Gơs ală broă bŏl he lơh gơlơh be niăm her ngăn, mơya tơnggume hơ ngkơi gen ò tŭ lơi niăm ò. Kung be, bŏl he dŏng kòl dô nă cau, mơya tòm nùs kơp koñ geh cau cih kòp wơl; bŏl he dùh broă, mơya gơlơh gơjrañ tŭ ò gơs cau lơi jong rơ hala ưnngai. Ală bơta gơlik gơs hơ̆ tơngkah bŏl he lah nùs bŏl he di càng gơs tòmgơl wơl. Yang Tom Trồ la Bơtau sền gŏ ală broă bŏl he lơh mơ Kơnrẵn kŭng sền sơwì nền ală tơnggume jrô ndơp tòm nùs bŏl he.

Ngai do, ngai 04/08/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Gary E. Roberts dê bơh Tơnggume TŬ YANG SỀN SƠWÌ NỀN NÙS

“Tŭ hơ̆ Añ rơp yal loh bol khai in git lah: ‘Ơ ală cau lơh bơta tồi glài iơh bơsak, Añ ò tŭ lơi git bol mê ò, lik lòt tĕ bơh di Añ.” (Mathiơ 7:23)

“Ò di kòp nă cau đơs mơ Añ lah: ‘Khoai Yàng, khoai Yàng,’ gen geh mut tòm lơgar đang trồ ò, mơya mìng cau lơi lơh jat nùs kòñ Bèp Añ jê ơm hơđang trồ. Tòm ngai hơ̆ rơp gơs oă cau đơs mơ Añ lah: ‘Khoai Yàng, khoai Yàng, bol hi ò di neh ai sơnđan Kơnràñ mơ đơs hwơr, ai sơnđan Kơnràñ mơ bơtrơh ală cà, ai sơnđan Kơnràñ mơ lơh oă broă gơnap gơnoar ò ơ?’ Tŭ hơ̆ Añ rơp yal loh bol khai in git lah: ‘Ơ ală cau lơh bơta tồi glài iơh bơsak, Añ ò tŭ lơi git bol mê ò, lik lòt tĕ bơh di Añ.”(Mathiơ 7:21-23)

Dô tơm ală rùp niăm her rlau jơh đơs bơh bơta lơh wơl pa ală phăn tŭ Yang Jesu ri wơl geh cih wơl tòm E sai Esai 65:25 “So rhau mơ belàt kòn rơp sa bal, klìu triă rơp sa rhe kung be kơnrồ, mơya bơs rơp sa ù.” rùp do ai tơnggŏ dô ngai ne, tŭ Bơtau Krist ri wơl, ală cồng nha tồi glài hơđăng ù do rơp tă săng. Bơta sò dră mơ ji sồt rơp ò găm tai; jơh ală phăn rơp geh kis tòm bơta rĭng lơngai bơh Yang Tom Trồ neh lơh nền bơh sơnrờp. Tŭ kơlôi sơnơng bơh sèng Sră Goh do, ăñ kơlôi tus dô nơm broă ndai bơh Yang Tom Trồ kŭng găm lơh ngai do mo. Bulah bơta lơh wơl pa wil tơl òhềt gơlik gơs, mơya Yang neh sơntom broă lơh hơ̆ tòm rài kis ală cau gơri hơ Kơnrẵn.

Tŭ dòn dòp Yang, bŏl he òhềt tơn mơ gơlik wil tơl ò. Yang Tom Trồ pơnjat lơh broă tòm rài kis bŏl he bơh dô bơta rơndăp họi sơnđăn là lơh sang gọh. Kơnrẵn tòmgơl dơngoh kơlôi mơ hwing nùs bŏl he (Epheso 4: 20 -24), bơtọ bŏl he klọ săng cau yau (Ro ma 8:13) mơ sơlơ ngai lòng tiar tồ bŏl he kòp ngai gơlik ndrom be Bơtau Krist rlau (Philip 2:12-13). Do la dô bơta rơndăp sum sum.

Tòm gùng dà lòt hơ̆, Yang Tom Trồ tòmgơl broă lơh đah bơdih, kung be tòm dơlăm nùs bŏl he. Ală tồi glài be pơnhừ să, mhăr gơjrañ, srat bơtang, boah gơjrañ, gơjrañ măñ, hala nùs koñ is rơp ò găm at bồ tòm rài kis cau gơri hơ Yang ngăn. Bulah bơta rơndăp do rơp pơnji pơnkôr ngăn, mơya hơ̆ găm la dô pơnah ò tŭ lơi siơ̆u tòm bơta tòmlơh đah hwing. Bơta tòmlơh mơ poăc să mìng rơp pơndut tŭ bŏl he rlô bŏl tòm Yang mơ geh tòmgơl be rùp să gơklŏ Kơnrẵn di.
Ăñ kung neh git lăm bơh ală bơta tòmlơh đah hwing tòm rài kis ăñ tơn, gơkrơi bơh bơta pơnhừ să đah hwing. Cau sàng gọh Paisios neh găm đơs broă pơnhừ să jrô ndơp rlau jơh là òs bàn tơlik tòm ală cau gơs rài kis đah hwing pràn kơldăng. Đah bơdih, digơlan pơndềt să ngăn, mơya tòm dơlăm kơp koñ geh cau ndai dòp git mơ jọng ro he. Hơ̆ là bơta ồng họi sơnđăn là “bơta gơklŏ ò kwơ”, tiah gen bơta pơnhừ să sọh hơđăng ào bơta pơndềt să ma blac.

Gơs dô tŭ tơngai, ăñ đal git lah să tòm he kŭng neh gơtơn dùh tòm ală tŭ behơ̆. Tŭ họi dăn mơ dăn Yang Hwing Gọh ràng tơlik nùs chồl jrô ndơp tòm nùs, ăñ mơpdơl dòp git lah oă broă ăñ lơh ò di tài bơh ăñ gơboh Yang, mơya bơh bơta păl càng koñ gơboh wơl, koñ geh cau dòp rò mơ jọng ro. Tŭ ò dòp geh bơta dòp rò hơ̆, ăñ òs rọh bơta gơn kơnòm, gơjrañ nùs, kunkŭng toài lah gơjrañ măñ.
Tŭ hơ̆, Yang neh bơtọ ăñ dô bơta bơtọ. I Korintô 13 dŏng ăñ dòp git lah: dô nơm broă lơh bulah niăm her git nđợ, mơya ò gơchồl bơh bơta koñ gơboh gen diđap măt Yang Tom Trồ kung gơlik gơs ò kwơ.

Yang Jesu kŭng neh gơs jơnau kơrhia tòm Mathiơ 7:22-23, Yang Jesu yăl tơnggit tus ală cau ò di bŏl khai ò git Yang ò, sơlơ̆ wơl bŏl khai là ală cau “đah hwing” rlau. Bŏl khai rơp đơs jơnau gơnoăr hwơr, bơtrơh cà, lơh oă bơta tề krơi, mơ jơh ală bơta “ai sơnđăn Yang” gen lơh. Mơya, Yang găm họi sơnđăn bŏl khai la “Ơ ală cau lơh bơta tồi glài iơh bơsak,” mơ đơs lah “Añ ò tŭ lơi git bol mê ò”.

Jơnau kơrhia Yang Jesu di tơngkah bŏl he păl sum sum sền sơwì nền să tòm he. Ală broă lơh đah hwing, bulah niam her mbe lơi, kŭng ò tŭ lơi tòmgơl ala dô nơm hwing nùs koñ gơboh Yang mơ dòn bơr Yang. Bŏl he păl òs sum kơnòm Yang Hwing Gọh sền sơwì bơta gơchồl mơ bồ dơngoh he di tŭ duh broă Kơnrẵn. Tŭ Yang sơñio bơta pơnhừ să hala ală bơta gơchồl tìs glài lơi, bŏl he càng yăl glài mơ gơjrañ săng glài băl mơ Kơnrẵn, kung băl mơ dăn Yang dŏng tă he lik bơh bơta pơnhừ să mơ òs git kơrhia diđap ală bơta gơchồl he pơnhừ să tòm nùs. Tŭ bŏl he kư̆ dòn duh Yang, bơta nđàc Kơnrẵn rơp ràng tơlik wil tơl tòm bơta lơbơn lơño bŏl he di (II Kôrintô 12:9). Kơnrẵn rơp rhòi rhòi tòmgơl bơta gơchồl bŏl he di, tồ ală bơta bŏl he lơh gen gơlik bơh bơta koñ gơboh gơwèt mơ Kơnrẵn.

Dan jà bol he dô nùs bal tòm bơta hòi dan: Khoai Yang! Kơnrẵn git kon rơp òs buơn gơtòmmut tòm bơta pơn hừh să mơ jọng să tòm rài kis đah hwing. Tài behơ̆, dăn Yang dŏng kon òs git sền sơwì nền nùs mơ tơnggu chồl he di tòm kòp broă lơh. Kọn kơp koñ ală broă kọn lơh mìng gơlik gơs bơh bơta koñ gơboh gơwèt mơ Kơnrẵn. Kon jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, ngai di, lòi tĕ tŭ jơ tus hơ Yang, dăn Kơnrẵn sơwì nền nùs he di mơ rằng tơlik ală tơnggu gơchồl pồn ndơp lơi gen he òhềt bàn git. Băñ mìng jọng să bơh ală broă neh lơh Yang ĭn, mơya kơlôi sơnơng tus Yang niăm nùs bơh ală broă lơh he di hala ò. Tŭ Yang Hwing Gọh sơñio ală tồi glài lơi, pơndềt tĕ să yăl glài mơ gơjrañ săng glài băl mơ Kơnrẵn. Sum sum họi dăn tĕ be Bơtau Dabit tòm Đơs Crih 139:23-24 lah: “Ơ Yàng Tom Trồ, dan sền sơwì añ mơ git nùs añ jê! Dan lòng añ mơ git ală bơta kơlôi sơnơng añ jê! Dan sơwì sền tòm añ gơs gùng dà iơh lơi hala ò? Dan tề lam añ tòm gùng gam sùm sùm.”

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.