Neh gơs cau lơi lùp he bơh bơta dòn he di tòm Yang sơl? Digơlan hơ̆ là dô nă cau lơh broă băl lùp ñchi bơh tai he òs niăm ngăn mơ rĭng lơngai digul kalke bŏl glăr. Digơlan hơ̆ la dô nă cau bơyô koñ git ñchi bơh tai he tus hiu duh khoai kòp poh. Hala kŭng gơs dô nă cau tơñŏ – tơnhial bơta dòn he di. Tòm ală tŭ hơ̆, he rơp lơh mbe lơi taih? Bŏl he rơp ho wơl bơh bơta nđàc mơ koñ gơboh, hala bơh bơta tòm pơndăng băl? Kwơ màng rlau jơh, lơh mbe lơi tồ lăm cau lơi ndai tus hơ Yang bơh bơta ho wơl bŏl he di.

Ngai do, ngai 28/07/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Tori Troncone dê bơh Tơnggume RCANG SIR RÀNG TƠLIK BƠTA DÒN

“Mơya duh rngòt tĕ di Bơtau Krist la sàng goh mơ bơtào Kơnràñ lơh gơs Yàng tòm nùs oh mi dê. Pal sùm sùm rcang sir nàng ho wơl mơ cau lơi lùp bơh bơta gơn kơnòm tòm oh mi, mơ lơh bơta hơ̆ dô bă niam lơnhơn mơ duh rngòt.” (I Pier 3:15-16)

Rcang gar la jơnau gơtha òs mòng gơwèt mơ cau gơboh gơbài thể thao. Oă môn thể thao càng lùp dô nơm bơta rcang gar niam ngăn tồ geh pha. Tơ’ai lah, oă mpồl kơñhơl găm gơs ală cau chài rgơi bơt bơtào rơndăp rcang gar mpồl kơñhơl in.

Mơya, bulah ơm tòm gơnoăr broă sền gar mpồl hìu tòm, ală cau chài kơñhơl plai păl lơh jat boh lăm bơta kơñhơl plai. Dilah bŏl khai rcang gar bơh broă lơh mhăr duh nùs hala goñ ir, bŏl khai rơp kŏng lơh glài. Tòm kơñhơl plai bóng rổ, dô nơm bơta lơh tis dờng ngăn gen jào gơnoăr wơl mpồl ndai ĭn wơl. Tòm plai choh, dô bơta lơh tìs plai ò git kơrhia gen lăm tus thẻ đỏ mơ lơh jơh mpồl he di choh plai siơ̆u cau choh.

Dô mpồl rcang gar niam la bơta dờng màng, mơya bơta hơ̆ ò gơtha la ală cau chài kơñhơl lơh jat nùs is he koñ ò. Bŏl khai ò di mìng rcang gar mpồl he di niam mơya păl lơh bơta hơ̆ di tòmtọh.

Rnoas do ò di mìng tòmtọh tòm bơta kơñhơl thể thao mơya găm găm tòmtọh tòm rài kis bơta dòn. La cau dòn jat Yang, bŏl he kŭng păl rcang gar mơ ràng tơlik bơta dòn he di, mơya păl lơh bơta hơ̆ jat rnoas Yang Tom Trồ niam nùs.

Cau gơnoăr bơtọ Pier cih: “Mơya duh rngòt tĕ di Bơtau Krist la sàng goh mơ bơtào Kơnràñ lơh gơs Yàng tòm nùs oh mi dê. Pal sùm sùm rcang sir nàng ho wơl mơ cau lơi lùp bơh bơta gơn kơnòm tòm oh mi, mơ lơh bơta hơ̆ dô bă niam lơnhơn mơ duh rngòt.” (I Pier 3:15)

Pier cih ală jơnau do tus ală cau dòn jat Yang kŏng kup kơryan tài bơh bơta dòn tòm Bơtau Krist. Bŏl khai geh họi jà păl rcang sir ràng tơlik “bơta gơn kơnòm” gen bŏl khai găm gơs di Kơnrẵn. Mơya, cau gơnoăr bơtọ Pier tơngkah pràn tus nùs nhờm hwing nùs di lài. Lài mơ tŭ koñ rcang gar bơta dòn he di, ồng họi jà ală cau dòn Yang păl “duh rngòt tĕ di Bơtau Krist la sàng goh mơ bơtào Kơnràñ lơh gơs Yàng tòm nùs” bŏl khai. Bơta hơ̆, ai tơnggit broă rcang gar bơta dòn sơntom bơh dô nơm hwing nùs duh rngòt Yang. Tŭ Bơtau Krist lơh gơs ngăn cau tòm at bồ rài kis bŏl he, jơnau đơs mơ bơta lơh lòt bŏl he rơp pơnđăng sol rùp sơñio Kơnrẵn di.

Ngai do, oă cau kơlôi lah rcang gar bơta dòn pơndròm be bơta geh pha tòm bơta tòmlah. Mơya Pier tơngkah lah tơnggume broă lơh do là ràng tơlik bơta gơn kơnòm he gơs tòm Yang Jesu bơh nùs nhờm “niam lơnhơn” mơ “duh rngòt”.
Tài bơh la ală cau ala măt Bơtau Krist tòm dunnia, broă lơh lòt bŏl he di kŭng dờng màng be broă bŏl he đơs. Dô jơnau hơ wơl siơ̆u bơta koñ gơboh rơp lơh iơh wơl bơh Jơnau Niăm. Sơlơ̆ wơl, dô jơnau ho bềng bơta nđàc mơ ki ngàn rơp dŏng cau ndai sền gŏ bơta niam her Bơtau Krist di.

Sră Goh cih: “Mơ tai, dĭ gơna Yàng dê ò di tòmpìt tòmhà, mơya pal ơm niam lơnhơn gơwèt mơ jơh ală cau, chài rgơi bơto sồr, kong ơt ơl, [25] ai bơta niam lơnhơn nàng bơto pơniam wơl ală cau jak pơrlơ̆ dră. Kơp kòñ Yàng Tom Trồ rơp ai bol khai in bơta gơjrañ sang glài nàng git wă jơnau song,” (II Timôthe 2:24-25)
“Jơnau đơs oh mi pal gơs bơta nđàc sùm sùm, mơ tĕ bơtơl boh, tồ oh mi in git pal ho wơl kòp nă cau in la mbe lơi.” (Kôlôse 4:6)

Kŭng be cau chài rgơi kơñhơl plai rơp lơh tềng rềng tus jơh mpồl kơñhơl bơh siơ̆u bơta jak chài he di. Cau Don Jat Yang kŭng rơp lơh bơ̆ iơh sơnđăn Yang tŭ ràng tơlik bơta dòn bơh bơta gơjrañ, pơnhừ să hala tòmpìt tòmhà. Hơ̆ ò di là bơta gen Jơnau Yang tơngkah bŏl he.

Kơp koñ bŏl he di ò di mìng la gơs bơta chài rgơi tòm ho wơl ală sèng lùp bơh bơta dòn, mơya găm păl ràng tơlik hwing nùs Bơtau Krist tòm kòp jơnau đơs he di. Tŭ cau ndai sề bàn bơta lơbơn niăm, bơta duh rngòt mơ bơta koñ gơboh di bŏl he, bŏl khai kŭng sền bàn bơta niam hàng mơnĕ Bơtau di gen bŏl he găm lơh cơng.

Dan jà bol he dô nùs bal tòm bơta hòi dan: Khoai Yang koñ gơboh, Ưnngai Yang neh ai pà kọn ĭn bơta gơn kơnòm tòm Yang Dong Klàs Jesu. Dăn dŏng kọn òs sum sum rcang sir ràng tơlik bơta dòn he di tŭ tìp jơnau lùp mơ pin wil wơl. Dăn ai kon ĭn lơh ală bơta hơ̆ lài ngăn bơh hwing nùs lơbơn niăm mơ koñ gơboh. Kơp koñ jơnau đơs mơ nùs nhờm kọn geh pơnđăng sol wơl rùp să Kơnrẵn, tồ bơh rài kis kọn, geh oă cau koñ lòt tus mơ Kơnrẵn. Kon jơh nùs họi dăn, kon ai sơnđăn Yang Jesu Krist, Anen.

Ơ ală ồng mọ ọh mi koñ gơboh, tồ rơp rcang sir ho wơl ală sèng lùp bơh bơta dòn he di, lài ngăn bŏl he păl càng kis tòm bơta dòn mơ Jơnau Yang kòp ngai. Mìng git lăm ngăn bơh bơta koñ gơboh mơ bơta nđàc Yang di, gen bŏl he rơp yăl tơnggit bơh Kơnrẵn dô bă sŏng ngăn. Tài bơh hơ̆, họi dăn tĕ mơ Yang ai pà he ĭn bơta hur hir geh git bơh Kơnrẵn oă rlau tai, tồ Jơnau Yang tòmgơl dơngoh kơlôi mơ rài kis he. Băl mơ, dăn Yang ai pà he ĭn bơta pơndềt să mơ koñ gơboh tồ gơs tŭ lơmpah lơh cơng bơh bơta dòn he di, he rơp pơnđăng wơl bơh hwing nùs Bơtau Krist bơh jơnau đơs mơ broă lơh lòt kòp ngai he di.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.