25.03 Amăn Jơ Krao Khan Rim Năr: PƠJAO ĂN KƠ KRĂ YANG

Lăm tơdrong arih đei lơ tơdrong hiơ̆k bơngơ̆t hli tơrơ, đei năr jơhngơ̆m lu bơ̆n trăp trĭn yua kơ dôm tơdrong proh hơmet bơih adrol, pŭ iŏk dôm lu tơdrong ưh kơ băt adrol. Lu bơ̆n ‘bônh kơ mơ̆t lăm tơdrong bơwei kơjăp lăm tơpang ti kơdih, nhen thoi kơdih gô gơh pơm tôm tơdrong. Dôm kơ nơ̆r Kră Yang krao iŏk lu bơ̆n yak năm lăm tơdrong arih nai, tơdrong arih lui gơnang păng bơ̆jang, dan lăm tơdrong pŭ trăp, hơpơi wă, proh hơmet hăm dôm tơdrong hiơ̆k bơngơ̆t oei hlơp ‘bơ̆t jơ̆ng Kră Yang. Noh ưh kơ achăng lê̆, mă noh jơ̆ tơdrong bơ̆jang đơ̆ng đon lui, lui ngeh kơ ‘Bok Kei-Dei jơ̆ Tơ’ngla pơgơ̆r păng ‘lơ̆ng tơpăt. Kơplah lu bơ̆n tơpăt pơjao tôm tơdrong ăn kơ Sư, rơnŭk rơnoa đơ̆ng ‘Bok Kei-Dei gô bơwei jơhngơ̆m đon tơchĕng lu bơ̆n lăm Yang Yêsu Krist.

Năr ‘nâu, ‘năr 25/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai PƠJAO ĂN KƠ KRĂ YANG

“…Tơdah trŏ kơ lôch lei inh lôch.” (Esther 4:16)

“Akŭm đĭ-đăng lu adrĕch bơngai Juđa tơ pơlei Susa bĕ, đơ̆ng noh athei ơ̆t kơ sŏng sa lăm pêng năr yua kơ inh, ‘nĕ sŏng sa, kư̆m ‘nĕ kơ nhă đak. Inh hăm lu bơngai awih awăn tơgŭm inh kư̆m ơ̆t kơ sŏng sa mơ̆n. Thoi noh inh gô mơ̆t tơ anih pơtao, mă khan pơm glăi kơ tơdrong juăt bưh mơ̆n. Tơdah trŏ kơ lôch lei inh lôch.” (Esther 4:16)

Lăm dôm kơ năr blŭng a kơ sơnăm ‘nao, inh ngăl tơchĕng hiơ̆k kơ proh hơmet kơ sơnăm ‘nao. Kră Yang ăn kơ inh đei tơdrong jang kơ jăp tơ pơlei kơdih đei jĭt sơnăm hlôi hloh bơih, hăm jên khĕi tôm mah wei rong kơdih hăm hnam dơnŏ. Yua kơ jơhngơ̆m ‘mêm kơ Kră Yang, inh yua jơ năr Kră Yang ăn na bơ̆jang hăm lu khŭl bơ̆jang lăm Hnam Akŭm bơ̆jang kơ Kră Yang. Mă lei tơdrong proh hơmet tơdrong jang kơ minh sơnăm, wă kơ hơtŏ ăi hăm tơdrong jang lăm hnam trưng hăm tơdrong jang lăm Hnam Akŭm, ưh kơ đei ‘bônh ôh.

Lăm jơhngơ̆m inh oei đei hiơ̆k bơngơ̆t, dôm kơ tơdrong tơchĕng bơngơ̆t adrol. Inh hăm wă drơ̆ng iŏk thim tơdrong jang dơ̆ng ưh? Tơdah drơ̆ng iŏk, inh gô đei thim jên tơmam, gô đei apah, mă lei tơdah bơ̆jang lăm Năr Tơpơh na gô thoi yơ? Inh hăm wă kăl kơ năm akŭm hơdai hăm lu khŭl lăm Hnam Akŭm ưh? Tơdah đei rơih iŏk, lei inh hăm wă đei jơ bơwei hnam dơnŏ inh dơ̆ng ưh?

Kơplah noh, Nơ̆r Kră Yang đei tơ’blŏk kơ inh: “Na bu achăng hnam sư, ‘nhŏng oh sư, mĕ ‘bă sư, kon sư, mir ‘ba sư, yua kơ jang tơdrong Inh, bơngai noh gô đei tơmam lơ hloh kơ sư đei sơ̆ păng ning-mônh sư gô arih ling-lang hơdai hăm ‘Bok Kei-Dei ưh kơ layơ tôch.” (Mathiơ 19:29). Mă băt kơ thoi noh, mă lei dôm kơ tơdrong hiơ̆k bơngơ̆t oei đei lăm inh lăm dôm kơ năr blŭng a lăm sơnăm ‘nao. Na pă minh ‘măng dơ̆ng, Nơ̆r Kră Yang đei chih pơma bơtho:“Iĕm ‘nĕ kơ hli, ưh kơ hli kơ minh tơdrong kiơ ôh. Mă-lei iĕm athei krao khan apinh ‘Bok Kei-Dei wei-lăng păng tơgŭm iĕm lăm tôm tơdrong păng athei băt bơnê kơ Sư ling-lang.” (Philip 4:6). Inh năm tơ Kră Yang na apinh thoi âu: “Kră Yang ơi apinh tơgŭm kon proh hơmet tơdrong jang…” Na Kră Yang tơ’blŏk ăn kơ inh tơdrong hơ’mon kơ Yă Pơtao Esther.

Esther jơ̆ minh ‘nu bơngai drŏkăn mơti bơngai Isơrael, đei bơngai ‘nhŏng adrĕch adrŭng sư Morđêkai wei rong (Esther 2:7). Anăn “Esther” jơ̆ anăn teh đak tih kơplah pơtao Êsêru pơgơ̆r- minh ‘nu pơtao đei bưng păng mơdrŏng. “Pơtao ‘mêm kơ Esther hloh kơ lu đe hơdruh nai, ‘bơ̆t anăp pơtao lăng sư mơnat hloh kơ lu đe hơdruh nai, na pơyơ̆l ăn kơ sư môk pơtao tơ kơ̆l sư, pôk sư jing yă pơtao tơplih kơ yă Wathi.” (Esther 2:17)

Đei đe pôk pơ ư, arih lăm hnam pơtao păng đei pơjao ăn tơdrong jang thoi kơ yă pơtao Esther đei blư tơ’bơ̆p tơdrong truh tih – noh jơ̆ đe wă pơrăm adrĕch adrŭng sư. Haman bơngai gak đei tơdrong kơ nam kơdih sư hăm Hamedatha, chă đon wă pơrăm adrĕch adrŭng bơngai Juđa. “Lăm năr mơjĭt-pêng khei mă mônh, krao lu bơngai jang chih hla bơar tơbăt kơ tơdrong juăt kiơ̆ kơ Haman tơtă boih kơ lu kuan tih pơtao đĭ-đăng lu kră pơgơ̆r tơring păng đĭ kơ lu kră pơgơ̆r rim kon pơlei lăm jơ̆p kơ dêh, tơring ayơ chih kiơ̆ kơ nơ̆r sư kơdih, adrĕch ayơ chih kiơ̆ nơ̆r pơma sư kơdih. Lu đe chih tơdrong kĭ anăn pơtao Asêrus păng iŏk tơkhiĕn pơtao chơ̆m hla bơar noh. Đe gơih hơtă kơ linh năm ba kơ đĭ-đăng tơring lăm char pơtao Asêrus, wă pơrăm pơlôch đĭ lu adrĕch adrung Juđa mă ‘lơ̆p mă ‘lŏ mă kră, mă drŏ-kăn, lăm năr mơjĭt-pêng khei mơjĭt-‘bar khei Adar păng wă tơgar iŏk mŭk tơmam đơ̆ng lu sư.” (Esther 3:12-13). Lăm lu kon pơlei Susa hli tơrơ (Esther 3:15).
Yă Pơtao Esther, đei lăm sư pham adrĕch adrŭng Juđa, dơ̆ng ‘bơ̆t anăp lôch dah arih: dah thĕng hreh wă bơwei akâu kơdih, dah apinh pơtao wă dŏng iŏk adrĕch adrŭng sư. Sư băt rơđah dah apinh mă ưh kơ đei drơ̆ng iŏk noh gô pŭ iŏk truh tơ tơdrong lôch (Esther 4:11).

Nơ̆r pơkă đơ̆ng Hamedatha: “Yua kơ tơdah ih ngăn lăm jơ ‘nâu gô đei trong nai dơ̆ng pơklaih adrĕch Juđa, mă-lei ih păng hnam dơnŏ ‘bă ih kư̆m gô lôch răm. Bu băt lê̆ ih gơh pơm yă pơtao kư̆m yua kơ tơdrong lâu?” (Esther 4:14) đei tơgŭm sư rơih iŏk tơdrong sư pơm. Esther ơ̆t kơ por, krao khan păng yak năm hăm jơhngơ̆m đon lui: “Tơdah dah truh tơ lôch inh gô chu lôch.” (Esther 4:16)

‘Bơ̆t anăp tơdrong truh, yă pơtao Esther mơn băt kơ tơdrong pơgơ̆r tih đơ̆ng ‘Bok Kei-Dei. Sư ưh pă tơchĕng kơ tơdrong sư đei anăn jing yă pơtao noh bơih, dôm kơ tơdrong pơgơ̆r lăm sư truh tơ tơdrong lôch sư chu iŏk, sư dan tơdrong yua ăn kơ adrĕch adrŭng păng tơdrong tơdă đơ̆ng ‘Bok Kei-Dei hơdrol hloh.

Kơplah Esther mơn băt kơ sư đei Kră Yang păng chu yom Kră Yang tôm tơdrong, ‘Bok Kei-Dei bơ̆jang lăm chăl arih sư. Kră Yang ăn kơ Yă Pơtao Esther đei gơh hơgei ‘bơ̆t anăp pơtao Asêsus (Esther 5:2), tơgŭm sư tơ’bôh tơdrong kơnê̆ Haman, pơm kơ Haman pŭ iŏk tơdrong lôch hrek atol ‘bơ̆t ‘long pơgơ̆ng mă đêl sư pơm ( Esther 7:9-10).

Tơdrong đêl drơ̆ng wă pơlôch kon pơlei Juđa đei tơplih ming păng kon pơlei Susa hiôk chơt. Truh tơ hrei âu, bơngai Juđa oei pơjing phĕt lăm khei Adar rim sơnăm wă ‘blŏk hơdơ̆r kơ tơdrong pơklaih đơ̆ng tơdrong wă lôch răm đơ̆ng Haman. Lu sư “…pơm thoi lu sư đei pơm boih lăm sơnăm tơm hmơm noh, lu sư pơm kiơ̆ tơdrong Morđêkai đei chih kơ lu sư. (Esther 9:23)

Esther đei krao iŏk đơ̆ng lăm tơdrong arih lăng thoi kơ hmă đĕch, lăm tơdrong arih kơplah noh. Sư ưh kơ đei yua iŏk tơdrong sư đei wă kơ hiôk kơdih đĕch, mă wă bơ̆jang ăn kơ kon pơlei. Sư rơih iŏk tơdrong hreh hrĕp, ơ̆t kơpor păng krao khan chơchă tơdrong bơtho tơ’bôh đơ̆ng ‘Bok Kei-Dei. Sư achăng lê̆ tơdrong arih hiôk sư truh tơ tơdrong arih truh tơ lôch wă kơ Kră Yang yua iŏk sư. Na, ‘Bok Kei-Dei huay ăn kơ sư hiong tơdrong noh; Kră Yang ăn kơ sư tơdrong tih hloh kơ sư tơchĕng, đei tơdrong dŏng pơklaih tih păng pŭn hiôk hloh.

Gah inh, kơplah năm tơ Kră Yang, dôm kơ tơdrong hli tơrơ lăm inh ‘net ‘net tơplih hăm tơdrong hơđơ̆ng rơnŭk rơnoa. Inh pơhrăm iŏk pơjao ăn kơ Kră Yang, hơpơi kơ Kră Yang yua iŏk chăl arih inh mă Kră Yang dan ăn bơih. Đĭ đăng lu bơ̆n Kră Yang đei krao iŏk phara dih băl, kư̆m đei yak năm hăm đon lui kăl kơ đei pŭ iŏk. ‘Bok Kei-Dei ưh kơ adrô̆ krao iŏk lu bơ̆n bơ̆jang lăm Hnam Akŭm đĕch mă kư̆m oei yua lăm tôm tơdrong jang Sư pơjao ăn lăm tơdrong arih rim năr.

Apĭnh đĭ đăng krao khan hơdai: Kơkuh kơ ‘Bă mă ‘mêm, kơplah đei lơ tơdrong lăm tơdrong arih, lơ wơ̆t kon hiơ̆k bơngơ̆t, hli tơrơ, tơchĕng pơwao păng ‘maih wă kơ bơwei lăng tơdrong arih kơdih tơ anăp. Apinh tơgŭm kon wă kơ chu yom Ih, Ih lăp đon kơ kon, lui gơnang kơ Ih pơgơ̆r hăm tơdrong ‘lơ̆ng tơpăt Ih. Apinh iŏk lê̆ dôm tơdrong hiơ̆k bơngơ̆t đơ̆ng kon, păng ăn kơ kon đei jơhngơ̆m đon lui kơjăp kơ Ih. Apinh bơtho kon băt kơ chang gô dôm lu tơdrong đơ̆ng Ih, chu yom dôm tơdrong Ih lăp đon, păng hơđơ̆ng kơplah Ih pơih trong. Hơpơi kơ tơdrong arih kon Ih yua iŏk kiơ̆ kơ tơdrong tơdă ‘lơ̆ng đơ̆ng Ih. Kon kŭp kơ̆l krao khan hăm anăn Yang Yêsu Krist, A – men.

Ơ lu bơngai mơ̆ng mă ‘mêm kơ eng, lăm giĕng bơtho tơ’bôh kơ phĕt ‘blŏk hơdơ̆r Yang Yêsu chu iŏk pơmat tat wă dŏng pơklaih kon bơngai, lu bơ̆n mơn ‘bôh tơdrong tơdă dŏng pơklaih đơ̆ng ‘Bok Kei-Dei đơ̆ng blŭng a kơplah adrĕch adrŭng kon bơngai noh jơ̆ Ađam păng Ewơ pơm yoch. Na tơdrong tơdă dŏng pơklaih kon pơlei Kră Yang đei đơ̆ng sơ̆ truh tơ dang ei, Sư yua iŏk lu bơngai băt kơ chu yom pơjao đĭ tơdrong arih ăn kơ Kră Yang. Kră Yang yua Esther dŏng pơklaih kon pơlei Juđa klaih đơ̆ng tơdrong lôch, hrei ‘nâu Kră Yang kư̆m yua chăl arih rim ‘nu lu bơ̆n wă bơ̆jang tơdrong Sư, wă pơma drơ̆ng iŏk tơdrong bơ̆jang Kră Yang pơjao, na ră roi tơdrong dŏng pơklaih Sư wă wơ̆t jur dơ̆ng. Hơpơi kơ chăl arih rim ‘nu lu bơ̆n gô pơjao kơ Kră Yang tôm tơdrong.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.