Oă cau tom bol he geh deh tom hiu nhă duh rngòt, têh dờng bal mơ Hiu Jum Goh, kah kờp sèng Sră Goh, git loh jơh ală bơta bơto mơ rgơi đơs bơh Yàng Dọ̆ng-Klàs Jesu dô bă ƀuôn-sọh. Mơ ya gơs dô wah ngài mơ kơlôi lah gơ rềp ngan mơ ya la ngài ngan rlau jơh tom rài kis do: hơ̆ la wah ngài bơh di bồ-dơngọh tus di plai nùs. Behơ̆ Bơtau Krist mơ bol he neh git wă bơh Kơnràñ gơs ngan la Yàng rài kis he dê hala Kơnràñ mìng la dô nă cau jat gùng duh khoai ơm momọ̆ tom oă bơta git jak jak-chài bồ-dơngọh bol he dê taih?

Ngai do, ngai 30/07/2026, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Maria Schleicher bơh tơnggume MPỒNG WỀT.

“Pơnđơl tĕ mut tom mpồng wềt, bơh añ đơs mơ bol mê oă cau rơp joì kòñ mut mơ ò rgơi.” (Luka 13:24)

“Gơs cau đơs mơ Kơnràñ lah: “Ơ Yàng, gơs mìng dô êt cau geh dong klàs ơ?” Kơnràñ ho mơ bol khai lah: “Pơnđơl tĕ jơh pràn mut tòm mpồng wềt, bơh Añ đơs mơ bol mê, oă cau rơp jòi gùng kòñ mut mơ ò rgơi. Dơ̆ cau tòm hìu guh mơ til mpồng rau, bol mê ntào đah bơdìh, teh mơ hòi lah: ‘Ơ Yàng, dan pò bol hi in.’ Kơnràñ rơp ho lah: ‘Añ ò git bol mê bơh ntềng đah tus.’Tŭ hơ̆ bol mê rơp đơs lah: ‘Bol hi neh sa ñô di đap Kơnràñ, mơ Kơnràñ neh bơto sồr tòm ală gùng ƀòn dờng bol hi dê.’ Kơnràñ rơp ho tai lah: ‘Ơ jơh ală bol mê la cau lơh bơta iơh bơsak, Añ đơs mơ bol mê, Añ ò git bol mê bơh ntềng đah tus; lik lòt tĕ bơh di añ!” (Luka 13:23-27)

Bơh di tŭ gam kơnòm dềt, añ sùm git Yàng Tom Trồ la ñcau: Kơnràñ la Kòn Yàng Tom Trồ, Bơtau neh tus tom dunnia nàng dong klàs jơi kòn mơnùs bol he klàs bơh tồi-glài. Dilah gơs cau lùp, añ rgơi ho wơl dô bă loh làng ală jơnau song hơ̆ dô bă ƀuôn-sọh. Bulah behơ̆, đơs ngan lah, bơh tom dơlăm nùs nhơm, añ òhềt ngan wă wơng loh gơtha wĭl tơl ală jơnau he đơs. Ñchi bơh tài añ pal cang geh dong klàs? Ñchi bơh tài mìng dô nă Yàng Jesu lơm rgơi lơh wil tơl bơta dong klàs dờng hơ̆? Añ lu-li di đap ală sèng lùp tơnggu tom do. Rngòt rlau jơh tai, nùs nhơm dô nă kơnòm dềt “jat gùng neh gơs” neh cèng tus añ in dô bơta ring-lơngai ma blàc, lơh añ hừh nùs ngan mơ niam nùs bal mơ bơta ò git kơlôi să-tòm he dê, ngèl mat ò bài sền bơta jrồ ngan jơnau song dê.

Rài kis bơta dòn añ jê tom tŭ hơ̆ ƀă-lĭa mìng la bơta tìp mat đah bơdìh gơwèt mơ Jơnau Yàng. Añ òs sùm kơno ală bơta yal yau Sră Goh, kah tom nùs mơ đơs wêh đơs wơl ală jơnau bơto sồr, mơ prap lòi dô ềt bơta jak-chài mơnàng bơh Jơnau Niam. Mơ ya, jơh ală bơta dòn añ jê gơwèt mơ Yàng Tom Trồ mìng ơm gùt dar tom kơrwàl bồ-dơngọh rọ-ràñ. Bơta dòn añ jê ò tŭ lơi gơcư̆t ryàs jrô tom hwềng soàn. Añ neh dòn dòp mơ bơr-sơndôi lah Yàng Jesu la Yàng Dọ̆ng-Klàs, mơ ya tom dơlăm, añ òhềt tŭ lơi git làm gơnap-gơnoar tom pơrgơl crih-crài Bơtau Krist dê. Bơta dòn dòp bơh đah bơta git-jak gơ siău bơta pràn kơldang nàng tơrpă srê srĕng bơta tồi-glài tom tŭ plai nùs òhềt dô dơ̆ bơcah lề-làc di đap bơta nđàc.
Bơta dòn añ jê ơn Yàng Jesu in lồi dùt mìng la ală jơnau hơđang cồng sơndồi lơmpiat. Tom tŭ dơngoh kơlôi kư sùm tò is să mơ pơrlôm he, añ neh lơh Yàng Jesu gơlik gơs dô “nơm sră ai gơnoar ò chơt” ai gùng lòt jat poăc să. Kờp tŭ gơduh tom tồi-glài, añ pơndòm-pơniàng ìs mơ lòi jơh ală bơta moat-jrùng is bơtào guh dô bơta kơlôi sơwì jak-chài ngan: añ dòn Yàng Jesu, ngan Kơnràñ rơp toh glài añ in, mơ phan ban lơgar trồ ngan neh geh ho nền bulah rài kis tŭ do añ jê mbe lơi. Añ neh ngui bơta nđàc dờng rlau jơh Yàng Tom Tồ dê lơh gơs mpàn căng king pun ndơp bơta pơnhừ să, pơnjat ơn să he digùl, kis khat gơboh mơ ò kơlôi tus jơnau hòi jà gơjràñ sang-glài kung be bơta dòn duh sàng-goh mơ Yàng Jesu kơp kòñ.

Jơl tus dô ngai, bơta nđàc crih-crài Yàng Dọ̆ng-Klàs Jesu neh cơnoà mut mơ pơrlac wơl kơrwal rài kis añ. Kơnòm bơta nđàc Kơnràñ, ală bơta añ òs mìng git wă mơ bồ-dơngoh gen nĭsơna geh àng lơr, gơtup jrồ tom plai nùs añ bơh gơnap-gơnoar Yàng Hwềng Goh. Tŭ jơ hơ̆, añ neh cùn gơltăng, gơjràñ sang-glài ngan mơ dòn duh wĭl tơl, ơn jơh rài kis he nàng yò tơngguh Yàng Jesu lơh gơs Yàng Dŏng mơ Bơtau At-ƀồ hwềng soan.

Kung be Jơnau Yàng cih tom Luka 13:23-27, tom tŭ têh dờng tom bơta dòn mơ tơnkrăm he tom Jơnau Sră Goh, añ sùm đal git dô bơta jê-sồt ò git lơh kờp tŭ sền tus tap do. Tơnggu lơh añ ji nùs ngan ò di tài bơh yoam pơrhiat, hala kơp kòñ gơs bơtơl tài dô nơm gùng ndai lam tus bơta kis sùm sùm mơ Bơtau Krist. Nền cê, tom ryàs bơta moat-jrùng dê sơntòm bơh broă añ đal git rùp bơta neh sơrlèt rlau să-tòm he dê gan ală sèng jơnau cih do, mơ dòp git dô bơta loh làng: gơs ò git nđò nă cau tŭ do gam kis ndròm bè añ ală kơnhai sơnăm klăm jơngọ ngai hơ̆.
Yàng Jesu bơto bol he pal “pơnđơl pràn nàng mùt tom mpồng wềt tài bơh… oă cau rơp joi kòñ mùt ting hơ̆ mơ ò rgơi”. Jơnau “pơnđơl pràn” ting do đơs bơh bơta tomlơh đah hwềng sơrbơng rơng mơ pràn ngan, nàng pha lin rlau jơh ală bơta ƀuôn-sọh poăc să dê. Tom tŭ hwềng soàn gam gơkòl jam tom kơrwàl ò git jơh bơta tồi-glài dê, bơta klò sang ală bơta hàm kòñ ìng dunnia dê gơlơh be la dô bơta kơp kòñ kalkê rlau jơh. Gơs oă cau git bơh Yàng Jesu, mơ ya Kơnràñ òhêt tŭlơi git bol khai. Bol he rgơi nggui dô bă niam tom ală tŭ pơjum duh khoai, iàng lơr đơs chò jòng-ro Yàng, mơ rgơi đơs oă ngan bơh Yàng Jesu jơh dô ngai. Bulah behơ̆, jơl tus di tŭ lơi nùs nhơm bol he òhềt git lam bơta tom pơrgơl bơh tom ryàs mơ òhềt dòn duh hơđơm gơnoar Bơtau Krist, bol he gam ntào di đap bơta gơpừ, kong alah tom tŭ cơnoà mùt mpồng wềt lăm tus bơta kis sùm sùm. Neh tus di tŭ bol he pal cang khin cha sền wơl jrô tom dơlăm nùs he, mơ sàc rwah “mpồng wềt” kờp ngai. Nàng tom tŭ ngai hơ̆ tus, Bèp Đăng Trồ rgơi hừh nùs đơs mơ bol he lah: “Añ git kòn”

Dan jà bol he dô nùs bal tòm bơta hòi dan: Khoai Yàng la Bèp Đăng Trồ kọn dê, kọn đal git lah mpồng lăm tus lơgar Kơnràñ dê la mpồng wềt. Mpồng hơ̆ “wềt” ò di tài bơh Kơnràñ ò wă rò jơh ală bơta, mơ la tài bơh mìng gơs dô nơm gùng lơm nàng cơnoà mut tom dơlăm. Mpồng hơ̆ mìng ai ală cau lơi in gơs nùs nhơm ngan ơn bơta dòn he dê tơm Yàng Jesu. Dan Yàng nđàc sơngit mơ dong kơl kọn lòi jơh ală bơta kơryăn, jơh ală bơta hàm kòñ poăc să gam hwài kọn, lơh kọn òhềt ngan dòn dòp mơ dòn duh rài kis he Yàng Jesu in. Dan Hwềng Goh Kơnràñ lah pơrhơng nùs nhơm kọn, bơtơl kọn in pràn mang ryŭ nàng kọn lơh nền gơjràñ săng-glài, pleh ngai jơh ală gùng tồi-glài. Dan tom pơrgơl jơh rài kis kọn ơn wil tơl Kơnràñ in. Bơh di tŭ jơ do, kọn dan sang lòi gơnoar lơh gơs cau tòm rài kis he, dan mìng Kơnràñ la Yàng Tom Trồ kọn dê. Kọn jơh nùs hòi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, dilah Jơnau Yàng ngai do lơh nggồr bồ-dơngoh oh mi, lơh oh mi òsup-òiàng rê wơl di tiah ngan he dê tom lơgar Yàng, añ ràc-ròc bơto tơngkah oh mi pal ơn tŭ jơ hòi-dan ìs mơ Kơnràñ. Dan tĕ Yàng sòl pơnđàng mơ rang tơlik bơta tồi glài lơi gam pun prap gam gơcư̆t jrồ tom nùs, kơryăn oh mi git làm dô rài kis hòn-chò wĭl tơl tom Bơtau Krist. Dăn tĕ Yàng Hwềng Goh lơh lơbơn nùs nhơm oh mi, nàng oh mi đal git jơnau song mơ dòn duh Yàng dô bă jơh nùs. Đi-ngkơi wơl mơ tồi-glài, pràn kơldang sang-lòi gùng lòt yau, mơ cơnoà lòt ntoàt mhar tus mơ gơrwàng tê kòñ gơboh ò git jơh ò git lồi Yàng Dọ̆ng-Klàs Jesu dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.