Bol he lòi jơh rài kis nàng bơtê mbe đơs tơmbơh, lơh lòt mơ dunnia: bơh mbe đơs chài-rgơi tus di bơta sac rwah jơnau nàng lơh niăm nùs cau iat. Mơ tus di đap Bơtau Crơng Gơs, bol he dơrcùl tài bơh dô bơta rngòt ò bàn mơ mat: “Behơ̆ jơnau hòi-dan he dê dờng màng hala ò? Geh niăm nùs Yàng hala ò? Bơh bơta kơnjơ̆ pal wĭl tơl, bơta nđàc tơmbơh bơr mơ Yàng nisơna gơlik gơs dô bơta bơtê sơwì krañ-cê ngan. Mơ tŭ hơ̆, bol he neh lơh roh bơta nđàc crih-crài mơ Yàng ai gòi kòn sau Kơnràñ in-bơta nđàc geh rang tơlik bal mơ Kơnràñ jơh ală bơta, ò pŭn ndơp bơta lơi, mơ ơm momọ̆ kơp gơn nàng kơno jơnau Bèp lơbơn niam ho wơl.

Ngai do, ngai 30/08/2026, bơta Hòi-Dan Kờp Ngai dăn jà jơh ală cau iat kơlôi sơnơng Jơnau Yàng kơnòm di bơta dong kơl Jessica Teed bơh tơnggume ƠM MOMỌ̆ MƠ TUS HƠ BÈP.

“Mơ ya ngăn Yàng Tom Trồ neh iat; Kơnràñ neh ai tồr iat jơnau hòi-dăn ăñ jê.” (Đơs Crih 66:19)

Tom tŭ kơno tus bàr jơnau “hòi-dan”, oh mi kơlôi tus bơta lơi sơnròp ngan? Digơlan la rùp dô nă cau koar tê, ñim mat mơ kŭn bồ ơ? Hala oh mi kơlôi tus ală jơnau hòi-dan loh làng, ală sèng Sră Goh geh ai git dô bă jak-chài, hala ală jơnau yal tơlik bềng bơta dòn? Digơlan oh mi kung kơlôi lah mìng ală cau gơnoar bơto, cau lam bồ pơjum hala lam bồ bi mpồl dê lơm la ală cau ngan git mbe hòi-dan.
Mơ ya hòi-dan ò di mìng la kŭn bồ, ñim mat hala đơs ală jơnau niam ngan mơ đah hwềng. Hơ̆ la bơta nđàc mơ Yàng Tom Trồ ai jơh tơl nă kòn sau Kơnràñ in. Bulah oh mi la ñcau, ơm tiah lơi hala dòp gơnoar broă lơi tom Hiu Jum Goh, oh mi kung rgơi cơnđoà mùt tom dô rài kis hòi-dan jrô-ndơp mơ đềt mêr mơ Yàng.
Ală ngai sơnròp pa bơtê hòi-dan, añ rngòt ngan pal hòi-dan di đap cau ndai. Añ sùm sền gọ̆ jơnau hòi-dan añ jê ò chài, ò loh làng hala bềng gơnap-gơnoar kung be bol khai. Kơp kòñ bơtê mbe hòi-dan niam rlau neh gơchồl añ mut tom dô mpồl dềt òs sùm hòi-dan. Mơ gơs dô jơnau đơs tom bơta pơjum dơ̆ sơnròp mơ tus di tŭ do añ gam ò tŭ lơi hŭi.

Cau lam bồ sền jơh mpồl gen đơs: “Cau ndai kơlôi mbe lơi bơh jơnau hòi-dan oh mi dê ò dờng mang. Jơnau hòi-dan hơ̆ ò di nàng bol khai iat, mơ la nàng tơmbơh bơr mơ Yàng Tom Trồ. Bơh Kơnràñ la Bơtau mơ oh mi wèt tus, Bơtau òs sùm iat kờp jơnau oh mi đơs.”

Ală jơnau hơ̆ neh tă bơta ơnòng-kơnjơ̆ tom nùs añ. Lai mơ hơ̆, añ sùm kơlôi tus cau ndai rơp kơlôi mbe lơi bơh jơnau hòi-dan añ jê. Mơ ya añ đal git lah bơta dờng mang rlau jơh ò di la cau ndai sền sơwì mbe lơi, mơ la añ neh ngan tus rềp mơ Yàng Tom Trồ mơ tơmbơh bơr mơ Kơnràñ hala ò.

Kơlôi wơl, hòi-dan lài ngan la bơta gơtomklac digùl kòn mơnùs mơ Yàng Tom Trồ. Mơ tom bơta gơtomklac lơi, bơta geh tombơh bơr sùm la bơta ò rgơi siơ̆u. Yàng ò sồr bol he pal ngui ală jơnau chài rgơî hala hòi-dan dô bă loh lang ò gơkol gơklĕ. Kơnràñ kòñ bol he song-ngan àñ jơh ơnòng-kơnjơ̆, jơh ală bơta kơlôi-rcang mơ jơh ală bơta lơi prap tom nùs tus mơ Kơnràñ, jào phi jơh ală bơta mơ nùs dòn kơnòm di bơta at-bồ mơ dòn-sọ̆ng Kơnràñ dê.

Bulah behơ̆, hơ̆ gam òhềt la jơh gơtha bơta hòi-dan dê.

Bulah I Piêr 5:7 bơto bol he pal “jào phi tĕ jơh ală bơta kơlôi-rcang oh mi dê Kơnràñ in”, hòi-dan ò di mìng la cèng ală bơta pal cang he dê di đap Kơnràñ. Hơ̆ kung la gùng mbe bol he gùl niăm bơta gơtomklac đềt-mêr mơ Yàng Tom Trồ, la bơta tombơh bơr bàr đah mơ Aba, Bèp bol he. Tom dô bơta gơtomklac, dilah dô nă kư đơs sùm ò bơdơh mơ ò tŭ lơi kòñ iat, gen bơta gơtomklac hơ̆ kălkê rgơi sơlo gơđềt-mêr.

Lat la dô pơnah ò rgơi siơ̆u tom bơta gơtomklac digùl bol he mơ Yàng Tom Trồ. Gơs tŭ tom tŭ bol he hòi-dan, Yàng kung hòi jà bol he gơs pơnah bal tom broă Kơnràñ gam lơh, nàng dòp wơl ală bơta hơ̆ mơ bol he ràc-dan. Yàng ò di mìng kòñ bol he tus yal jơh ală bơta pal cang, mơ Kơnràñ kung kòñ bol he kơno jơnau đơs lơbơn niam Kơnràñ dê tom bơta ngềt-ngơt mơ jơnau jòng-ro Kơnràñ tom tŭ kơp gơn Kơnràñ ho wơl.

Đơs Crih 46:10 cih lah: “Ơm tĕ momọ̆ mơ git lah añ la Yàng Tom Trồ. Añ geh bơtào jong hơđăng ală lang bol, mơ añ geh bơtào jòng hơđăng ù sơl.”

Tom ală jơ phuk ngềt-ngơt tom tŭ bol he tus mơ Yàng Tom Trồ mơ jào jơh ơnòng-kơnjơ̆ he dê Kơnràñ in, nùs bol he kung pò nàng đal git bơta kơ̆-dơ̆n mơ dòn-song Yàng dê. Tom tŭ ơn Kơnràñ ală nùs nhơm, ală bơta kơp kòñ mơ ală bơta lơh he in kơlôi rngòt, bol he yal tơlik nùs dòn kơnòm di bơta sền gàr bềng bơta kòñ gơboh Kơnràñ dê. Bơh bơta dòn duh mơ dòn kơnòm lơh niăm nùs Yàng Tom Trồ. mơ tom ală tŭ hơ̆, Yàng Hwềng Goh òs lơh broă tom nùs bol he, ai bơta ring-lơngai mơ tơngkah bol he kah lah Yàng sùm dòn-song gơwèt mơ jơh ală jơnau ho Kơnràñ dê.

Jơnau hòi-dan gơs dô gơnap-gơnoar dờng ngan. Bañ hŭi lah bol he gam gơs dô bơta nđàc dờng màng la geh gơtomklac mơ Bèp Đăng Trồ – geh yang tơlik jơh ală bơta tom nùs mơ kung bơtê mbe kơno jơnau Yàng đơs.

“Mơ ya ngăn Yàng Tom Trồ neh iat; Kơnràñ neh ai tồr iat jơnau hòi-dăn ăñ jê. Pal jòng-ro Yàng Tom Trồ, bơh Kơnràñ ò săng lòi jơnau hòi-dan ăñ jê, kung ò tă tơlik bơta kòñ gơboh kơ̆-dơn Kơnràñ dê bơh di ăñ.”
(Đơs Crih 66:19-20)

Dan jà bol he dô nùs bal tòm bơta hòi dan: Khoai Bèp Đăng Trồ kòñ gơboh, kòn ưnngai Yàng tài bơh Kơnràñ neh ai kòn in bơta nđàc geh tombơh bơr mơ Kơnràñ. Kơnràñ git wă jơh ală nùs nhơm, bơta lơbơn-lơñọ mơ ală bơta jê-sồt jrô-ndơp rlau jơh tom hwềng nùs kòn. Dan toh-glài kòn in tài bơh ală tŭ kư kơlôi rngòt cau dunnia sền sơwì mơ hŭi lah Kơnràñ gam kơp gơn jơnau ràc-dan kòn dê. Tŭ do, dan Yàng Hwềng Goh tề-lăm kòn mùt tom bơta ngềt-ngơt, ai kòn in nùs dòn kơnòm wĭl tơl nàng jào phi jơh ală bơta kơlôi-rcang, mơ dong kòn mhar dòp git kơno jơnau đơs lơbơn niam Kơnràñ dê. Dan lơh pa wơl bơta gơtom-klac kòn dê mơ Bèp tom ngai do mo. Kòn jơh nùs hòi-dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, ngai do, oh mi rơp lơh bơta lơi nàng bơt bơtào rài kis hòi-dan he dê sơlo pràn kơldang taih? Bañ gơn tus ngai hìng. Tŭ do mo, ơn tĕ tŭ jơ cơnđoà mùt tom tiah ndơp-ndơr mơ Yàng Ḍọ̆ng-Klàs Jesu, ơn jơh ală bơta tom nùs he mơ ơm momọ̆ iat jơnau đơs Kơnràñ dê. Dan Yàng dong bơta hòi-dan gơlik gơs dô rài kis, be-òs kung bè nhơm tă, tom-klàc oh mi mơ Yàng kờp ngai. Bèp Đăng Trồ gam kơp gơn oh mi!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.