23.03 Amăn Jơ Krao Khan Rim Năr: TƠM TƠNƠM ‘LONG JƠLA PĂNG ‘LONG BƠMRÔM

Nhen thoi teh ‘bĕnh kơ ‘nhĕt chăt, đei jơla lăm tơdrong arih bơ̆n pơm kơ bơ̆n rơhông, jô kro păng ưh kơ đei plei. Kơplah bơ̆n ‘blŏk hơdơ̆r Kră Yang Yêsu pŭ iŏk tơdrong lôch lăm phĕt chu Pơmat- Iung arih ‘nâu. Sư thei bơ̆n dơ̆ng lăng, lăng pơnhen tơdrong arih bơ̆n, pơ̆n hŭt lê̆ tơm tơnơm jơla păng ‘long bơmrôm wăn gơhret tơdrong arih bơ̆n, pơgăn bơ̆n wơ̆ ‘lŏ lăm Kră Yang.

Năr ‘nâu, ‘năr 23/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kim Anderson kơ̆l ‘bai TƠM TƠNƠM ‘LONG JƠLA PĂNG ‘LONG BƠMRÔM.

“Teh gô chăt lu jơla păng ‘long bơmrôm, păng ih gô sa tơmam chăt đơ̆ng lăm mir pơgar.” (Blŭng-a 3:18)

Lăm nơ̆r hiap pơtê̆ blŭng a yua kơ tơdrong yoch, tơm tơnơm ‘long jơla ưh kơ pơma kơ anih teh hrĕng kro đĕch. Noh jơ̆ nơ̆r tơ’blŏk gah dôm lu tơdrong oei wă pơrăm tơdrong arih lu bơ̆n – ưh kơ đei ba ăn tơdrong arih, jơ̆ pơthim ăn chhŭr nuih đĕch.

“Kră Yang khan kơ Ađam thoi âu: “Yua kơ ih chu nơ̆r akăn ih na sa plei ‘long mă Inh khă ưh kơ ăn sa, ‘thoi noh teh gô pŭ hơngiap yua kơ ih,’ lăm chăl arih ih athei chu gleh lap na đei tơmam sa kơ ih lĕch đơ̆ng teh. Teh gô chăt lu jơla păng ‘long bơmrôm, păng ih gô sa tơmam chăt đơ̆ng lăm mir pơgar; Ih athei jang lĕch đak bơuh bơang tơ klĕng ih ‘mơ̆i na đei sa,dĭng truh tơ năr ih brŏk tơ teh dơ̆ng, teh mă đêl man ih sơ̆, yua kơ ih đơ̆ng ‘mui teh, ih gô brŏk tơ ‘mui teh.”(Blŭng-a 3:17-19)

Nơ̆r ‘Bok Kei-Dei yua iŏk tơnơm ‘long jơla wă pơma kơ kon bơngai kơnê̆, dôm lu bơngai “đei plei” lu sư ba ăn noh jơ̆ ơh sơ’ngon păng chhŭr nuih ăn kơ bơngai nai.

“Na kư̆m thoi Inh đei khan boih, Inh ưh kơ đei pơpuh tơweh kon pơlei noh ataih kơ lu iĕm, lu sư gô oei jê̆ lu iĕm păng tơdrong lu sư pơm yang nhen thoi poh-‘năk wă đăk kơ lu iĕm.” (Lu ‘Bok Sek Tơlang 2:3)

Pơyan Pơmat tat – Iung arih jơ̆ jơ năr lu bơ̆n tơchĕng pơwao lăng ming tơdrong arih, hơmet kơ năr phĕt Yang Yêsu Krist kĕ jei tơdrong yoch păng tơdrong lôch, noh jơ̆ lu bơ̆n lăng tơ lăm tơdrong tơpă mă jĭ jơhngơ̆m dêh: Tơm đơ̆ng tơdrong yoch lu bơ̆n ‘bet rơhiĕo Sư. Lu bơ̆n jơ̆ jơla suĕng mă môk jơla Sư yơ̆l.

Mă lei Pơmat tat – Iung arih ưh kơ sĭ adrô̆ jơ năr lu bơ̆n lăng lăm tơdrong hmach. Tơdrong bơtho gah Iung arih tơ’blŏk kơ lu bơ̆n thoi âu, dôm lu jơla hiap pơtê̆ noh ưh kơ đei gơh ket tơdrong arih ling lang. Lăm Yang Yêsu Krist lu bơ̆n đei tơpŭ ming ‘nao, wă kơ jing thoi “ tơm ‘long chăt cheng đak glung, đei plei kiơ̆ kơ bơyan…”(Hơriso 1:3)

Yua kơ thoi noh, bơyan Pơmat tat – Iung arih jơ̆ jơ năr wă kơ lu bơ̆n buch lê̆ tơm tơnơm jơla.

Tơdrong juăt ơ̆t kơ por lăm pơyan Chu Pơmat tat- Iung Arih ưh kơ wă kơ bơ̆n hil kơdih, hơdrin “pơmat hơla tŏ sĕt” wă kơ đei. Ơ̆t kơ por ba ăn tơdrong pơjuăt, tơgŭm bơ̆n praih păng pran kơ tang buch lê̆ dôm tơdrong oei pơgăn drong arih bơhngol bơ̆n. ‘Nâu bơih trŏ kơ jơ’năr bơ̆n tơblah tơpă hăm tơdrong juăt kơ pơm, pơlơ̆k pơle, pơm kơ bơ̆n ưh kơ wơ̆ ‘lŏ.

Kră Yang krao bơ̆n ưh kơ sĭ bơ̆n hŭt lê̆ tơdrong juăt iĕ ayơ noh. Kăl hloh bơ̆n kăl pơhrăm iŏk hŭt lê̆ dôm tơdrong bơ̆n gơnang hloh kơ Kră Yang. Noh jơ̆ tơdrong juăt, gơnang kơ đe, dah pơm kơdih hiôk kơplah gleh lap. Đơ̆ng noh lu nhôn athei hơdai tơgŭm dih băl, hơdai tơ ‘blŏk, hơdai pơjuăt ăn kơdih wă pơlôch lu tơdrong pơgăn. Bơyan phĕt ‘nâu ưh kơ krao iŏk lu bơ̆n arih lăm tơdrong sơ’ngon wă kơ đe ‘bôh. Noh jơ̆ nơ̆r krao yak năm lăm tơdrong tơpă, đĭ jơhngơ̆m, gô tơ’bơ̆p păng tŭk lê̆ dôm lu tơdrong pơm kơ lu bơ̆n rơdu kơ tơdrong pơgơ̆p hăm Kră Yang. Tuch luch, tơm kơ kơnhăm noh ưh kơ wă kơ lu bơ̆n kơ’bah kơ ‘bôch ôh, mă wă kơ lu bơ̆n đei lơ hloh- đei tơdrong arih ‘bĕnh blai lăm Kră Yang.

Lăm hnam dơnŏ lu nhôn, rim kơ pơge hơri ư-ang păng klah song nơ̆r ‘Bok Kei Dei. Adrol kơ phĕt Kră Yang Chu Pơmat tat lu nhôn kăt pơkao jơla păng chĕp minh achô̆ mơ̆t lăm hnam. Lu jơla suĕng jĭng nơ̆r tơ ‘blŏk kơ tơdrong yoch đei chhŭr nuih. Lu nhôn pinh Kră Yang tơbăt ăn tơdrong kiơ oei pơgăn tơdrong lui wơ̆ ‘lŏ, tơdrong kiơ pơm kơ plei lu nhôn jô kro. Lu nhôn apĭnh Kră Yang lăm hơnăm ‘nâu, Sư wă kơ nhôn rô̆ lê̆ tơdrong kiơ.

Đơ̆ng noh lu nhôn athei hơdai tơgŭm dih băl, hơdai tơ ‘blŏk, hơdai pơjuăt ăn kơdih wă pơlôch lu tơdrong pơgăn. Ưh kơ̆ sĭ tơhôih đĕch ưh kơ pơm kiơ, thei adrin hrĕch lê̆ đĭ.

Truh năr Phĕt Chu Pơmat tat, lu nhôn tơkuh ŭnh. Kơplah lu dơng jơla ŭnh sa, lu nhôn ‘blŏk tơdrong hil ‘Bok Kei Dei tuh tơ Kră Yang Yêsu Krist wă pơrăm tơdrong yoch kon bơngai. Lu nhôn lui ngeh tơdrong jang pơkeh Kră Yang. Lui ngeh tơpă lu nhôn ưh pă arih lăm tơdrong yoch rôp chô̆ bơih, mă đei tơdrong arih wơ̆ ‘lŏ lăm Kră Yang khŏm khŏm.

Apĭnh đĭ đăng krao khan hơdai: Kơkuh kơ Kră Yang, kon băt kon ưh kơ đei jơhngơ̆m pran wă rô̆ đĭ lu jơla oei wăn jơhngơ̆m kon. Kon apinh Kră Yang tơgŭm kon. Kon pơjao ăn Ih tơdrong juăt kơpơm, gơnang kơ đe, păng dôm tơdrong ưh kơ đei yua mă kon oei bơwei. Apinh ih pơjing jơhngơ̆m jing ‘nao, wă kơ tơdrong arih kon đei plei yua kơ wă ư ang kơ Ih. Kon kŭp kơ̆l krao khan hăm anăn Yang Yêsu Krist, A-men

Ơ lu bơngai mơ̆ng ‘mêm kơ eng, apinh Kră Yang pơdah ăn wă kơ bơ̆n ‘bôh băt tơdrong kiơ oei rôp chô̆ bơ̆n. Hơpơi bơ̆n đei jơhngơ̆m iơ̆m dim, pơih ăn kơ Kră Yang bơ̆jang, chong hơmet păng pơm plơ̆ng ăn lu tơmơ̆ng bluh dreng plơ̆ng ‘nao. Athei pơjao tơdrong arih bơ̆n lăm ti Kră Yang, wă kơ tơdrong arih Kră Yang ăn huay pă jô kro, na wơ̆ ‘lŏ, chăt rơh, păng pơkao đei plei lăm tơdrong rơnŭk rơnoa tôm tơdrong.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.