27.03 Amăn Jơ Krao Khan Rim Năr: TŬK ĐĬ TƠDRONG KƠDIH PĂNG TÔI ‘LONG PƠGLANG

Đei mơ̆n bơ̆n mơn rơđah kơ Kră Yang krao bơ̆n pơm minh tơdrong kiơ noh, mă lei jơhnhơ̆m bơ̆n oei ling lang kơ hiơ̆ hyĭn. Mơlâu kơ đe lăng tơ bơ̆n, mơlâu kơ bơ̆n “phara ‘biơ̆”, dah lăng hmă đĕch ưh kơ ‘maih wă lĕch đơ̆ng anih juăt kơ hơđơ̆ng bơih. Bơ̆n oei ‘mêm kơ Kră Yang, oei kiơ̆ Sư, mă lei bơ̆n ưh tam mă achăng lê̆ dôm tơdrong bơ̆n oei bơwei. Thoi noh, kơplah hơmet jơhngơ̆m wă tôi ‘long pơglang kiơ̆ Kră Yang, na lu bơ̆n gô wơ̆ ‘lŏ păng mơn đei pŭn hiôk đơ̆ng Kră Yang ăn.

Năr ‘nâu, ‘năr 27/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jessica Teed kơ̆l ‘bai TŬK ĐĬ TƠDRONG KƠDIH PĂNG TÔI ‘LONG PƠGLANG

“Klaih kơ noh Yêsu khan kơ lu bơngai pơhrăm păng Sư: “Dah bơngai bu wă kiơ̆ Inh, sư athei tŭk đĭ tơdrong sư kơdih păng tôi kơdih ‘long pơglang chu lôch yua kơ wă kiơ̆ Inh.” (Mathiơ 16:24)

Kiơ̆ Kră Yang păng jing jơ̆ng ‘bang Sư noh jơ̆ minh tơdrong ưh kơ đei tôch. Noh jơ̆ trong yak năm đunh sơnăm, kơplah lu bơ̆n pơhrăm arih phara kơ kon bơngai lăm teh đak păng wă kơ rai nhen thoi ‘Bok Krist hloh. Gô ưh pă đei layơ bơ̆n dui jơhngơ̆m hiôk păng pơma khan: “đang bơih, inh truh tơ anih hơgăt bơih”. Tơplơ̆ dơ̆ng, lu bơ̆n oei năm lăm chăl wă pơhrăm, wơ̆ ‘lŏ, păng đei Kră Yang dui ba năm hloh mă kơdih bơ̆n tơchĕng khan ưh kơ gơh.

Lơ wơ̆t, bơ̆n mơn ưh pă băt bơih, tơchĕng khan bơ̆n ưh kơ kĕ pơm kiơ̆ Kră Yang bơtho. Mălei lăm kơplah noh Kră Yang Yêsu tơbăt ăn kơ bơ̆n. Tơdrong kiơ bơ̆n ưh kơ kĕ pơm hăm jơhgơ̆m akâu jăn bơ̆n, mă lei Kră Yang yua bơ̆n gơh pơm, yua kơ đơ̆ng tơdrong mơsêh Sư. Kră Yang ưh kơ ôn tơdrong ‘nâu: kiơ̆ Kră Yang wă khan tŭk lê̆ tơdrong kơdih bơ̆n, rim năr tôi ‘long pơglang kiơ̆ Kră Yang.

“Klaih kơ noh Kră Yang khan kơ lu bơngai pơhrăm păng sư: Dah bơngai bu wă kiơ̆ inh, sư athei tŭk đĭ tơdrong sư kơdih, păng tôi kơdih ‘long pơglang chu lôch yua kơ wă kiơ̆ Inh. Bơngai bu ưh kơ chu lôch yua kơ tơdrong Inh, bơngai noh gô lôch hoh hoh đĕch. Bơngai bu chu lôch yua kơ tơdrong Inh. Sư noh gô arih ling lang.” (Mathiơ 16: 24-25)

Inh pŭn dêh yua kơ đei oei lăm anih akŭm kơkuh rơngei. Mă lei lăm kơpal teh đak âu, đei lơ ‘nhŏng oh bơ̆n pơ̆n nuih ră roi anăn Kră Yang Yêsu na đei tơ’bơ̆p truh tơ tơdrong lôch. Inh jet kơdih: đei minh năr, tơdah tơdrong ră roi anăn Kră Yang dah đŏk nơ̆r ‘Bok Kei Dei đei truh tơ đe pơlôch, lei inh hăm pă rơih iŏk Kră Yang ưh? Pơma tơpă, inh tơchĕng inh oei rơih iŏk Kră Yang.

Inh lui kơ Kră Yang 22 sơnăm bơih, păng Sư oei bơtho inh ling lang thoi yơ wă kơ chu yom Sư tơpă. Đei minh năr, inh hơdai chông anhăk tơdrong hơri lăm hnam akŭm, kơplah hơri Kră Yang athei inh sơtơ̆p kŭl tăng. Mă lei inh ưh kơ pơm kiơ̆. Inh hli kơ đe tơchĕng păng măt đe lăng. Truh kơ Kră Yang thei inh sơtơ̆p kŭl tăng dơ̆ng, tơ minh hnam akŭm tih, inh băt inh ưh pă gơh hơngah bơih. Lăm kơ̆l inh tă kơ tơchĕng wă tơblang kơ bơngai nai. Inh krê kơ lu sư hiơ̆k bơngơ̆t păng hlôh hơwơ̆l. Mă lei adrol kơ inh wă pơm tơdrong kiơ noh, lăm jơnghơ̆m inh đei nơ̆r tơ‘blŏk: tơdrong kiơ kăl hloh- pơm tơdrong Inh đei krao iŏk kon, dah hli tơrơ kơ bơngai nai tơchĕng kơ kon?

Inh băt inh kăl kơ chu yom, păng jơ̆ chu yom hloi. Đơ̆ng rŏng kơ klah song nơ̆r ‘Bok Kei Dei, inh tep măt, sơtơ̆p kŭl tăng, păng krao khan. Noh bơih jing jơ kơkuh ‘lơ̆ng rŏ. Đak măt inh lĕch, inh ưh kơ ‘maih weh đơ̆ng anih Kră Yang tơ’bưh hăm inh. Inh tơ oei gô tŏ sĕt, mă khan jum dăr kơ tơ̆ng lu buăl hơmet tơmam wă brŏk bơih.

Kơplah inh lar măt, inh ‘bôh hlĭch tơpă: đei buăl oei gô inh. Lu sư roi, kơplah hơmet wă brŏk, lu sư mơn đei nơ̆r tơ’blŏk thei gô ‘mơ̆i, ‘măn thim jơ kơkuh kơ Kră Yang. Kơplah ‘bôh inh sơtơ̆p kŭl tăng oei kơkuh, lu sư ming tơmam păng wang hơdai kơ kuh kơ Kră Yang.

Tơdrong Kră Yang athei inh pơm kơ plah noh iĕ đĕch. Noh ưh kơ tơdrong lôch dah arih ôh. Mă lei Kră Yang tơ’blŏk kơ inh lơ wơ̆t ‘mơ̆i na inh chu yom. Tơdrong noh tơgŭm inh băt: Kră Yang ‘lơ̆ng tơpăt păng ‘mêm mơnat kơ lu bơ̆n dêh.

Kiơ̆ Kră Yang wă khan rim năr lu bơ̆n pơhrăm iŏk hŭt lê̆ tơdrong tơchĕng kiơ̆ thoi bơ̆n wă. Ưh pă adrin pơm kiơ̆ thoi bơ̆n wă, mă lei rơih iŏk kiơ̆ trong Kră Yang. Inh ưh kơ băt buăl thoi yơ, inh rơhing hơpơi wă kơ pran hloh, wă pơm kiơ̆ thoi Kră Yang wă đơ̆ng blŭng a. Inh ‘maih kiơ̆ Kră Yang, mă khan tôm tơdrong ưh kơ juăt păng anat anot. Inh ‘maih ‘bôh Kră Yang tơplih bơngai jê̆ inh, păng ‘maih wă pơchrang hơdah kơ dêh char măng mu ‘nâu.

Na buăl thoi yơ?

“Bu ưh kơ chu tôi ‘long pơglang sư kơdih lôch kiơ̆ Inh, bơngai ‘noh kŭm ưh kơ trŏ wă tơbôl hăm Inh mơ̆n. Bu ưh kơ chu lôch yua kơ tơdrong Inh, bơngai ‘noh lôch hoh hoh đĕch, ưh kơ yua ôh. Bu chu lôch yua kơ tơdrong Inh, bơngai ‘noh gô arih ling lang.” (Mathiơ 10: 38-39).

Apĭnh đĭ đăng krao khan hơdai: Kơkuh kơ Kră Yang, kư̆m đei năr kon băt kơ Ih krao. Mă lei kon oei hiơ̆ hyĭn yua kơ hli krê, mơ lâu. Apinh Ih mơmat kơ kon, rim wơ̆t kon kơ tơ̆ng nơ̆r Ih mă lei kon ưh kơ pơm kiơ̆. Pinh Ih ăn kơ kon jơhngơ̆m iơ̆m dim, adrin tŭk lê̆ dôm tơdrong oei pơgăn kon chu yom Ih. Kơplah Ih krao, kon pơ̆n nuih tơl nơ̆r Ih. Apĭnh Ih yua tơdrong arih kon wă pơ-ư pơ-ang anăn Ih. Kon kŭp kơ̆l krao khan yua anăn Yang Yêsu Krist, A-men

Ơ lu bơngai mơ̆ng mă ‘mêm kơ eng, dah năr ‘nâu Kră Yang krao buăl, buăl hăm wă chu Kră Yang hloi ưh? Kơplah buăl dan tơdrong Kră Yang kăl hloh kơ tơdrong lăm teh đak lăng. Buăl ưh pă mơlâu păng hli tơrơ dơ̆ng bơih. Năr ‘nâu Kră Yang oei chang gô păng krao buăl kiơ̆ Sư, mă khan lơwơ̆t buăl oei hiơ̆ păng sơngah. Rŏ lăng lăm tơdrong arih buăl pơ̆n nuih drơ̆ng iŏk, Kră Yang gô yua jơhngơ̆m chu yom đơ̆ng buăl wă hơtŭt ‘bơm bơngai nai- păng wă tơplih kơ dih akâu buăl.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.