Kòn mơnus mờng ờs gơs bơta rngòt nàng sơn tờm dồ broă pa, bulah hơ̆ là dồ broă dêt rhền. Bol he rngòt ờ gơs tơl bơta chài rgơi, rngòt gơblơ̆, hala rngòt bơta he lơh ờ drờm mờ tơng gu dờng hơ đap ne. Gen gơs ala broă Yàng ơn hơ đap măt bol he ngai do là dêt rhền, mờ ya Kơnràñ kung rgơi ngui bơta dêt rhền hơ̆ nàng lơh dồ nơm broă dờng rlau tai mờ ngai do bol he ò rgơi sền gŏ.

Ngai do, ngai 05/09/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê bơh Tơnggume SƠNTỜM BƠH ALĂ BƠTA DÊT RHỀN

“Ñcau sền òsơp di ngai ală bơta dềt rhền taih? Cau rơp chò hòp sền gŏ che rnoas bơt hìu tòm tê Jerubabel. Poh nơm ồs đèng la gar mat Yàng Jehôwa sền sơwì làm jơh plai ù.”(Sacari‬ ‭4‬:‭10‬)

“Gen gơs jơnau Yàng Jehôwa đơs mơ añ tai lah: “Tê Jerubabel neh bơt mơnàng hìu duh khoai do, gen tê khai kung rơp lơh sir. Gen bol mê rơp git lah Yàng Jehôwa Gơnap Gơnoar Dờng Làm Jơh neh sồr añ tus mơ bol mê. Ñcau sền òsơp di ngai ală bơta dềt rhền taih? Cau rơp chò hòp sền gŏ che rnoas bơt hìu tòm tê Jerubabel. Poh nơm ồs đèng la gar mat Yàng Jehôwa sền sơwì làm jơh plai ù.” (‭‭Sacari‬ ‭4‬:‭8‬-‭10‬)

Bơta ntas kơñi, ala muh mat hòn chò, ala phan ƀàn, che wan mờ sră chơng tàng neh geh rơn dap song ngăn nàng kơp dê tŭ ala sơnđăn măt geh hòi dờng là ala bol oh neh geh cồng nha chơ. Di gùl bơta hòn chò tòm klờng bơ srăm sơn đăn lah School Of Light, là klờng bơ srăm Bơta Àng dê, jơnau yăl bơh dồ nă cau pugru ơ dŭ bol oh dêt.

“Gơs cau neh đơs lah ala gùng dà dờng màng gen geh sơn tờm bơh ala cơnđoà sơn rờp.”

Tòm bơta bơ srăm, cơnđoà sơn rờp hơ̆ là bơta bơ srăm đọk. Ala chữ cái là chìa khoá chài rgơi pờ jơh lam bă tah. Hơ̆ là sơn tờm ala jơnau yăl wơl mờ bol he đọk mờ ala bơta kơp koñ mờ bol he ting jat tòm ngai hìng.

Bol he kơlôi tĕ dồ rùp oh dêt găm bơ srăm đọk. Tŭ sơntờm, ala chữ hơđang mpang sră là ala rùp kal ke wă ngăn. Mờ ya tŭ bol oh tơ riang bơ srăm âm, rgum âm, gen bơta krơi is gơlik gơs. Ala bơta ntas gơlik gơs jơnau đơs, mờ ala jơnau đơs pờ dồ bă tiah pa. Mìng bơh bơta bơ srăm đọk, bol he rgơi gŏ dồ bơta dờng rlau neh găm geh gơlik gơs bơh ala bơta dêt rhền.”

Tòm tiah Việt Nam, ngai 5 nhai 9 là ngai Sơntờm dồ năm bơ srăm pa. Rbô rhiăng bol oh là cau bơ srăm rơp rê wơl tòm klờng bơ srăm. Gơs bol oh neh mờng mờ ala sră bơ àr, klờng ơ dŭ; mờ ya kung gơs bol oh là dơ̆ sơn rờp băl mờ dồ mpăng sră cih pa, dồ ơ dŭ pa, bơta bơ srăm sơn rờp, dồ nă cau bơyô pa. Ala bơta hơ̆ ngăn sền bè là mờng ờs mờ dêt rhền, mờ ya hơ̆ là tiah sơn tờm dồ gùng dà pa.

Tòm rài cau gơnoăr hwơr Sachari, làng bol Y-sơ-ra-ên pa rê bơh tiah lơh dĭ. Ntào dê đap bơta gơtơ lah tơling Jê-ru-sa-lem dê, Xô-rô-ba-bên neh sơntờm mơ tòm bơta lơh wơl tiah duh khoai. Mơ ya, broă lơh hơ̆ ò gơs bơta đươn soh. Bơdìh, ala làng bol ndai tòm dră bol khai; tòm dơr lăm, păl tòm toh mơ bơta gơ plơ̆ nùs mờ siơŭ siăr. Di đap măt làng bol là dồ broă lơh dờng ngăn, mờ ya ala bơta bol khai geh là dêt rhền ngăn. “Tê Jerubabel neh bơt mơnàng hìu duh khoai do, gen tê khai kung rơp lơh sir. (Sa-cha-ri 4:9). Gen Kơnràñ đơs tai: “Ñcau sền òsơp di ngai ală bơta dềt rhền taih? Cau rơp chò hòp sền gŏ che rnoas bơt hìu tòm tê Jerubabel (sèng 10). “Che rnoas” là phăn cau lơh hìu dê, geh ngui nàng sền sơwì bơta song bơta lơh dê. Rùp Xô-rô-ba-bê đơng che rnoas neh ai gŏ bơta bơt hìu hơ̆ ờ mìng lơh nơm jơng kơ̆ cê lơm, mờ lag găm lơh tai. Gen Yàng Tòm Trồ ngăn là koñ chồl chao làng bol Kơnràñ dê bañ sền ò sơp broă mờ Kơnràñ neh sơn tờm, bulah broă hơ̆ geh sơn tờm là dêt rhền mờ kal ke. Bulah bè lơi, làng bol hơ̆ rơp lơh sir ala broă hơ̆, ò di bơh bơta pràn is bol khai dê, mờ là bơh bơta gŏ mat mờ gơnoar Yàng Tòm Trồ dê, bơh Kơnràñ neh đơs: “‘Hơ̆ ò di la bơh gơnoar pràn, kung ò di la bơh gơnap gơnoar, mơya la bơh Hwềng Añ,’ (Sacari‬ ‭4‬:‭6 )

Rê wơl mờ rùp ala bol oh dê bơ srăm đọk. Bol oh ò rgơi đọk jơh dồ mpang sră tòm ngai sơn rờp tus tòm klờng bơ srăm, mơya sơnrờp ngăn là sơntờm bơh bơta đuơn mờ dêt rhền.

Gen tàng, ơ ala bol oh cau bơ srăm là cau dòn Yàng dê, năm học pa bol oh kung rgơi sơntờm bơh ala bơta dêt rhền hơ̆. Hơ̆ là broă bol oh lời tŭ jơ hòi dăn lài mờ tŭ lòt bơ srăm, bol oh dòn kơnờm Yàng mờ lơh ala bài dồ bă song ring , hala ơn pơndơng gơklŏ Yàng in tŭ he geh cồng nha. Ala broă do sền là dêt rhền ngăn, mờ ya là bơta bol oh ràng tơlik bơta dòn bol he dê.

Ơ cau lơh mơi bàp, oă dơ̆ bol he kơp koñ bơta dờng ngăn kòn he in. Bol he koñ oh kòn bơ srăm chài rgơi, gơs broă lơh niam mờ dồ rài kis geh cồng nha. Hơ̆ là ala bơta kơp koñ mòng òs ngăn. Mơya gơwèt mờ ala cau lơh mơi bàp tòm Yàng, bơta ơn dơ̆ sơn rờp bol he dê hơ̆ ò di lah ala số điểm hala geh cồng nha tòm rài do, mờ là sền dê đah hwềng ala oh kòn he. Gen sơntờm tĕ bơh ala broă dêt rhền bè là bơtê oh kòn git koñ gơboh, git song ring, git hòi dăn, git dòn kơnờm Bơtau git broă lơi rơp gơlik gơs ngai hìng oh kòn dê. Bơh ala broă hơ̆, mơi bào rơp dong kòl oh kòn he dồ nơm che rơ bŏ mơ Bơtau Dong Klàs dồ bă is oh kòn dê, lòt găn bơta geh tòm gơl mờ geh dòng tòm đah hwềng.

Sră Goh cih: “Cau lơi dòn song tòm broă dềt rhền, gen kung dòn song tòm broă dờng; cau lơi ò song ring tòm broă dềt rhền, gen kung ò song ring tòm broă dờng sơl.” (Luka‬ ‭16‬:‭10). Bulah bol he găm lòt bơ srăm, duh broă Yàng, halà lơh broă ndai, bañ lơh gơs dồ nă cau “ ò gơs kwơ”, mờ ya sùm dòn song tòm kòp broă lơh, Bañ gơ plơ̆ nùs dê ala sơntờm dêt rhền, hala bơta pràn ò tơl he dê. Tŭ he git jào jơh cơnđoà pơndềt să bol he dê tòm bơta gơn kơnờm mò duh rngòt Yàng, Kơnràñ rơp lơh ala bơta dêt rhền hơ̆ lơh gơs dồ pơnah tòm gùng dà niam Kơnràñ dê.

Dan jà bol he dô nùs bal tòm bơta hòi dan: Khoai Yàng koñ gơboh, tòm tŭ kòn rngòt mờ wi wơ bơh bơta pràn să tòm hala broă gơlik gơs gut dăr kòn, dăn pờ măt kòn gơwèt dê Kơnràñ, sền dê Bơtau jak chài mờ gơnap gơnoăr rlau jơh. Ơ Yàng, dăn dong kòn ò sền ò sơp ala sơntờm dêt rhền, mơya git gơn kơnờm Yàng nàng cơn đoà tòm bơta dòn song, lơh jơh nùs ala broă Yàng neh ai dê đap mat kòn kòp ngai. Kòn jơh nùs hòi dăn tòm sơnđăn Yàng Je-su Krist, A-men.

Ơ ồng mọ, oh mi koñ gơboh, gơs ala broă dêt rhền mờ Yàng neh ai bol he in tòm ngai do sơl? Gen kah tĕ lah ala broă dờng rơp ò gơlik gơs ngăn dilah ờ sơn tờm bơh ala broă dêt rhền. Gen tàng, lơh tĕ ală broă Yàng neh jào bol he in ngai do. Rac dăn tĕ mờ Kơnràñ dong kòl bol he sang sơbì bơta lời nhợt, git dòn song tòm kờp broă dêt rhền, mờ kòp tŭ sền gŏ he gơs bơta lơbơn lơnho hala ò tơl jak chài, gen kah tĕ jơnau Yàng đơs: “‘Hơ̆ ò di la bơh gơnoar pràn, kung ò di la bơh gơnap gơnoar, mơya la bơh Hwềng Añ.”

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.