Tơdrong lôch jơ̆ tơdrong mă lơ bơngai weh wer kơplah tơchĕng truh, mă băt khan ưh kơ đei bu gơh weh wer. Mă lei, hăm bơngai lui kơ Kră Yang, tơdrong trŏ kơ tơchĕng pơwao hloh ưh kơ trŏ jơ̆ tơdrong lôch đơ̆ng akâu jăn tơ ning mônh, mă kŭm jơ̆ tơdrong lôch đơ̆ng lôch kơ tơdrong yoch, tơdrong đơ̆ng kơdih kâu păng kon bơngai so lăm dang ei. Tơdrong pơm lôch tơdrong kơdih kâu đơ̆ng kơdih bơ̆n jơ̆ ưh tim mă layơ jơ̆ tơdrong ‘bônh đĕch, mă lei lăp kơplah kon bơngai so đei pơ̆ng kơ đĭnh, lu bơ̆n ‘nao wă hlôi mơn đei tơpă tơdrong arih ‘nao lăm tơdrong pơgơ̆p hăm ‘Bok Kei-Dei.

Năr ‘nâu, ‘năr 26/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Marty Bullis kơ̆l ‘bai DANG BƠ̆N LÔCH BƠIH LĂM TƠDRONG YOCH.

“Akâu bơ̆n kư̆m thoi noh mơ̆n, dang bơ̆n lôch hŭt đĭ dôm tơdrong yoch, gơnang kơ Yêsu Krist đei arih ‘nao kiơ̆ thoi Sư, na jang tơdrong ‘Bok Kei-Dei lei-lăi.” (Rôm 6:11)

Chu iŏk tơdrong pơmat jơ̆ khei jơ năr bơngai lui kơ Kră Yang đei krao wă hơmet jơhngơ̆m wă ‘blŏk tơchĕng gah ‘long pơglang păng tơdrong lôch tang đơ̆ng Yang Yêsu. ‘Nâu kŭm jơ̆ jơ năr rim ‘nu lu bơ̆n kăl kơ thĕng hreh wă lăng ming chăl arih bơ̆n, ‘bôh băt dôm tơdrong kơ ‘bah, tơbral păng pơm ‘nao dơ̆ng tơdrong pơkăm đơ̆ng kơdih hăm ‘Bok Kei-Dei. Kiơ̆ kơ tơdrong juăt sơ̆ kơ lơ Khŭl Bơngai Lui, lăm kơplah jơ năr ‘nâu đei krao jơ̆ Bơyan ‘blŏk kơ Yang Yêsu pơmat tat truh tơ lôch yua kơ tơdrong yoch kon bơngai

Bơyan ‘blŏk kơ Yang Yêsu pơmat tat truh tơ lôch yua kơ tơdrong yoch kon bơngai đei lăm 40 năr, pơtơm blŭng a đơ̆ng Năr pêng Phĕt ‘Blŏk hơdơ̆r kơ Kră Yang Chu lôch păng tôch adrol kơ Phĕt ‘Blŏk Hơdơ̆r kơ Kră Yang Iung Arih. Lăm Năr Mă Pêng Phĕt , lu bơngai lui đei pik tơnuh tơ klĕng rup ‘long pơglang. Pơm tơ ‘bôh ‘noh tơ ‘blŏk kơ lu bơ̆n khan kon bơngai đei pơjing đơ̆ng ‘mui teh păng gô wih brŏk tơ ‘mui teh. Phĕt ‘blŏk hơdơ̆r kŭm ăn kơ jơhngơ̆m bơ̆n lăng tơ tơdrong lôch đơ̆ng ‘Bok Dŏng Pơklaih Yêsu, kŭm thoi gah tơdrong lôch đơ̆ng kơdih lu bơ̆n. Yua kơ ‘noh, lăm Bơyan ‘blŏk kơ Yang Yêsu pơmat tat truh tơ lôch yua kơ tơdrong yoch kon bơngai ‘nâu, lu bơ̆n athei tơchĕng pơwao gah ‘bar tơdrong lôch.

Mă mĭnh jơ̆ tơdrong lôch rim năr đơ̆ng tơdrong kơdih kâu. Lôch tơdrong kơdih kâu jơ̆ kơplah lu bơ̆n hŏk iŏk tơdrong achăng dôm tơdrong kiơ̆ kơdih, hưch wă păng tơdrong arih ưh kơ chu kiơ̆ tơdrong Kră Yang wă, wă chu yom ăn tơdrong arih bơ̆n kơ Sư. ‘Nâu jơ̆ mĭnh tơdrong tơblah bơhngol mă rim ‘nu bơngai lui kơ Kră Yang kăl kơ đei tơ ‘bơ̆p hơđăl.

Mă ‘bar jơ̆ tơdrong lôch gah sĕch akar tơ ning mônh. ‘Mui teh tơ ‘blŏk kơ lu bơ̆n khan mĭnh năr ayơ noh, akâu jăn ‘nâu gô rơdu păng hiong răm, păng teh đak kŭm ưh kơ trŏ jơ̆ anih oei khŏm khŏm kơ lu bơ̆n. Mă lei, tơdrong chang hơmĕng đơ̆ng bơngai lui kơ Kră Yang jơ̆: mă kon bơngai gah ‘nguaih đei hiong răm, mă lei kon bơngai gah lăm oei gơh tơplih păng wơ̆ pran hloh rim năr lăm ‘Bok Krist.

Akâu jăn gơh rai rơdu, mă lei jơhngơ̆m ‘mêm kơ Kră Yang kăl kơ đei pơthim ăn.
Lăm Mathiơ 26:6-13, Sơ̆p Hla Bơar Nơ̆r ‘Bok Kei-Dei chih roi hơ’mon mĭnh ‘nu bơngai drŏ kăn ba pơgang ‘bâu phu kăp jên tuh tơ kơ̆l Yang Yêsu. Lu bơngai pơhrăm đei pơma hil păng đei khan ‘noh jơ̆ pơm pơhuach, yua kơ pơgang ‘noh gơh tĕch na wă tơgŭm ăn kơ bơngai dơnuh. Mă lei Yang Yêsu pơma bơngai drŏkăn ‘noh pơm thoi noh jơ̆ wă hơmet ăn kơ tơdrong ‘bŭ Sư. Sư khan: “Yua kơ kiơ iĕm ơh kơ tơdrong sư pơm kơ Inh noh? Sư pơm thoi noh trŏ boih. Lu bơngai dơnuh hin sư oei păng iĕm ling-lang, gah Inh ưh kơ oei păng iĕm ling-lang ôh. Sư tuh đak pơgang ‘bâu phu tơ akâu Inh hơdrol kơ đe wă ‘bŭ Inh.”

Bơngai drŏkăn ‘noh rŏ lăng ưh kơ gơh hlôh băt gah ‘long pơglang mă Yang Yêsu pŭ iŏk, mă lei sư đei hiôk lăm jơhngơ̆m pơyơ̆r tơdrong gĭt kăl hloh đơ̆ng kơdih đei ăn kơ Kră Yang. Yă ưh kơ gĭt kơ pơgang ‘bâu phu ‘noh kơdih ‘noh bơih, mă lei yua kơ ‘mêm kơ Yang Yêsu, yă đĭ jơhngơ̆m pơyơ̆r kơ Sư, ưh kơ bơngơ̆t kơ đơ̆ng măt lăng dah tơdrong pơjăm đơ̆ng bơngai nai.

Păng trŏ thoi kơdôm tơdrong kiơ Yang Yêsu pơma, lăp dôm năr đơ̆ng rŏng, Sư đei pŭ iŏk tơdrong lôch tơ ‘long pơglang, trŏ thoi wă păng tơdrong tơdă dŏng pơklaih đơ̆ng ‘Bok Kei-Dei.

Kŭm kiơ̆ kơ tơdrong tơm ‘noh, rim ‘nu lu bơ̆n oei rim năr hơmet kơ tơdrong lôch đơ̆ng kơdih bơ̆n. Tơdrong lôch gah sĕch akar jơ̆ tơdrong ưh kơ gơh weh wer, mă lei tơdrong gĭt kăl hloh jơ̆ lu bơ̆n hăm pŭ iŏk pơlôch lê̆ tơdrong akâu kơdih đơ̆ng kơdih bơ̆n dah ưh. Lôch lê̆ tơdrong akâu kơdih jơ̆ tơ’bôh đơ̆ng tơdrong wơ̆ pran gah bơhngol, wă pơtơm mĭnh chăl arih ‘nao hăm ‘Bok Krist.

Dah arih kơ Kră Yang, lu bơ̆n rơih iŏk mĭnh tơdrong arih mă teh đak ‘bôh hlĭch tơpă. Teh đak ling lang chă trong pơm kơ lu bơ̆n arih kơ tơdrong hưch hanh păng kơdih kâu, hiơt lê̆ kơ tơdrong ‘mêm mơnat păng bơwih bơwăn kơ bơngai nai. Tơdrong chu pŭ iŏk đơ̆ng chăl arih kiơ̆ Kră Yang ngăl đei hlôh ưh kơ trŏ, lei lăi thoi tơdrong tơ’bôh đơ̆ng bơngai drŏkăn sơ̆ đei lu bơngai pơhrăm ưh kơ đei hlôh kơplah ‘noh. Mă lei Kră Yang Yêsu krao ‘noh jơ̆ “mĭnh tơdrong ‘lơ̆ng”.

Yua kơ thoi noh, lăm bơyan Kră Yang Chu iŏk Pơmat ‘nâu, lu bơ̆n athei tơchĕng lăng kơdih oei hơmet kơ tơdrong lôch ayơ? Lăp jơ̆ tơdrong lôch gah sĕch akar tơ ning mônh, dah jơ̆ tơdrong lôch rim năr đơ̆ng kơdih kâu? Dah đei ‘bôh băt chăl arih khŏm khŏm jơ̆ tơpă, păng mĭnh năr ayơ ‘noh lu bơ̆n gô tơ’bơ̆p ‘bơ̆t anăp Kră Yang, lei lăm kơplah dang ei, lu bơ̆n kăl kơ pơ̆ng kơđĭnh gah akâu sĕch akar bơ̆n tơ ‘long pơglang, păng yua kơ tơdrong mơnat đơ̆ng Kră Yang wă arih tôm mah kơ Sư. Lu bơ̆n athei mơ̆ng nơ̆r bơtho đơ̆ng ‘bok Pôl: “Akâu bơ̆n kư̆m thoi noh mơ̆n, dang bơ̆n lôch hŭt đĭ dôm tơdrong yoch, gơnang kơ Yêsu Krist đei arih ‘nao kiơ̆ thoi Sư, na jang tơdrong ‘Bok Kei-Dei lei-lăi. Akâu bơ̆n juăt kơ pơm yoch, bơ̆n athei gơ̆t ‘nĕ pă ăn pơm yoch dơ̆ng. Ning-mônh akâu kon bơngai bơ̆n gô tơ’bơ̆p tơdrong lôch. Bơ̆n ‘nĕ pă ăn akâu bơ̆n pơm yoch, bơ̆n athei pơjao akâu bơ̆n kơ ‘Bok Kei-Dei đĕch, wă kơ ‘Bok Kei-Dei wei-lăng chăl arih bơ̆n tơpăt ling-lang dang bơ̆n iung arih đơ̆ng lôch.” (Rôm 6 :11-13)

Apĭnh đĭ đăng krao khan hơdai: Kơkuh kơ Kră Yang mă ‘mêm! Kon bơnê kơ Ih yua kơ đei lôch tang tơ ‘long pơglang wă dŏng pơklaih kon. Kră Yang ơi, dah Ih đei lôch tang kon, lei apinh Ih kŭm tơgŭm kon băt kơdih đei lôch hăm tơdrong yoch, wă kơ gơh arih mĭnh chăl arih ‘nao lăm Ih. Lăm dôm kơ năr ‘nâu, apinh ăn kơ jơhngơ̆m kon thĕng hreh ‘bơ̆t anăp Ih, wă tơchĕng gah kơdih kâu păng gah kơdih Ih, gah dôm kơ ơh sơ’ngon păng pơmat tat Ih đei pŭ iŏk yua kơ kon.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lăm dôm kơ năr adrol kơ Phĕt ‘Blŏk Hơdơ̆r kơ Kră Yang Chu Iŏk Pơmat, athei ‘măn jơnăr thĕng hreh wă năm jê̆ Kră Yang hloh, wă tơchĕng pơwao păng mơn lăm jơhngơ̆m ‘bơ̆t anăp tơdrong ‘mêm tih đơ̆ng Sư đei tơ’bôh tơ kơpal ‘long pơglang. Dah gơh, athei hơmet lê̆ dôm tơdrong hrơ̆ng hreng, pơchơt ưh kơ kăl păng ăn kơ jơhngơ̆m lu bơ̆n lăng tơ gah tơdrong chu iŏk pơmat đơ̆ng Yang Yêsu.

Wă tơl tơwih hăm Nơ̆r Kră Yang, lăm năr ‘nâu, lu bơ̆n athei krao apinh Kră Yang tơ’bôh ăn mĭnh tơdrong yoch, mĭnh tơdrong juăt, dah mĭnh tơdrong tơ’bôh ayơ noh ưh kơ thoi Sư wă, wă adrin achăng thoi mĭnh tơdrong pơkăm “lôch lê̆ tơdrong kơdih” đơ̆ng kơdih kâu. Hơdai hăm, lu bơ̆n kŭm đei krao wă pơyơ̆r tôm tơdrong kơdih đei kơ Kră Yang, thoi bơngai drŏkăn sơ̆ đei pơyơ̆r gŏl đak pơgang ‘bâu phu gĭt kơ Yang Yêsu.

Hơpơi lăm bơyan Kră Yang Chu Iŏk Pơmat ‘nâu, lu bơ̆n ưh kơ pơdơh ‘bơ̆t tơdrong tơchĕng tơdrong lôch đơ̆ng Kră Yang, mă lei kŭm pơm tơ’bôh wă kơ tơdrong kơdih kâu lôch păng kon bơngai so đơ̆ng bơ̆n, wă kơ gơh arih mĭnh chăl arih ‘nao lăm Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.