Gơs dô pơnah ngai dơng ngăn digul broă “git Yang” mơ “don kơnơm Yang”. Bol he rgơi kah mơ nus lah Yang la Bơtau don song, ní hỡ mơ nus bol he kung wi wơ be la ù hơđơm jơng he mor bơcah. Gơs gơtơmdră ò, tom tũ bol he yal lah he găm duh khoai Bơtau at bồ lam plai ù dê, mơya dơrcul wơl diđap dô ía cal rbut rai ing dô dê. Yang găm sùm gơs mat mơ at bồ, ming la bol he gơs tơl don kơnơm nang cơnđòa jat Kơnrãn mơ ò pin wil wơl hala ò?

Ngai do, ngai 3/9/2026, Bơta Hôi Dăn Kơp Ngai dăn ja ală ồng mò oh mi bơtê bal Jơnau Yang kơnơm di bơta dong kơl Linda Vulcano dê bơh tơnggumê KIS RING LƠNGAI TÒM BƠTA DÒN KƠNƠM.

“Bañ rngòt, bơh Añ ơm bal mơ mê; bañ rngòt rngơt, bơh Añ la Yàng Tom Trồ mê dê. Añ rơp lơh mê in pràn kơldang, Añ rơp dong kòl mê mơ rơp yò tơngguh mê mơ tê ma pha lin rlau Añ jê.” (Êsai 41:10)

“La cau Añ neh tă bơh di ală tiah lồi dut plai ù, Añ neh hòi sac mê bơh di ală tiah ngài rlau jơh mơ mum plai ù dê, mơ đơs mơ mê lah: “Mê la cau duh broă Añ jê; Añ neh sac rwah mê, mơ neh ò sang lòi mê.” Bañ rngòt, bơh Añ ơm bal mơ mê; bañ rngòt rngơt, bơh Añ la Yàng Tom Trồ mê dê. Añ rơp lơh mê in pràn kơldang, Añ rơp dong kòl mê mơ rơp yò tơngguh mê mơ tê ma pha lin rlau Añ jê.” (Êsai 41:9-10)

Neh sơlet rlau 30 jơt sơnăm bơh di tũ ăn geh iat yal yau sơnĩo tòm bơta bơto Yang dê. Mơ ngai do ăn găm kah loh.

Yal yau đơs bơh dô nă cau klau lòt tus kơnhwal đah đăng tom kơnhai noat mrểt. Tũ ơm nggui tòm rơndeh bơh di ơnih rondeh par tus ơnih ơm rlô, ồng sền gõ dô nă cau găm nggui đar ka digul dàlêng neh gơlik piêr.

Càu nac lùp: “Nggui đah hỡ ring lơngai sơl?”

Cau at rơndeh nõ mơ hơ wơl: “ơi, lơi ăn ai ồng in gõ.”

Đơs sir, cau at rơndeh lòt tus digah dàlềng. “Ồng kư lòt lă” – khai đơs. “Ring lơngai ngăn.”

Cau nac rngot rngơt cơnđòa dô êt cơnđòa bơh mat piêr, mơya gen sơrbac sơrbăng ri wowl digah dàlêng.

Tus têng do, cau gơnoăr bơto lúp mpôl cơnum: “Jat ồng mò oh mi, ncãu la cau ring lơngai rlau? Cau ming khin cơnđòa dô êt cơnđòa mơ ruc wơl hala cau găm nggui digul dàlêng, ring lơngai dơp lèng dô ngai đar ka?”

Lơi tẽ dô phuk nàng kơlôi sơnưng. Jat oh mi, ncãu la cau ring lơngai rlau?

Ăn rơp ò tũ lơi hũi sèng hơ dô nă cau gơnoăr bơto hỡ dê. “Jơh bar nă lơngap lơngai dô rưng bal. Bol khai ring lơngai tai bơh mat piêr dê găm la măt piêr. Mơya bơta pha is gơ ơm tòm bơta công nha rai kis bol khai dê.”

Sèng hơ hỡ neh lơi wơl tòm ăn dô bơta gơboh jrô ndơp.

Mat piêr kung găm la mat piêr. Gơ găm tơl kỡ nàng grơng đơ bol khai, bulah bol khai gơlơh mbe lơi.

Dô nă cau rgơi wil tơl dòn lah mat piêr tơl kỡ nàng kong bơta pràn kơnjợ he dê, gne tang ồng ring lơngai nggui đar ka digul dà lềng. Cau găm wơl ò ges bơta dòn nền cê hỡ. Behỡ, kơp cơnđòa jơng lòt lơi kùng lòt bal mơ bơta rngot rngơt, mơ lồi dut ồng ming khin sơrbac sơrbăng ri wơl hơ digah kềng dà.

Ơ oh mi kỡn gơboh, bobl he găm duh broă dul Yang Tom Trồ ò tũ lơi kong alah. Bol he wil tơl rgơi ơn wil tơl bơta dòn di Kơnrãn. Kơnràn la Bơtau dòn song, ngai or, ngai do mơ jơl tus sum sum.

Mơya seng lup ai kơp nă cau in la: Bol he gơs ngăn dòn di bơta hỡ hala ò?

Sèng hơ ai sèng lup hỡ in rơp lơh nền nùs nhơm bơta kis kơp ngai bol he dê. Bol he rơp klôn he tòm bơta rngot rngơt hala rơp lòt kỡ win bơh git lah Yang sum dòn song?

Tòm gung lòt bơta dòn, oă dỡ bol he kung ndrơm be cau nac tòm yal yau. Yang la mơnang kỡ cê, la Bơtau prăp gar hwêng soan mơ at bồ hơđăng ală bơta gơlik gơs bol he dê.

Bulah behỡ, ala mơ ơm rlô tòm bơta sền gar Kơnrãn dê, bol he lơi oă ir tũ jơ nàng kơlôi rcăng mơ pin wil wơl bơta ai bơntơl Yang dê. Bol he git lah Kơnrãn la Bơtau niam, mơya găm rngot ò khin cơnđòa lòt ngai rlau tòm bơta dòn duh, ò tơl khin cha nang ơn wil tơl rai kis he Kơnrãn in.

Yang Tom Trồ neh đơs: “Bañ rngòt, bơh Añ ơm bal mơ mê; bañ rngòt rngơt, bơh Añ la Yàng Tom Trồ mê dê. Añ rơp lơh mê in pràn kơldang, Añ rơp dong kòl mê mơ rơp yò tơngguh mê mơ tê ma pha lin rlau Añ jê.” (Êsai 41:10)

Bol he ò tũ lơi pal cơnđòa lòt dô nă. Bol he kung ò tũ lơi păl lik ngai bơta nđac jrơm gom bềng bơta kỡn gơboh Yang dê. Kơnrãn ơm sum mơ bol he, mơ bol he sum geh grơng đơ tòm tơwor tê kỡn gơboh Kơnrãn dê.

Yang găm don song, bulah bơta dòn bol he dê pran hala lơbơn. Mơya tũ bol he hơ nên ngăn lah Kơnrãn là Bơtau don song, gùng bol he ntao tòm rai kis kung rơp tơmgơl. Ala mơ kol bơta kơlôi rcăng mơ rngòt rngơt lơh giga, bol he rgơi kis mơ bơta ring lơngai, kỡ win mơ khin cha, bơh git he găm geh grơng đơ bơh dô Bơtau ò tũ lơi tơmgơl.

Dan jà bol he dô nùs bal tòm bơta hòi dan: Khoai Bèp kỡn gơboh, dăn dong kon ò tũ lơi hũi Kơnrãn la Bơtau don song, dipal âng kon jao phi mơ jơh hwêng nus. Dăn bơtô kòn git rlô tòm bơta kỡn gơboh ò tũ lơi tơm gơl Kơnrãn dê. Dăn rang tơlik ală bơta gơlik gơs tòm rai kis mơ kon găm ò hềt ơn wil tơl bơta dòn tòm Yang. Dăn ai kòn in bơta don nàng cơn đòa lòt dô bă khin cha, kis pha lin mơ lơh sir ală bơta Kơnrãn hôi sac. Kòn jơh nus hôi dăn tòm sơnđăn Yang Jêsus Krist, Amen.

Ơ ală ồng mò oh mi kòñ gơboh, ală bơta pin wil wơl bol he dê ò rgơi lơh tơmgơl bơta nđàc kỡ cê Yang Tom Trồ dê. Mơya jê sồt ngăn, gơ rgơi tă ai bơta ring lơngai tòm hwêng nus bol he dê, lơh rai kis bol he gơlik gơs wãnh lơng gơh ala mơ hưh nus mơ ring lơngai be la bol he pal gơs. Rai kis pha lin ò di la dô tơnggu tus ngai, bol he ơs rgơi lơngap lơngai dơp lêng bơta phalin hỡ tòm rai ing dô, bulah tũ dà ring ngêt hala cal rbut dơng. Yang Tom Trồ jơh dunnia dê găm grơng dơ jơng bol he dê kơp jow phuk, behỡ bol he găm rngòt bơta lơi tom dunnia dềt rhền dô taih?

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.