Bơngai lĭnh jơ̆ rup juăt dêh lăm tơdrong arih rim năr hmă. Rŏ lăng lu bơ̆n đơ̆ng đei mĭnh wơ̆t lăp đon hăm dôm lu bơngai lĭnh nuih pran dơ̆ng pơrĕng tơproh ‘lơ̆ng, hrŭk hơbăn ao ‘lơ̆ng, păng hloh ‘noh jơ̆ jơhngơ̆m pơm kiơ̆ tơdrong juăt lu sư. Rŏ lăng buăl tim mă ‘bôh băt, mă lei đơ̆ng kơplah buăl lui sơng iŏk Kră Yang Yêsu, buăl đei jing mĭnh ‘nu bơngai lĭnh lăm khŭl lĭnh Sư. Mă lei tơpă, lăm dôm tơdrong hrăt hrot păng tơdrong pơlong lăng đơ̆ng tơdrong arih, đei lơ dêh lu bơ̆n ưh tim mă tơpă arih thoi kơ mĭnh ‘nu bơngai lĭnh gơh hơgei đơ̆ng Kră Yang. Thoi noh lu bơ̆n kăl kơ đei tơ’blŏk tơdrong kiơ?

Năr ‘nâu, ‘năr 22/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai BƠNGAI LĬNH RƠGEI KƠ YANG YÊSU KRIST.

“Mă ih truh tơdrong pơmat, ih kư̆ adrin bơtho đĕch thoi inh dang ei mơ̆n. Thoi noh na ih jing linh ‘lơ̆ng Kră Yang Yêsu Krist.” (II Timôthê 2:3)

Rim sơnăm, rơbâu ‘nu tơdăm mơlôh tơ lơ dêh char đei krao pơm lĭnh wă bơwih bơwăn lăm khŭl lĭnh. ‘Noh jơ̆ tơdrong kăl kơ pơm đơ̆ng kon pơlei, kŭm jơ̆ jơ năr wă kơ dôm lu bơngai lĭnh ‘lơ̆p ‘nâu gơh pơhrăm pơjuăt, wơ̆ pran păng wang hơdai lăm tơdrong bơwei dêh char.

Lăm tơdrong tơm kăl gah bơhngol, đơ̆ng jơ phŭt lui sơng iŏk Yang Yêsu, rim Bơngai Lui kŭm đei krao wơ̆n mơ̆t lăm khŭl lĭnh rơgoh kơ Yang Yêsu. Rup bơngai lĭnh tơ’blŏk kơ lu bơ̆n ‘blŏk truh kơ nơ̆r bơtho đơ̆ng ‘bok Pôl ‘măn ăn kơ bơngai kon gah bơhngol Timôthê: “Mă ih truh tơdrong pơmat, ih kư̆ adrin bơtho đĕch thoi inh dang ei mơ̆n. Thoi noh na ih jing linh ‘lơ̆ng Kră Yang Yêsu Krist. Pơtih gia bơngai pơm linh: Bơngai pơm linh athei kơchăng tơdrong linh ling-lang ưh kơ gơh tơchĕng ‘bar pang tơdrong ôh, tơdrong sơwil păng tơdrong linh. Sư kơchăng ling-lang thoi noh wă kơ ‘bok yŏng sư lăp đon.” (II Timôthê 2:3-4)

‘Bok Pôl tơ băt mĭnh ‘nu bơngai lĭnh kơ Kră Yang ưh kơ trŏ layơ kŭm arih lăm tơdrong hiôk hơđơ̆ng mă athei hơmet sơng iŏk “chu pŭ pơmat”. Athei pơlong lăng lăm tơdrong arih hmă đơ̆ng minh ‘nu bơngai lĭnh lăm khŭl lĭnh: anih arih athei ling lang hơmet ‘lơ̆ng, tơproh; iung đơ̆ng tep trŏ kơ jơ; sŏng sa trŏ kơ jơ, pơjuăt pơhrăm tơnăp; bơ̆jang pơmat tat; mă khan tơdrong pơdơh kŭm trŏ kơ hơgăt. Dah mĭnh ‘nu bơngai lĭnh lăm teh đak oei đei kăl arih pơm kiơ̆ tơdrong juăt thoi noh, lei bơngai lĭnh kơ ‘Bok Krist gơh arih kư̆ kă dah ưh kơ pơm kiơ̆ khôi juăt ưh?

‘Bok Pôl chih dôm lu nơ̆r ‘nâu jơ̆ kơplah sư oei chĭt lăm hnam phak, chô̆ glang yua kơ tơdrong bơtho Tơdrong ‘Nao ‘Lơ̆ng. Lăm anih ‘noh, sư ưh kơ thei Timôthê jing mĭnh ‘nu bơngai lĭnh hiôk hmă, na athei jing mĭnh ‘nu bơngai linh rơgei păng pơ̆n nuih kơ ‘Bok Krist. Yua kơ sư hlôh khan bơngai linh rơgei ‘mơ̆i gơh dơ̆ng kơjăp ‘bơ̆t anăp dôm kơ tơdrong pơmat tat lăm tơdrong jang Kră Yang, hloh ‘noh jơ̆ lăm dôm kơ năr jơhnơ̆r tuch luch.

Wă kơ jing mĭnh ‘nu bơngai lĭnh rơgei, ‘bok pôl tơlĕch mĭnh tơdrong athei pơm, ‘noh jơ̆ tơdrong kơ nhăm, tơm jơ̆ ưh kơ ăn “tơdrong lăm teh đak” ưh kơ bơwar iŏk bơ̆n. Lăm khŭl lĭnh Rôm kơplah ‘noh, bơngai lĭnh ưh kơ gơh hơdai lăm tơdrong jang kon pơlei, phŏ kŭm ưh kơ gơh chă akăn lăm khei ‘năr oei pơm lĭnh wă kơ ăn đĭ đon tơchĕng kơ tơdrong jang. Lei lăi thoi noh, bơngai linh kơ ‘Bok Krist kăl kơ pơ ‘lơ̆ng wă kơ ưh kơ đei “tơdrong lăm teh đak” pơgăn bơ̆n. “Tơdrong lăm teh đak” ‘bơ̆t dâu jơ̆ mă khan tơdrong kiơ tơgar iŏk anih ‘măn blŭng a kơjung hloh tơdrong tơtă đơ̆ng Kră Yang, pơm kơ lu bơ̆n ưh kơ gơh pơm trŏ nơ̆r krao đơ̆ng Sư.

Mă lei yua kơ liơ lu bơ̆n đei gô tơplih hloi tơdrong hiôk rơhŏu đơ̆ng kơdih kâu wă mơ̆t lăm tơdrong pơm kiơ̆ khôi juăt pơmat thoi noh? Tơdrong kơnhăm tuch luch đơ̆ng dôm kơ ‘bai pơhrăm pơjuăt, dôm kơ tơdrong pơlong lăng, dôm kơ tơdrong adrin jơ̆ kiơ? ‘Bok Pôl pơma khan “ ‘Noh jơ̆ wă kơ ‘bok yŏng sư lăp đon.” Rŏ lăng kơplah oei lăm hnam phak păng chih tơlĕch tơdrong ‘nâu, ‘bok Pôl hlôh băt khan tơdrong kơnhăm đơ̆ng chăl arih bơngai lui kơ Kră Yang jơ̆ tơdrong chu kiơ̆, păng pơm thoi yơ wă kơ Sư lăp đon.

Yang Yêsu jơ̆ Tơ’ngla ‘Bok Yŏng tih hloh. Sư đei ‘mong ăn hăm kơdih tơdrong arih Sư kơpal ‘long pơglang wă dŏng pơklaih lu bơ̆n mơ̆t lăm khŭl lĭnh Sư. Tơmam apah tih păng gĭt kăl hloh kơ bơngai lĭnh tơnăp ưh kơ trŏ jơ̆ gơh đei kiơ lăm teh đak, mă lei jơ̆ nơ̆r pơ ư đơ̆ng kơdih Sư: “Ơ dăm, ih jang kơ inh ‘lơ̆ng tơpă, ih ưh kơ lê̆ ôh dôm tơdrong jang inh.” (Mathiơ 25:21).

Rim năr, lu bơ̆n oei oei lăm khŭl lĭnh ‘lơ̆ng rơgoh kơ Yang Yêsu, oei kăl kơ pơhrăm pơjuăt kơ tơdrong arih gah bơhngol bơ̆n. Đei dôm ‘bai pơhrăm pơjuăt anat dêh, đei dôm kơ tơdrong bơtho hơnat, ‘noh kŭm jơ̆ kơplah đon lui đei pơlong lăng, kơplah đei pơhlŭ yua kơ tơdrong hưch wă, đei tơdrong yoch pơkơ̆ng, dah gleh lap chăl arih tih dêh. Mă lei athei ‘blŏk dôm kơ tơdrong adrin pơhrăm pơjuăt ‘noh đei lăng tơ gah mĭnh tơdrong kơnhăm đĕch, ‘noh jơ̆ pơm kơ Tơ’ngla ‘Bok Yŏng lăp đon kơ bơ̆n. Lăm khŭl lĭnh ‘noh, lu bơ̆n ưh kơ layơ yak năm mĭnh drô̆, mă lei băt Tơ’ngla Yŏng Pơgơ̆r oei ‘mêm mơnat păng bơtho lu bơ̆n lăm tơdrong mơnat ăn đĕch rơkah rơkai đơ̆ng Sư. Lăm dôm tơdrong pơmat tat, lu bơ̆n athei lăng tơ pôm Sư đĕch, yua kơ băt Sư đei yak adrol păng pŭ iŏk pơmat ăn kơ lu bơ̆n.
“Bơnê kơ ‘Bok Kei-Dei, pôm Sư đĕch kĕ wei-lăng iĕm, huay ăn kơ iĕm lê̆ Sư, wă kơ iĕm dơ̆ng ‘bơ̆t anăp Sư ning-mônh iĕm ‘bôh Sư mơsêh mơyang, iĕm hiôk hơiă huay kơ hli kơ Sư, yua kơ iĕm ưh kơ đei tơdrong yoch.” (Jut 1:24)

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ đei krao păng rơih iŏk kon jing bơngai lĭnh kơ Ih. Apinh ăn kơ kon ưh kơ lăp đon hăm tơdrong rơhŏu hiôk dah hơđơ̆ng đơ̆ng chăl arih, mă lei apinh tơgŭm kon gô ăn jơhngơ̆m yak lăm tơdrong pơm kiơ̆ khôi juăt păng chu pŭ iŏk pơmat yua kơ Ih. Apinh tơgŭm kon yak kiơ̆ mĭnh tơdrong kơnhăm đĕch đơ̆ng chăl arih kon jơ̆ Ih lăp đon, mă khan lăm anih ayơ. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rim ‘nu lu bơ̆n đei krao wơ̆n wă kơ jing dôm bơngai lĭnh rơgei kơ ‘Bok Krist. Yua kơ thoi noh, athei pơm hơmet tơdrong juăt kơ chăl arih bơhngol kơ buăl, pơtơm hăm tơdrong năm tơ Nơ̆r Kră Yang păng tơdrong krao khan rim năr. Mă ‘bar, athei tŭk lê̆ tơdrong kiơ oei pơm kơ tơdrong pơgơ̆p buăl hăm Kră Yang đei pơgăn, rŏ lăng ‘noh jơ̆ mĭnh tơdrong juăt, mĭnh tơdrong hơ iă, dah mă khan tơdrong kiơ. Tuch luch, athei “tơblah” kơ Kră Yang lăm anih hnam dơnŏ, anih bơ̆jang, hŏk pơhrăm đơ̆ng buăl đĭ jơhngơ̆m. Pơ̆n nuih tơ ‘bôh Kră Yang đơ̆ng lăm tơdrong arih lu bơ̆n thoi mĭnh ‘nu bơngai lĭnh pơ̆n nuih yua kơ Tơdrong ‘Nao ‘Lơ̆ng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.