Buăl tam đei layơ mơn kơ sơ’ngon ưh? Tŏk bŏk lăm teh đak đei lơ tơmam lăng ‘bôh thoi kơ Facebook , YouTuber, tivi…wă lăng layơ kư̆m gơh, mă lei kon bơngai lu bơ̆n mơn kơ oei rơhông păng sơ’ngon. Yua kơ đơ̆ng kiơ lu bơ̆n đei mơn lăm jơhngơ̆m thoi noh? Păng lu bơ̆n kăl kơ gơnang kơ Kră Yang thoi yơ lăm dôm kơplah sơ’ngon?

Năr ‘nâu, ‘năr 24/03/2026, tơdrong tơdă Amăn Jơ Krao Khan Rim Năr apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Gene Markland kơ̆l ‘bai TƠ‘BƠ̆P TƠDRONG SƠ‘NGON

“Đang Sư pơma thoi noh bru đĭ-đăng lu bơngai pơhrăm păng Sư achăng Sư kơdâu jăk tơ nai.” (Markôs 14:50)

Tơpă rŏ lăng bu bu lăm lu bơ̆n kŭm đơ̆ng đei tơ’bơ̆p mơn lăm jơhngơ̆m thoi ‘noh. Yak tŏk bŏk lăm mĭnh pơlei tih lơ tơ pôl bơngai, mă lei lăm jơhngơ̆m đei rơhông thoi oei dơ̆ng tŏk bŏk char glă. Đei bơngai hơoei lăm hnam akŭm, tăp dăr jơ̆ dôm kơ muh măt hiĕk hiôk, hơdai kơkuh păng bơ̆jang kơ Kră Yang, thoi noh na lăm jơhngơ̆m oei mơn thoi kơdih oei hoch jroh mĭnh drô̆ kơpal thŏng nan tŏk bŏk đak dơsĭ să. Tơpă ưh kơ trŏ tŏ sĕt. Đei kơplah, buăl lăp ‘maih ôr pơret lăm jơhngơ̆m: “ ‘Nâu! Inh oei ‘bơ̆t dŏu ou!”

Thoi noh tơdrong kiơ oei truh? Yua kơ liơ Kră Yang đei ăn kơ lu bơ̆n tơ’bơ̆p hăm tơdrong ‘noh?

Lei buăl hăm đei layơ tơchĕng khan, rŏ lăng kơdih Sư wă tuh tơ ‘bĕnh tơdrong sơ’ngon lăm jơhngơ̆m buăl ưh?

‘Bok Kei-Dei đei ăn kơ ‘bok Ađam mĭnh ‘nu bơngai drŏkăn pơm buăl yak hơdai tơgŭm, yua kơ sư oei mĭnh ‘nu mĭnh drô̆ ưh kơ ‘lơ̆ng. Mă lei mă khan kơplah đei yă Ewơ hơdai, lăm Ađam oei đei mĭnh anih rơhông mă yă ưh kơ gơh tuh tơ‘bĕnh. Păng lăm rim ‘nu lu bơ̆n kŭm thoi noh. Đei mĭnh anih rơhông jrŭ lăm jơhngơ̆m, lăp gơh tơ ‘bĕnh yua kơ trŏ đơ̆ng tơdrong oei hơdai đơ̆ng Kră Yang.

Kơplah lu bơ̆n đơ̆ng đei tơdrong oei hơdai đơ̆ng ‘Bok Kei-Dei bơih, lei ưh kơ đei tơdrong kiơ nai gơh pơhiôk tơdrong rơhing jrŭ să mă bơhngol lu bơ̆n ‘măn ăn kơ Sư.

Lăm dôm kơ năr arih lăm teh đak ‘nâu, Kră Yang Yêsu juăt kơ pơm tơdrong juăt ‘nâu: “Mă-lei hơtai noh Yêsu wă năm krao khan kơ ‘Bă Sư ‘Bok Kei-Dei tơ anih kueng, na Sư năm hloi.” (Luka 5:16)

Kon ‘Bok Kei-Dei rơih mĭnh anih kueng wă oei mĭnh drô̆ hăm ‘Bă.

Na păng, lăm kơplah jơ jĭ pơmat sơ’ngon hloh đơ̆ng chăl arih Sư, dôm lu bơngai jê̆ hơdai hloh kŭm achăng Sư.

“Đĭ-đăng lu bơngai pơhrăm păng Sư achăng Sư kơdâu jăk tơ nai.” (Markôs 14:50)
Athei pơlong tơchĕng lăng tơdrong sơ’ngon ‘noh jĭ pơmat tat truh dang yơ! Lăp mĭnh tơdrong arih lăm teh đak lăm akâu jăn kon bơngai, pŭ iŏk dôm tơdrong hơgăt đơ̆ng kon bơngai, đei jơ̆ mĭnh tơdrong ưh kơ gơh kĕ tơchĕng hăm Sư. Lu bơ̆n ưh kơ gơh hlôh băt đĭ tơdrong sơ’ngon đơ̆ng Sư. Sơ̆p Hla Bơar Nơ̆r ‘Bok Kei-Dei tơ băt Yang Yêsu jơ̆ mĭnh kon bơngai tơpă păng kŭm tơ’bơ̆p dôm tơdrong gah kon bơngai, ‘ngoaih kơ tơdrong yoch.

‘Blŏk kơ hnam ah? Sĭt jơ̆ đei. Yang Yêsu ‘blŏk tơdrong ư-ang, ‘blŏk tơdrong pơgơ̆p tôm mah mă Sư đơ̆ng đei hăm ‘Bok Kei-Dei ‘Bă păng Yang Bơhngol ‘Lơ̆ng lăm plei ‘lơ̆ng. Mă lei, yua kơ tơdrong ‘mêm mơnat kơ kon bơngai, yua kơ pơm pơkeh tơdrong proh hơmet dŏng pơklaih đơ̆ng ‘Bok Kei-Dei ‘Bă, Sư đei achăng anih Plei ‘lơ̆ng, arih lăm chăl kon bơngai, tơ’bơ̆p dôm tơdrong sơ’ngon lăm jrŭ.

Thoi noh na, dah lu bơ̆n tơ‘bơ̆p mĭnh tơdrong sơ ‘ngon ayơ ‘noh, athei lăng ‘noh jơ̆ jơ năr wă hơdai pơgơ̆p hăm ‘Bok Krist lăm tơdrong sơ’ngon đơ̆ng Sư kơplah arih lăm teh đak. Tơdrong pŭ iŏk pơmat tat, hơdai hăm tơdrong sơ’ngon, jơ̆ mĭnh pah đơ̆ng lăm chăl arih lu bơ̆n kơ pal teh ‘nâu. Tơdrong ‘noh kŭm tơ ‘blŏk kơ lu bơ̆n khan teh đak ‘nâu ưh tim mă layơ jơ̆ anih oei khŏm khŏm kơ bơ̆n. Gô truh kơ năr, lu bơ̆n achăng lê̆ dôm tơdrong pŭ trăp đơ̆ng chăl ‘nâu thoi măt mêng lĕch hlôi đơ̆ng hơkâu yă ‘ngă.

Mơn lăm jơhngơ̆m sơ’ngon jơ̆ đei tơpă, mă lei jơ̆ bơngai lui kơ Kră Yang, lu bơ̆n athei hlôh khan kơdih ưh kơ đei mĭnh drô̆. Lu bơ̆n đei Yang Bơhngol ‘Lơ̆ng, Tơ’ngla pơlung lu bơ̆n lăm dôm kơ jĭ jăn.

Mơn ‘bôh sơ’ngon lăm mĭnh teh đak lơ bơngai mơ̆ng anat kơ lui ngheh, mă lei ‘noh jơ̆ tơdrong lơ bơngai oei tơ ‘bơ̆p, mă khan dôm lu bơngai lui kơ Kră Yang.
Athei hŏk iŏk tơdrong tơ’bơ̆p tơdrong sơ’ngon thoi mĭnh tơmam Kră Yang yua wă dui lu bơ̆n năm jê̆ Sư hloh dơ̆ng. Athei ‘blŏk khan Sư băt hơđăl rim kơ mum iĕ hloh lăm kon bơngai lu bơ̆n- anih hlơp, bơhngol păng akâu jăn.

Tơdrong sơ’ngon lăm chăl ‘nâu ưh kơ đei kiơ wă pơtŏ hăm tơdrong ư-ang kơplah yak năm lăm Yang Bơhngol ‘Lơ̆ng, pơgơ̆p hăm ‘Bok Kei-Dei Pêng ‘Nu Yang.
Păng ‘nĕ kơ hiơt nơ̆r ‘Bok Kei-Dei tơ ‘blŏk kơ lu bơ̆n lăm Tơdrong Pơđơ̆k 18:24: “Đei minh ‘nu buăl tơpăt juăt hloh kơ ‘nhŏng oh pôm mĕ ‘bă.” păng ‘Bok Dŏng Pơklaih Yang Yêsu trŏ jơ̆ bơngai buăl ‘noh.

Dah lu bơ̆n yak năm hăm ‘Bok Krist lăm Yang Bơhngol ‘Lơ̆ng, lu bơ̆n gô ưh pă đei layơ sơ’ngon bơih.

Apĭnh đĭ đăng krao khan hơdai: Kơkuh kơ Kră Yang ‘mêm, đei kơplah kon ‘bôh kơdih sơ’ngon tơpă lăm teh đak hrơ̆ng hreng păng lơ bơngai ‘nâu. Kon ưh kơ băt yua đơ̆ng kiơ, mă lei kon băt jơ̆ kon kăl kơ Kră Yang. Apinh Ih oei jê̆ kon lăm dôm kơ jơ phŭt ‘nâu, tuh tơ ‘bĕnh dôm kơ anih rơhông lăm jơhngơ̆m kon hăm tơdrong ‘mêm mơnat jrŭ să đơ̆ng Ih. Apinh tơ ‘blŏk kơ kon ‘blŏk khan kon ưh kơ yak năm mĭnh drô̆, na Ih ling lang năm hơdai hăm kon đĭ trong năm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mơn lăm jơhngơ̆m sơ’ngon ưh kơ trŏ layơ kŭm jơ̆ tơ’bôh đơ̆ng tơdrong ưh kơ đei tơdrong ‘mêm. Mưh lăp, ‘noh jơ̆ nơ̆r krao wă yak jrŭ hloh lăm tơdrong pơgơ̆p hơdai hăm Kră Yang. Dah đĭ đăng re hrơ̆ng tăp dăr thĕng hreh, dah ưh pă đei bu wă gơnang, lu bơ̆n ‘nao wă ‘bôh băt tơpă kơdih kăl kơ Sư lơ truh dang yơ. Dah năr ‘nâu buăl oei ‘bôh sơ’ngon, athei băt khan Kră Yang oei ‘bơ̆t jê̆ buăl. Sư băt hơđăl rim kơ mơn lăm jơhngơ̆m, Sư ‘bôh băt đĭ đăng dôm kơ tơdrong rơhing lăm jơhngơ̆m buăl. Păng mă khan kơplah mơn ‘bôh mĭnh drô̆ lăm teh đak lơ bơngai ‘nâu, buăl oei gơh chă ‘bôh tơdrong pơdơh tơpă kơ bơhngol bơ̆n lăm anih ‘Bok Krist.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.