Kei-Dei păng tơ’bôh ăn tơdrong jang ‘lơ̆ng, truh tơ anăn sư dan ăn kơ đei pơjing phĕt tơ dêh char Ireland hăm phĕt lăm tơdrong arih lu sư. Dôm lu tơdrong pơm kơ jing gĭt lăm chăl arih sư ưh kơ lăm anăn đe pôk pơ-ư noh. Jơhngơ̆m sư lăng hmă đĕch: Tơ tuch luch noh jơ̆ Yang Yêsu jơ̆ tơmam hu rang gĭt.

Yua kơ thoi noh nơ̆r jet ăn kơ rim ‘nu lu bơ̆n noh jơ̆: lu bơ̆n pơyơ̆r tơdrong kiơ wă kơ pơgơ̆p hăm Pơtao kơ đĭ đăng pơtao? Đei tơdrong kiơ lu bơ̆n oei bơwei kơ kơdih, tơplih kơ pơjao wă bơ̆jang tôm mah? Rŏ lăng tơ tuch luch trong yak năm, lu bơ̆n hăm đei khan tơpăt – thoi kơ Patrick đei pơma khan tơpăt?

Sĭt tơpă, kơplah Patrick keh kơ pơjei băl đơ̆ng sư, đei sơng iŏk sư hăm tơdrong ư ang đơ̆ng ‘Bok Kei-Dei. Na lơ bơngai gô pơgơ̆p hơdai sư lăm tơdrong arih ling lang, yua kơ sư pơyơ̆r đĭ tôm tơdrong wă kơ băt kơ Yang Yêsu Krist, jơ̆ Kră Yang lăm tơdrong arih sư:

Thoi kơ ‘bok Pôl pơma khan: “Mă tơdrong kiơ đe khan yua, inh lăng ưh pă yua boih, yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh. Inh hăt kơ kiơ̆ Sư lê̆ đĭ dôm tơdrong akâu inh sơđơ̆ng thoi lĕ kơ hla đuih đăm, wă kơ inh gơh sơng iŏk Yêsu Krist, na jing pôm đon hăm Sư. Kuă boih gơnang kơ akâu inh kiơ̆ tôm tơdrong juăt; inh wă gơnang kơ Yêsu Krist đĕch, na ‘Bok Kei-Dei jô̆ inh bơngai tơpăt.” (Philip 3:8-9)

Apĭnh đĭ đăng krao khan hơdai: Bơnê kơ Kră Yang yua kơ đei tơ’blŏk kơ kon lăm năr ‘nâu: “Tơdrong kiơ mă tơpă noh jơ̆ tơmam hu rang gĭt lăm chăl arih kon?” Apinh huay kơ jô̆ yo kơ kon kơ plah kon dan tơdrong ưh kơ gĭt lăm teh đak mă dan lăm anih gĭt hloh lăm jơhngơ̆m kon. Apinh tơgŭm kon băt kơ pôk pơ-ư kơ Yang Yêsu jơ̆ tơmam hu rang gĭt hloh, jơ̆ tơdrong gĭt hloh kơ tôm tơdrong. Apinh ăn kơ kon đei jơhngơ̆m ‘maih bơ̆jang, pơih jơhngơ̆m pơyơ̆r tôm tơdrong kon oei chĕp bơwei, wă kơ arih đei chăl arih Ih lăp đon păng tơpăt truh tơ tôch kơ trong yak năm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kiơ̆ Kră Yang ưh kơ sĭ khan dôm lu trong yak năm ‘bônh dah juăt kơ trong noh. Kư̆m đei Kră Yang krao lu bơ̆n wơ̆t tơ dôm lu anih đêl pơm kơ lu bơ̆n chhŭr nuih, wă pơchrang hơdah ăn kơ lu bơhngol oei wơ̆l jrok. Tơdrong noh lu bơ̆n athei tŭk lê̆ tôm tơdrong, đei minh ‘Bok Krist đĕch. Lei lu bơ̆n hăm pơ̆n chă Yang Yêsu thoi kơ tơmam hu rang gĭt lăm chăl arih bơ̆n, na tŭk lê̆ dôm tơdrong hiôk ‘lơ̆ng, na đĭ jơhngơ̆m kiơ̆ Sư ưh?

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.