Gơs tú lơi ồng mò oh mi neh mong mơ ală bơta gơlik gơs tòm Hiu Jum Goh mơ húi Yàng hala húi he la ncau sơl? Bol he ming jòi tus Yàng tòm tú he cang hala he kơp kỡn gơs Bơtau kỡn gơboh he taih? Bulah mbe lơi gen Yàng kung kơp gơn he rê wơl tòm tiah ndơp ndơr nàng dô dớ tai git lam bơta hòi dan pràn kơldang, đềt mêr mơ Yàng.

Ngai do, ngai 01/08/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume TIAH NDƠP NDƠR

“Tòm tŭ bol mê hòi dan, bañ lơh be ală cau ma blac, bơh bol khai kòñ ntào hòi dan tòm ală hìu jum mơ di ală mum gùng, nàng cau in gŏ. Di ngan Añ đơs mơ bol mê, bol khai neh geh phan ƀàn bol khai dê rau. Mơya tòm tŭ mê hòi dan, mut tĕ tòm ơdŭ, til mpồng, gen hòi dan mơ Bèp mê la Bơtau ơm tòm tiah ndơp ndơr; mơ Bèp mê la Bơtau gŏ tòm tiah ndơp ndơr, rơp ai wơl mê in.” ‭‭(Mathiơ‬ ‭6‬:‭5‬-‭6‬)

Tú găm lòt bơtê, ẵn òs lip kơni mơ đơs chò tòm ală tiah cau tac ka phe nàng jòi jê. Ẵn lòt tus tòm kòp bă tiah mơ jòi lùp bol khai cang cau til kơni sơl, gen ẵn ceng ghi-tar mơ ală phan pal cang tus nàng lơh broă. Bè òs, ẵn pal cang dô êt jó nàng rcang tòm broă lơh ẵn jê. Mơya, kung gơs tú ẵn lơh jat nùs ẵn kỡn, tus di ngai lơh broă gen song ẵn lơh nên rơp đơs chò lơi. Tú ò gơs oă jơ nàng bơtê, ẵn đơs wơl ală chò neh yau, ală chò ẵn neh mong, neh kah nàng đơs.

Pa do mơ, Yàng neh ngui bơta hớ nàng tơngkah ẵn kung gơs ală bơta behớ tòm tú ẵn hòi dan sơl. Krơi is ngan tòm tú Yàng sol pơnđang tòm tiah ndơp ndơr rlau jơh tòm rai kis he dê nàng he in tòm gơl. Bơta sol pơnđang hớ ò di lơh he in kơt glài hala kong cahrna, bè tòm Rôma 8:1 cih: “Gen tàng tŭ do ò gơs bơta lơh nền glài di ală cau ơm tòm Yàng Krist Jesu”. Hớ la bơta tơngkah lơbơn niam Yàng Hwềng Goh dê, nàng tề lam bol he tus tòm bơta gơjrẵn sang glài mơ têh dơng rlau tai tòm Yàng.

Di gơlan ồng mò oh mi kung gơs tú bè ẵn sơl. Hala he ò git, tú he kơno bơta hòi dan ngai do dê, he sên gó bơta hòi dan he dê ò dôh hôl tai. Ẵn dan gơnoar la cau ntao tê dớ sơnròp bơh bơta do. Hớ la tú ẵn ngui ală jơnau hòi dan òs mong nàng hòi dan mơ Yàng. Bơh dòn Yàng neh jó nam, ẵn buôn ngan jong is să he. Tú jơ hòi dan ẵn lơh nàng gơ in sir lơm. Gơs tú ẵn ming hòi dan tú gơs broă pal cang lơm: tú gơs cau ơm tòm bơta kòp jê, rơndeh chơt tòm gung hala geh cau jà hòi dan tòm tú jơ pơjum. Kòp ngai ẵn hòi dan jat bơta òs mong lơm.

Di gơlan la ò di dô êt nă cau jat Yàng lơm behớ. Mơya do nên cê ò di la dô rai kis tơngkah tơngkẵn mơ Yàng kơp kỡn gơs tòm bol he. Kơnràn kỡn bol he kis dô rai kis bêng liu dà kis ò di la bè dô nơm gri jơh dà. Kỡn behớ, bol he pal cang tú jơ cơnđoà tus tòm tiah ndơp ndơr mơ Yàng.

Tòm Mathiơ 6:5-6, Yàng Jesus đơs lah: ““Tòm tŭ bol mê hòi dan, bañ lơh be ală cau ma blac, bơh bol khai kòñ ntào hòi dan tòm ală hìu jum mơ di ală mum gùng, nàng cau in gŏ. Di ngan Añ đơs mơ bol mê, bol khai neh geh phan ƀàn bol khai dê rau. Mơya tòm tŭ mê hòi dan, mut tĕ tòm ơdŭ, til mpồng, gen hòi dan mơ Bèp mê la Bơtau ơm tòm tiah ndơp ndơr; mơ Bèp mê la Bơtau gŏ tòm tiah ndơp ndơr, rơp ai wơl mê in.”

Bol he òs hòi tiah hòi dan mơ tòm klac đềt mêr mơ Yàng la “tiah ndơp ndơr”. Do la tiah mơ Yàng Dong Jesus bol he dê sùm lòt tus (Luka 5:15-16). Tú sên Sră Goh, bol he kung sên gó rùp sơnio ală cau klau, cau ur Yàng Tòm Trồ dê bè: Apraham, Davit, Daniel, Eli hala ồng Pol: Jơh tơl nă cau hớ sùm jòi Yàng tòm tiah ndơp ndơr.

Lùp is să tòm he: ẵn hòi dan nàng cau in sên gó mơ jong rơ, hala ẵn jơh nùs kơp kỡn tòm klac đềt mêr mơ Yàng he dê sơl? Sră Goh ai he in git loh lah, dilah he gơs ală bơta tis, gen ală jơnau jong ro kon mơnùs dê rơp ming la phan bàn he dòp geh sơl. (Mathiơ 6:5). Mơya Yàng Jesus hòi jà bol he mut tòm bơta tòm klac đềt mêr, jrô ndơp mơ Yàng rlau tai.Kung bè ur klau, ò ceng ală jơnau đơs ming ur klau git lơm nàng yal cau ndai in, Yàng kung kỡn bol he tòm klac đềt mêr mơ Yàng behớ. Kơnràn kơp kỡn bol he pò nùs mơ Kơnràn nàng dòp geh bơta đềt mêr mơ ming dô nă Kơnràn rgơi pà ai he in lơm.

Kung bơh bơta tòm klac đềt mêr mơ kớ cê mơ Yàng lơm. Tú bol he til mpồng ơdú he dê, lòi ală bơta nggôr nggàc đah bơdih mơ ơm ing mơ Yàng lơm, bol he rơp git lam Yàng dô bă jrô ndơp. Tòm tiah ndơp ndơr hớ, Yàng rơp sơm bơi ală bơta jê sồt, mơ ai wơl pràn pa bol he in, ai bơta nđàc nàng bol he in cơnđoà lòt tòm bơta hòi sac Kơnràn dê, mơ chu wơl ồs bơta kỡn gơboh Kơnràn tòm ală cau bol glar, ngêt ngai.

Kòp nă bol he sên swì is să he. He ming hòi dan tú gơs cau ơm gut dar he lơm sơl? Ngan la gơs tú he hòi dan lài mơ tú sa, pơjum mơ jơnum să lơm sơl? Dilah behớ, gen ngan la Yàng kỡn lam ồng mò oh mi gơs dô rai kis hòi dan jrô ndơp. Kơnràn hòi jà ồng mò oh mi mut tòm tú jơ tòm bơh bơr mơ hòi dan tòm klac đềt mêr mơ Kơnràn kòp ngai.

Dan jà bol he dô nùs bal tòm bơta hòi dan: Khoai Bèp kỡn gơboh, ưnngai Kơnràn bơh gơs tú kon ò hòi dan jơh nùs, Kơnràn sum don song mơ kơp gơn he rê wơl. Dan bơt wơl tòm kon bơta kơp kỡn mơ jigloh tơhir geh ơm is mơ Yàng, geh tòm bơh bơr mơ Yàng ò dơh. Dan bơto kon git dơh wơl ală bơta kơryan kon lòt tus tòm tiah ndơp ndơp mơ Yàng, kơno jơnau đơs Yàng dê. Dan kòp ngai dong kon cơnđoà tus rềp mơ Kơnràn rlau tai mơ dòp geh bơta tòm klac đềt mêr mơ Bèp. Kon jơh nùs hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, dilah ồng mò oh mi dơrcul lơnggơr ò git sơntòm bơh bơta lơi, gen sơntòm té bơh tú do. Lòi ming 5 phút lơm, ơm ngêt ngơt, dilah rgơi gen til té mpồng ơ dú he dê mơ tìp mat mơ Yàng Dong Klàs dunnia dê. Kơnràn sum kơp gơn ồng mò oh mi. Mơ ẵn dòn nền lah, tòm tú ồng mò oh mi sơntòm git bơta bơkah lơnggồt dà hớ dê, gen ồng mò oh mi rơp lòt tai oă dớ tòm tiah hớ. Bơh tòm hớ gơs dà ò tú lơi soat.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.