Ò gơs nùs kỡn nđàc tòm rài do dê be là dô nơm càl noat ngan khồm tơnchơt ồs bơta kỡn gơboh tòm kòp nùs cau dê. Tòm pah rai bol he kis, dô nơm bơta bư tê tòm điện thoại hala ipad hala máy tính gen bol he rgơi cau ndai lơh bơta lơi, gam pràn hala ò bulah he ơm ngai, mơya he ò rgơi git wă cau ơm rềp mơ he jê sồt bol glar mbe lơi. Ngan la gah bơdih ne “noat mrềt” ò di la ò gơs mattơngai mơ la siớu bơta kỡn gơboh sơl?

Ngai do, ngai 24/07/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume GƠS NÙS KỠN NĐÀC

“Gen tàng cau lơi git broă niam pal lơh mơ ò lơh gen tìs glài.” (Jakơ 4:17)

“Tŭ do, ơ oh mi la cau đơs lah: “Ngai do hala ngai hìng bol hi rơp lòt tus hơ ƀòn dờng ne, ơm tềng hơ̆ dô nam, kă bro mơ jòi cồng nha.” Mơya oh mi ò git ngai hìng rơp gơlik be lơi! Bơta kis oh mi dê la ñchi taih? Bơh oh mi be dà tŭ, gơlik tòm dô êt jŏ gen roh thit. Di ngan oh mi pal đơs lah: “Dilah Yàng kòñ mơ bol hi gam kis, gen bol hi rơp lơh broă do broă ne.” Mơya oh mi jòng să, pơnhừ să. Jơh ală bơta jòng să behơ̆ la iơh. Gen tàng cau lơi git broă niam pal lơh mơ ò lơh gen tìs glài.” (Jakơ 4:13-17)

Bàr jơnau “kỡn nđàc” sơlo ngai sơlo êt cau đơs tus, mơ gơ kung roh thit tòm rai kis mơp dơl bol he dê. Gơs tú, he sên gó jơi kon mơnùs mut tòm ală ngai lôi dut bè jơnau Yàng Jesus đơs lah: “Mơ tài bơh bơta tồi glài iơh bơsak rơp gơbơtơl oă, gen bơta kòñ gơboh oă cau dê rơp huc ngềt.” (Mathiơ 24:12).

Jơnau đơs hớ rang tơlik dô bơta jê sồt moat jrum ngan bơh jơi kon mơnùs ngai do. Rngòt rngơt ngan tú he kơlôi tus bơta ang mơ bơta kỡn gơboh pà ai Yàng Tòm Trồ dê gơhùc ngềt. Bơta dòn he dê kung behớ dô nơm đeng jrêng ơm di đap càl – dilah he ò kơrhia gen ồs đeng kỡn Yàng mơ kỡn gơboh cau ndai geh tơnchơt bơh bơta ò gơs nùs kỡn nđàc. Nàng kis dipal mơ jơnau song Jơnau Niam dê, bol he pal sum ơm kớ tòm Yàng nàng ồs bơta kỡn gơboh cau glài tòm bol he sum ang.

Tòm tú bơtê ơm ngêt mơ sền nền nề, gen bol he rơp dòp gó bơta lơi he kơp kỡn Yàng sơm bòi. Gơs cau lơi tòm hiu nhă, gơp bơyô hala bon lơgar gam ơm tòm bơta jê sồt moat jrum sơl? Gơs cau he ò git lòt gan rai kis he gen rơp mbe lơi taih? Ò gơs nùs kỡn nđàc la dô bơta bơcah tòm rai kis đah hwềng bol he dê, behớ Jakơ 4:17 cih lah: “Gen tàng cau lơi git broă niam pal lơh mơ ò lơh gen tìs glài.” (Jakơ 4:17)

Tòm nđò nam lai or, ẵn jơh nùs dan mơ Yàng sơnio ẵn in git cau lơi la cau pal cang bơta dong kơl. Ò jó bơh hớ, ẵn tìp dô nă cau ur sơnđàc sơngit ngan lòt gan hiu ẵn jê. Bulah khai kis bal bòn mơ ẵn, mơya ẵn ò hềt git khai. Sơnđan khai dê la Tracy, mơ khai ơm tòm bơta kòp ji kơnjớ ngan.

Tòm nđò poh liah, ẵn hào rơndeh pơniang Tracy lòt drà. Bol he tòm bơh bơr mơ hòi dan tòm rơndeh. Tracy la bau dô nă cau gơnoar bơto dê, mơya mò gơs dô bơta jê sồt moat jrum dơng ngan hớ la khai roh kon ur kỡn gơboh khai dê. Khai jê sồt đah poac să kung bè đah hwêng sơl. Dớ lôi dut tìp mat, khai pà ai ẵn in dô nơm đĩa DVD ală bơta bơto gơs tiơng pơnro. Mơ tơnớ hớ… khai lik lòt. Khai tă nhơm mơ rê mơ Yàng. Sên wơl, ẵn dòn nền lah digơlan Yàng Jesus kỡn ceng dô nă cau tus lơh yô mơ khai tòm ală ngai lôi dut tòm ù, nàng rang tơlik bơta nđàc Kơnràn dê ò tú lơi sang lòi khai.

Dilah bol he pơndềt să dan Kơnràn tề lam he lòt tus mơ cau ndai, gen ngan Kơnràn rơp ho wơl… Bơh bơta kỡn gơboh dơng ơnang Kơnràn dê pà ai jơh tơl nă bol he in.

Sră Goh cih wơl bơh dô nơm bơta yal yau bơh bàr nă cau jơngo mat nggui digah gung, ràng tơlik loh lang bơta do:

“Ne, gơs bàr nă cau jơngo nggui di gah gùng, kơno Yàng Jesu lòt gan tềng hơ̆, gen driau lah: “Ơ Yàng, Kòn Dabit, dan nđàc sơngit di bol hi” Mpồl làng bol lah pơrhơng bol khai, sồr ơm mŏ mŏ, mơya bol khai sơlo driau dờng rlau tai lah: “Ơ Yàng, Kòn Dabit, dan nđàc sơngit di bol hi.” Gen Yàng Jesu dơh wơl, hòi bol khai mơ lùp lah: “Ñchi bol mê kòñ Añ lơh bol mê in taih?” Bol khai ho lah: “Ơ Yàng, dan pò mat bol hi in.” Yàng Jesu gơs nùs nđàc sơngit mơ ƀư di mat bol khai, gen bol khai gŏ mo mơ lòt jat Kơnràñ.” (Ma-thi-ơ 20:30-34)

Seng Sră Goh do neh pò nàng bol he in sên gó nùs nđàc sơngit Yàng Jesus dê. Digul mpôl jơnum nggôr nggàc mơ srat bơtang, Kơnràn sum kơno jơnau hòi driau jê sồt bàr nă cau jơngo dê, mơ Kơnràn neh dơh wơl. Yàng Jesus neh nđàc sơngit. Ồng mò oh mi rgơi kơlôi tus bơta chò hòp ò git nđò tòm nùs bol khai tú hớ sơl?

Tú bol he git ơm mó mó kơno mơ dòn bơr tòm bơta tề lam Yàng dê, nùs nhơm he kung gơs nùs nđàc sơngit sơl. Bơh bơta kỡn gơboh hớ Yàng Tòm Trồ dê bêng tơl tòm bol he mơ gơs pơnah nàng tơnram dunnia bêng bơta ngêt ngơt do.

Dan jà bol he dô nùs bal tòm bơta hòi dan: Khoai Yàng la Bèp kỡn gơboh kon dê, ngai do kon dan Kơnràn pà ai kon in dô rai kis đah hwềng mhar dòp git ală hwềng soan kơp kỡn bơta dong kơl. Dan bơto kon git kis rang tơlik bơta kỡn gơboh hiu nhă in, gơp bơyô, cau gơp bòn mơ ală cau kon ò git sơl. Tòm jơh dunnia pal cang ngan gơs bơta tề lam Yàng dê. Dan Kơnràn ngui kon bè tê mơ jơng Kơnràn dê, nàng lơh sêr nùs kỡn niam Kơnràn dê. Kon jơh nùs hòi dan, ai sơnđan Yàng Jesus Krist, Amen.

Ơ ală ồng mò oh mi kỡn , Yàng Jesus neh dơh wơl tòm tú kơno jơnau đơs bàr nă cau jơngo dê lai or. Ngai do, Yàng kung sên bol he gơs nùs nđàc sơngit mơ dô nă cau cang he dong kơl sơl. Bẵn tơnchơt ồs bơta kỡn gơboh tòm nùs bol he dê bơh bơta oă lơh broă hala ò kỡn gơboh bol he dê. Ngai do, tú lik lòt bơh hiu, lòt lơh broă hala rê tòm hiu, dan lòi dô êt tú nàng sên kiaw ma. Ming cang dô jơnau lùp còp să lơm, dô bơta kwar pơndom pơniang kung tơl lòi bơta ang Yàng dê sol pơnđang pal cang bơta kỡn gơboh.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.