Bŏl he gơlơh rĭng lơngai rlau tŭ rơndăp tap sèng ală bơta, bơh broă lơh, hìu nhă, jền priă. Sơlơ rcang wil tơl, bŏl he sơlơ kơlôi he rơp at bồ rài kis niăm rlau. Mơya, òs mòng lah ò di tŭ lơi kŭng be bơta he kơp koñ. Mơya ală bơta tòmgơl mơpdơl rơp lơh bŏl he kơlôi rcang mơ dơrcul. Ală broă gơlik gơs nisơna bơtọ bŏl he git lah bơta rĭng lơngai ngăn tus bơh broă đal git Bơtau găm at bồ rài tơnơ.

Ngai do, ngai 21/07/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Kim Nanney dê bơh Tơnggume RĬNG LƠNGAI TÒM TÊ BƠTAU AT BỒ

“Sền tĕ tŭ do, Añ la Bơtau hơ̆! Ò gơs yàng lơi ndai rlau mơ Añ. Añ tơnchơt mơ lơh kis wơl, Añ lơh sồt jê mơ rơp sơmbòi wơl; ò gơs cau lơi rgơi dong tă bơh di tê Añ.” (Yal Wơl 32:39)

Ơthoa dô kơnhai tơnơ̆ tòm hòp bau, ăñ òs guh bic mhăr ngăn, ñô dô ly kaphe gen nggùi sền Sră Goh. Dô àng drim ne, tŭ găm sền tus Yăl wơl bơta boh lăm tap 32, tap tŭ làng bŏl Israel cơnđòa mut tiah Yang ho pơgon, ăñ dơh wơl mơ măt sền tơlik đah mpồng dềt. Mat tơngai pa lik mo.

Yò ly kaphe, gen ăñ dòp bơta ram tơmut tòm mpang tê. Măt tơngai àng drim găm lik mut òm bơh ală tòm chi ño rì tòm tiah Texas. Tơnơ̆ bơta tòm hòp bau, ală bơta gơwèt mơ ăñ bơta lơi kŭng pa lơm: dô nơm hiu nhă pa, dô rài kis pa mơ dô nơm gơnoăr broă pa tòm rài kis tòm hòp bau. Mơ ăñ gì rài kis ăñ rơp sơlơ gơtòmgơl.

Broă gơlik gơs là ăñ dòp git bơta gơtòmgơl mơpdơl tòm să jan. Nisơna., broă gơlik gơs gơpram nùs băl mơ kơlôi rcang gơlik tus. Ăñ găm òhềt git neh rcang lài tồ lơh me hala òhềt. Broă glèng bŭn mhăr ir ò ơm tòm bơta rơndăp bŏl hi di. Ăñ koñ dòp geh ală ngai sơnrờp tòm bơta tòm hòp bau mơ bơtê git bơt bơtào rài kis băl lài mơ tŭ cơnđòa lòt mut dô pah rài pa.

Tŭ sền tai Sră Goh, ăñ dơh wơl tòm sèng 39. Yăl wơl bơta boh lăm 32:39 “Sền tĕ tŭ do, Añ la Bơtau hơ̆! Ò gơs yàng lơi ndai rlau mơ Añ. Añ tơnchơt mơ lơh kis wơl, Añ lơh sồt jê mơ rơp sơmbòi wơl; ò gơs cau lơi rgơi dong tă bơh di tê Añ.”

Ală jơnau do geh Moise đơs mơ làng bŏl Israel tŭ bŏl khai găm ntào diđap bơta sac rwah dờng. Bŏl khai mor mut tòm tiah hơ pơgon, mơya Moise gen mor săng rài. Dô ngai tơnơ̆ găm pa pò diđap măt bŏl khai, mơya kŭng bềng tơl ală bơta bŏl khai òhềt git. Tòm bơta đơs chò lồi dut rài kis he, Moise tơngkah làng bŏl lah mìng gơs Yang Tom Trồ là Yang Ngăn lơm. Kơnrẵn là Bơtau at bồ hơđăng bơta kis mơ bơta chơt, hơđăng lơngai lơngọ hala gơlòng bŏl glăr, hơđăng rài do hala rài tơnơ̆ làng bŏl Kơnrẵn.

Sền tus tềng do, ăñ dòp git bơta lơh he ĭn kơlôi rcang ò di mìng la broă rơp glèng bŭn. Jrô rlau tai, ăñ găm rngòt tài bơh òhềt git ngai tơnơ̆ rơp gơlơh mbe lơi. Mơ bơta lơi găm kơp gơn he hơđap. Ăñ koñ ală broă păl ràng tơlik jat bơta rơndăp he di.

Mơya Yăl wơl 32:39 tơngkah ăñ lah bơta kis ò tŭ lơi ơm tòm tê he. Bulah ngai tơnơ̆ rơp gơlik gơs mbe lơi, mơya ăñ găm rơp dòn kơnòm di Bơtau găm kơrmap gar rài tơnơ̆ hơ̆.

Yang Tom Trồ ò ho rơp ai bŏl he git ală bơta gơlik gơs, mơya Kơnrẵn rơp ai bŏl he git Kơnrẵn là ñcau. Kơnrẵn la Yang Tom Trồ at bồ hơđăng ală bơta. Ò gơs bơta lơi gơlik gơs ơm đah bơdih bơta wă sòng mơ tơnggume Kơnrẵn di.

Gen behơ̆, bulah bŏl he găm cơnđòa mut tòm dô rài kis chò hòp bau pa, dô nơm broă lơh pa, dô nơm gơnoăr broă lơh pa hala bulah pah rài kis lơi pa, bŏl he găm rơp rĭng lơngai mơ dòn kơnòm tài bơh rài tơnơ̆ bŏl he di găm ơm wil tơl tòm tê Yang Tom Trồ.

Dan jà bol he dô nùs bal tòm bơta hòi dan: Khoai Yang la Bơtau At Bồ, kon dòp git bơta kis mơ rài tơnơ̆ do kon di găm ơm tòm tê Kơnrẵn. Dăn Kơnrẵn ai kon ĭn dô nơm hwing nùs rĭng lơngai tồ cơnđòa lòt jat bơta tề lăm Kơnrẵn di kòp ngai, git lah ò gơs bơta lơi gơlik gơs bơdih bơta wă wờng mơ gơnoăr at bồ Kơnrẵn di. Kon kơp koñ geh git lăm bơta tơlik mat mơ tề lăm Kơnrẵn di tòm kòp nơm pơnah dềt rhền rài kis kọn di. Kon jơh nùs họi dăn, Kon ai sơnđăn Yang Jesu Krist. Amen.

Ơ ală ồng mọ ọh mi koñ gơboh, gơs bơta lơi tòm ngai tơnơ̆ do găm lơh he ĭn găm kơlôi rcang mơ ò rĭng lơngai sơl ơ? Dilah he gơs găm pơnđơl sơmbat gơnoăr at bồ, hala neh jào phi ală bơta hơ̆ ngăn tòm Yang? Lòi tĕ tŭ jơ tus băl mơ Yang tòm bơta họi dăn, jào ơn Kơnrẵn ĭn ală bơta kơlôi rcang, ală bơta rơndăp mơ ală bơta òhềt git bơh hơđap. Dăn Kơnrẵn dŏng he bơtê git dòn kơnòm tòm bơta at bồ mơ bơta dòn sŏng Kơnrẵn di. Mơ dilah he neh găm gơs git lăm bơh bơta tề lăm, dŏng kòl hala dŏng tă lik klàs Yang di tòm pah rài yau, kah wơl tĕ ală bơta hơ̆ tồ nùs he kơ̆ nùs dòn, git lah Yang Tom Trồ neh dòn sŏng ngai or gen găm kơrmap gar ngai tơnơ̆ he di ngai do mo.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.