Yang la Bơtau don song. Oh mi nên cê neh kơno bơta do oă dơ̆ tòm ală bơta bơtô hala găn di ală dap Sră Goh. Bulah be hơ̆, digul ală bơta ghi gha rai kis dê, tòm tŭ ntao diđap bơta gơlong is să tòm dê, ngăn sơl ọh mi neh git lam ngăn bơta dòn song wil tơl Kơnrañ dê tòm să tơm rai kis he dê hala ò? Hala Jơnau Kơnrañ găm ming la ală jơnau cih lơm?

Ngai do, ngai 31/7/2026, Bơta Hòi Dan Kòp Ngai dăn jà ală ồng mò oh mi bơtê bal Jơnau Yang kơ nơm di bơta dong kơl Jessica Teed dê bơh tơnggumê ALĂ JƠNAU HƠ RƠP GEH LƠH WIL TƠL

“Yàng Jehôwa rơp lơh wil tơl bơta Kơnràñ neh lơh nền gơwèt mơ añ; Ơ Yàng Jehôwa, bơta kòñ gơboh kơ̆ dơn Kơnràñ dê gam sùm sùm. Dan bañ sang lòi ală broă tê Kơnràñ dê.” (Đơs crih 138:8)

“Bulah añ lòt digùl bơta gơlòng bòl glar, Yàng sền gàr bơta kis añ jê; Kơnràñ pò tê tòmdră di bơta gơjrañ dờng cau sò tơm di añ, Mơ tê ma Yàng dê dong tă añ. Yàng Jehôwa rơp lơh wil tơl bơta Kơnràñ neh lơh nền gơwèt mơ añ; Ơ Yàng Jehôwa, bơta kòñ gơboh kơ̆ dơn Kơnràñ dê gam sùm sùm. Dan bañ sang lòi ală broă tê Kơnràñ dê.” (Đơs crih 138: 7-8)

Kơp dơ̆ kơlôi bơh ală jơnau hơ Yang Tom Trồ dê, bồ dơngoh añ kư wểt tus hơ Apraham. Kơnrañ neh ai ồng in ală jơnau hơ dơng ryŭ, ală bơta hơbal dơng tian gơs bơta kơlôi sơnưng kòn mơnus dê kalke ngăn dòn kơnơm. Kơnrañ đơs ồng rơp gơlik gơs bèp oă lang bol dê mơ Kơnrañ sùm prăp gar ồng. Mơ ồng mò oh mi git ờ, Kơnrañ neh hơ rơp sền gar bol he kung behơ̆ sơl (Mathiơ 6:25-34).

Gơs dô dơ̆ añ roh broă lơh, mơ hoai bal roh ơnih ơm tơn. Tòm tŭ lơmpah hơ̆, añ wil tơl gơtup pừ mơ srat bơtăng tòm tŭ sền lăng bơta gơlik gơs rai he dê. Añ git ưnngai ală oh tòm Hiu Jum Goh oă ngăn. Bol khai neh pờ ơnang tơwơr tê ai añ in dô bă tiah king crŭ ing, bơh tơm tŭ ãn găm rcăng lơh sră jôi dăn broă lơh mơ sơwing bồ bơh ală khà jen pal tơm wơl. Ngăn, broă pơndềt să dơp rò bơta dông kơl bơh cau ndai la dô bơta ò buôn. Bơta pơnhừ să is he dê lơh ẵn oă dơ̆ ò rgơi đơs jơnau ưnngai bơh ală bơta he găm gơs, ming tai bơh ală bơta hơ̆ ò ndrơm be rup ẵn neh pac sir. Ẵn lăng he be la dô nă cau kong alah, mơ lơh jê sồt is nùs pơnhừ să he dê. Gơwet mơ dô nă cau neh dơng, broă pal gơri mơ cau ndai la dô bơta gơduh dơng ngăn, nhức la tòm tŭ bol he sùm ơn is tơnggu la pal wil tơl lơh is să he.

Mơya tòm bơta gơlong gơlơh be găm hoai ẵn rùc wơl, Yang neh grơng dơ ẵn. Kơnrãn ai ẵn in dơp git dô jơnau song crih crai: bơta nđàc Kơnrãn dê kung rcăng sir ai să tòm cau alah be ẵn. Mơ bơta dơng mang tai lah, Kơnrãn bơtô ãn dô bơta bơtê dơng mang tòm gùng lòt bơta dòn, hơ̆ la pal dòn duh mơ gơn kơnơm wil tơl tòm dô nă Kơnrãn lơm.

Apraham sơnăm yau kung neh lòt găn ală gùng lòt klò săng bơta pơnhừ is să he bềng bơta jê sồt behơ̆. Kơp gơn Yang ò tũ lơi la buôn soh, mơ ẵn neh ò í dơ̆ gơtup pừ. Mơya Sră Goh pơndơm pơniang ẵn lah, bơta dòn ală ồng pang kung gơs jơ phuk lơbơn.

Yang Tom Trồ neh hơ mơ Apraham lah ồng mơ Sara ò di ming gơlik gơs mè bèp lơm ò, mơ ồng rơp gơlik gơs bèp oă lang bol dê. Tũ Yang hoi sac mơ ràng tơlik bơta rơndap dơng hơ̆ hơđăng rai kis ồng, Apraham neh 75 sơnăm rau (Sơnrơp 12:1-4).

Bulah behơ̆, bơta gơlik gơs ngăn tòm rai kis ò gơlik gơs tòm toh jat tũ jơ mơ dơngoh kơlôi kòn mơnus dê kơp gơn, Apraham sơn tơm duh nùs. Ông lơh nên “dong” Yang dô tê găn dê bơta ơm bic mơ Agar, mơ công nha la Ismael neh lik rai tũ ông 86 sơnăm (Sơnrơp 16:16). Hơ̆ la dô bơta lơh lòt mơng lúi bol he dê: tũ sền gõ ală bơta ơm mõ mõ dơ dơn, bol he gen kỡn lơh nền is rai kis in ala mơ pơnjat don kơ nơm Yang.

Bulah Ismael neh lik rai, mơya bơta rơndap hơ đăng trồ yang Tòm Trồ dê ò tơm gơl, Kơnrãn lơh nền jơnau hơ hơ̆ pal geh lơh sir găn dê Sara. Mơ gen, Apraham neh tus 100 sơnăm tòm tũ kòn dềt Isak lik rai (Sơnrơp 21:5).

Ồng mò oh mi gơs tũ lơi kơlôi tus bơta dơp git he dê mbe lơi tòm tũ ơm gơn 25 sơnăm nang sên gõ jơnau hơ Yang dê geh lơh sir hala ò? Kơlôi tus gợi kung neh gõ jõ jong rau. Digơlăn, să tòm oh mi tũ do kung găm ơm tòm gung lòt jong mơ lơgah lơgãn ndrơm behơ̆ sơl.

Kong ơt kơp gơn Yang Jêhôwa ò tũ lơi la buôn soh, mơya Yang bol he dê la Bơtau bềng bơta nđàc. Bulah Apraham kung gơs dơ̆ duh hôl, bulah bơta dòn ồng dê ò hềt wil tơl, Yang găm wet sền nus nhơm dòn kơnơm ồng dê. Bơta dòn song Yang dê ò cang bol he păl cơnđòa lòt wil tơl ò sồt rmãn. Kơnrãn wet tus bơta dòn băliă mơ nùs nhơm niam nùs tơnggơr sền Kơnrãn digul ală tũ bol he ơm is rlau jợh. Kơnrãn neh yal Apraham la song ring kơnơm bơta dòn hơ̆ (Rôma 4:13-22).

Apraham neh kơp gơn Yang, mơ să tòm tòm gùng lòt kơp gơn hơ̆, ồng neh geh tip Kơnrãn dô bă is mơ jrô rlau.

“Tòm tŭ Yàng Tom Trồ ho pơgon mơ Abraham, bơh ò gơs Bơtau lơi dờng rlau, gen Kơnràñ ai să tòm Kơnràñ mơ srat să lah: “Ngan, añ rơp ai lơngai mê in, mơ añ rơp bơtơl oă jơi bơtiàn mê in.” Behơ̆, Abraham neh kong ơt kơp gơn jŏ jòng, gen tàng khai dòp geh jơnau Yàng Tom Trồ neh ho pơgon.” (Hêbrơ 6:13-15)

Bơta hơ̆ wil tơl tòm toh hơđăng rai kis oh mi. Dilah oh mi găm lơgah lơgãn ơm gơn dô jơnau hơ lơi bơh Yang geh lơh sir, gen kơ̆ nùs tẽ: bơta kơp gơn oh mi dê ò di là ò kwơ ò. Yang dòn song wil tơl, mơ tũ jơ Kơnrãn dê sùm la wil tơl rlau jơh. Kơnrãn git loh oh mi găm cang bơta lơi mơ git tũ lơi la tũ di rlau jơh nang ai pà. Yang ò tũ lơi lơh sir jơnau hơ hơđưng rai kis oh mi jat tũ lơmpah wil tơl rlau jơh Kơnrãn dê, bulah la tòm tũ do hala tòm tiah găm sum sum.

Lơi tẽ Jơnau Yang tòm Đơs Crih 138:8 yờ dơ hwing soan oh mi tũ do:

“Yàng Jehôwa rơp lơh wil tơl bơta Kơnràñ neh lơh nền gơwèt mơ añ; Ơ Yàng Jehôwa, bơta kòñ gơboh kơ̆ dơn Kơnràñ dê gam sùm sùm. Dan bañ sang lòi ală broă tê Kơnràñ dê.”

Dan jà bol he dô nùs bal tòm bơta hòi dan: Khoai Yang kỡn gơboh, kòn ơn jơnau ưnngai Kơnrãn bơh git lah rai tơ nỡ kon geh prăp kỡ ring lơngai tòm tơwor tê Kơnrãn. Tòm tũ kòn sền gõ ală mpông neh til mơ ală tũ lơmpah neh lòt găn, dăn dòng kòn dơp git lah Kơnrãn găm ăt bồ hơđăng rai kis kòn. Dăn tă jan bơta rngot rngơt, duh nus mơ bơtô kòn git sơnđing să he tòm bơta nđàc Kơnrãn dê kơp ang drim. Dăn ai kòn in dô bơta dòn kỡ win, nang tòm tũ bơta gơlik gơs iơh rlau jơh, kon kung găm jong rơ bơta don song Kơnrãn dê. Kòn jơh nùs hôi dăn tòm sơđăn Yang Jêsus Krist. Amen.

Ơ ală ồng mò oh mi kòñ gơboh, dilah Yang neh kỡ dơn mơ dô nă Apraham bềng ală jơ phuk lơbơn, Kơnrãn kung rơp kỡ dơn mơ ồng mò oh mi mơ ẵn ngai do. Jơ dunnia dô dê rgơi chôl oh mi, mơya tũ jơ lơgarr đăng trồ dê lơh broă mơ bơta nđàc mơ nùs dòn song. Bãn rngot ală sơnăm kơnhai kơp gơn, bơh Yang rgơi ngui să tòm ală sơnăm kơnhai hỡ nang bơt mòn mơ tơmgơl bol he. Kơp kỡn lah oh mi mơ ẵn rơp lòt găn tũ lơmpah gơlong bol glar dô mơ dô nơm nùs nhơm bềng liu bơta gơn kơnơm, rcăng sir mut tòm rơndăp crih crai mơ Kơnrãn neh rcăng sir bol he in.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.