“Ai sơnđan bơta kờn gơboh” la jơnau he ờs mờng kơno tu dồ nă cau kờn sền gàr, phi bơta lơi hala sac bơta lơi tus dê cau he kờn gơboh. Mơya gơs tu lơi he lùp is lah: bơta he lơh tú ai sơnđan bơta kờn gơboh ngan là di hala ờ? Gơs bơta kờn gơboh lơh cau in geh dờng, mơya kung gơs bơta kờn gơboh lơh cau in lơh tìs, lơh roh să tờm he, mơ gơs tú lòt tìs wơl bơta niam mơ Yàng kờn pà bol he in.

Ngai do, 09/09/2026, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bơh tơnggume TÀI BƠH BƠTA KỜÑ GƠBOH

““Bơta kòñ gơboh… ò lơh tìs jơnau, ò jòi cồng nha is, ò mhar gơjrañ, ò kah prap bơta tìs; ò hòn chò bơh bơta ò song ring, mơya hòn chò bơh jơnau song.” (‭‭I Kôrintô‬ ‭13‬:‭4‬a, 5, 6‬)

“Sol sồr cau lòt tus di hìu Dabit nàng kơp mơ tơnchơt khai tòm àng drim hìng. Mơya Mikal, bau Dabit dê yal tơngkah khai in lah: “Dilah mê ò dô pleh tòm mang do gen tòm ngai hìng mê rơp kong tơnchơt.” Behơ̆ Mikal tơmù Dabit bơh mpồng dềt, khai dô mơ geh klàs.” (‭‭I Samuel‬ ‭19‬:‭11-12‬)

Mỹ Ngọc la dồ nă cau oh đềt mềr tòm mpồl bơtê Sră Goh an dê. Khai geh cau kồn rơndap bơta tombau khai dê. Tòm ală broă hớ, Mỹ Ngọc jơh nùs dờn bơr mơ git ừn ngài cau kồn tài bơh neh dong khai gơs lơmpah lòt tus lơgar ndai. Tơnớ mơ bơta tombau dờng, chò hòp mơ đềt mềr bàr jơi bơtiàn, khai sơntờm bơt hìu nhă tòm lơgar pa, tòm bơta kờn gơboh mơ dong kòl oă bơh hìu nhă ală cau kồn mơ jơi bơtìan đah mẹ khai dê.

Mơya tú tơngai lòt gan, ùr klau gơs bơta ờ tom klac. Ală tú dơr cul tòm hìu nhă lơh rài kis tombau ờ jat bè bơta khai kơp gơn tai. Ală bơta hớ ờ rgơi pồn tai mơ kồn khai dê. Dilah lài òr, kồn la cau bơrkoat bol khai, mơya tú do, tú sền gó ală bơta ờ ring bal tòm hìu nhă khai, jơnau mơ kồn khai đơs hớ la “kòn ờ rgơi bal gen sang lòi té khai”

Ntào dê đap jơnau tơngkah hớ, Mỹ Ngọc pin wil wơl mơ ơm mo mó. Bơh ală bơta dơr cul, jê sồt mơ roh nùs, khai dờp git dồ bơta mơ khai ờ rgơi kơlôi tus: khai gam kờn gơboh bau klau khai dê oă ngăn.

Tòm tú hớ, tòm mpồl bơtê Sră Goh, an mơ Mỹ Ngọc gơlik đềt mềr oă rlau tai. Ală broă tòm bơta tombau cèng bol hi tus bal tòm bơta jòi jat mơ bơtê git Jơnau Yàng. bơtê mơ git rơndap mơ nggu tòm Yàng Tòm Trồ neh bơt bơtào bơta tom bau bơh sơnrờp, Jơnau Yàng bè bơta àng sòl tòm nùs nhơm khai dê. Oă dớ, bal mơ muh mat kơlôi sơnơng, Mỹ Ngọc neh yal wơl an in, bè đơs mơ să tờm khai, ală bơta ndơp tòm nùs nhơm, bơh bơta kờn gơboh mơ Yàng ơn tòm khai gơwèt tus hơ bau klau khai dê. Ală bơta kơlôi khai dê bơh ngai ờ hềt git Yàng, tombau la gùng lòt nàng cèng khai tus lơgar pas gơs rlau, mơ bơta tombau bè nđar nàng cèng bơta kơp kòn khai dê par cơ rlau tai, mơ ngài, … mơya jơh bơta kơlôi hớ neh tomgơl tus bơh bơta àng Jơnau Yàng dê.

An hòi dan ơn ală bơta kalke hớ Mỹ ngọc dê Yàng in tòm tú hòi dăn ala. Mơ jơnau Sră Goh geh cih tòm I Samuel 18, ràng tơlik dồ êt tòm rài kis mò Micanh dê, kon ùr cau bơtau Sol dê, neh lơh an in kơlôi sơnơng oă ngai.

Sră Goh yal git “Micanh, kon ùr Sol dê, kờn gơboh Davit” (I Sam 18:20)

Bơh sơnròp bơta crơng gơs trồ tiah, Yàng Tòm Trồ neh rcang lài tus dê ală cau ur nàng gơlik gơs cau dong kòl. Bơta pràn bơta kờn gơboh neh dong Micanh phalin gơnoar cau bơtau dê mơ gơnoar cau bàp dê, mò neh khin cha nang dong ồng David: Behơ̆ Mikal tơmù Dabit bơh mpồng dềt, khai dô mơ geh klàs.” (‭‭I Samuel‬ ‭19‬:‭12‬)

Broă lơh mò Mikal lơh an in kơlôi tus Mỹ Ngọc. Dờn Yàng mơ bơtê git nggu Yàng Tòm Trồ dê tú crơng gơs kon mơnus tòm bơta tomklac mơ Yàng mơ bal mơ gơp. Mỹ Ngọc neh khin cha ai bơta sac rwah. Sơntòm bơh bơta jòi broă lơh, Mỹ Ngọc neh lơh nền lik bơh hìu ơm mơ cau kồn neh ai bar nă ur klau khai in leng. Khai dờn dờp ală bơta kalke nàng bơt bơtào is, ờ kơnòm tai cau ndai.

Kung bè Mikal lơh krơi bơta sồr cau bơtau dê nàng sền gar bơta tombau khai dê mơ dong tă bơta kis ồng David, Mỹ Ngọc neh rhời ờ tomklac mơ cau kồn khai dê. Khai ờ ơn tôr iat tai ală jơnau sôr tơngkah nàng cèng khai sang bơta tombau khai dê. Mơ tú do khai chò nùs dờn dờp ală bơta kalke bơh hìu nhă nàng sền gar bơta tombau khai dê jat nùs kờn Yàng Tòm Trồ mơ khai gơboh mơ jòng rơ.

Mỹ Ngọc neh lơh jat Jơnau Yàng bơto: “Bau ùr bañ tòmlòi mơ bau klau,… mơ bau klau bañ lòi bau ùr … bơh Yàng Tom Trồ neh hòi sac bol he tòm bơta ring lơngai. Mìng kòp nă cau pal lơh lòt jat bơta nđàc Yàng neh pà he in, mơ jat be Yàng Tom Trồ neh hòi sac.” (‭‭I Kôrintô‬ ‭7‬:‭10‬-‭17‬)

Mơya jơnau yal rài kis mò Mikal dê tơnớ mơ dong tă ồng David neh lòt jat gùng ndai lơh an in kơlôi. Sră Goh yal wơl oă bơta Mikal neh lơh krơi is mơ nùs kờn Yàng Tòm Trồ (1Sam 19). Dồ dớ khin cha tòm bơta kờn gơboh ờ rgơi sền gar rài kis mò Mikal dê, mò pơnjat gơkòl tề lăm tòm ală tê cau geh gơnoar dê (1 Sam 25:44 mơ 2 Sam 6:20-23)

Do la bơta lơh an in kơrmap gar tòm gùng jòi jat Yàng bal mơ Mỹ Ngọc. bol hi dờp git, nàng lik klàs bơta tề lăm gơnoar klam jơngo dê, bơta kờn gơboh jat nùs kờn Yàng, pal sùm sùm ơm tòm bơta tề lăm Yàng Tòm Trồ dê, tài bơh Kơnràn la bơta kờn gơboh.

Tài bơh ““Bơta kòñ gơboh… ò lơh tìs jơnau, ò jòi cồng nha is, ò mhar gơjrañ, ò kah prap bơta tìs; ò hòn chò bơh bơta ò song ring, mơya hòn chò bơh jơnau song.” (‭‭I Kôrintô‬ ‭13‬:‭4‬a, 5, 6‬)

Kung bè să tờm an neh mơ gam pơnjat kis bơtê git bơh bơta kờn gơboh Yàng dê ràng tơlik bơh bơta tombau an dê, bol hi sùm dờn kơnòm Yàng tòm gùng lòt bềng bơta kalke dê đap mat bol hi.

Dan jà bol he dô nùs bal tòm bơta hòi dan: Khoai Yàng kờn gơboh, kon ừn ngài Yàng tài bơh Jơnau Yàng sùm kis hơđang rài kis kon dê. Dan Yàng toh glài kon in tài bơh oă dớ kon hừ nùs mơ ală bơta niam kon lơh, mơ rài kis kon ờ hềt ngan gơrê mơ Yàng. ơ Yàng! Dan Jơnau Yàng tomgơl kon mơ dong kòn bơh bơta kơlôi, jơnau đơs, broă lơh sùm bơh bơta kờn gơboh ngan tus bơh Yàng mơ ràng tơlik kon la kon Yàng dê. Kon jơh nùs hòi dăn, ai sơnđan Yàng Jêsu Krist, Amen.

Ơ ală ồng mọ oh mi kờn gơboh, bơta kờn gơboh ngan ờ di mìng geh dờp git bơh ală broă he lơh cau he kờn gơboh in, mơya bơh broă hớ di pal mơ Jơnau Yàng hala ờ. Gơs tú kờn gơboh sồr he pal khin cha sac rwah, lik bơh bơta gơn kơnòm, sang ală bơta ờ niam mơ ntào kớ hơđang ală bơta niam nùs Yàng. ngai do, sền wơl té ală cau he tomklac. He gam kờn gơboh jat nùs is hala jat nùs kờn Yàng dê taih? Pal lời Jơnau Yàng sòl pơnđàng tòm nùs kơloi, jơnau đơs, mơ bơta lơh nền he dê, nàng bơta kờn gơboh ờ tề lăm he sac rwah tìs, mơya gơlik gơs phan nàng ràng tơlik bơta kờn gơboh Yàng dê mơ ràng tơlik he ngan gơrê mơ Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.