19.03 Amăn Jơ Krao Khan Rim Năr: KRĂ YANG OEI HƠDAI LĂM TƠDRONG ARIH RIM NĂR

Lu bơ̆n juăt kơ tơchĕng ‘Bok Kei-Dei bơ̆jang lăm jơnăr pha ra tơpă, tih tin dah ‘lơ̆ng rŏ. Mă lei ‘Bok Kei-Dei tơ’bưh hăm bơ̆n hmă thoi tơdrong arih juăt măng năr. Kră Yang bơ̆jang hăm lu bơngai lăng thoi kơ hmă đĕch, đơ̆ng tơdrong tơ’bơ̆p ưh kơ đei pơrơ̆ng, hăm nơ̆r krao khan tơpă đơ̆ng lăm jơhngơ̆m. Sư wă yua iŏk lu bơ̆n wă kơ bơ̆n ba ăn tơdrong pơlung, pơklaih, păng tơdrong chang hơmĕng ăn kơ lu bơngai oei jĭ jăn.

Năr ‘nâu, ‘năr 19/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Martha Noebel kơ̆l ‘bai KRĂ YANG OEI HƠDAI LĂM TƠDRONG ARIH RIM NĂR

“Păng pơklaih lu bơngai măt tol. Sư wơh inh pơklaih lu bơngai mă đe pơjuă pơđep, păng roi kơ đe Kră Yang wă dong pơklaih kon bơngai dang ei.” (Luka 4: 19)

Hăm đei layơ buăl tơchĕng: hrei ‘nâu hăm pă đei tơdrong pơklaih dah ưh? Kră Yang hăm wă yua bơngai hmă thoi bơ̆n wă pơklaih bơngai nai dah ưh? Hăm trŏ mă bu bu kư̆m gơh pơklaih ngăl? Hăm trŏ kơ inh athei năm tơ minh anih sĭt, đei minh ‘nu bơngai ‘Bok Kei-Dei yua dan ti krao khan, lei ‘mơ̆i na inh gơh klaih?

Lu nơ̆r jet ‘nâu ưh kơ đei hlĭch ôh. ‘Noh bơih nơ̆r hơpơi đơ̆ng lu bơngai gleh lap, jĭ jăn păng kăl kơ tơgŭm. Inh roi kơ buŏl minh tơdrong. Buŏl tơchĕng ăn kơdih akâu. Lăm minh năr, Inh oei ngôi lăm gre hăm kon drŏkăn, wă năm răt tơmam, kơplah inh wơ̆r gre lĕch tơ trong ‘bôh bơngai rông ‘bôt ‘bơ̆t anăp. Sư oei dơ̆ng ‘bơ̆t cham, iŏk tơmam đơ̆ng gre, inh pơdơ̆ng gre đơ̆ng noh jur năm tơ pah to trong wă pơma dơnuh hăm sư minh ‘bar nơ̆r. Kơplah noh inh ưh kơbăt Kră Yang wă bơ̆jang hăm inh. Inh pơma dơnuh hăm sư nhen thoi minh ‘nu bơngai rông ‘bôt hơlăng rơhăo. Nhi pơma dơnuh tŏsĕt. Kơplah inh wă weh, sư khan kơ inh: “krao khan tơgŭm inh hơ”.

Kiơ̆ kơ thoi inh băt, sư tam mă lui kơ ‘Bok Kei-Dei. Mă lei kơplah ‘noh sư oei jĭ păng kăl kơ tơgŭm. Sư roi kơ inh ‘bok pơgang khan sư jĭ măt ưh kơbang wă jê̆ măt tol. Inh tơchĕng: tơdrong jĭ ‘nâu trăp dêh, ưh kơ gơh hơmet. Jơhngơ̆m inh ‘bĕnh kơ tơdrong mơnat kơ sư. Ưh kơ đei tơchĕng lơ: inh jet, inh krao khan kơ ih hloi dang ei hăm gơh? Hlĭch mơ̆n, sư drơ̆ng. Trong năm mơ̆t tơhnam, inh rôp ti sư păng krao khan, kơplah inh krao khan, inh mơn đei tơdrong mơsêh ‘Bok Kei-Dei. Lăm jơhngơ̆m inh băt Kră Yang oei bơ̆ jang. Kơplah inh krao khan đang, sư ngôi doh hăm đak măt ro păng bơnê kơ inh. Nhi tơ kuăr băl, đơ̆ng noh inh wơ̆t tơ gre hăm jơhngơ̆m hiôk ưh kơ gơh wă roi thoi yơ. Kon drŏ kăn inh sư ‘bôh đĭ tôm tơdrong noh, Inh roi kơ kon mơ̆ng, păng athei kon krao khan tơgŭm bơngai rông’bôt ‘mêm kơeng ‘nâu.

‘Bar pêng năr đơ̆ng rŏng, kon drŏkăn roi kơ inh sư ‘nao ma dơnuh hăm yă rông ‘bôt. ‘Bok pơgang khan yă hơrih hăm klong nhor đei rơka găm ‘bơ̆t tŏk bŏk klong ngai. Măt yă dă ‘biơ̆ tŏsĕt, ‘bok pơgang khan noh ‘lơ̆ng dêh bơih. Kon drŏkăn khan pơ’lơ̆ng kơ sư khan tơdrong ‘bok pơgang khan noh jơ̆ ‘lơ̆ng dêh bơih.

Kon inh khan rơka găm noh gơh klaih, păng Kră Yang gơh pơm tơdrong noh. Yă rông ‘bôt sư ưh kơ ngeh. Kơplah noh yă sư băt tơdrong jĭ pơm kơ măt sư ưh kơgan ‘bôh nhen păng gleh lap.

Minh ‘bar giĕng đơ̆ng rŏng, kơplah inh oei ngôi lăm hnam, inh kơtơ̆ng yă ôr rơ̆n krao anăn inh đơ̆ng cham. Sư khan: “Athei chih tơbăt kơ lu bơngai krao khan tơgŭm inh. Măt inh klaih bơih!”

Inh hiôk dêh: mă tơpă lu bơngai krao khan lăp ‘bar ‘nu inh hăm kon inh đĕch. ‘Bok Kei-Dei yua nơ̆r krao khan kơđeh, ‘bơ̆t trong mơ̆t lăm hnam, wă tơplih tơdrong arih minh nu bơngai. Yă klaih bơih.

“Yang Bơhngol ‘Lơ̆ng ‘Bok Kei-Dei oei hơdai inh. Sư rơih inh wă năm pơtho ăn tơdrong ‘nao ‘lơ̆ng kơ lu bơngai dơnuh hin păng pơlung lu bơngai ơh sơ’ngon. Sư wơh inh roi tơdrong Sư wă tơlĕch lu bơngai đe phak, păng pơklaih lu bơngai măt tol. Sư wơh inh pơklaih lu bơngai mă đe pơjuă pơđep, păng roi kơ đe Kră Yang wă dong pơklaih kon bơngai dang ei.” (Luka 4: 18-19)

Năr noh inh krao khan, roi tơbăt dôm tơdrong ư-ang lăm ‘Bok Kei Dei. Yua kơ thoi noh inh chih lu nơ̆r ‘nâu. Đĭ đăng tơdrong jang mơsêh mơ yang tih đơ̆ng Kră Yang ngăl. Ư-ang kơ ‘Bok Kei-Dei! Inh bơnê yua kơ inh ưh kơ hŭt lê̆ krao khan tơgŭm yă noh. Inh kŭm bơnê yua kơ kon inh đei hŏk iŏk tơdrong đei kăl yua. Nơ̆r lu nhôn kăl kơ mơ̆ng ưh kơ đơ̆ng nơ̆r pơtôch kon bơngai, noh nơ̆r khan đơ̆ng ‘Bok Kei Dei.

Lăm drong hơrih rim năr, ‘Bok Kei-Dei thei pơm minh tơdrong kiơ, athei pơ̆n nuih yak năm. ‘Bok Kei-Dei ling lang oei hơdai hăm tơdrong lăp ai. Sư oei bơ̆jang đơ̆ng lăm lu bơngai băt hli yom, păng tơdrong đei yua pơm kơ buŏl ‘bôh hlĭch.

Apĭnh đĭ đăng krao khan hơdai: Bơnê kơ Kră Yang yua kơ Ih ling lang oei hơdai lăm drong hơrih kon. Pĭnh Ih pơih măt kon wă kơ kon băt Ih oei bơ̆jang lăm tơdrong lăng thoi kơ hmă đĕch. Apinh ih ăn kơ kon đei jơhngơ̆m băt mơ̆ng nơ̆r Ih, hăm tơchĕng hli yom pơm kiơ̆ thoi Ih wă. Apinh Ih yua tơdrong arih kon wă pơlung, pơklaih păng ba tơdrong hơmĕng ăn kơ lu bơngai jĭ jăn jum dăr kơ kon. Dôm tơdrong ư-ang lăm Kră Yang ngăl. Kon krao khan hăm anăn Kră Yang Yêsu Krist, A-men.

Ơ lu bơngai mơ̆ng mă ‘mêm kơ eng, lăm jơnăr ayơ, buăl kơtơ̆ng nơ̆r Kră Yang pơtrŭt, ‘nĕ kơ achăng lê̆, mă khan noh thoi nơ̆r jet, nơ̆r krao khan hmă đĕch ăn kơ lu bơngai kăl kơ krao khan tơgŭm. Mă lei kơplah lu bơ̆n chu yom lăm tơdrong iĕ đĕch. Kră Yang oei bơ̆jang hloh kơ thoi bơ̆n tơchĕng. Năr ‘nâu pinh Kră Yang ăn đei jơhngơ̆m hlôh băt, wă ba ăn tơdrong pơklaih hơtŭt tơdrong arih ăn kơ bơngai bu kăl kơ Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.