Tŭ ntao di đap ală sơnah pleh bềng cal rbut rai kis dê, sền lăng gut dar, bol he ming gŏ sơ lung sơ lăng, dut gùng. Bol he lùp is: “Ơ Yàng, bơta rơndap Kơnrañ dê ai kòn in ting đah digul ală bơta rung rai do tiah?” bol he buôn ngăn dòn kơnơm Yàng tòm bơta ring lơngai mơya gen jê sồt mơ lơnggơh tom tŭ cal rbut tus. Mơya tŭ kong cơnđoà rlĕ wơl mơ dòn kơnơm wil tơl, bol he rơp gŏ Yàng Tòm Trồ dơng ryŭ găm lơh dô “rơndap wil tơl” hơđăng rai kis oh mi, tian gơs tòm ală gùng klăm jơngo rlau jơh.

Ngai do, ngai 23/07/2026, Bơta Hôi Dăn Kơp Ngai dăn jà ală ồng mò oh mi bơtê bal Jơnau Yàng kơnơm dê bơta dong kơl Martha Noebel dê bơh tơnggumê RƠNDĂP BƠH HƠĐĂNG TRỒ.

“Bol mê la cau lơh cơng Añ jê. Gơs Yàng Tom Trồ lơi ndai tai rlau mơ Añ sơl? Ò gơs pơnai lŭ lơi ndai; Añ git ò gơs dô nơm lơi ndai!” (Êsai 44:8)

“Yàng Jehôwa la cau Bơtau At Bồ mơ la Bơtau Dong Tơwài Israel dê,
la Yàng Jehôwa Gơnap Gơnoar Dờng đơs be do: “Añ la Bơtau sơnròp mơ Añ la Bơtau lồi dut; rlau mơ Añ ò gơs Yàng Tom Trồ lơi. Ñcau la ndròm bal be Añ taih? Lòi bol khai yal tơnggit tĕ. Lòi bol khai yal tơnggit mơ ơn gơ di đap Añ. Ñcau neh yal lài bơh ală bơta bơh yau tus tŭ do taih? Lòi bol khai yal bol hi in ală bơta gam gơlik gơs. Bañ rơm să, bañ rngòt. Añ ò di neh yal mơ mê bơh yau òr mơ yal tơnggit gơ ò ơ? Bol mê la cau lơh cơng Añ jê. Gơs Yàng Tom Trồ lơi ndai tai rlau mơ Añ sơl? Ò gơs pơnai lŭ lơi ndai; Añ git ò gơs dô nơm lơi ndai!” (Êsai 44:6-8)

Añ têh dơng mơ bơta ham kơñ kơnhơl plai pơng mơ mơng. Ngai găm dềt, añ kơñ ngăn duh tơngai tòm kơnhai rlô dê mơ ală tŭ jơ phuk kơnhơl mơ ală bơyô tòm tiah kơnhơl plai. Mơya tŭ têh dơng, bơta lơh añ ham kơñ bơta kơnhơl plai dô la ală bơta rơndăp pồn ndơp ngkơi bơta pơrlong dê. Gơ ndrơm be dô nơm mpan kơnhơl cờ vua dơng! Kơp dơ̆ tơng plai ală cau kơnhơl dê là dô nơm kai rơndăp. Ơnih ală cau kơnhơl dê tòm blang kơnhơl plai sum pơnjat tơmgơl gơri jat be cau ăt mơng pơrlong. Bal broă sac ală rơndăp kơnhơl kơp dơ̆ kung gơri mơ cau găm ntao tòm tiah tơng plai. Bơta kơnhơl dô gơs oă pơnah pồn jrô ò di ming la ală plai gơ par, ală dơ̆ pơng sơleh hala ală dơ̆ ntoat pơrlong digul ală tiah tơnggu.
Dul tòm ală gùng lòt rondăp mơ ală cau lăm bồ ơs ngui la “rơndăp lòt hơđăng blang konhơl plai” – gơtha la kơñ lơi ală cau kơnhơl đah nê in ntoat hơđap gơs tiah tơnggu dô bă lơngap lơngai. Dilah sền dô bă bă liă, hala gơwet mơ ală cau ò mơng bơh bơta kơnhơl plai pơng mơ mơng dô gen bơta lơh nên dô la dô bơta ò rgơi dơp rò ngăn. Ñchi bơh tai pal ai bơta niam mpôl pơrlong đah nê in ala mơ pơnđơl pràn nàng lơh alah bol khai mơ bơta tơng plai tơn? Lơh behơ̆ ò di la neh ơn he tòm gơnă sơrbơng roh mơ ơn tŭ lơmpah cih khà mpôl đah nê in sơl ơ? Mơya ò, bulah ò rgơi dòn mbe lơi, dô nă cau lăm bồ jong sơnăm sum gơs tơnggu rondăp bơta sac rwah he dê. Là cau lòt sền, bơta ming dùl bol he cang lơh la dòn kơnơm lah cau lăm bồ hơ̆ gơs dô rơndăp wil tơl nàng phalin bơta pơrlong.

La cau bơtê dòn jat Bơtau Krist, añ jơh nùs ưnngai bơh Sră Goh ai tơnggit Yàng Tom Trồ sùm ăt bồ, mơ Kơnràñ gơs dô rơndăp wil tơl rai kis bol he in. Đơs ngăn, digul dunnia tis glài do, bơta rondăp hơ̆ ò gơtha la bol he rơp pleh ală bơta rung rai. Bol he buôn ngăn gơduh tòm bơta kơlôi lah lòt jat Yàng gen gùng dà sùm song, ring lơngai. Mơya, tòm Jơnau Niam Mathiơ dap 10, tơnơ̆ mơ neh sôr jơt bar nă cau bơtê lik lòt bơto yal Jơnau Niam, sơmbơi ală cau kop ji mơ bơtrơh cà, Yàng Jêsus ò ai bol khai in dô nơm rup sơñio dà phông. Sơlơ̆ wơl, Kơnràñ đơs song yăl lai in bol khai bơh bơta kup kơryăn mơ bơta gơlong bol glar ngăn găm ơm gơn hơđăp:

“Kơrhia tĕ dê cau, bơh bol khai rơp bơtào bol mê di đap Mpồl Kwang Tơrña, mơ pù lơh bol mê tòm ală hìu jum. Bol mê rơp kòl hwài tus di đap ală cau kwang đơng lơgar mơ ală cau bơtau tài bơh Añ,” (Mathiơ 10:17-18a)

Dilah ming sền đah bơdih, hala gơwet mơ dô nă cau ò hềt git lam gùng rơndăp bơh hơđăng trồ Yàng dê, jơnau yăl lai hơ̆ kalke ngăn dơp rò. Bol he buôn lúi pin wil wơl: ñchi bơh tai dô nă Yàng Tòm Trồ kòñ gơboh rgơi lơi jơt bar nă cau geh sac rwah kol kup kơryăn, kol hwài tus tiah sơrbơng roh? Sư tơm tòm tiah dô, jơnau song bơta bơta ăt bồ Yàng Tòm Trồ dê gơlik tòm toh ngăn gơwet mơ bol he. Nùs nhơm Yàng dê sùm la niam, bulah tòm ală tŭ lơmpah klăm jơngo rlau jơh, Kơnràñ kung găm ơm lơh broă jat nus dơng ryŭ Kơnràñ dê. Yàng Jêsus neh lơh loh lang rơndăp jrô ndơp hơ̆ ală cau bơtê in tòm Mathiơ 10:18b-20:

“nàng lơh cơng di đap bol khai mơ ală làng bol Bơdìh. Mơya tòm tŭ bol khai bơtào bol mê, gen bañ kơlôi rcang mbe lơi hala jơnau lơi bol mê pal đơs. Bơh rơp ai bol mê in ală jơnau pal đơs tòm jơ hơ̆. Bơh ò di bol mê đơs is ò, mơya la Hwềng Yàng Bèp bol mê dê ơm tòm bol mê đơs gơ dê.”

Cau gơnoăr Bơto Dơng Pol tơngkah bol he tòm Rôma 8:28 lah rơndap wil tơl do ò di ming ai ală cau bơtê ngai or in gợi, mơ kung la jơnau hơ jơh tơl nă cau lơi gơri hơ Yàng. Digul ală bơta bol glar nên cê pal ntao diđap tòm dunnia, bol he păl cang wet nùs hôi lup Yàng. Tŭ cih kah tòm nùs lah Kơnràñ găm chai rgơi mòn tañ ală pơnah nàng cèng wơl kwơ he in, bơta roh ring lơngai tòm nùs rơp lơi ơnih bơta lơngap lơngai hơđăng trồ in. Bol he ò càng pal kơlôi hala gơduh nùs tòm bơta gơlong, bơh sư tòm Yàng Hwềng Goh rơp lơh broă mơ ràng tơlik gơnap gơnoăr gơklŏ Kơnràñ dê tom bơta lơbơn lơñio bol he di mơ.

“Bañ rơm să, bañ rngòt. Añ ò di neh yal mơ mê bơh yau òr mơ yal tơnggit gơ ò ơ? Bol mê la cau lơh cơng Añ jê. Gơs Yàng Tom Trồ lơi ndai tai rlau mơ Añ sơl? Ò gơs pơnai lŭ lơi ndai; Añ git ò gơs dô nơm lơi ndai!”

Dan jà bol he dô nùs bal tòm bơta hòi dan: Khoai Yàng Tòm Trồ la Bèp kòñ gơboh kòn dê, dăn Kơnràñ yờ dơ nàng kòn sùm cih kah lah Kơnràñ sùm făt bồ mơ găm lơh broă tòm ală bơta gơlik gơs tòm rai kis kòn dê. Dăn Yàng bơntơl pràn kòn in diđap ală bơta gơlong mơ bơta moat jrung rai kis dê. Kơp kòñ rai kis kòn dê rơp gơlik gơs dô jơnau cơng kis bơh nùs lơbơn niam bơh Kơnràñ, cèng bơta gơn kơnơm mơ bơta ring lơngai song ngăn tus ală hwềng soan găm ji gloh tơhir in. Dăn sơnđăn Yàng Dong Jêsus geh gơklŏ găn dê rai kis kòn, mơ dăn Yàng Hwềng Goh bong mơñà ai gơnap gơnoăr nàng kòn gơs pơnah công nha tòm broă Kơnràñ, dipal la dô nă cau kong sôr Lơgăr geh ơn is sang goh hơđăng ù dô dê. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, dô nă cau lăm bồ bơta kơnhơl plai mơ mơng dê kung gơs dô rơndăp wil tơl nàng tề lăm ală cau kơnhơl he dê, tơai lah Bèp hơđăng trồ, Bơtau neh crơng gơs ồng mò oh mi mơ kòñ gơboh oh mi mơ bơta kòñ gơboh sùm sùm. Ală gùng lòt bềng bơta gơlong bol glar oh mi lòt găn wil tơl ò di la broă nisơna, mơ la jơh ală bơta găm gơ ơm tòm bơta ăt bồ wil tơl Kơnràñ dê. Tŭ bơta dòn bol he dê geh kơlnĕ kơ̆ tòm nùs nhơm niam Bơtau Krist dê, gen bơta ring lơngai ngăn rơp jrơm gom rai kis bol he – hơ̆ la bơta ring lơngai tiă rlau ală bơta gơlik gơs. Ngai do, bulah cal rbut dơng gơrwang gut dar mbe lơi, gen khin cha tĕ cơnđòa pơnjat mơ gơnă broă la cau kong sôr Lơgar Yàng dê, ràng tơlik bơta gơn kơnơm kis dunnia đah bơdih nê in.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.