Buăl hăm ‘bôh kơdih oei kơdâu pơjei hăm jơ năr, na kơplah măng truh, mĭnh tơdrong đĕch oei đei lăp jơ̆ mĭnh bơhngol gleh lap păng mĭnh rơ hông ataih ưh kơ ‘bôh hăm Kră Yang? Lu bơ̆n ngăl đei pơkă hăm jơhngơ̆m gô ‘măn kơ Sư dôm kơ jơ phŭt blŭng a, dôm kơ tơdrong kiơ ‘lơ̆ng rŏ hloh, na mă lei kŭm dôm kơ tơdrong hiơ̆k bơngơ̆t por sŏng ao hrŭk, nơ̆r nhơ̆m đơ̆ng kon hơ’lơ̆p, dah gleh lap đơ̆ng tơdrong jang đei hrĕp hreh tơ lơ̆ Sư jur tơ anih tuch luch. Năr ‘nâu, lu bơ̆n athei hơmet lê̆ tơcheng dôm kơ tơdrong hrơ̆ng hreng tơ ‘nguaih to, wă hơdai băl lăng dơ̆ng dôm tơdrong ‘măn blŭng a đơ̆ng jơhngơ̆m bơ̆n.

Năr ‘nâu, ‘năr 18/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Joy Brunson kơ̆l ‘bai PƠYƠ̆R TƠDRONG ‘LƠ̆NG HLOH

“Đei minh ‘nu yă adro dơnuh năm tơ noh tah lăp ‘bar hlak jên ngang.  Na Yêsu krao lu bơngai pơhrăm păng Sư păng khan: “Inh khan kơ iĕm tơpă, yă adro dơnuh âu tah lơ hloh kơ đĭ-đăng lu bôl nai,  kơlih kơ lu bôl nai pơyơ̆r tơmam rơkah sư đĕch; yă adro âu dơnuh tơpă mă-lei sư pơyơ̆r đĭ hloi jên sa sư.” (Markôs 12:42-44)

Adrol kơ inh jing bơngai mĕ, ưh tim mă đei bu tơbăt adrol kơ inh gah tơdrong jơhngơ̆m pă kĕ mă inh đei tơ ‘bơ̆p: ưh kơ jơ̆ akâu jăn, na kŭm jơ̆ jơhngơ̆m pran, mơn lăm jơhngơ̆m păng ngăl jơ̆ đĭ bơhngol dai. Pơma tơpă, kơplah sơnăm hŏk đăi hŏk inh ngeh kơ kơdih đei gleh lap dêh bơih, mă lei tă kơ ưh kơ trŏ. Đơ̆ng rŏng kơ tơpŭ kơ kon drŏnglo, đei mĭnh măng ei inh thar ‘bôh băt kơdih ưh pă đei pơgơ̆p hăm Kră Yang đunh khei năr bơih. Inh pơma kơdih: “Pơge hrôih dơning inh gô iung đơ̆ng hrôih wă chă Kră Yang blŭng a, inh kăl kơ pơjuăt dơ̆ng tơdrong juăt pơtơm năr plơ̆ng wă kơ trŏ lăp!”

Re kơtơ̆ng jơ điên thoăi ôr…inh pĭt lê̆. Re kơ tơ̆ng mă ‘bar…hmĕt kơtĭt pĭt dơ̆ng. Na kơtơ̆ng re kon hơ’lơ̆p pơtơm nhơ̆m hlŭ.

Inh đei tơchĕng gô ‘măn jơnăr kơ Kră Yang lăm jơ kơmăng, mă lei kơplah truh kơ măng, inh đei huŏng lăm tơdrong jơhngơ̆m pă kĕ. Tơdrong ‘nâu hrĕnh tĕnh jing mĭnh tơdrong juăt ưh kơ hơpơi wă, minh tơdrong tơblah mă inh lui sĭt lơ bơngai lăm lu bơ̆n kŭm oei tơ ‘bơ̆p.

Lăm Sơ̆p Hla Bơar Blŭng a chăl 4, lu bơ̆n đŏk hơ’mon gah ‘bar ‘nu kon drŏnglo ‘bok Ađam hăm yă Ewơ jơ̆ Kain păng Abel.

“Abel jing bơngai wei triu; gah Kain sư jang mir ‘ba. Đunh ‘biơ̆ đơ̆ng noh, Kain yua phe ‘ba sư pơm tơmam pơyơ̆r kơ Kră Yang. Abel kư̆m pơyơ̆r kon triu tuh blŭng-a hăm rơmă sư kơ Kră Yang ‘Bok Kei-Dei, Kră Yang lăng gah Abel păng iŏk tơmam soi sư. Mă-lei ưh kơ đei lăng Kain păng kư̆m ưh kơ iŏk tơmam soi sư, na Kain blĕk dêh mah ‘bri ‘bra muh măt sư.” (Blŭng A 4:1-5)

Đei lơ trong pơma pơjah gah yua kơ đơ̆ng kiơ tơmam đơ̆ng Abel đei sơng iŏk na đơ̆ng Kain ‘noh ưh. Sơ̆p Hla Bơar Nơ̆r ‘Bok Kei-Dei chih khan Kain pơyơ̆r “phe ‘ba”, mă lei Abel đei pơyơ̆r “kon triu tuh blŭng-a”. Đei nơ̆r pơma khan, Abel đei pơyơ̆r kơ Kră Yang tơdrong ‘lơ̆ng hloh lăm dôm tơdrong ‘lơ̆ng, yua kơ sư lui khan ‘noh jơ̆ tơdrong Sư trŏ kơ đei sơng iŏk. Tơplơ̆ dơ̆ng, Kain pơyơ̆r tơmam kiơ̆ hăm tơdrong ưh kơ đei jơhngơ̆m. Abel ‘măn kơ Kră Yang tơdrong ‘măn anih blŭng a, na Kain pơyơ̆r kơ Sư dôm tơmam kiơ oei đei rơkah.

Tơdrong gar đei pơm kơ Kain pơm yoch pơlôch oh sư. Sư tơchĕng Kră Yang ưh kơ ‘mêm lei lăi, mă lei tơpă, tơdrong Kră Yang chang gô jơ̆ mĭnh jơhngơ̆m ‘lơ̆ng rơgoh păng hơmrah.

“Kră Yang apinh Kain thoi âu: “Yua kơ kiơ ih blĕk? Yua kơ kiơ ih kŭp muh măt ih? Dah ih pơm ‘lơ̆ng liơ ih ưh kơ pơ̆n ngơk muh măt? Na mưh ưh kơ pơm ‘lơ̆ng, to tơdrong yoch răp gô ‘bơ̆t ‘măng ‘ngeng kơ ih dêh mă-lei ih ‘nĕ kơ ăn jei sư.” (Blŭng A 4:6-7)

Lăng lăm hơ’mon đơ̆ng Kain păng Abel, lu bơ̆n kŭm đei tơ ‘blŏk gah mĭnh rup pơchrang ‘bĕnh mơn lăm jơhngơ̆m lăm Sơ̆p HLa Bơar Pah ‘Nao: ‘noh jơ̆ yă hơdro dơnuh.

“Đei minh ‘nu yă adro dơnuh năm tơ noh tah lăp ‘bar hlak jên ngang. Na Yêsu krao lu bơngai pơhrăm păng Sư păng khan: “Inh khan kơ iĕm tơpă, yă adro dơnuh âu tah lơ hloh kơ đĭ-đăng lu bôl nai, kơlih kơ lu bôl nai pơyơ̆r tơmam rơkah sư đĕch; yă adro âu dơnuh tơpă mă-lei sư pơyơ̆r đĭ hloi jên sa sư.” (Markôs 12:42-44)

Lăm kơplah dôm lu bơngai mơdrŏng pơyơ̆r “jên mah hu rơkah” lei lăi thoi tơdrong ưh kơ bơngơ̆t đơ̆ng Kain, lei yă adro ‘nâu đei pơyơ̆r “đĭ dôm tơmam kiơ kơdih đei”. Tơpă thoi noh, tơdrong gĭt đơ̆ng tơdrong pơyơ̆r ưh kơ lăm dôm yơ tơmam, mă lei lăm tơdrong ‘măn ăn blŭng a đơ̆ng lăm jơhngơ̆m. Yua kơ Kră Yang ưh kơ lăng lăm dôm yơ jên, Sư lăng lăm “mĭnh lăm” jơhngơ̆m mă lu bơ̆n ‘măn ăn kơ Sư. Hăm lu bơngai adro dơnuh chăl sơ̆, Kră Yang ưh kơ trŏ jơ̆ mĭnh tơdrong rơih iŏk pơthim kơplah yă mah rơkah, mă Sư trŏ jơ̆ đĭ đăng tu arih đơ̆ng yă.

Kŭm lei lăi thoi tơdrong pơyơ̆r tơdrong ‘lơ̆ng hloh, tơdrong pơm tơ’bôh pơyơ̆r đĭ đăng dôm tơdrong kiơ bơ̆n đei athei đon lui tôm mah, khan Kră Yang gô rơkah rơkai dŏng tơgŭm kơ dôm tơdrong kăl yua đơ̆ng bơ̆n. Dah lu bơ̆n đĭ jơhngơ̆m pơyơ̆r kơ Kră Yang dôm kơ jơ phŭt blŭng a lăm năr ‘nao plơ̆ng, mă khan đei gleh lap dah hrăt hrot truh dang yơ, lei kơplah noh lu bơ̆n oei pơma tơbăt hăm bơhngol bơ̆n khan: “Kră Yang ơi, Ih gĭt kăl hloh kơ tơdrong hiôk lăm jơhngơ̆m đơ̆ng kon.”

Lu bơ̆n kăl kơ hlôh khan tơdrong “ ‘lơ̆ng hloh” mưh lăp kŭm jơ̆ tơdrong đei kăl kơ lơ jơhngơ̆m pran hloh. Lei lăi thoi Abel pơyơ̆r kon triu tuh blŭng a dah bơngai yă adro pơyơ̆r trŏ tu rong tơdrong arih sư, tơmam ‘lơ̆ng hloh đơ̆ng buăl năr ‘nâu rŏ lăng jơ̆ đăm phŭt đĭ jơhngơ̆m pơma dơnuh hăm Kră Yang tŏk bŏk re kơtơ̆ng kon hơ’lơ̆p oei nhơ̆m. Yua kơ ‘noh kŭm trŏ jơ̆ jơ phŭt gĭt hloh mă buăl gơh pơyơ̆r ăn kơ Sư.

Đơ̆ng dôm kơ tơdrong hlôi mơn đei noh, inh thar ‘bôh băt mĭnh tơdrong tơpă hmă đĕch: Kră Yang lu bơ̆n trŏ kơ đei sơng iŏk tơdrong ‘lơ̆ng hloh. Trŏ bơih, đei krao jơ̆ “ ‘lơ̆ng hloh” ‘noh ưh kơ trŏ layơ kŭm lei lăi băl rim năr. Mă lei dah inh oei gơh ‘măn đĭ đon tơchĕng kơ dôm bơngai jum dăr, dah phŏ kŭm jơ̆ hŭt đĭ lơ jơ lăm điên thoăi, lei rŏ lăng inh ưh kơ gơh đei ‘măn ăn đăm phŭt kơ Kră Yang ah? Hơđăl khan bơhngol inh oei kăl kơ đei “hơmet ming” dơ̆ng wă kơ trŏ hăm Sư.
Lăm chăl arih ‘nâu, jơhngơ̆m lu bơ̆n tơpă ‘bônh kơ đei hiơt yua kơ rơ bâu trong kơnhăm oei nŏng kơ dui rôp pơkơ̆ng. Mă lei hơ bŏ lăng ‘Bă ‘mêm mơnat- Tơ’ngla dŏng tơgŭm, bơwei păng pơjing lu bơ̆n- tă kơ ưh kơ trŏ kơ đei anih ‘măn blŭng a hloh ah?

Yua kơ dah inh ưh pă đei kiơ ‘ngoaih kơ Sư, lei inh oei đei tôm tơdrong inh kăl- Trŏ jơ̆ Sư!

Apĭnh đĭ đăng krao khan hơdai: Kơkuh kơ Kră Yang mă ‘mêm, apinh tơgŭm kon pôk Ih tơ anih ‘măn blŭng a anih hloh kơ tôm tơdrong. Dah dôm kơ tơdrong kăl athei đơ̆ng teh đak ‘nâu ôr pơret gom ‘iŏk kon, apinh tơgŭm kon mơ̆ng kơ tơ̆ng nơ̆r khan rơngơp ‘lơ̆ng đơ̆ng Ih. Apinh tơ’bok kơ kon khan kơplah kon chơ chă Ih adrol hloh, Ih gô hiơ̆k bơngơ̆t tôm tơdrong oei đei. Bơnê kơ Kră Yang yua kơ tơdrong mơnat ăn đĕch đơ̆ng Ih ling lang tuh ro ‘bĕnh lăm tơdrong rơdu kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lei lu bơ̆n oei pơyơ̆r kơ Ih dôm tơdrong gah “ ‘lơ̆ng hloh” đơ̆ng jơ năr păng đon tơchĕng bơ̆n, dah lăp jơ̆ dôm kơ tơdrong oei đei rơkah đơ̆ng mĭnh năr kơjung gleh lap? ‘Nĕ kơ gô truh kơ tôm tơdrong tơproh ‘lơ̆ng ‘mơ̆i na chă Kră Yang, yua kơ trŏ kơplah lu bơ̆n pôk Sư tơ trŏ kơ anih ‘măn blŭng a, lei tôm tơdrong tơsŭl tơ wŏk lăm chăl arih ‘mơ̆i pơtơm gơh proh hơmet ‘lơ̆ng. Hơpơi khan đơ̆ng rŏng kơ ‘bai amăn jơ krao khan ‘nâu, buăl păng inh gô đei tơplih tơpă tơdrong juăt arih đơ̆ng kơdih kiơ̆ kơ Sư wă, pơdơh pơyơ̆r kơ Sư dôm kơ tơmam rơkah, mă lei đĭ jơhngơ̆m pơyơ̆r dôm kơ plei ‘long bơyan blŭng a, tôm tơdrong đei ‘lơ̆ng rŏ hloh. Tơơchĕng tôm tôch, đei Kră Yang tơm jơ̆ lu bơ̆n đei đĭ đăng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.