Ngai do oă cau ting jat nùs kơ-lôi cau dunnia, đòm jat oă cau mơ lơh roh să tờm he dê. Do ờ di là rài kis cau dờn Yàng dê. Yàng hòi sac cau dờn pal sùm “drơng kơp”, geh gơtha la kơrmap gàr, ban lòi să tờm gơkòl tề lăm tòm bơta ờ niam. Nchi bơtài bol he pal kis drơng kơp taih?

Ngai do, 29/07/2026, rơndap bơta hòi dăn kòp ngai hòi jà ồng mọ oh mi kơlôi sơ-nơng Jơ-nau Yàng bal mơ mò Jessica Teed bơh tơnggume DRƠNG KƠP TĔ!

“Behơ̆, drơng kơp tĕ bơh bol mê ò git ngai mơ kung ò git jơ Añ rê wơl” (Ma-thi-ơ 25:13)

“Tŭ hơ̆ lơgar đang trồ rơp tòm toh be jơt nă cau ơruh at đèng lòt wă rò bơrtơu. Tòm bol khai, gơs pram nă bơrngơl mơ pram nă jak. Ală cau ơruh bơrngơl at đèng mơ ò cèng mơñà ồs bal, ai ală cau ơruh jak at đèng mơ cèng mơñà ồs bal. Tài bơh bơrtơu òbat tus, gen bol khai gơdan bic yồp yồi mơ bic lơhă. Tus digùl mơnang gơs jơnau hòi lah: ‘Ne, bơrtơu tus! Lik lòt tĕ wă rò khai.’ Gen ală cau ơruh hơ̆ kah rngal jơh, rcang đèng bol khai dê. Ală cau ơruh bơrngơl đơs mơ ală cau ơruh jak lah: ‘Dan tòmpà mơñà ồs ală bi dê bol hi in ƀà, bơh đèng hi mòr chơt.’ Mơya ală cau ơruh jak ho lah: ‘Rngòt ò tơl bol hi mơ ală bi in sơl. Chan ală bi lòt tus hơ cau tac nàng rwat.’ Mơ tòm tŭ bol khai lòt rwat, gen bơrtơu tus; ală cau neh rcang sir lòt bal mơ bơrtơu mut tòm tiah sa tòmbau, mơ til mpồng. Lồc behơ̆, ală cau ơruh ne kung tus mơ đơs lah: ‘Ơ Yàng, ơ Yàng, dan pò mpồng bol hi in!’ Mơya cau tòmho lah: ‘Di ngan añ đơs mơ bol ai, añ ò git bol ai ò.’ Behơ̆, drơng kơp tĕ bơh bol mê ò git ngai mơ kung ò git jơ Añ rê wơl.” (Mathiơ 25:1-13)

An ờ di la cau geh dờng tòm Hìu Jum. Tu gam dềt, an ờs mờng lòt hìu jum nàng bơtê ală klờng Sră Goh. Jơl tus dê tú an 20 nam, an sùm lơh nền dờn dờp Yàng Jêsu. Bơh tú hớ, rài kis an geh tom gơl.

Tơngai lòt gan, an dờp git ală bơta an sac rwah rgơi cèng an tus rềp mơ Yàng oă rlau mơ kung rgơi lơh an in ngài mơ Yàng oă rlau sơl. ờ gơs cau rgơi dờn Yàng ala an, kung ờ gơs cau rgơi ala an prap gar bơta tomklac an mơ Yàng. An rgơi lòt tus hìu jum tòm kòp ngai rlô, kơ-no iat ală bơta bơto sồr, đơs ală khà đơs chò, mơya dilah ờ lòi tú jơ is nàng bơtê Jơnau Yàng, hòi dan mơ duh khoai Yàng kòp ngai, bơta dờn an dê rơp ờ tú lơi rgơi geh dờng.

Bulah bơta duh khoai bal mơ hìu jum goh la broă dờng màng pal càng, mơya broă do ờ rgơi ala bơta tomklac is he dê mơ Yàng. Tú jơ ơm is mơ Yàng gơkòl sền ờ dờng màng, bol he rơp roh bơta drơng kơp đah hwềng, tòm tú nùs kờn Yàng dê gơwèt mơ cau dờn la pal drơng kơp.

Yàng Jêsu neh yal dồ jơnau yal yau nàng ràng tơlik bơta drơng kơp, geh cih tòm sră Mathio 25:1-13. Dut bơta yal, Yàng Jêsu tơngkah: “Behơ̆, drơng kơp tĕ bơh bol mê ò git ngai mơ kung ò git jơ Añ rê wơl”

Tòm rài yau cau israel dê, cau bơrtơu ờs lòt tus mơ ờ yal lài tú jơ. Cau gơs mat tòm mpồl wă rò pal sùm rcang lài ồs đèng mơ mơnà nàng wă rò bơrtơu. Yàng Jêsu ngui rùp sơnio ờs mờng do nàng bơtê lah ờ gơs cau lơi git tú jơ Yàng rê wơl. Bèhơ, cau lòt jat Yàng pal sùm rcang lài.

Tòm bơta pơnyơu, cau bơrtơu ala Yàng Jêsu, 10 nă cau ùr ruh ala ală cau kơp gơn Yàng. Bơta he sền gó hơ la 10 nă cau ùr do cau lơi kung gơs ồs đèng. sền đah bơdì bol khai dồ bă bal, kung bè oă cau ngai do dồ bă gơs mat tòm ală rơndap bơta pơjum hìu jum goh, mơ đơs he la cau dờn Yàng.

Mơya, bơta krơi is hớ la ơm tềng “mơñà ồs”. Yàng Jêsu ờ ràng tơlik gơtha ala mat bơta lơi. Mơya, tòm oă sèng Sră Goh, mơñà đơs tus bơh Yàng Hwềng Goh (Xacari 4:1-7). Đèng ờ rgơi àng dilah siơu mơñà, kung bè hớ, rài kis đah hwềng ờ rgơi kis pràn kơldang dilah siơu mat Yàng Hwềng Goh dê. Tài bơh ờ rcang, gen 5 nă cau ùr gơla pal yòng dan mơ 5 nă cau ùr jak chài mơya ờ rgơi. Kung bè hớ sơl, bol he ờ rgơi “yòng dan” bơta dờn hala bơta drơng kơp bơh cau gơnoar bơto, me bàp, hala ală cau ndai, mơya pal bơh să tờm bol he dê.

Tú 5 nă cau ùr gơla rê wơl mơ dan cau pờ mpồng hìu, gen cau bơrtơu đơs lah: ‘Di ngan añ đơs mơ bol ai, añ ò git bol ai ò.’ Cau bơrtơu ờ git ală cau ùr gơla tài bơh bol khai ờ gơs bơta tomklac ngan mơ cau tờm. kung bè hớ, oă dớ bol he git bơh Yàng Jêsu, mơya ờ hềt tú lơi gơrê mơ Yàng. Bol he mìng gơs bơta dờn đah bơdì, mơya ờ hềt gơs bơta tomgơl pa tòm nùs nhơm.

Bơh hớ, bơta pơnyơu do kờn tơngkah rài kis đah hwềng bol he dê.

Digơlan bol he gam sền Sră Goh, hòi dan, duh broă Yàng hala ơn să tòm rơndap hìu jum goh dê. Mơya ală bơta do tus bơh nùs kờn gơboh Yàng, hala mìng tus bơh broă ờs mờng jat bè poac să dê taih? Bol he gam kis jat Yàng Hwềng, hala mìng ai pràn is he dê dồ bă bòl glar ngan taih?

Dilah sền gó rài kis đah hwềng he dê gơkòl ran rsơh, siơu drơng kơp mơ lơh roh bơta chò hòp tòm bơta gơs mat Yàng dê, broă bol he pal lơh hơ la rê wơl mơ Yàng, lòi tú jơ sền swì nùs nhơm he dê, gơjran sang glài, mơ hòi dăn dan Yàng Hwềng Goh tomgơl pa. Tơhir té tòm bơta tomklac mơ Yàng oă rlau tai, nàng tú Yàng rê wơl, bol he rgơi chò hòp dê đap mat Yàng.

Dan jà bol he dô nùs bal tòm bơta hòi dan: Khoai Yàng, dan toh glài kon in tài bơh bơta lơbơn lơnio mơ siơu tòm bơta dờn kon dê. Dan hoài kon tus rềp mơ Yàng kờp ngai, nàng kon ờ di mìng gơs đah bơdì mơya la dồ rài kis gơrê ngan mơ Yàng. Khoai Yàng, kon ờ kờn nùs nhơm ngài bơh Yàng Hwềng Goh, mơya sùm kờn geh Yàng sòl pơđàng, tơngkah mơ tomgơl pa, nàng kon rgơi kis drơng kơp, dờn song kòp ngai. Kon jơh nùs hòi dan ai sơnđan Yàng Jêsu Krist, Amen.

Ơ ală ồng mọ oh mi kờn gơboh, neh tus dê tú bol he pal kơ-no iat jơnau hòi jà Yàng dê nàng lik klàs tòm bơta lơbơn siơu đah hwềng. Tơhir te bơta tomklac đềt mềr bal mơ Yàng bơh tòm ngai do. Ban lòi nùs nhom kơldang bơh bơta lah pơrhơng Yàng dê. “măng neh jơngo, ngai mờr tus”, bol he pal sang sơbì broă lơh klam jơngao, soh té phan tom lơh đah hwềng, nàng kis drơng kơp tòm tú kơp gơn Yàng rê wơl.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.