Jơi kòn mơnus bơh lai tus ngai do sùm kòp kờñ joi jơnau song, bơh jrô ndơp tòm nus nhờm, cau lơi kùng kơñ git gơtha ngan rai kis he dê, mơ nting đah la bơta di pal dòn kơnòm. Mơya, rlau mơ bàr rbô năm lai, Yàng Jesu neh wơl sèng lùp hơ̆. Ngai do, bulah kis di gùl dunnia bơtao tơngguh rlau mơ tòm ryas jơnau tơnggit dờng ryŭ, oă cau đos lah ò gơs jơu song lồi-jơh, jơh ală bơta mìng la dimờ. La cau dònYàng, bol he rop lơh lòt mbe lơi di đap bơta kơlôi sơnưng be hơ̆? Mơ di gơlăn bol he dòn lah nềncê Yàng Jesu la Jơnau song mìng dul he dê sơl?

Ngai do, ngai 04/9/2026, tơnggu Hoi Dan Kòp Ngai dan ja ông mò oh mi kơlôi sơnưng bal Jơnau Yàng kơnòm bơta dong kòl Gary E. Roberts bơh tơnggu me JƠNAU SONG LA ÑCHI?

“Añ la gùng lòt, jơnau song, mơ bơta kis; ò bơh Añ gèn ò gơs cau lơi geh lòt tus hơ Bèp” (Jang 14:6)

“Yàng Jesu hơ lah: Lơgar Añ ò di bal mơ dunnia do. Dilah lơgăr Añ bal mơ dunnia do, gen ală cau jat Añ neh tòmlơh, nàng Añ ò kong bơtao tòm tê cau kwang Juda dê mơya tŭ do lơgar Añ ò di bal mơ dunnia do” gèn Pilat đơs lah: “Behơ̆ gèn mê la Bơtau ơ?” Yàng Jesu hơ lah: “Be jơnau ồng đơs, Añ la Bơtau. Tai bơh hơ̆ mơ Añ neh lik ling mơ kùng tai bơh hơ̆ mơ Añ lòt tus tòm dunnia nàng lơh cơng bơh jơnau song. Kòp nă cau lơi bal mơ jơnau song gèn iat jơnau đơs Añ jê”. Pilat lùp tai lah: “Jơnau song la ñchi taih?” (Jang 18:36- 38)

Bol he gam kis tòm pah rai mơ dơngơh kơlôi bơh cau bơtao gơs (AI) bơtao tơngguh dô bă mhăr ngăn. AI cèng wơl oă bơta kwơ mang mơ tògơl gùng dà bol he bơtê bơnsrơm, lơh broă kùng be tòm tìp mơ ală bơta yal tơnggit. Mơya bal mơ ală bơta kwơ hơ̆ la dô bơta gơlòng pa. Dùl tom ală broă hơ̆ la broă cah is khe lơi la ngăn mơ khe lơi la ma blac solờ ngai sơlò kalkê rlau.

Di gơlan ò it dơ̆ bol he lướt mạng, bol he ròp lùp: “Do la video ngan hala bơh AI lơh gơs?” hala “Jơnau yal do di pal dòn sơl, hala mìng dòn la ma blac?” jơnau ma blac sơlờ gơs oă jơnau yal, jowi kòn mơnus sờlơ wi wơ tòm broă lơh nền nting đah la bơta song ngăn, mơ nting đah la jơnau song. Seng lùp bơh jơnau song ò di la bơta pa gơlik gơs rềp do. Rlau mơ bàr rbô năm lai, neh gơs dô nă cau lùp Yàng Jesu sềng lùp hơ̆.

Tơnơ̆ mơ tŭ kol kùp, Yàng Jesu geh cèng tus Ƀônsơ Pilat, la dô nă cau kwăng đơng lơgar Roma, gơs gơnoar cahrña mơ lơh glài tơnchơt. Bulah oă dơ̆ đal git Kơnràñ ò gơs glài, mơya Pilat găm lùp kơnràñ nàng lơh nền di gơlan Kơnràñ ngăn la dô pơnah lơh cau Roma in rngòt rngơt hala ò. Tŭ pilat lùp Kơnràñ ngăn la Bơtau hala ò, gèn Yang Jesu hơ: “Be jơnau ông đơs, Añ la Bơtau. Tai bơh hơ̆ mơ Añ lik ling mơ kùng tai bơh hơ̆ mơ Añ neh lòt tus tòm dunnia nàng lơh cong bơh jơnau song. Kòp nă cau bal mơ jơnau song gèn iat jơnau đơs Añ jê.” (Jang 18:37)
Tơnơ̆ hơ̆ Pilat lùp wơl: “Jơnau song la ñchi taih?” (38). hơ̆ la dô nơm sèng lùp pơrlơ̆ wơl. Pilat ntao di đap Yàng Jesu, la jơnau song, mơya ò đal git Kơnràñ.
Di gơlan tom bơta kơlôi sơnưng Pilat dê, mpôl ling la jơnau song, ling Rôma la jơnau song, Sêsa la jơnau song, gơnoăr at bồ dà lơgar la jơnau song. Pilat mìng kờñ git Yàng Jesu ngan la dô nă cau sò dră hala ò. Tòm tŭ git Kơnràñ ò di la nă cau khơm lơh tus gơnoar at bồ dàlơgar, Pilat tôn lah broă do neh sir. Pilat mìng sền gŏ dô nă Yàng Jesu kol yă mơ ò đal git lah diđap mat he la Bơtau geh sồr lòt tus nàng ràng tolik jơnau song Yàng Tơm Trồ dê. Dilah Pilat la dô nơm nus nhờm geh sòl pơnđàng, gèn ngăn ông neh cùn gơlang mơ duh khoai Yàng Jesu.

Bulah ò gơs dô jơnau cih lơi loh lang ai tơnggŏ ñchi bơh tai Yàng Jesu ơm mŏ mŏ tŭ Pilat lùp: “Jơnau song la ñchi taih?” Bulah behơ̆, bol he gŏ sèng lup Pilat dê ngăn ò di nàng kờñ joi jơnau song dô bă song ngăn, nàng kòp gơn sèng hơ wơl, mơya ràng tơlik dô jơnau hơ gơlơh be hiă hăt mơ thờ ơ di đap ală jơnau Yàng Jesu neh đơs. Mơya bơta lơh bol he in kơlôi sơnưng rlau hơ̆ la, Jơnau song ntao di đap mat Pilat. Ò jŏ tơnơ̆ mơ tŭ Yàng Jesu kol kup, Yàng Jesu neh đơs lah: “Añ la gùng lòt jơnau song mơ bơta kis. Ò bợh Añ gèn ò gơs cau lơi geh lòt tus hơ Bèp” (Jang 14: 6). Kơnràñ ò di ming đơs bơh jơnau song, mơya Kơnràñ neh yal tơlik să tòm he Jơnau song. Behơ̆, jơnau song ò di la jơnau gơtha mơ kon mơnus rgơi yal tolik is hala joi wơng mơ dơngoh kơlôi, mơya la bơta yal tơlik Yàng Tom Trô dê tòm să tòm Kòn Kơnràñ.

Hơ̆ la bơta pal càng jơh dunnia dê kòp bơh di tŭ Adam mơ Eƀia tis glai tòn sươn Eden. Dùl tòm ală bơta ràng tơlik nus nhờm tis glài dê la kòn mơnus kờñ lơh nền is bơta lơi la di, bơta lơi la tis ala bơh dòn duh bơta mơ Yàng Tom Trồ neh đơs. Bơh kon mơnus ƀuôn gơkol gơring bơh nus pơnhừ să, hàm kờñ, mơ ală bơta wă wờng jat rnoas he dê, gèn ala bơh dòn duh jơnau song Yàng Tom Trô dê, kòn mơnus òs lơh gơs dô “jơnau song” mơ ting hơ̆ pơnđang wơl kờp kờñ mơ bơta kơlôi sơnưng he dê.

Hơ̆ la tơnggu mơ Yàng Jesu bơto bol he pal mă àñ dô nơm nùs nhờm ƀă liă be dô nă kòn dềt (Mathiơ 18:3). Rlau mơ hơ̆, bol he pal càng pơng đin nus pơnhừ să he dê, dòp git lah bơta wờng git, jơnau tòm pơndang mơ jak chai he de la gơs n’hal rnoas, digah hơ̆ git lah bơta jak chai Yàng Tom Trồ dê lòt rlau mơ bơta đal git bol he dê. Bơta do ò gơs gơtha la bol he sang loi dơngoh kơlôi hala khoa học, mơya dòp git lah dơngoh kơlôi kòn mơnus, bulah la phan ƀàn kas mang boh Yàng Tòm Trồ, gèn kung gơring tus bơh tồi glài mơ ò rgơi lam bol he tus jơnau song dilah ò gơs bơta sòl pơnđang bơh jơnau Yàng Tơm Trồ mơ Yàng Hwềng Goh.

Tòm gùng lòt bơh dô nă cau ò gơs Yàng gơlik gơs la Cau Dòn Yàng, añ rhơi geh bơtê bơta bơtê hơ̆. Bơh lai, añ sùm at bồ jơh ală bơta mơ mìng dòp ròbơta lơi he rgơi geh yal tơlik bơh dơngoh kơlôi. Mơya tŭ tus mơ Bơtau Krist, añ đal git la bơta dòn ò di la sang lơi gơnoăr kơlôi pơyai, mơ la ơn bơta dòn kơnòm tòm Bơtau gơs bơta Jak chai mơ bơta git jak ò lôi. Sơlò cơnđòa lòt mơ Yàng, añ sơlò sền gŏ bơta at bồ Kơnràñ dê tơm ală bơta tòm rai kis he dê. Kơnràñ git loh tòm nòm chè sŏ hơđang ƀồ añ, Kơnràñ git añ kis jŏ kàr lơi, mơ găm lơh jơh ală bơta golik gơs kwơ rài kis añ in.

Ròp gơs ală tŭ dơngoh kơlôi bol he ơn oă sèng lùp bơh Yàng Tom Trồ, mơ bơta hơ̆ ò ai lơh krơi. Mơya ala bơh pơnđơl pràn yal tơlik gơtha jơh ală bơta jat gơnoăr pràn he dê, dan bol he git cèng bơta dòn bal mơ bơta pin wil wơl he dê tus mơ Yàng. Bơtê tĕ nùs nhờm ƀă lĭa cau bèp tòm Mak 9:24 : “Añ dòn, dan Yang dong kòl tòm bơta ò dòn añ jê!”

Dan jà bol he dô nùs bal tòm bơta hòi dan: Khoai Yàng kờñ gơboh, ngai do, kòn yal lah Kơnràñ la gùn lòt, jơnau song mơ bơta kis kòn dê. Kòp tŭ kòn tus mơ Kơnràñ, dan dong hwềng nus kon gơlik gơs bă lĭa be dô nă kòn dềt, nàng kòn rgơi dòp rò dô bă wil tơl jơnau song mơ bơta bơtô sồr bơh Jơnau Kơnràñ. Kơnòm ting hơ̆, kòn rgơi cơnđòa lòt dô ƀă kơ̆ cê dê gùl dùnnia bềng bơta sơlông sơlang do Kòn jơh nus hoi dan tòm soanđăn Yàng Jesu Krist, Amen.

Ơ ală ông mò oh mi kờñ gơboh, bơta dơng mang rlau jơh tòm rai kis mơ bol he pal càng ơn sèng lùp să tòm he in, la ông mò oh mi neh dòp rò jơnau sng, la Yàng Jesu, tòm nus nhờm he di hala ò hềt? Kòp ngai, ông mò oh mi gam jê gloh tơhìr tùs mơ Kơnràñ, kơno jơnau Kơnràñ, hala ông mò oh mi ming kờñ kơn jơnau dunnia, jơnau bơyai, hala mạng xã hội? Lòi tĕ jơnau song Kơnràñ dê gơlik gơs mơnàng lơh tề lăm rài kis mơ bơta lơh nền ông mò oh mi dê. Tòm tŭ ông mò oh mi tip ală bơta ò hềt wờng bơh Yàng Tom Trồ hala tòm tip mơ ală bơta pin wil wơl tòm bơta dòn, ƀàñ mhăr crap wơl jat bơta wờng git he dê. Ala bơh hơ̆, pơndèt tĕ să tus mơ Yàng mơ dăn Kơnràñ: “Khoai Yàng, kòn don. Dan dong kòn tòm bơta ò dòn kòn dê!”

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.