Tơdrong pơgơ̆p lu bơ̆n hăm Kră Yang hăm ‘lơ̆ng kơjăp ưh, dah ngăl đei tơplih kiơ̆ kơ tơdrong arih? Kơplah dôm lu tơdrong trŏ ‘lơ̆ng, pŭn hiôk ‘bĕnh blai, nhen thoi ‘bônh đĕch năm jê̆ Kră Yang, kơkuh kơ Sư, păng pơma khan ‘mêm kơ Kră Yang đĭ jơhngơ̆m. Mă lei, kơplah Kră Yang nhen thoi ataih bơih, dah dôm lu tơdrong ưh kơ thoi lu bơ̆n hơpơi wă, lei jơhngơ̆m lu bơ̆n ‘bônh kơ đei ưh kơ hiôk? Lei lu bơ̆n ưh pă wă chă Kră Yang, na ‘net ‘net tơwih rŏng hăm Tơ’ngla jur yua kơ lu bơ̆n?

Năr ‘nâu, ‘năr 29/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Cathy Irvin kơ̆l ‘bai PÔK PƠ –Ư, ĐANG KƠ NOH TƠWIH RŎNG

“Mă pơm tơdrong kiơ kiơ sư kư̆m ưh kơ hơnơ̆ng ‘mơ̆i, yua kơ sư tơchĕng đon ‘bar pah, na ‘Bok Kei-Dei ưh kơ wă tơgŭm ôh.” (Yakơ 1:7-8)

“Hô- sa –na! Kră Yang truh bơih!” – nơ̆r jreo jơ̆p kơ anih, chĕp bơbơh dôm kơ lu hla gao. “Noh jơ̆ Yang Yêsu! Lăng to, Sư oei wă truh!”

Rŏ lăng tŏk bŏk bơngai tơpôl noh, kư̆m đei bơngai jet kơ dih lăm jơhngơ̆m: “Yua kơ kiơ Kră Yang hao aseh iĕ, mă ưh kơ aseh kok tih rŏ, dah hao gre aseh tơblah?” Mă lei ưh kơ đei bu kơnhăm kơ tơdrong noh. Lu bơngai tơpôl băt kơ ôr jreo đĕch: “Hôsana! Hôsana tơ kơpal plĕnh ti!” Lu sư hiôk soang, ôr jreo, lơ̆k ao păng hla gao tơ rok trong, jrap kơkuh kơ Kră Yang. ‘Bôh tơdrong noh hiôk dêh, hăm phĕt ‘lơ̆ng tơpă. Kon pơlei ‘mêm kơ Yang Yêsu.

Noh jơ̆ năr Yang Yêsu mơ̆t tơ pơlei Jêrusalem. Adrol kơ Sư wă mơ̆t, Yang Yêsu hăm bơngai pơhrăm păng sư pơdơh tơ kông Ôliwơ. Tơnoh, Sư wơh bơngai pơhrăm păng Sư năm iŏk aseh iĕ, păng pơma hăm tơ’ngla aseh thoi âu Kră Yang wă yua sư ‘biơ̆. Đe lơ̆k ao tơ kơdŭ aseh iĕ wă kơ Sư hao hơbôn hiôk. Na Yang Yêsu mơ̆t tơ lăm pơlei, tŏk bŏk tơ lăm pơlei đei lơ bơngai tơpôl, tŏk bŏk đei pơjing phĕt tih ‘lơ̆ng rŏ ( Luka 19:28-38)

Kơplah noh, rŏ lăng bu bu kư̆m ngeh kơ lu sư hlôh kơ Kră Yang tih hloh pă đei kiơ wă pơtŏ pơting. Truh tơ lu sư lơ̆k ao lu sư tơ teh. Lu sư ‘nă hal, hiôk chơt, yua kơ lu sư lui ngeh kơ Kră Yang gô jing pơtao lu sư. Minh ‘nu pơtao gô ‘mêm kơ lu sư, păng gô ăn tơdrong ‘lơ̆ng rŏ, hiôk hian kơ lu sư. Noh bơih tơdrong lu sư chang gô.

Mă lei lăp minh ‘bar năr đơ̆ng rŏng, tôm tơdrong đei tơplih đĭ đăng.

Yang Yêsu đe rôp lăm kơ măng noh, đe khan đei tơdrong yoch wă blơ̆ tơdrong pơgơ̆r lu bơngai Rôm kiơ̆ kơ lu ‘bok soi tơm khan (Yôhan 18). Đơ̆ng lăm lu bơngai tơpôl ôr jrĕo, tơtap ti, kŭp kơ̆l kơkuh ư ang kơ Sư, na jơ ‘nâu tơwih rŏng kơ Sư. Rŏ lăng lu sư hiơt bơih kơ Kră Yang jơ̆ Tơ’ngla iơ̆m dim, đei tơdrong ‘mêm mơnat, ‘lơ̆ng tơpăt? Rŏ lăng lu sư hiơt bơih nơ̆r bơtho tơ’bôh păng tơdrong mơsêh mă măt kơdih lu sư đei ‘bôh?

Mă tơpă, lu sư đei mơn kơ tơblơ̆. Kră Yang ưh kơ jing pơtao thoi lu sư chang gô. Kră Yang ưh kơ tơblah ăn kơ lu sư, ưh kơ chĕp ba mŭk tơmam ăn kơ lu sư. Kră Yang jơ̆ Pơtao – mă lu sư wă kơ thoi pơtao lăm teh đak ‘nâu, oei hơdai lu sư, pơm dôm lu tơdrong thoi kơ lu sư wă.

Na kơplah ‘nâu, Kră Yang hăm oei đei gĭt hăm lu sư?

Hôsana wă khan “apinh dŏng pơklaih lu nhôn dang ei”. Mă lei đơ̆ng rŏng kơ noh minh ‘bar năr, dôm lu bơngai đêl ôr jrĕo nơ̆r noh mơ̆t tơ lăm bơngai tơpôl lơ ôr pơret khan: “Pơ̆ng Sư tơ ‘long pơglang, pơ̆ng pơlôch Sư tơ ‘long pơglang.” (Yôhan 19:6). Lu sư ưh kơ hlôh adrol kơ pơm Pơtao đe ư ang, Sư truh thoi kơ Bơngai đĭch- Bơngai đĭch pơmat tat. Yang Yêsu tam mă đei layơ, păng ưh kơ đei layơ ăn kơ kon bơngai thar rơngei hloi. Sư jơ̆ Pơtao kơ đĭ đăng pơtao, Yang kơ đĭ đăng yang – Sư jur wă dŏng pơklaih lu bơngai ôr krao Sư đơ̆ng lăm jơhngơ̆m tơpă: nơ̆r ôr krao wă kơ đei dŏng pơklaih.

Kơplah Sư kăl kơ pơlung tơgŭm, mă kon bơngai tơwih rŏng. Chhŭr nuih dêh. Bơngai tơpôl lơ noh hơngah kơ Pơtao đĭ đăng pơtao păng Yang kơ đĭ đăng yang – Tơ’ngla ăn kơ lu sư tơdrong dŏng pơklaih păng tơdrong arih ling lang.

Na tơdah lăng tơpă, lu bơ̆n kư̆m ưh kơ phara kơ lu sư ôh.

Kơplah tơdrong arih hiôk ‘lơ̆ng, đei lơ tơdrong pŭn hiôk, lu bơ̆n ‘bônh kơ ư ang kơ Kră Yang. Mă lei kơplah ưh pă đei mơn kơ Kră Yang oei hơdai, kơplah tơdrong krao khan ưh kơ đei tơl, lu bơ̆n ‘bônh kơ ngil ngŭl, jô̆ jŏk, truh tơ tơwih rŏng kơ Kră Yang.

Hơpơi kơ lu bơ̆n huay kơ jing bơngai thoi âu thoi to, thoi noh lăm tơdrong pơgơ̆p hăm Yang Yêsu. Bơngai ‘bônh kơ tơplih noh jơ̆ ‘bônh kơ ngil ngŭl- mă loi lăm tơdrong ‘mêm păng pơjao ăn, huay kơ tơchĕng thoi âu thoi to, huay kơdŭn tơrŏng, tơpăt yak năm hăm Kră Yang truh tơ tôch.

“Mă pơm tơdrong kiơ kiơ sư kư̆m ưh kơ hơnơ̆ng ‘mơ̆i, yua kơ sư tơchĕng đon ‘bar pah, na ‘Bok Kei-Dei ưh kơ wă tơgŭm ôh.” (Yakơ 1:7-8)

Apĭnh đĭ đăng krao khan hơdai:

Bơnê kơ Kră Yang yua kơ Ih ling lang tơpăt păng ‘mêm kơ kon. Apinh Ih tơgŭm kon ‘mêm kơ Ih, yak kiơ̆ Ih truh tơ tôch. Năr ‘nâu, apinh pơyơ̆r kơ Ih jơhngơ̆m huay kơ ngil ngŭl mă khan đei jum dăr tơdrong kơnê̆ truh, yua kơ kon băt kơ Ih ling lang oei hơdai kon. Kon rơih iŏk ‘mêm kơ Ih mă kơplah ưh kơ hlôh tôm tơdrong, kon rơih iŏk lui gơnang kơ Ih mă khan tam mă đei nơ̆r tơl. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah Kră Yang bơ̆jang ưh kơ thoi lu bơ̆n chang hơmĕng, kơplah trong Sư ưh kơ thoi lu bơ̆n proh hơmet adrol, lei lu bơ̆n hăm oei kơjăp lăm anih noh ưh? Khŭl bơngai tơpôl lơ pơma pơ ư kơ Kră Yang kơplah Kră Yang pơm ăn kơ lu sư, mă lei lu sư tơwih rŏng kơplah Kră Yang ưh kơjing pơtao thoi kơ lu sư wă. Na năr ‘nâu, nơ̆r jet noh oei đei jơwa, tơ’blŏk kơ rim ‘nu lu bơ̆n : lu bơ̆n hăm ‘mêm kơ Kră Yang tơpă ưh, lei ‘mêm kơ Sư yua kơ dôm tơdrong Sư tuh ăn? Hơpơi kơ lu bơ̆n huay kơ tơwih rŏng kơ Tơ’ngla pŭ iŏk tơdrong lôch yua kơ lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.