Òs mòng, bol he ƀuôn ngăn sền gŏ bơta tis cau ndai dê. tŭ kơno cau lơi hơ̆ ai dô jơnau lơh nền siău bơta jakchai, ò gơs cồng nhà tòm broă lơh, hala gơ pừ tòm rai kis đah hwềng, bol he ò kơlôi lah: dilah la he, nền ề he neh lơh niam rlau.” Mơya, tòm tŭ ơn tŭ jơ kơlôi sơnưng wơl jơnau Yàng, bol he ròp dòp git lah bơta pal càng ò di ming gơ òm tòm ca ndai. Gơs tŭ tòm bol he kừng gam pơtwơl mơ bơta pin wil wơl, bơta kơdang nus mp ală bơta sac rwah ò hềt niam nus Kơnràñ.

Ngai do, ngai 27/7/2026, tơnggu Hoi Dan Kop Ngai dan ja ông no oh mi kơlôi sơnưng bal jơnau Yàng kơnòm bơta dong kờl Jordan Buntgen bơh tonggu SIAT GƠLTAU TĔ HWỀNG NUS

“Gèn tàng, siat gơltau tĕ nùs bol mê, mơ bañ kơldang bồ tai.” (Yal wơl 10:16)

“Bơh ngan, trồ mơ ală tap trồ hơđăng jòng rlau jơh gơrê bal mơ Jehôwa Yàng Tom trồ bol mê dê. Bulah behơ̆ Yàng Jehôwa wèt nus kờñ gơboh di Kơnràñ ming di ală ồng pang bol mê de, mơ neh sac rwah di bol khai mơ kon sau bol khai dê bơh di gùl ală lang bol, be neh gŏ tòm ngai do. Gèn tàng, siat gơltau tĕ nus bol mê, mơ ƀàñ kơldăng bồ tai.” (Yal wơl 10: 14- 16)

Oh mi neh tŭ lơi sền Sră Goh mơ sền gơloh roh gơn kơnòm bơh ală cau tòm hơ̆ sơl? Añ neh lùp is lơh mbe lơi lang bol Israel rgơi pin wil wơl gơnap gơnoăr Yàng Tom Trồ dê tòm tŭ neh lòt găn dàlêng Pơrhê; ñchi bơh tai bol khai yoam bơh bơta rcang ai Kơnràñ dê tơnơ̆ mơ tŭ bol khai geh dòp Mana kòp ngai; hala ñchi boh tai bol khai rgơi kư pơnjat tis glài tơnơ̆ mơ tŭ geh Yang dong tă bơh yồ dĭ gơna. Bơta dòn song YÀng Tom Trồ dê gơlơh be lơh be loh lang ngan. Ñchi bơh tai bol khai rgơi lơh klam jongo mơ ò dòn tus behơ̆?

Mơya tòm tŭ añ cahrñà ală cau tòm Sră Goh, kùng be ală cau gut dàr he, Yàng sơntòm ai añ in gŏ añ kùng lơbờñ lơñò behơ̆.

“Neh tŭ lơi kòn pin wil wol bơh bơta rcang ai Añ jê sơl?”

“Neh tŭ lơi kòn lờt jat nus is ala bơh kòp gon tŭ tơngai Añ jê sơl?”

“Neh Tŭ lơi kòn git bơta he lơh la tis mơya kừ gam sac rwah gơ sơl?”

Añ kơlôi sơnưng mơ đơs song mơ Yàng lah jơh ală sèng hơ la: “gơs”.

Tòm tŭ sền wơl să tòm he, añ dòp git lah jơh lang bol Israel mơ să tòm añ kùng tòm tip mơ ală bta tòm lơh tòm hwềng nus mơ broă lơh mƀe lơi nàng don dùh Yàng. Mơ hơ̆ la bơta hoi ja ông Moise dê tòm sr Yal Wơl Bơta Boh Lam 10 gơlik gơs bơta pal càng gơwèt mơ kòp nă bol he ngai do.

Môise bơtô sôr lang bol: “siat gơltau tĕ nùs bol mê, mơ bañ kơldang bồ tai.” (sèng 16). Tòm pah rai Hơbal Yau, siat gơltau la dô nơm til sơñio bơta hơbal dê mơ Yàng Tơm Trồ neh ai lang bol Israêl in, ai tonggit bol khai la lang bol gơri is mơ Kơnràñ (Sơnrop 17:9-14). Mơya ting do, Môise ò đơs tus bơta lơh lòt đah bơdih, mơ ông gam đơs tus bơta golik gơs tòm hwềng nus dê. “siat gơltau nùs” gơs gơtha la tă sang jơh ală bơta kră kơdang, pơnhừ să mơ ală bơta kơryăn bol he dong dùh Yàng wil tơl. Hơ̆ ò di la bơta lơh lòt đah bơdih mơ la bơta gơlik gơs ngan tòm dơlam.

Mơya lai mơtŭ hoi ja lang bol tom gơl, Moisê neh tongkah bol khai kah lah Yàng Jehôwa nehh “yal tơlik nus kờñ gơboh ông pang oh mi dê” mơ “Tòm ală lang bol Kơnràñ neh sac rwah oh mi”. Yàng ò đớs bol khai siat gơltau tĕ nus he dê lai, tơnơ̆ gèn Kơnràñ kờñ gơboh bol khai, mơya Kơnràñ đơs lah Kơnràñ kờñ gơboh mơ sac rwah bol khai, behơ̆ bol khai pal kis di pal mơ bơta hơ̆. Bơta do ai tong gŏ bơta dong duh ò di la gùng dà nàng bol he gos bơta kờñ gơboh Yàng dê, mơya la bơta hơ wơl gơwèt mơ bơta nđàc Kơnràñ dê neh ai bol he in.

Bơh hơ̆, bol he wờng lah bơta pal cang lang bol Israêl dê ò di gơ ơm tòm broă bol khai siau bơta krơi hala siău cơng tang bơh gơnap gơnoăr Yàng, mơ gơ ơm tòm să tòm nus nhờm bol khai dê. Bol khai neh mat ttom sên gŏ dàlêng Pơrhê gơcah, dòp geh Mana bơh trồ mơ git lam bơta tề lam YÀng Tom Trồ dê bơh dơ̆ do tus dơ̆ ndai, mơya bol khai găm òs mòng tòm dră wơl mơ Kơnràñ.

Ngai do, bol he rgơi gơduh tòm ală bơta ndrơm behơ̆. Bol he git Jơnau Yàng, duh broă Yàng, kùng git lam mơ sền gŏ gơnap gơnoăr Yàng dê, mơya nus nhờm bol he gơs dơ̆ kùng găm kră kơdang di đap mat Yàng.

Behơ̆ tàng, bơta bol he pal cang rlau jơh la dô nơm nus nhờm lơbơñ niam mơ rcang sìr nàng geh tòmgơl, ò di la bơntơl bơta krơi hla oă bơta git lam dàh hwềng pa lơm.

Lang Bol Israeel rgi prap gàr bơta hơbal siat gơltau đah bơdih niam ngan, mơya dilah nus nhờm tòm dơlam bol khai dê găm kră kơldang, Yàng Tom Trồ kùng ò niam nus. Kùng behơ̆ sol, oh mi rgơi ràng tơlik bơta dòn đah bơdih he di mơ broă lơh lòt hiu jum kòp poh, sên Sră Goh kòp ngai, geh pơnah tòm oă broă, mơya ală bơta hơ̆ ròp gơik gơs rùp sơnio dilah nus nhờm găm ò hềt geh “siat gơltau” mơ ò hềt dòn dùh ngan Yàng.

Añ git ưngai Yàng bơh Kơnràñ neh ai añ in gŏ bơta ò wil tơl să tòm he di mơ pơnjat bơtê tiăr añ. ngai do, tòm tŭ sên bơh ală cau kong alah ală cau tòm Sră Goh, añ ò găm sền bol khai mơ mơ nús nhơm cahrña tai. Ala bơh hơ̆, añ sền gŏ bơta kong ơt, dòn song mơ broă lơh tòm gơl YÀng Tom Trồ dê hơđăng kòp nơm rai kís cau. hơ̆ la bơta cèng wơl bơta gơn kơnòm mơ chồl bơtrồt tòm gùng lòt jat Kơnràñ.

Dan jà bol he dô nùs bal tòm bơta hòi dan: Khoai Yàng kờn gơboh, dan Bèp toh glài kòn in bơh neh gơs tŭ kòn cahrña ală bơta lơbờñ lơñio cau ndai dê mơya ò sền wơl bơta tồi glài să tòm he dê. Kon git să tòm kòn ò rgơi tòm gơl nus nhờm he di dilah ò gơs Kơnràñ. Behơ̆ tàng, kòn dan Yàng Hwềng Goh pơnjat tom gơl kòn, nàng kon ngan kờñ gơboh mơ cơnđòa lòt mơ Kơnràñ kòp ngai. Kòn jơh nus hoi dan tom sơnđăn Yàng Jesu Krist, Amen.

Ơ ală ôn mò oh mi kờñ gơboh, bơg bơta kờñ gơboh Yàng dê la bơta chồl bơtrồt bol he sang lơi bơta kơldăng nus mơ dòn dùh Kơnràñ wil tơl. Di gơlăn ngai do bơta ông mò oh mi pal cang la ơn tŭ jơ song ngan mơ Yàng, nàng lòi Jơnau Yàng sền sơwì nùs nhờm să tòm he dê. Lùp is tĕ: Gơs bơta lơi añ găm krañ cê ò rgơi sang lơi? Gơs cau añ gam prăp gàr nus sràt bơtăng, cahrñà, hala ò kờñ toh glài? Gơs pơnah lơi añ găm git nus kờn Yàng mơya sac lơh jat nus is he dê? Ƀañ mìng sền trol di ală bơta siău lơbơñ cau ndai dê mơ huĭ nàng lơi Jonau Yàng bư tus dê rai kis să tòm he dê. Dô nơm nus nừm lơbơñ niam di đăp mat Yàng ròp sùm la ù bơkah lơngồt nàng Kơnràñ pơnjat lơh broă mơ tòm gol. Ngai do, hoi dăn tĕ Yàng Hwềng Goh “siat gơltau nus” ông mò oh mi dê, sang tơlik bơta pơnhừ să, kră kơldang hừh nus is, nàng ông mò oh mi cơnđòa lòt tòm bơta pondềt să mơ dòn duh. Tòm tŭ să tòm ong mò oh mi geh Yàng tom gơl kòp ngai, ông mò oh mi ò găm la cau mìng git lah pơrhơng hala cahrnzà, mơya ròp gơlik gơs la dô nă cau bềng nus nđàc sơngit, it yò đò ală cau gơ plơ̆ gơ pừ mơ pơnđang wơl bơta kờn gơboh, bơta kong ơt Bơtau Krist dê tus mơ bol khai. Hơ̆ kung la til soñio dô nă cau bơtê ngan gam geh Yàng tòm gơl kòp ngai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.