Gơs ală tu tòm rài kis, bol he ai jơh pràn mơ ya kung ờ rgơi prap gar bơta he kờn gơboh. Dê đap bơta kòp jê, bơta chơt roh hala dồ bơta iơh nisơna, jơh bơta pràn, jền priă mơ ală bơta he gơn kơnòm ờ rgơi dong he bơta lơi. Tú hớ, bơta lơi dong bol he ờ gơplớ nùs? Bơta lơi dong bol he sùm gơs bơta gơn kơnòm tú ală mpồng dê đap mat gơlớh bè neh til taih?

Ngai do, 02/09/2026, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bơh tơnggume BAÑ RNGÒT, MÌNG DÒN LƠM!

“Mơya Yàng Jesu ò gơjal bơh jơnau hơ̆ gen đơs mơ khai lah: “Bañ rngòt, mìng dòn lơm.” (Mak 5: 36)

“Tòm tŭ Yàng Jesu gam đơs jơnau do, gơs cau bơh hìu jum Jeru tus đơs mơ khai lah: “Kòn ùr ồng neh chơt rau, ñchi kòñ lơh tơmbòl tai Cau Bơto taih?” Mơya Yàng Jesu ò gơjal bơh jơnau hơ̆ gen đơs mơ khai lah: “Bañ rngòt, mìng dòn lơm.” (Mak 5:35-36)

La dồ nă cau gơnoar sơn-nơm, broă lơh an dê kờp ngai sùm gơwèt mơ jơnau ntas plai nùs dê. Bơh jơnau ntas pip pip dồ bă ring bal máy cau đo dê hala tú sền gó dồ nơm gùng song hơđang mpàn rùp, an dờp git bơta dềt rhền bơta kis dê. An dờp git ală bơta pràn cau gơnoar sơ-nơm dê mìng la phan lơh broă, mơya nhơm tă mơ bơta kis kon mơnus dê gen tòm mpàng tê at bồ Yàng Tòm Trồ dê. Bơta siơu siăr kon mơnus dê lơh nùs tồr an kah tus jơnau Sră Goh bơh bơta yal yau bơta dờn dồ nă cau bàp sơnđan la Jeru, mơ gơnap gơnoar Yàng dê neh sơm bòi kon ùr dêt ồng dê.

Đah pơnah gơnoar sơnơm, đơs is la pơnah plai nùs, bơta chơt geh dờp git mơ ală tềl sơnio loh làng: nùs ờ pờng tai, ntơh ờ gó nhơm tă, mơ gùng ràng tơlik gơlik dồ nơm gùng song. Tú cau kòp jê gơ tơmut tòm bơta plai nùs ờ pờng tai, broă cau gơnoar sơ-nơm dê hớ la lơh ală broă jat bè rơndap: bơklơn plai nùs, sok điện mơ chit sơnơm nàng rgơi dong plai nùs rgơi kis wơl. Oă dớ, jơh ală cau gơnoar sơnơm chò hòp tú gó plai nùs kis wơl. Mơya kung oă dớ, tơnớ mơ ai jơh pràn, dê mpàn rùp sơnio ờ gó bơta lơi. hớ la tú an sền gó bơta siơu kon mơnus dê. Cau gơnoar sơnơm rgơi sơm bòi ală bơta jê sồt poăc să, mơya nhơm tă mơ hwềng soàn gơrê mơ Yàng Tòm Trồ. Bơta kis ờ di la phan kon mơnus rgơi jòi pìt, mơya hớ la phan pà gời crih crài bơh Yàng dê.

Tòm sră Mak 5 he kơlôi tus ồng Jeru, dồ nă cau at bồ dồ nơm hìu jum. Tú lòt gan bơta kòp jê kơn jớ kon ùr dềt 12 nam, jơh ală gơnoar hala bơta git jak kon mơnus dê ờ rgơi dong bơta lơi. La cau bàp kờn gơboh kon he dê, ồng plớ să dê đap jơng Yàng Jêsus nàng dan: “Kòn ùr dềt añ neh mòr chơt rau; dan Kơnràñ tus ơn tê hơđang khai nàng khai in gơs bòi mơ kis.” Jơnau dan hớ ràng tơlik bơta ờ tơl pràn kon mơnus dê, mơ cèng bơta gơn kơnòm mìng tòm Yàng Jesus dê lơm. Mơya, tú Yàng gam tòm gùng lòt, dồ jơnau yal tơngit bơh cau tòm hìu nhă tus: “Kòn ùr ồng neh chơt rau, ñchi kòñ lơh tơmbòl tai Cau Bơto taih?” gơwèt mơ dunnia, nhơm tă jơh hớ kung la tú mpồng gơn kơnòm neh til, broă jòi dan mơ dồ nă cau gơnoar hwơr gơlik ờ kwơ tai.

dờng rlau mơ bơta lơbơn siơu kon mơnus dê, Yàng Jêsus neh đơs dồ jơnau ring lơngai, yờ đơ nùs nhơm jê sồt cau bàp dê: “Bañ rngòt, mìng dòn lơm.” Tú cơn đoà mut tòm hìu bềng bơta nìm ràc, Yàng ràng tơlik jơnau song đah hwềng: “Oh dềt do ờ chơt ò, mơya khai bic lơhă gơ dê”. Jơnau đơs do gơwèt mơ ală cau tềng hớ la ờ di pal, mơ bol khai neh dơnó tơnhial Yàng tài bơh bol khai neh gó kon dềt do neh chơt rau. Mơya Yàng Jêsu ờ wèt tus ală jơnau hớ, Yàng cèng mè bạp bal mơ 3 nă cau bơtê mut tòm ơdu. Yàng at tê kon dềt mơ đơs lah: “Talitha Koumi!” Gơtha la: “Ơ kòn ùr, Añ sồr ai guh tĕ!” di tú hớ, kon ùr dềt kis wơl, khai ntào mơ cơn đoà lòt tòm bơta ai lơh crih crài ală cau sền gó dê.

Sền bơta tềl krơi do gơwèt mơ dồ nă cau gơnoar sơnơm, an sền gó bơta dờn ờ cèng bol he tòm bơta tom lơh mơ bơta chơt nàng jòi bàn bơta kis, mơya cèng bol he tus mơ bơta dờn duh wil tơl dê đap nùs kờn Yàng dê. Bulah bè hớ, nùs kơ-lôi kon mơnus dê ờ rgơi ples klàs jơnau lùp is: dilah ngai hớ Yàng Jesus ờ lơh tềl krơi mơ kon ùr dềt ồng Jeru ờ kis gen mbè lơi tiah? Tòm ală ngai an lơh cau gơnoar sơnơm, an neh sền gó oă jơnau hòi dan jơh nùs ală hìu nhă cau dòn Yàng tus dê ală cau tòm hìu nhă, mơya ờ gó tềl krơi lơi. Ngan sơl bơh jơnau hòi dan bơh bơta dờn rơp dong dồ nă cau rgơi geh kis tai tòm dunnia sơl ơ? Sră Goh ai jơnau hơ wơl la ờ rgơi. Bơta kis mơ bơta chơt gơrê mơ rơndap crih crài Yàng Tòm Trồ dê, la tiah mơ bol he ờ rgơi dờp git loh làng.

Bulah kon ùr ồng Jeru, hala cau klau bòn Nain, mơ ồng Laxaro geh Yàng hòi kis wơl, gen ală sơnăm hơđang ù, bol khai kung rơp lòt gan bơta chơt dồ dớ tai. Broă Yàng lơh jó bơta kis kon ùr 12 sơnam ờ di la nggu lồi dut ờ, mơya la tềl sơnio nàng ràng tơlik bơta gơklo Yàng dê mơ bơt bơtào bơta dờn hìu nhă dê. Tú he lòt gan bơta ờ hơ wơl Yàng dê bơh jơnau hòi dăn dan Yàng sơm bòi, bol he geh hòi tus nàng bơtê git lah bơta chơt dồ nă cau gơrê mơ Yàng ờ di la bơta chơt roh bơta dờn dê. Hớ là rơndap Yàng dê hơđang cau hớ neh sir, mơ Yàng pờ dồ nơm bơta sơm bòi dờng rlau jơh: cèng bol khai mut tòm bơta kis sùm sùm tòm lơgar hơđang trồ, tiah ờ jê sồt, dà mat hala bơta cah is tai.

Gơwèt mơ ală cau gam kis, bơta moat jrung tòm bơta cah is là bơta ờs mờng, mơya jơnau Yàng Jêsus đơs: “bañ rngòt, mìng dòn lơm!” sùm là lòs kơlné kớ cê. Bơta dờn ờ di la sồr Yàng pal lơh tềl krơi jat nùs is he dê, mơya là bơta jào phi tòm gơnoar at bồ Yàng dê. Dờp git do dong an sền gó broă lơh an dê dồ bă dipal: jơh nùs tòm broă ròng siăm cau kòp jê bè dồ nă cau dí dờn song, mơya sùm dờn jat rơndap Yàng lơh nền gơwèt mơ ală rài kis cau dê. Bơta chơt đah poac să mìng là bơta bic ing lơm, mơ dồ ngai ne, tú jơnau đơs Bơta Kis Wơl dê geh yò, jơh tơl nă bol he kung rơp geh dờng tòm să jan gơklo nàng chò hòp tòm bơta kis sùm sùm tòm Yàng.

Dan jà bol he dô nùs bal tòm bơta hòi dan: Khoai Yàng Tòm Trồ la Bơtau at bồ bơta kis bơta chơt dê, kon ừn ngài Y àng tài bơh gơnap gơnoar Yang dê dờng rlau mơ bơta jak chài kon mơnus dê. Dan toh glài kon in tài bơh oă dớ hwềng nùs bềng bơta tom lơh, pin wil wơl tú tìp ală cau kòp jê sang rài, hala ală jơnau hòi dăn ờ geh dờp jat kon kơp kờn. Dan pà ai kon in bơta dờn kơcê bè ồng Jeru, nàng di gùl bơta gơlòng dờng, kon sùm kơno jơnau Yàng đơs: “bañ rngòt, mìng dòn lơm!” dan tề lăm kon git dờn bơr nùs kờn wil tơl Yàng dê mơ kis bơh bơta gơn kơnòm kơ cê tòm bơta kis sùm sùm Yàng pà. Kon jơh nùs hòi dăn, ai sơnđăn Yàng Jêsus Christ. Amen.

Ơ ală ồng mọ oh mi kờn gơboh, gùng nhàr di gul bơta kis mơ bơta chơt tơng kah bol he bơh bơta lơiah, siơu sar kon mơ nus. Ngai do, rlau mơ rngot bơh bơta chơt hala yoan joh ală jơnau hòi dăn ờ geh dop jat nùs is he. Dan bol he bơê jào phi ală bơta tòm tê Yàng dê. Pal kis wil tơl kòp ngai mơ Yàng pà, sền dờng màng bơta kis nàng duh broă Yàng mơ kờn gơboh ală cau kiau ma. Mơ tú tìp bơta bòl glar hala chơt roh, dan jơnau đơs “bañ rngòt, mìng dòn lơm!” Yàng Jêsus dê rơp la jơnau pơn dờm pơn iang dờng, yò đơ bơta dờn he dê wèt tus hơ lơgar Yàng dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.