01.04 Amăn Jơ Krao Khan Rim Năr: ‘BÂU PHU ĐƠ̆NG TƠDRONG HLÔH BĂT KƠ YANG YÊSU KRIST

‘Bâu phu chĕp ba tơdrong hlơp mă bơ̆n lăng ưh kơ’bôh, hơtŭt ‘bơm lăm jơhngơ̆m păng tơdrong arih kon bơngai đêl hlôi bơih đơ̆ng lăm muh ‘bâu ba truh tơ lăm jơhngơ̆m, na ba truh tơ kơ̆l ‘ngok. Ưh kơ thoi tơdrong nai lăm akâu bơ̆n, muh ‘bâu noh jơ̆ sư tơ’bưh hăm kơ̆l ‘ngok, ‘bâu phu năm tơpăt hloi tơ kơ̆l ‘ngok, đơ̆ng muh ‘bâu tơdah ưh kơ ba truh tơ kơ̆l ‘ngok pơm kơ bơ̆n tơchĕng ngeh đĕch.
Kư̆m thoi noh, Bơngai lui kơ ‘Bok Kei-Dei đei krao iŏk jing bơngai ‘bâu phu đơ̆ng Kră Yang ăn kơ jơ̆p jang anih, chĕp ba tơdrong pơgơ̆p hăm lơ bơngai truh tơ tơdrong mơn băt kơ Kră Yang.

Năr ‘nâu, ‘năr 01/04/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai ‘BÂU PHU ĐƠ̆NG TƠDRONG HLÔH BĂT KƠ YANG YÊSU KRIST

“Bơnê kơ ‘Bok Kei-Dei tơgŭm nhôn bơtho tơdrong Yêsu Krist ling-lang, jei Yêsu Krist boih, jơ̆p kơ teh đak gô kơtơ̆ng tơdrong Yêsu Krist. Nhôn bơtho đe dang lĕ tơmam ‘bâu phu Yêsu Krist soh pơyơ̆r kơ ‘Bok Kei-Dei, wă kơ đĭ rim ‘nu bơngai mă ‘Bok Kei-Dei wă iŏk, hăm lu bơngai mă wă hiong răm ‘bâu tôm.” (II Kôrintô 2:14-15)

“Kon ưh kơ đei năm tơ hnam akŭm dơ̆ng bơih, anih noh jơ̆ anih kơkuh kơ rup yang, kon jơ̆ bơngai oei nge, năm tơnoh wă pơm kiơ?” Nơ̆r mĕ pơma hơtŏk hil. Inh blĕk na nhơ̆m, ưh kơ đei nơ̆r ayơ wă pơma tơ’bôh kơ mĕ ‘bă, ăn kơ đĭ đăng hnam dơnŏ. Inh ưh kơ đei tôm nơ̆r wă pơma pơlung. Mă lei inh băt kơ Kră Yang mă inh lui păng kơkuh. Sư jơ̆ Tơ’ngla hlich chrơp, Tơ’ngla proh hơmet gơh hơgei, jơ̆ ‘Bok Kei-Dei mơsêh mơyang, jơ̆ ‘Bă đei ling lang, jơ̆ Kră Yang rơnŭk rơnoa. Đơ̆ng rim kơ tơdrong jang ‘Bă jing juăt bơih, pơm kơ jơhngơ̆m inh ‘nă hal, kơplah noh inh jơ̆ minh ‘nu bơngai drŏ kăn 11 sơnăm.

Kư̆m nhen thoi jơhngơ̆m Mari pơlei Bethani noh sơ̆, kơplah lơ bơngai oei sơng iŏk Yang Yêsu hăm bơngai pơhrăm păng Sư. Kơplah anih đei lơ bơngai hiĕk hăm pơma, Mari dơrơ̆ng tơchĕng pơwao. Đei lơ wơ̆t sơng iŏk Yang Yêsu, mă lei năr ‘nâu sư mơn kơ đei tơdrong kiơ noh pơm kơ sư ưh kơ hlôh mă lei ưh kơ weh đơ̆ng Yang Yêsu.

Yang Yêsu tơ oei ‘bơ̆t doh, lăm hnam pêng ‘nu ‘nhŏng oh lu sư, na Yang Yêsu oei pơma dơnuh. Sư oei pơma gah Sư đei rơih iŏk, păng dôm tơdrong gô truh.

Noh jơ̆ gô truh tơ tơdrong ư ang kơ Yang Yêsu lăm pêng sơnăm bơ̆ jang, kon pơlei oei hiôk ‘nă hal kơ anăn Sư. Noh kư̆m jơ̆ lăm tơdrong hli tơrơ, jơ̆ tơdrong klai gar đơ̆ng lu ‘bok soi hăm lu ‘bok bơtho khôi juăt, lu sư oei chă đon wă rôp păng pơlôch Yang Yêsu.

Mari hiơt đĭ kơ dôm lu tơdrong jum dăr kơ sư, hiơt hloi kơ tơdrong jang hơmet tơmam sa. Sư thĕng hreh păng mơ̆ng, kơ nhăm kơ dôm tơdrong Kră Yang tơ’bôh, noh jơ̆: Tơdrong tơdă đơ̆ng ‘Bok Kei-Dei wă dŏng pơklaih kon bơngai, đei lu ‘bok khan lê̆ adrol, na đei truh ‘bôh bơih mă lei ưh kơ thoi kon bơngai chang gô. Lơ bơngai ưh kơ hlôh, lơ bơngai ngĭl ngŭl, lơ bơngai areh ưh kơ drơ̆ng iŏk, mă lei Mari, sư lui ngeh. Jơhngơ̆m đon sư mơn kơ tơdrong gĭt kăl gô truh thoi kơ nơ̆r Yang Yêsu đei tơ’bôh adrol kơ phĕt năm brih tuch luch mă Sư oei tơ lăm kơpal teh ‘nâu.

Mari ưh kơ đei pơma jing nơ̆r, sư ưh kơ đei jet, kư̆m ưh kơ đei chă nơ̆r pơma wă kơ băt. Plei nuih mơn ‘bôh bơngai drŏ kăn Kră Yang đei pơjing drơ̆ng iŏk dôm tơdrong Kră Yang pơma adrol gah tơdrong pơmat tat păng truh tơ tơdrong lôch Sư …

Na hăm jơhngơ̆m adrin, Mari chĕp gĕl đak ‘bâu phu mă sư đei ‘măn đunh sơnăm, thĕng hreh pơm hloh kơ lu bơngai drŏ nglo, pơm hloh kơ dôm tơdrong pơgăn kiơ̆ tơdrong arih năm jê̆ Yang Yêsu. Mari tĕh pơchah gĕl đak ‘bâu phu gĭt kăp jên noh, teh pơchah dôm lu tơdrong kơdih lăng gĭt, na sư pơ’lơ̆ng tuh pơgang ‘bâu phu tơ kơ̆l Yang Yêsu, pơyom pôk tơ iung Pơtao kơ chăl arih sư. Na sư pơ ‘lơ̆ng sơtơ̆p kŭl tăng, pơ’lơ̆ng tuh pơgang ‘bâu phu tơ tơpang jơ̆ng Yang Yêsu, kơkuh kơ Yang Yêsu hăm đĭ jơhngơ̆m. Mari iŏk sŏk sư chhŭt tơ tơpang jơ̆ng Yang Yêsu pơm kơ lơ bơngai ‘bôh hlich. Lăm jơ phŭt, dôm lu tơdrong gĭt kăl lăm tơdrong juăt kơ arih đei ‘măn ăn kơ tơdrong mơn băt, păng kơkuh kơ ‘Bok Mêsi đơ̆ng kơpal plĕnh.

Lăm anih ‘bĕnh kơ ‘bâu phu đak ‘bâu phu noh, lơ bơngai ‘bôh hlich păng đei nơ̆r roi sa pơma ‘bơm, Mari oei thĕng hreh lăng tơ Yang Yêsu đĕch. Rŏ lăng muh măt lĕch đak măt mơ̆ng Yang Yêsu mơn đơ̆ng lăm jơhngơ̆m đei bơwei sư:

Yêsu khan: “Ơ Juđa, lê̆ sư pơm thoi noh boih, yua kơ hơdrol kơ Inh wă lôch na sư tuh pơgang ‘bâu phu thoi đe tuh kơ bơngai lôch kơplah đe wă ‘bŭ hmă.” (Yôhan 12:7)

Tơpă, thoi kơ Mari đei hlôh dôm kơ lu tơdrong Yang Yêsu đei pơma dơnuh păng sư sơng iŏk hloi tơ’bôh tơdrong pơyom kơ Kon ‘Bok Kei-Dei lăm jơ năr gĭt kăl kơplah oei hơdai hăm Sư, inh kư̆m hlôh đei mơn kơ tơdrong gĭt kăl mă Kră Yang oei tơ’bôh. Nơ̆r Kră Yang păng tơdrong oei hơdai đơ̆ng ‘Bă mơsêh mơyang Sư ba inh lĕch hlôi đơ̆ng thŭng thong măng mu lăm jơhngơ̆m hli tơrơ, lăm tơdrong arih jĭ jăn lăm jơhngơ̆m kơplah oei sơnăm mơlôh.

Tơdrong arih đei lơ tơdrong tơplih, tơdrong juăt lăm hnam dơnŏ ưh kơ gơh găn plei Yang Bơhngol ‘Lơ̆ng roi wơ̆ ‘lŏ lăm inh. Oei thĕng hreh, lui gơnang Nơ̆r Kră Yang chông anhăk, inh hŏk pơhrăm gơh hơgei tơ lăm hnam trưng, păng tơnăp tơ lăm hnam. Na thoi kơ nơ̆r Kră Yang đei pơsĭt “Tơpă, dôm lu bơngai gơnang kơ Ih. Ưh kơ đei mơlâu…”(Hơriso 25:3) ‘net ‘net inh lăng ‘bôh tơdrong ‘mêm, lui gơnang mĕ ‘bă drơ̆ng ăn kơ inh đei tơdrong arih akŭm kơkuh kơ ‘Bok Kei-Dei.

Nhen ‘bâu phu đơ̆ng đak ‘bâu phu ‘bĕnh kơ hnam sơnăm noh sơ̆, bơ̆jang thĕng hreh hăm đon lui đơ̆ng Mari đei kiơ̆ inh kơplah tơdrong ‘Nao Lơ̆ng Kră Yang truh tơ inh đơ̆ng kơplah oei ‘lơ̆p noh. Trong lơ̆ng tơpăt Kră Yang jing đei tơ’bôh kơ inh, chông anhăk tơdrong arih inh thĕng hreh tơpăt săi đak ‘bâu phu gah tơdrong mơn băt kơ ‘Bok Krist, hăm ‘nhŏng oh đei đon lui, hăm bơngai inh juăt păng hăm lu bôl buăl tam mă băt kơ Kră Yang:

“Bơnê kơ ‘Bok Kei-Dei tơgŭm nhôn bơtho tơdrong Yêsu Krist ling-lang, jei Yêsu Krist boih, jơ̆p kơ teh đak gô kơtơ̆ng tơdrong Yêsu Krist. Nhôn bơtho đe dang lĕ tơmam ‘bâu phu Yêsu Krist soh pơyơ̆r kơ ‘Bok Kei-Dei, wă kơ đĭ rim ‘nu bơngai mă ‘Bok Kei-Dei wă iŏk, hăm lu bơngai mă wă hiong răm ‘bâu tôm.” (II Kôrintô 2:14-15)

Truh tơ hrei âu, Sư jơ̆ ‘Bok Kei-Dei ‘lơ̆ng tơpăt bơwei inh lăm rim trong yak năm lăm tơdrong bơ̆jang, jing mŏ mai, jing akăn, jing bơngai mĕ lăm hnam dơnŏ inh, jing minh ‘nu Bơngai Lui pơdah ‘bâu phu lăm tơdrong mơn băt kơ ‘Bok Krist ăn kơ lơ bơngai.

Apĭnh đĭ đăng krao khan hơdai: Kơkuh kơ Kră Yang ‘mă ‘mêm, đei lơ wơ̆t ưh kơ đei bu hlôh kon đei wă yak năm hlôi hloh hăm Kră Yang. Đei lơ wơ̆t nơ̆r pơma ưh kơ gơh wă tơblang kơ trong iĕ kon rơih iŏk yak năm hăm Kră Yang. Păng đei tơdrong tơblah kon gơnang kơ tơdrong pran đơ̆ng Kră Yang wă chu yom pơm kiơ̆ nơ̆r Ih bơtho, ưh kơ đei bu băt, kon bơnê kơ ‘Bok Kei-Dei, Ih ling bơwei kon hăm tơdrong hlich chrơp. Apinh Ih yua kon wă kơ ‘bâu phu ăn kơ lơ bơngai, lơ anih băt kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, pha ra kơ kon bơngai lăm teh đak ‘nâu tơ’bôh, păng pôk pơ ư hrei âu, Nơ̆r ‘Bok Kei-Dei oei tơpăt hăm tơdrong pơdah minh ‘nu bơngai ‘bâu phu ăn kơ tơdrong mơn băt kơ ‘Bok Krist lăm tơdrong pơgơ̆p hăm ‘Bok Kei-Dei, na lăm tơdrong pơgơ̆p tơduă kon bơngai. Noh jơ̆ ‘bâu phu lăm jơhngơ̆m thĕng hreh mơn băt kơ Kră Yang, tơ’bôh ăn lăm tơdrong bơ̆jang thĕng hreh pơ̆n nuih đơ̆ng Yang Yêsu. Sư jơ̆ Tơ’ngla ‘mêm mơnat kơ lu bơ̆n păng pơjao akâu Sư ăn kơ ‘Bok Kei-Dei pơm tơmam pơyơ̆r păng tơmam soi, nhen thoi tơmam ‘bâu phu.

Kră Yang oei ling lang krao buăl yak mơ̆t lăm tơdrong pơgơ̆p hăm Sư. ‘Bă ‘mêm mơnat gô ‘mêm păng tơ’bôh ăn kơ buăl tơdrong tơdă păng tơdrong ‘lơ̆ng đơ̆ng Sư. Yang Yêsu rơih iŏk “tơdah lu iĕm pơm kiơ̆ nơ̆r inh bơtho, iĕm jing buăl juăt Inh… Inh krao iĕm jing buăl juăt Inh yua kơ Inh đei tơbăt ăn kơ iĕm tơdrong Inh đei kơtơ̆ng đơ̆ng ‘Bă Inh.” (Yôhan 15:14,15) Năr ‘nâu nơ̆r Kră Yang krao lu bơ̆n năm tơ Sư hăm tơdrong thĕng hreh, mơ̆ng păng pơm kiơ̆ kơ tơdrong bơtho đơ̆ng Kră Yang, chăl arih buăl gô ‘bâu phu lăm tơpang ti Tơ’ngla ‘mêm kơ buăl, hlôh kơ buăl păng wei rong buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.