Gơs tŭ, nàng dòp geh dô bơta dờng màng, bol he pal bơtê mbe sang dô bơta ndai. Cau ntoàt pơrlòng pal sang bơta ƀuôn-soh, loĭh-lơm he dê nàng jơh nùs tom bơta bơtê lòng. Dô nă cau bơtê pal sang tŭ jơ kơnhơl nàng jơh nùs bơtê. Kung behơ̆ sơl, tom gùng lòt jat Yàng, gơs ală bơta bol he pal cang sang tài bơh gơdĭn tiah Kơnràñ dê tom nùs he. Tom tŭ đal git Yàng la kwơ màng rlau jơh mơ ală bơta he gam sơmbat prap, bol he rơp git lah ò gơs bơta sang lơi bơh Kơnràñ la ò kwơ. Behơ̆, oh mi pal sang bơta lơi nàng khat gơboh jat Yàng?

Ngai do, ngai 20/07/2026, Bơta Hòi-dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Marissa Nordlum bơh tơnggume SANG JƠH ALĂ BƠTA NÀNG JAT YÀNG.

“Khai sang jơh ală bơta, ñă ntào mơ jat Kơnràñ.” (Luka 5:28)

“Tus di tŭ pal lòt rau,” añ đơs mơ kòn klau dềt tom tŭ nggui kơnhơl digùl ală phan kơnhơl bêng hiu. Añ sồr khai lòt chồ khọ̆ nàng rcang lòt hơ bơdih, mơ ya khai kư kơnđu oă ngan phan kơnhơl tom tê tài bơh kòñ ceng jơh ală bơta lòt jat he.

Tom tŭ sền gọ̆ kờp phăn kơnhơl gơduh hơđơm tiah, añ sền khai mơ ñọ̆: “Ơ kòn klau, lòi jơh ală phan kơnhơl hơ̆ ơm wơl. Bol he mìng lik bơdih dô ềt lơm, kòn ò cang pal cèng bal.”

Tŭ jơ hơ̆ lơh añ kah tus jơnau hòi jà Yàng Jesu dê ai Lêbi in tom Luka 5. Sră Goh cih: “Tơnơ̆ mơ hơ̆, Yàng Jesu lik lòt, gŏ dô nă cau dar dia sơnđan la Lebi nggui tòm tiah boh dia, gen sồr khai lah: “Jat tĕ Añ.” Khai sang jơh ală bơta, ñă ntào mơ jat Kơnràñ.” (sèng 27-28)

Lêbi, hala sơnđan la Mathiơ, la dô nă cau dar-dia. Ồng git loh bơta kas mang jền-prĭa dê, sơbàn nggui mơ broă lơh he dê cèng wơl. Mơ ya tom tŭ Yàng Jesu đơs: “Jat tĕ Añ”, ồng neh ñă ntào mo mơ jat Kơnràñ.

Tom tŭ kơlôi sơnơng bơh sèng sră do, añ đal git lah he kung òs sùm cèng oă ngan bơta tom gùng lòt jat Yàng. Ò di jơh ală bơta bol he dòp geh la iơh, mơ ya gơs tŭ gơs ală bơta gơ-dĭn nùs bol he oă rlau mơ Yàng. Hơ̆ digơlan la bơta ring-lơngai, hàm kòñ, jền-prĭa hala dô bơta lơi lơh bol he kalkê dòn duh Kơnràñ wĭl tơl.
Kung be kòn klau añ jê pơnđơl sơmbat prap ală phan kơnhơl tom tê bulah ò pal cang gùng lòt in, oă dơ̆ bol he kung sơmbat prap ală bơta at-bồ he kalkê cơnoà lòt bal mơ Yàng. Yàng kòñ bol he pal sang ìs he kờp ngai mơ ơn Kơnràñ hơđang rlau jơh tom rài kis.

Jat Yàng sùm gơs bơta pal phi. Yàng Jesu kòñ cau jat Kơnràñ pal dòp git bơta hơ̆. Kơnràñ đơs lah: “Kung behơ̆ sơl, dilah cau lơi tòm bol mê ò sang lòi jơh ală bơta he gơs, gen ò rgơi lơh gơs cau bơtê Añ jê.” (Luka 14:33). Bơta hơ̆ ò di gơtha la bol he pal sang lòi jơh ală bơta, mơ ya la rcang sir ơn Yàng hơđang rlau jơh ală bơta he gơs. Tom tŭ dòn duh rài kis Bơtau Krist in, bol he dòp geh să tòm Kơnràñ mơ bơta kis sùm sùm tom Kơnràñ, la bơta kwơ màng rlau jơh mơ bơta lơi dunnia cèng wơl.

Ngai do, digơlan Yàng kung gam sơniọ bol he in sền gọ̆ ală bơta bol he gam sơmbat prap kơ̆. Digơlan hơ̆ ò di la ală bơta iơh, mơya dilah gơ lơh bol he kòñ Yàng gơhùc rlau, òbat tom rài kis bơta dòn, hala kalkê dòn duh Kơnràñ rlau, gen tus di tŭ pal ơn gơ hơđơm jơng chi-pơng.

Dan Yàng Hwềng Goh đơs tom nùs bol he ngai do, dong bol he ho wơl jơnau hòi jà Yàng dê bal mơ nùs nhơm rcang sir mơ dòn duh.

Tom tŭ kơlôi bơh bơta dòn duh, nisơna añ kah tus jơnau sèng đơs chò òs mòng do:

“Ăñ neh lơh nền ngan, lòt jat Yàng Jesu.
Jesu gơboh kòn, lơh nền lòt jat Yàng.
Ăñ neh lơh nền ngan, lòt jat Yàng Jesu.
Ò gŏ rùc wơl, lòt jat Yàng sùm.”

Dan jà bol he dô nùs bal tòm bơta hòi dan: Khoai Yàng, dilah gơs bơta lơi gam lơh kòn in ngài bơh Kơnràñ, gơhùc ngềt tom bơta gơtom klac mơ Kơnràñ, hala ò gam jơh nùs cơnoà jat Kơnràñ, dan sơnio mơ ai gơnoar pràn nàng kòn git gơjràñ sang-glài mơ sang lòi. Dan Yàng lơh pa plai nùs kòn kờp ngai, nàng kòn sùm kòñ gơboh Kơnràñ mơ ơn rài kis he Kơnràñ in dô bă wil tơl. Kòn jơh nùs hòi-dan tom sơnđan Yàng Jesu Krist, A-men.

Ơ jơh ală ồng mò, oh mi kòñ gơboh, oh mi gam ơn bơta ring-lơngai he in hơđang jơh ală bơta ƀă-lĭa ìng-lơm dunnia dê hala ò? Kơlôi sơnơng tĕ bơh bơta lơi gam gơdĭn tiah Yàng dê tom rài kis oh mi, lơh oh mi ò rgơi ơn Kơnràñ hơđang rlau jơh. Hòi-dan tĕ Yàng tom pơrgơl oh mi, dong oh mi bơtê ơn hơđang rlau la bơta jòi jat Kơnràñ lài ngan mơ rcang sir lòt jat jơnau hòi jà Kơnràñ dê be Lêbi ngài òr. Ngai do, đơs tĕ mơ Yàng lah: “Kòn ò rùc wơl, lòt jat Yàng sùm”
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.